تجربتي مع عمليتة شد البطن وتكبير الصدر

طبعا من بعد الاستخارة
والدعاء وزيارة العديد من العيادات والمستشفيات
ودراستة كل دكتور في اختباراتي لهم شنو النتيجة الي راح يعطيني
اخترت المستشفى والدكتور من بعد جهد جهيد

طبعا كانت مشكلتي السمنة في سن مراهقتي
وصلت لي وزن 120 كيلو الى ان صار 68 كيلو

ودخلت على هذا الاساس عمليتي الاولى كانت لايبو سكشن
رغبة مني لشد جسمي بتقنية الليزر بس للاسف ماشد كلش

وصرت من بعد عملية اللايبو سكشن 55 كيلو :
ماكان عندي مهم اني اخسر هالوزن كان وزني زين مقارنة مع طولي
بس كنت ابي اشد لان لانادي ولا جلسات مساج فادت معاي ولاشي فاد

ف رحت عند الدكتور وقررت هالقرار بعد ما اكدلي ان ماراح يشد الا بعملية
شد الجلد وصدري ماراح يصير شكلة زين الا بتكبيرة
ومن شطانتي

وطلب مني بعدها الدكتور الاشعة والتحاليل
وسئلني اذا مريضة شي او اخذ ادوية معينة
كان وقتها غلطتي ان فيني بلغم تكرمون من بعد الزكام " النشلة "
كنت اكح عقب العملية احس روحي بتطلع مع كل كحة لوووووووووووول

المهم

وكل ماقرب يوم العملية سفطت عند البحر وقمت ابجي
وماخليت احد من الناس الي احبهم ماشفتة

والله كنت خايفة

ويوم العملية صار حسيتها خلاص ساعة الصفر
وقمت اوصي الدكتور علي
تكفة دكتور ابي اخووش دونيا بعد العملية
دربالكم علي
ويطمني الدكتور والحمدلله
طلعت من العملية

اول مافجيت عيوني
لقيت الدكتور يباركلي بنجاح العملية
مالقيت نفسي الا اقول الحمدالله

لقيت برابيش مركبينهم فيني
3 برابيش
اثنين لشفط الوصخ من الجسم والتخلص من افرازات مابعد العملية
وواحد تكرمون للبول
اليوم الاول ممنوع الاكل ومفروض تكونين صايمة من الساعة 12 بالليل

الالم كان يعني شي مو قوي نفس اللايبو سكشن
بس كان اخف منها بوايد!!

زارني الدكتور بعد ماوعيت من البنج حاولت استفرغ من اثار البنج بس ماقدرت كلش
طلع مني على هيئة بلغم المهم انة طلع والحمدلله

حسيت بالام بس محتملة من المسكنات والصدر جنة طابوق لان تدرون سوا زراعة لتكبير الصدر
الزراعة كانت من حوالين الحلمة طلبت منة يكون مكان الجرح غير مرئي فإقترح علي 3 اماكن
حوالين الحلمة او من الابط او من تحت الصدر
وكلة يعتمد على شطارة الجراح

طلب مني الدكتور المشي اذا كنت اقدر او باجر لان كل ما سارعت بالمشي راح يكون فرصة شفائي اسرع

والحمدلله قلت للسسترات يمسكوني وراح امشي وتحديت هالالم وقمت ومشيت
حسيت يومها في بعد كل شي هههههههه كل شي بعييييييد يايمةةةةةةة

ثاني يوم من صباحية ربنا
طل علي الدكتور بشرتة اني مشيت
شجعني حيل على هالشي وقمت امشي ثاني يوم احسن من اول يوم وشالو عني بربيش البول تكرمون وقلت افرازات البرابيش الخاصة لشفط افرازات الدم من العملية

اليوم الاخير طلعت من المستشفى

احمدك واشكرك ياااااارب

شالو عني برابيش الدم وسوالي الدكتور الغيارات للجروح
وعطاني موعد للمباشرة والمتابعة

النوم كان على مخدتين والمشي منحنية لشد منطقة البطن
الحمدلله فجيت الغرز
والحين قدرت امارس حياتي بشكل احسن

العملية كلفتني كاملة 3200 مع مصاريف المستشفى وقعدت فيها 4 ايام

بعد 3 يوم من العملية قدرت اطلع لما تاكد الدكتور من ان برابيش الدم شفطت كل الافرازات وقدرت امشي من اهني تم تسجيل خروجي من المستشفى
و بعد 6 ايام من العملية قدرت اقط الكورسية بس قعدت بكورسية ثاني عندي بديل على مانشف
^_^
الاكل عادي ماتتبعين حمية غذائية
لان فقدت كمية دم محتاجة اعوض وفوق هذا في انسجة تبي تنبني من يديد
فلازم اكل كل شي مفيد لجسمي مثل الخضروات والفواكة واللحوم