تعالوا شوفوا الكلام الي بيوصل ريلي وعطوني رايكم :)

السلام عليكم ورحمه الله بركاته

شلونكم يا كويتيات ؟؟
يسعدني اني انضم الى كوكبتكم الجميله الي الكل مدح فيها

بنات ..
الموضوع ومافيه ان ..
انا صارلي مالجه شهر تقريباً .. والصراحه ريلي ريال طيب ما شاء الله عليه وجد كان سهل وبسرعه فهمنا بعض ولله الحمد

واهو ايام الخطوبه يابلي هديه .. ومع المهر هم هديه .. وعقب سبوع من الملجه هم هديه وانا بادلته بهديه بعد باول اسبوع

عاد الحين ووعقب هالشهر قاعد افكر اعطيه شي يقعد طول العمر .. وسويت عمل فني بيدي وكتب عليه عباره واسمه .. وحطيت العمل داخل صندوق حلو ومرتب وزينته بطريقتي ..

بس لازم احط كرت بره ..
وهم ابي الكرت يكون مميز وراح اسوي له حركات بركات بالفوتوشوب
بس الي ابيكم تساعدوني فيه ..
الكلام الي بكتبه بالكرت او بالبطاقه ..

انا كتبت كلام وابي رايكم فيه اذا يبيله اضافات او حذف شي منه
او اذا في اخطاء املائيه او نحويه
خخخخخ بعد انا كله امتيازات باللغه العربيه خخخخ

الكلام يقول

(((((((((
أجمع باقات الورد ,, وكل روائع الجمال,,
لأقول لك غدت أيام جميلة ..وستغدوا أجمل منها بإذن الله ..
أياماً تطوّقها ورود حمراء ,, تحيط بها من جميع الجهات ..
تبث فينا حب صادق يجمعنا ليكن ركيزه حياة المستقبل ..

زوجي..
لا أعرف ماذا أقول !!
فالمشاعر كبيرة ,, والكلمات كثيرة ,,
وهذا ما يجعلني حائرة أمامها لاختار اي منها !
ولكن .. كل ما استطيع قوله ولعله يستجمع تلك المشاعر ……
“احببتك”

إليك حبيبي..
إليك يامن شعّ نور الحب في قلبي..
نور من نوع جديد ومن مصدر فريد..

إليك اهدي هديتك منك!
إليك اهدي هدية صنعها قلبي واختار عبارتها وجملها باسمك ..
نعم أنت من صنع هديتك .. ألست “انت” قلبي !!؟

)))))))))

طبعا الكلام تاليفي واخراجي ومونتاجي خخخخ
ابي همتكم يا بنات ورايكم بصرااااااااااحه
عشان اجزم واقدم الهديه
ودعواتكم لي والله يوفق الجميع

ولكم جزيل الشكر

اول شي مبروك والله يوفقك ويتمم عليكم انشاء الله كلمات ولا أروع الله يهنيكم ببعض وكل اسبوع يبلك هدية حلوة والله سبحانة قال الطيبون للطيبات

صراحة كلامج حلووو..

والله يوفقكم يارب..

كلامج مايبيله اي تعديل
حلو مثلج

ماشاءالله عليج واااااايد حلو الكلام ورقيق .. يالله يالحلوه تشجعي ووديها والله يسعدج ويوفقج وياه ولايغير عليكم

ماادري اذا اللحين كل هالكلام بعدين مااتلاقين شئ اتقولين له واتصير الحياة مملة

خلج طبيعية واختاري كلام ناعم وخفيف

لان الشئحلاته قليل ودايم

بالتوفيق

بالمبااااااااااااااااااااااارك ومنه المال ومنج العيال إن شاء الله ومبروك إنضمامج لكوكبتنا.. بس ياريت تبدلين كلمه أحببتك في كل ما استطيع قوله أحببتك بكلمة أحبك تكون لها أوقع في العباره
وكلمات جدا جميله وموفقه أختى

ماشاء الله تبارك الرحمن روعه
ونصيحة لااتعدلينه ولااتغيرينه
الكلام الي يطلع من القلب يدش القلب صدقيني

الكلام رووووووووووووووووووووووووووووعة

الله يوفقج ويهنيج يارب

بس احس انه كلام ثقييييييل جني اقرا موضوع انشاء

خليج اكشن ودمج خفيف

كلمتين كافي

يعني مثلا

جذي

احبك
واعشقك
وامووووووووووت فيك

او قوليله كلمه بينكم ممكن ان يضحك عليها او يبتسم

مثلا مره قلت بدليه لزوجي بدال لا اقول مشاعرك قلته مشاعيرك

خخخخخخخخ

وصرت اتحرش فيه كل شوي بمسج واقوله اشلون مشاعيرك الحين؟؟

وهو يستانس لاني بالنسبه له مصدر للسعاده والضحكه

يعني ممكن تستعملين كلمه كله اطفرينه فيها او غزل

فهمتي

وطبعا الراي رايج بالاخير

مشاءالله حلو الله يتمم عليكم يارب

softlady

باقت الكلام اللي كنت بقوله

الريال ما يحب هالحجي المنمق …. الا اذا كان يحب الشعر بالفصحى هذا شي ثاني

بس ممكن مايقراه كله او مايعلق عليه ويضيق خلقج انا افضل كلمة بسيطة من القلب تغني عن اي كلام ثاني

الله لا يحرمني منك

حبيبي وزوجي وابو عيالي ان شاء الله … اقبل هديتي عربون محبة وحياة احلى من العسل

بس الكلام النحوي مايدش القلب مثل كلمة بسيطة حلوة … بس ترا لج مستقبل بالخواطر