تبين ولد وطلعلج بالسونار بنت@@!! تعالي اقولج سالفتي وقوليلي سالفتج

شلونكم يا بنات ويا زوجات ويا حوامل ويا امهات

باين من العنوان عن شنو يتكلم موضوعي وانشالله راح يكون هالموضوع للسوالف والفرفشه مو عشان تضيق خلوقكم

سؤالي اهو

(( في وحده تمنت الولد وطلعلها بالسونار بنت؟؟ والعكس صحيح))

((شنو شعورج بعد هالصدمه؟؟ وهل تقبلتي الموضوع بسرعه ورضيتي بقسمة ربج ولا تضايقتي؟؟ ))

((شنو شعور زوجج وموقفه اذا كان نفسج يبي البنت وطلع ولد والعكس صحيح؟؟))

خل اقولكم سالفتي

الله يسلمكم انا هذا اول حمل لي بعد سنتين زواج ولله الحمد والمنه

بصراحه وبدون مجامله من اول ما حملت الكل يسألني تبين البنت ولا الولد؟

انا كنت اقول الي يه من الله حياه الله عادي دام اني بجر

بس من داخل الشيطان لازم يلعب بحسبتي هههه الصراحه من داخل كنت ابي ولد

كنت ابي افتك من اول شي ومن زمان بعايلتنا ماكو صبيان صغار كله الدفعات الاخيرة بنات ههه وانا كنت ابي اتميز

تقريبا هذي كانت اسبابي

والمشكله من حطيت هالفكرة براسي صار فيني هوس من اول ما حملت ابي اعرف شنو في بطني

وماظل موقع او منتدى مادخلت عشان اعرف الطرق الي تسويها المرا عشان تعرف الجنس

منها البول كرمكم الله والوحام والاكل والجدول((((للعلم كله هالسوالف طلعت خرابيط وبقولكم ليش))))

بعد البحث الطويييييل لي الشهر الرابع قبل السونار

وانا مقتنعه ان فيني ولد لان كل شي بحثت فيه وسألت عنه بأي طريقه يثبتلي ن فيني ولد مو بنت

حتى الناس لما تشوفني والكل قالي شكلج فيج ولد مو بنت (((الا زوجي)) قال انا حاس فيج بنت <<<<<<<<<<يمه منه الساحر خخخ

انا طبعا استانست لان تحقق الي في بالي

الحين يا موعد السونار وسوناري ومراجعاتي عند الدكتورة ناهده العلي ومعروف سونارها وحده بوحده وشاطرة بهالشي

وقبل لا تدش الدكتورة انا وزوجي متراهنين لاخر لحظه انه مقتنع ان فيني بنت ونا فيني ولد والرهان عشا

طبعا دشت لدكتورة وعقب ما تطمنت عالبيبي سألتها ابي اعرف شنو فيني وبعد البحث والبحث والبحث

قااااااالت

مافي شي بين ريولها زهبو وردي وقعدت تمدح وتدعي وتقول انتي بجر

طبعا انا لا تشوفون ويهي من الصدمه طبعا والله ما كنت متضايقه ومعترضه عالبنت بالعكس والله البنات ايننون وحبيبات امهاتهم بس انا لان كنت مقنعه نفسي ان الي فيني ولد(( وهذا اكبر غلط لا تسووون مثلي)) عشان جذي انصدمت وماسكه نفسي بالغصب ومبينه نفسي اني طايره من الفرح

وطبعا ريلي مستانس وايد لان اهو كان يبي بنت عادي عنده

عقب ما طلعت وبالطريج ريلي يقولي انتي متضايقه صح؟؟ قلتله الصراحه لان قصيت على عمري والمفروض ما يكون عندي هوس بهالشي واخليها على الله

وظليت فترة شعوري ناحية بنتي عادي مااحس اني احبها

الا لما كنت باخر الرابع سبحان الله كنت طالعه ومرة وحده صار فيني نزيف ونزل علي دم

اهني طبعا من الخرعه ومت من البجي واحنا بالطريج حق المستشفى وانا ادعي لا اراديا (( يارب لا يصير في بنتي شي والله يحفظها من كل شر))

وحاطه ايدي على بطني وانا امشي ماسكته خايغه عليها

وظليت يومين بالمستشفى لان صار انفصال جزء من المشيمه ولما رجعت البيت ظليت شهر ونص بالسرير مااتحرك لان مو زينه الحركه وكنت حتى اخاف اروح الحمام امشي شوي شوي خايفه على بنيتي يصير فيها شي

ولله الحمد عدت على خير

والحين احب هالبنيه حتى النخااااااع واهي لحين ما طلعت عيل شلون لما تطلع يمكن اكلها هههه الله يحفظها بااارب

ومستانسه حيل وانا اجهزها واسولف معاها

سبحان الله التجربه الي مريت فيها والي الله حطني فيها بس عشان يبين لي ان احب بنتي

صج بعد فترة حسيت بتأنيب الضمير قلت ليش انا مافي شعور ناحية الي في بطني معقوله مااحبها

بس سبحان الله الله حطني بالمحنه عشان يبين ان الضنى غالي

ولو بنت ولو ولد كلهم نعمه من الله

انا ادري بنات طولت وقرقت عليكم

بس نصيحه مني لكم

لا تسوون نفس الغلط الي سويته اهو (( التوقعاااات))

ثاني شي خلو كل شي على الله

ادري مو بيدكم وراكم رياييل ما ترحم خاصه الي عندها اكثر بنت وتبي الولد ((( هذا اكثر شي شايع)))

وفي عندهم الاولاد ويبون البنت

بس اهم اهم شي تخلونها على الله ولا تنسون الدعاء

والي عندها ولد وتبي البنت ترا الولد عزوة ويشيلكم لما تكبرون وشايل اسمكم

والي عندها بنت وتبي الولد لا تنسين ان البنات البنات اجمل الكائنات
والبنت صج صج حبيبة امها وابوها ( طبعا راح تكون شريجتج خخخ لانها راح تاخذ الحب والدلع كله من زوجج)
والبنيه مهما كبرت وتزوجت وصار عندها عيال ترا مردها حقج وحق ابوها وبتشيلكم بعيونها

والحين اترك المايك لكم واي وحده عندها تجربة مرت فيها تذكرها

وسلامتكم يالحلوين

تعبت وانا اكتب

الله يتمم عليج ان شالله
اصلا انا من حملت ودريت ان فيني بنت حدي استانست لان ماعندي خوات
وحمدت ربي
والحين ريلي طاير فيهااا عسالله يخليهاااا لنا ان شالله ويرزقنا برها يارب*

شوفى حبيبتى انا حاليا عندى نجمتين وقمر

يعنى بنتين وولد
بقولج سالفتى
انا كنت مهووسة يمكن أكثر منج

طبعا اول ما حملت بالبجر وانا متمنية ان اللى ببطنى يكون ولد
متمنية بشكل مو طبيعى
اول شئ لان انا ما عندى خوان كلنا بنات والوالد متوفى الله يرحمه فكنت متشوقه يكون عندى ولد يكبر وأشوفه ريال جدامى
علاوة على جذى ام زوجى ما تحب البنات كلللللللللللش
فهذى بعض العوامل اللى خلتنى اتمنى الولد

المهم
سويت سونار وقالتلى الدكتورة بالشهر الرابع احتمال كبير ولد بس تعالى الزيارة الياية اتأكد
طبعا انا طرت من الفرح وعلمت زوجى ( للأسف استعجلت )
ولما يت الزيارة الثانية قالتلى لا ترى بنت وانا متأكدة
تخيلى صدمتى
بس قلت الحمد لله
ولآخر لحظة وانا بغرفة الولادة كنت اتمنى تكون ولد

ويت حبيبة قلبى بنتى البجر اللى حبها بقلبى ما يعادله حب

وبعد سنة
قررت احمل مره ثانية
والرغبة بالولد زاااادت عندى أكثر وأكثر
وقالتلى الدكتورة بالسونار بنت
وكان زوجى حزتها مسافر
وحسيته تضايق وايد بس ما بين
وانا بعد بس لما اتذكر انى تضايقت استسخف نفسى وااااايد

ويت بنتى الثانية اللى خذت قلب ابوها بشكل ما تتصورينه لدرجة ان يشمها واهيا نايمة من كثر ما يحبها

وبعدها قررت أصبر وما احمل الا بعد جم سنة
وما كنت استخدم حبوب كان مانع طبيعى

وبعد سنة تفاجأت انى حاااامل
لكن اعراض الوحام كلها تغيرت
ببناتى كنت أحس بثقل من أول الأشهر
بس هالحملة احس نفسى خفييفة

ورحت اسوى سونار بدار الشفا بروحى
لان زوجى كان مسافر
وقالتلى الدكتورة المفاجأة الحلوة

ولــــــــــد

قلت لها دكتورة انتى متأكدة ؟
قالتلى ايه وشوفتنى العضو الذكرى

طبعا أنا طررررررررررررت من الفرحة
ودقيت مكالمة على زوجى وبلغته
وطااااار أكثر منى

ويبت ولدى حبيبى أحمد الفال لج ولكل وحده تتمنى الولد

والحين اقول لنفسى الحمد لله يبت بنتين ورا بعض
لإنهم صاروا مثل التوأم يلعبون مع بعض ويلونون مع بعض
وسوالف بنات بروحهم
يعنى لو كان الولد بالنص جان ما مشى مع البنت

وادعيلى اييب الولد الرابع واكمل الفريق

الله يتممم عليج يارب وتولدين بالسلامة

موضوعج وايد حلو يا حلوة

الله يحفظ بنتج ويخليها ويوصلج لتمامه ان شاء الله ويرزقج برها
يااااااااااااارب يا ( ليبرا ) الحمله اليايه يكون ولد
وحزتها بتعرفين وتتأكدين ان الضنا غااااااااااااااااالي سواء كان بنت او ولد

بس احنا طماعين ورب العالمين كريم

الله يرزق الي ما عنده ويخلي عيالنا ويحفظهم ويصلحهم ياااااااااارب

أنا مثلج يا ( زوجي توأم روحي ) عندي بنتين وولد الله يحفظهم ويخليهم
والحين الحمدلله انا حامل
واتمنى من رب العالمين انه يرزقني بولد يصير مع اخوه ياااااااااااارب
ولو كانت الي ببطني بنت بقول الحمد لله ولو ولد هم بقول الحمدلله

( اللهم اني رضيت فارضني )

صدقيني البنات حلوين والاولاد حلوين وكلهم رزق ونعمة من رب العالمين

اللهم لك الحمد كما ينبغي لجلال وجهك وعظيم سلطانك

الضنا غااااااااااااااااالي

ماشالله

سبحان الله كل وحده تختلف اسبابها عن الثانيه بس عسا يا ربي يخليها لكم وتشوفونها عروس يااارب

الله يتمم على الجميع ياارب

واااي قصتج كله اكشن واحداث بس سبحان الله بالاخير صار الي الله كاتبه

الله يخليلج بناتج وولدج يااارب ويرزقج الولد الي يصير عون حق اخوه بأذن الله

الله يتمم على الجميع يااارب

تسلمين يالغاليه

شبسوين لي ولدتى وشفتيها وااااااااي بتاكل قلبج ….انا نفسج عانيت عقم 6سنوات وبعدها صفيت البنات <<قصه هههه وكان زوجى يبي ولد بس مايبين ويموت بالبنات وبعدها ربي رزقنى بالولد <<معاناه يالله يبته …والحمد الله من قبل ومن بعد غيرنا يتمنى ظفر ياهل الله يرزق كل محرووومه يارب احنا بعمه وااااااجب نحمد ربنا عليها ..

اهلا ام حيدور

انا بجري كنت اتمنا ولد

امبي قاعده تمجع شعري وانا اكتب خخخخخ

يلا باك

المهم كنت اتمنى ولد ما ادري ليش بس هم الاغلب بنات فكنت ابي ولد عشان اتميز خخخخ

الله عطاني بنت و يوم دريت انها بنت امبييي ردت تمجع شعري لحظه

المهم

قبلها بيوم يعني صبل السونار بيوم حلمت بغزاله صغييييره و عرفت انها بنت

ما كانت رغبتي حيل قويه بالولد بس يوم عرفت انها بنت صرت اعشقها و اسولف وياها

و اكتب لها رشايل واهي اربع شهور ببطني الظنا غالي وانا عشقتها حييييل

و سبحان الله يوم يت البنت حننت قلب ابوها و صارت اهي الكل بالكل و مااااكله الجو فعلا مميزه مع انها مو اول حفيده

بس محبوبه حيييييييييلللللل حتا باجي الابهات قاماو يغارون

و بعدها عرفت اني حامل للمره الثانيه و المفاجأه انه طلع حيدر صغيرون استانست بس احس البنت مهما مهما مهما يكون غييييييرررر

وراح تحسين بحياتج تنقلب فوق حدر وراح تاكل منج الجو لوووول الله يسهل علينا استانست لما عرفت انج حامل انا من متابعينج و اتوقع انتي مغيره نكج عدل

بعد قلبي فديتج على هالدعوه والله يسمع منج ياااارب ويرزق كل وحده الي في بالها

وعسى الله يحفظ عيالج يااارب ويرزقج باخو حق ولدج باذن الله

عاد بشرينا

والله صاااااااجه

تسلمين حووبي

طوفوا البدليات ترا كانت تلحقني و تمجع شعري

اهي بس بتاكل قلبي!! قولي تاكلني كلي هههه

حبيبتي صج الواحد لازم يحمد ربه غيرنا صج مو محصل الضنا ويدور المستشفيات يعالج واحنا نختار نبي هذا او هذا

الحمدالله الله اعلم بحالي بالسنتين الي طافو لما ما حملت وكنت متشفقه عالياهل عيل شلون انتي 6 سنين

عورتي قلبي صراحه

الله يخليلج بناتج ووليدج يارب ويبلغج فيهم ويشيلونج وانتي عيوزة

تسلمين فديتج