تكفوووون بنات بنتي عمرها شهر وماتنام الا بالنهار والليل كله بجي انقذوووني !!!!

السلام عليكم بنات الله يخليكم انا بمشكلة مقطعة قلبي

عندي بنت ولدتها باول شهر يناير مشكلتها تنام النهار كله وتقعد بس للرضاعة او التبديل وتنام على طول بعدها بس قعدتها المتواصلة من الساعة 12 بالليل ل7 الصبح وطبعا طول هالفترة بجي

مع انها لاحرارة ولاتسلخات حفاظة ولاغازات لاني اعطيها دوى اعشاب من المستوصف وتحميلة للتخريج وطرد الغازات

والحين قاعدة تبجي اهزها واقرى عليها واتمشى فيها وماكو فايدة ومدفيتها وشبعانة ومنظفتها وماكو فايدة كل يوم على نفس الحالة تعبت حدي ….مع انها وقت نومها هااااادية ماشاءالله ماكو تعصر تكفون منو نفس مشكلتي؟

حبووبه حاولي تعدلين نومتها يعني تقريبا على الساعه عشر او 11 قعديها اشوي لعبيها بدلي كل ملابسها وغيري حفاظها وهيئها للنوم

واشوي واشوي يتعدل نومها لا تخافين

شوفي انا امي كانت تنقع حق بنتي ماي مع شوية نعناع يابس و عقب تحطه مع سكر نبات بس طبعا مو كل يوم

او اذا ما عطيناها هذا مرات انا اعطيها دوا اسمه bimbi gas شريته من الصيدليه والله من اعطيه بنتي شوي و تسكت

اهو مال غازات . بس شوفي اذا يناسب عمر بنتج .

حبووبه انا استخدمت اكثر من ماركه ملوت دوا الغازات مافاد وياها ولا بامبي غاز ولا بنيسون اعتقد

للي نفع مال المستوصف وايد زين بصراحه

لله يخليها لج عدلى نومتها عشان تنااام بالليل يعنى بعد الساعة 10 بالليل لاتنااام سهريها لى الساعة 12 اذا قدرتى وعطيها اى دوا طارد للغازات وهم بين فترة وفترة عطيها ينسون مفيد وهم نوميها على بطنها
وترا هذى فترة وتعدى اول شهر لااازم جذى

عدلي نومتها كل يوم قدمي الساعه يعني

اوا يوم على ال10 قوميها وخليها ليما 12 اليوم اللي بعده 9 شوي شوي على 7 وبترتاحين ان شاء الله

بنتج الله يحفظها مافيها شي بس نومتها بالنهار مشبعتها

وييييييييييييي نفس حالتي بالضبظ وانا بنتي شهرين ولي اللحين على هالحال
قالولي عدلي نومتها ما كو فايده
مثلا اقعدها 8 بليل تنام 9
ولا تطول بالنومه وتقوم 1 وتقعد لي الصبح لي 10 او 11 الصبح بجي

ما اقول غير الله يعينج ويعطيج طولت البال والصبر يا رب

لا توها اسمالله عليها صغيره ماتتحكمين بنومتها

شوفي اذا عندج احد اييبلج من لبنان دوا بيبي كال واايد ممتاز يهدي البيبي وينومه طبعا هذا اذا خلاص جربتي كل الحلول

وانا انصحج تطولين بالج انا مريت باللي انتي فيه بس تكبر شوي راح تعدل نومتها بروحها الحين تحملي عادي اليهال اغلبهم ماينامون الليل وبجي وصيااح مو بس انتي تطمني ..
ومبروك ماياج

اغلب اليهال جذي نومهم معتفس ومايتعدل الا عالثلاث اشهر
شوفي لاصارت الساعه 8 ونص او 9 قعديها لعبي معاها لاتخلينها تنام لما تصير الساعه 11 ونص او 12 بعدين عطيها رضعتها عشان تنام لأن تكون تعبت من اللعب والقعده وشبعت جذي تنام وماتقوم الا وقت الرضعه اللي وراها

واذا شربتيها رضعتها اللي وراها واهي نايمه يعني ماتنطرينها تقوم وتبجي من اليوع راح تكمل نومتها
جربي وشوفي تضبط معاج ولا لأ لأن كل ياهل غير

واذا نامت الظهر نامي معاها عشان تقدرين تسهرين معاها اذا مانامت بالليل

الله يجزاكم الف خير يالغاليات

بس شنو سبب البكاء؟؟؟ توقعت الياهل لما يقعد يكون هادي بس اهي بجي متواصل كل شي سويتلها وماكو فايدة !!!!

شنو سبب بكائهم؟

كل البيبيات جدي لاتحاتين وذا نامت نامي معاها انا بنتي كانت على كيفها تنومني هههههههههههههه

شربيها ماي غريب والله انا نفع مع بنتي وقت رضعه الليل

عادي حبيبتي كل اليهال جذي انا ولدي ما تعدلت نومته الا بعد الشهرين
صج راح تتعبين بس بعدها ترتاحين ينام معاج ويقعد عقبج ههههه
الله يخليها لج وتشوفينها عروووس

حبيبتي الله يعينج كل اليهال تتاذي اام منهم اول الاشهر لكن بجي بنتج غريب وتقولين مستمر الليل كله وماتنام
اذا انتي متاكده ان بجاها مو غازات ولا عوار بطن ولا مريضه الله يحفظها يمكن بنتج ممصوعه يعني فيها مصع وهذا يكون سببه الشيل الغلط للياهل والمصع مايخلي الياهل ينام خصوصا بالليل وكله يبجي
بقولج طريقه وسويها وانشالله راح ترتاح بنتج وتنام
دفي زيت زيتون وبليل دلكي بنتج ودهنيها فيه عدل خلي الزيت يتشرب جسمها عدل ودلكيها بس اشوي اشوي لاتنمصع ومهديها وحتي شعرها دهني ودلكي عالخفيف ولبسيها كبوس ودفيها عدل ونوميها وبتنام انشالله مرتاحه
اذا عندج احد كبير مثل الوالده او خالتج يعرف للمصع خل يشوفها لج لان المصع يبين وتقدرين انتي تسوينه اذاقلبج قوي
عقب ماتدهنينها عدل نوميها على ظهرها ومسكي ريلها الثنتين ومسيهم عدل وشوفي اذا متساوين او لا وممكن يكون المصع بالايد بس هذي صعبه اتسوينها مو اي احد يسويها الا اللي يعرف
انا عيالي ما اسويلهم الوالده الله يسلمها اتعرف وتسويلهم اذا فيهم شي
الله يعينج ياقلبي وعلى فكره دهنيها بالزيت لمدة 3 ايام متواصلين ولاتسبيحنها الا 4 يوم واهم شي اتدفينها
والله يخليها لج ويحفظها وطمنيني عليها

حبيبتي كلها فتره وتعدي

من يصير عمر البيبي شهرين ونص او ثلاث شهور بترتاحين

هدي بالج صدقيني فتره وتعدي