|
|
السلام عليكم
انا ابلة روضه
والروضة تعب من قلب ولويه
اللحين حامل بتوام وثقيله
حييييييييييييييييييل
شلون اقدم على تخفيف جدول ؟
وجم ساعه يخففونه لى
فهمونى شالسالفه انا سمعت فيه بس ما اعرف شلون
وانا عندى حالات اجهاضات سابقه
بليز اللى تعرف تفيدنى
شوفي ادارتج وان شاء الله راح يراعونج / انا حاولت اخفف الجدول بس اللجنة رفضت وقالوا ما يصير الا اتحولين اعمال مكتبية يعني عمل إداري بالمنطقة او الوزارة او حتى بالمدرسة
شنو سويت؟اخذت مجلس طبي يعني معاشي ماشي وانا بيتنا بس اللة يعينج يبيلة دوخة ومراكض بالاوراق انا عطوني شهرين ونص راحة وبعدها ولدت ماكنت ادري ان في مجلس طبي ولا قالولي الحامل بتوأم يعطونها مجلس طبي من بداية الحمل.يعني تسع شهور راحة ماتداومين
وبالنسبة لولادتي كانت عملية واللة يقومج بالسلامة
بس أهم شي راحتج وانا أختج وانتي عندج عذر انا راح اعلمج الخطوات …..
1– اخذي من السكرتاريه نموذج 1 واكتبي فيه اتقدم بطلب مجلس طبي بسبب حالتي الصحيه التي تمنعني من انجاز اعمالي المدرسيه ووقعي عليه .
2- راح تدزه السكرتاريه للمنطقه التعليميه لكن انتي اخذي نسخه من الطلب عشان ماتطولين السالفه وعطيها أخوج او ريلج او ابوج يراجع فيها المنطقه ( انا دايم عمي يراجعلي ويستعجلي الطلب ).
3- راح يوصل الرد من المنطقه للمدرسه بس متأخر واذا احد راجعلج راح يسلمونه الرد بيده ( يعني تستلمين الرد من مدرستج او من المنطقه على طول ).
4- تروحين بالورقه مع تقاريرج الطبيه للمجلس الطبي يحددولج المستشفى والموعد اللي راح يشوفونج فيه الدكاتره .
5- على فكره اول ماتدخلين على الدكتور اشرحيله ظروف عموما اول مايعرف انج حامل بتوم وعندج حالة اجهاض على طول راح يعطونج اجازه لمدة شهرين واذا موعد ولاتج ماقرب تراجعينهم مره ثانيه يمددون المده
6-المستشفى راح تدز اوراقج للمجلس الطبي تستلمينه من هناك عقب انتي او اي احد يوديه للمنطقه .
7- صج فراره ولوعة جبد بس والله والله والله صحتج وراحتج تستاهل لان المدارس مهما اشتغلتي وذبحتي عمرج مايقدرون حتى لو انج تعبانه يزيدون عليج عشان يتعبونج اكثر (اتكلم عن تجربه 4 مدارس مريت فيها وكلهم نفس الطقه مايرحمون ولايقدرون خاصتا الحامل يزدون عليها الشغل اهم شي شغلهم يمشي واحنا بالطقاق )
وبجذي تاخذين اجازه لين تولدين بالسلامه ومعاشج ينزل كامل
وحده عندنا ماخذه تخفيف ساعات عمل .. عندها معاق
تطلع الساعة 10 ضبط .. ولا تقولون الادارة مستحيل ناظرتنا معطتها اكيد من الوزارة
1- ساعات العمل تشترينها من الوزاره كل ساعه ب100 … رفيجتي مشتريه ساعتيين تطلع 11 من المدرسه مسكينه عندها 5 يهال والاداره صارت حقيره معاها وترفض انها تطلع كل مره استاذان قالت اشتري كرامتي بفلوسي وجننت الاداره تجي الصبح تدرس وتطلع حتى احتياط مايقدرون يعطونها لانها اجبرت الناظره تغير جدولها وتقدم حصصها بأمر من الوزاره ومافي مجال يحطولها احتياط لانها تطلع .
2 – ساعات عمل تخفض بأمر من المجلس الطبي بس لازم تكون عندج تقارير طبيه ( بسم الله علينا )
وصح كلامج رفيجتي يخصمون منها جنه قالت 160 بس على الاقل مشتريه راحتها وغير جذي عندها ظرف
ما قصرتوا
بس عندى سوال اذا اخذت مجلس طبي للولادة وانا حالتى صعبه اللحين ———– اخاف ينقلونى من مدرستى وانا بصراحة تونى
منتقله لهم صار لى سنتين ومرتاحه الحمد لله ادارتى تهبل والمدرسات عسل ما ابي ينقلونى من الروضه
انا مو مفكرة اخذ امومه
هل ينقلونى لانى سنه ما داومت مجلس طبي ؟ ولا لا ؟
وبالنسبة لتخفيف ساعات العمل ——– عشان الظروف الصحية ( شلون جم ساعه يخففون على ) احنا نداوم 7 ونص ونخلص 12 وعشرين دقيقه
وطبعا عندنا فرصة ومناوبه واحتياط غير حصص الحركية والنشاط الصبح ترقصين يالله صباح خير
فيدونى ولكم الشكر
معلمة رياض اطفال انصحج بالمجلس الطبي وماراح تنتقلين النقل يجي اذا خذيتي بعد الوضع اجازة امومه او اذا انتي طالبه نقل
و البنات ما قصرو
واب للحوامل