تجربتي مع عملية () عند الجارالله ^_^

بنات باركولي سويت عملية التكميم على يد الدكتور خالد العنزي ولله الحمد

تشجعت اسوي العملية وعقب معاناة مع السمنة ونغزات الحريم والانطوائية اللي حاشتني من بعد ماصار وزني over طبعا انا جربت كل شي مثل باجي البنات ريجيم ورياضة بس ماعندي ارادة استمر المشكلة انه صار فيني ربو وجذي من السمنة المهم حبيت اقولكم تجربتي مع عملية التكميم مع دكتور محمد الجارالله …,طبعا بقولكم بالتفاصيل
دقيت عليهم الخميس
قالت لي ام احمد المصرية اللي بعيادته جان تقول تعالي السبت >>>عاد هني اعجبوني مو نفس باجي العيادات بعد شهر او شهرين الموعد يعني (( سرعة في العمل ))

رحت للدكتور وسوولي
تحاليل بـ 60
فتح ملف 30
سونار 30
منظار 100

بعدها ضبطت موعد العملية
بنفس الاسبوع اللي راجعت فيه عندهم خليته يوم الثلاثاء دخلت الاثنين بليل في مستشفى الهادي طبعا خدماتهم بايخه خيروني اختار غرفة اللي حاجزها لي الدكتور او غرفة سوبر ديلوكس بس اغلى
قلت بشوف الغرفتين ..

واااااي مو صج الغرفة اللي حاجزها لي الدكتور غرفة والله يابنات جنها قبر
قلت لا ابي الثانية المهم دفعت عندهم 3000 قبل العملية وللعلم انا ماسويت عملية عادية سويت تجميلية ماتبين الفتحات يعني فتحتين بالسرة وفتحة قريب من السرة
دخلت الغرفة الساعة 12 وربع صباحا وانسدحت على امل انام وماغمضت عيوني الا كل شوي داخلين علي الممرضات مرة يقيسون الضغط مرة يشوفون التنفس ودخل علي دكتور وقعني على ورقة موافقة على اجراء العملية ..,

وزني 110 طولي 150
المهم
سويت العملية الصبح الساعة 8 يماااا لما دخلوني غرفة العمليات شفت الدكاترة وجذي جان اخاف والله بغيت اهون انا اعرف يعطوني البنج قبل لا ادخل الغرفة هذول عكس الناس المهم ماحسيت الا اختي تقعدني واهم يرفعوني عالسرير بعد مانمت مدري جم ساعة قعدت رجعت دم وانتوا بكرامة وحسيت بألم ببطني ومو قادرة اتحرك وكل شوي ارجع دم حسيت يابنات جني بموت والله ما اقص عليكم كان شعوري بالندم يخالط شعوري بالالم بس كل ماتذكرت نظرة الناس لي على اني بطة وما اضعف اهون على نفسي واول يوم مر بدون شرب اما ثاني يوم عطوني 30 ملم ماي كل ساعة اشربه وعطوني عصير تفاح ومعاناة مع الالم وخلوني امشي بالممر شوي بس ثالث يوم الصبح صرت احسن وطلعت بالسلامة من المستشفى بعد مادفعت باجي الفلوس واهي 330 دينار

رحت البيت دايخه وكانت توصيات دكتور الجارالله بعد ماخلصت العملية وطل علي
((7 ايام اخذ ابرة السيولة + سوائل شفافة ))

والحين امشي على التوصيات بس فيني حارج وان شاء الله باجر اروح له صار لي 10 ايام الحين وزني صار 105 لاحول ولا قوة الابالله
وان شاء الله انزل وزن بعد بس يابنات انصحكم لاتسوونها الا اذا ارادتكم = 0 مثلي

بس بصراحة الحين مقدر اكل شي قبل محد يخلص الفطور الا انا الحين بس اشوفهم واهم يتلذذون بالاكل واتحسر بس ان شاء الله تكون هالعملية منها فايدة وانزل للوزن اللي ابيه