|
|
السلام عليكم
أبدأ كلامي بـ حسبي الله على كل من يزور و يضلل مسئولي الوزاره و يعطل عملية تطوير المناهج لانه يظلم عيال الكويت و معلميها ..
يا جماعه الكل سمع عن الاختبار التجريبي للصف الرابع ..
هالاختبار شمل اللغة العربية و الانجليزية و العلوم و الرياضيات .. كلفنا وقت و مجهود و حبر و ورق .. علشان شنو ؟
علشان المسئولين يتمكنون من قياس مستويات الطلبة و الوقوف على مواطن الخلل و مواطن القوة بالمناهج و التعليم ككل … عدل؟؟
لا مو عدل ..
للاسف .. هذا المجهود كله .. و اتكلم عن الانجليزي بس ما ادري باقي التخصصات .. على مستوى الكويت .. كان بس لتلميع المسئولين عن منهج الانجليزي و اللجنة اللي اجازته و وافقت عليه .. لان اليوم وصلتنا اوامر بتعديل النسب لانها متدنية جدا و تسيء لهم
تخيلو .. النسب اللي وصلتهم … من بعض المدارس كانت اقل من 60% فزعلو و قالو لا غيروها .. شلون ندزها للوزاره ؟!!
تخيلو قبلو نتايج وهميه تقولهم عيالنا نسبة نجاحهم 100% و 90%
شلون نجاح 100% ؟؟ مستحيل .. و اللي يقول هالحجي مزور و نصاب و انا مسئوله عن كلامي ..
اتحدى ان كانت هالنتايج صحيحه .. حسبي الله عليهم تزوير بمستقبل الطلبه ؟
طريقة الاختبار كانت تقول :
عطوهم الاوراق .. و خلوهم يحلون .. لا تقرونه .. لا تجهزونهم له
اللي صار:
يت اوامر من التوجيه بتدريس الاجزاء اللي يغطيها الاختبار .. و تمت قراءه الاسئله ! وين قياس المستوى ؟ وين الامانه ؟
مدرستي .. من المدارس اللي التزمو و ما قرو الاسئله و لا حضرناهم للاختبار .. و الحين .. لازم ننسى مجهودنا و شغلنا و تصحيحنا و نرد نغير النتايج علشان يطلعون المسئولات باحلى صورة جدام الوزارة … و الا لازم نكتب تقرير باسباب تدني المستوى ! لان مقارنة بمدارس نسبها 100% يطلع ان احنا اللي عندنا تدني مستوى .. مو اهم اللي مزورين النتايج !!
يا عالم هذا اهو المستوى مو احنا عندنا تدني مستوى !
طبعا النسب العالية الخيالية .. ما تخليهم يحاولون يصححون المنهج … و لا عندهم اي مشكله معاه
يعني عيالنا راح يضلون يعانون من هذا المنهج و يطلعون زيرو بالمستوى علشان الاخوات المسئولات يطلعون صح !
بالمقابل .. نتايج اللغة العربية و العلوم و الرياضيات طلعت ما بين 15% الى 40%
شلون بالعربي و العلوم و الرياضيات 40% و الانجليزي 100% ؟؟ اي منطق و اي عقل يصدق هذا الكلام ؟
عيال الاجانب ما اييبون بلغتهم 100% علشان عيالنا اييبونها!!
بالختام .. لازم احيي الاستاذه الفاضلة سعاد الانصاري .. اللي استقالت من منصبها و اهي موجهه عامة لرفضها هذا المنهج عقب ما تعبت و اهي تقول و توضح و تحاول تدارك هالمصيبة ! عقب ما هاجموها بشتى الطرق و شككو بوطنيتها و حبها لديرتها لقت ان الاستقاله افضل حل لانها مثل ما قالت " ما اقدر اواجة الشعب الكويتي بهذا المنهج" ..
اي مسئول يقرا كلامي .. اي شخص يقدر يوصل للمسئولين هالحجي .. يزاه الله خير .. و أجره على الله .. وانا مستعده اعطيكم التفاصيل و الاسماء
حسبنا الله … شلون تنامون و انتو ظالمين عيال الكويت ؟ وانتو مطلعين اوامر صريحه بالتزوير ؟!
اسفه تحجيت وايد .. بس من القهر ! و الصدمة !
أحنا بمدرستنا طرشناهم على وضعم
يعني قسمي الرياضيات كانت نسبة النجاح 30 %
عادي طرشناها بعد هذا مستواهم شنو نسوي
وخاصة أن اغلب الاسئلة من الفصل الأول
الحمدلله والشكر أصلا بديهي ما يجيبون 100%
لان حتى لو دروس توهم ماخذينا
بس الفروق الفردية موجودة
و أي انسان ممكن يعرف هذا حتى لو جاهل
اما قسم الانجليزي اعتقد 13 أو 17 %
ما عدلنا انرسلت جذي للوزراة
هم يبون يشوفون المستوى
خليهم يشوفون مناهجهم الطيبة 
اقولج شي
انا رئيسه قسم انجليزي
نسبه النجاح بالاختبار التجريبي عندنا للصف الرابع 36% وطبقنا اوامر التوجيه حرفا لا قرينا الاختبار ولا شي الطالب منه لنفسه يقرا ويحل
والتزام تام بالتصحيح والدقه فيه
اعرف مدارس ثانيه لما سألتهم قالو قرينا الاسئله ووضحنا لهم وتساهلنا بالتصحيح
انا ادري من قبل الاختبار ان نتائج المنهج الجديد زفت والحمدلله الاختبار التجريبي بين هالشي ولاغيرت النتيجه ولا زورت واذا عندهم شي خل يتفضلون يسألون علشان نبط الجربه
منهج فاشل ومصممين يكملونه ومنو الضحيه ؟ عيالنا
حسبي الله ونعم الوكيل
طيب و الحل شنو ؟؟
حسبي الله و الله احتريت و انقهرت .. يعني يبون نتايج مزوره ليش يضيعون وقتنا و مجهودنا ؟؟
و هالمناهج شلون تتعدل اذا بنضل نقص على انفسنا ؟
انا لله :
بعد هذا منهجهم وهذا مستوى الطلبه
يعني ماكو مصداقيه ابد ؟؟؟
مجاملات حتى على حساب عيالنا 
اصلا المنهج اللي ندرسه صعب حتى على ال native speakers شلون يبون هالتلاميذ المساكين يستوعبونه !!!
من صجهم هذول إإإف
اهم يهمهم ان هالمنهج يمشي و بطلع صح .. لان اهم اللي يدافعون عنه و يقولون انه زين .. شلون زين و النسب متدنية ؟
حتى العربي ما سلمو من هالتزوير ؟؟ الله يعين … و نقول لبش التعليم متخلف ..
والا معقول المواد الثانيه النسب متدنيه الا في العربي النسبه في التسعينات( في مدرستي)
هذا معناه شي واحد مانعرف ندرس ؟؟ او في لعب في النسب
والله يكووووووون في عونج اختي ويعطيج على قد نيتج
بس نصيحه اخت مشغوله ومحتاسه الي يبي يزور يزور انتي مالج شغل عشان ما تاخذين الذنب معاهم!!
المشكله كبيره والله و الحل صعب .. يعني شلون تنحل مشاكلنا و احنا عندنا عقليات جذي ؟
احنا بمدرستي طلعت النتايج طبيعيه و دزيناها .. بس اعترضو .. عاد ما ادري شنو المديره و المشرفه قررو ..
الله المستعاااان
بالنسبة للنسب المتدنية انا اقول العيب مو بالمنهج العيب كله باملف الانجازي يعني جنه اعيالنا ناقصين دلع علشان يدلعونهم زيادة ( المدارس بازت يا قدعان ) العيال ما قاموا يدرسون ولا اولياء الامور مهتمين يعني تخيلي انه ولي امر ياي متعني يشتكي علي علشان عطيتهم اربع اسئلة واجب بالدفتر تدرون شي يقول والله شي يضحك يقول انه ماعرف يحل الاسئلة لانها صعبة قلت له ترا الواجب حق الولد مو لك ولو متعب نفسه شوية جان لقه الاجابة بالكتاب الحمد لله والشكر ………………………… و بالنسبة للنسب احنا عندنا النسبة اطلعت بالسبيعات بدون تزوير بس قرينا الامتحان و عندي احساس انه بعض الوافدات مراجعين نفس الاسئلة قبلها بيوم و احنا اعلى نسبة بالمدرسة و بعض الاقسام زوروا بالنتيجة و صار نوع من الحسد و الشك بنتيجتنا……………………. وفعلا مو كل شى يوصل الوزارة حقيقي لانه احنا مغضوب علينا اذا النسب نازلة راح يلينا تحقيق و تحط علينا الناظرة و اذا ما خلصنا الكتاب لانه ندرس بامانة هم ييلينا تحقيق و اذا ما عطينا الطالب درجات من مخابينا راح يي ولي الامر يقوم الدنيا و ما يقعدها لانه مافي قانون يحمينا و تيي الناظرة تقول زيدي يا ابلة شوي جنه قاعدين في سوق الحراي و منا للمسؤولين
احنا الامتحان التجريبي مالنا ( الانجليزي) كان اوكي من غير تزوير
بس احنا عندنا تزوير يومي بالمدرسة الطالب اللي محسوب على الادارة
قسما بالله انه ياخذ اعلى الدرجات لو مايفهم شي وينجح ينجح ويتنا نشره
داخليه بأسماء الأولاد اللي لازم ينجحون وقعنا عليها
وفي النهايه يلومون المعلمه على التقصير
ما يشوفون المنهج .. التوجيه بس حق كراف المعلم
حسبي الله عليكم يا توجيه الانجليزي