تبوني اعلمكم عن الولادة في مستشفى الصباح ؟؟؟

اهلين و سهلين ..اتصدقون ولهت عليكم حيييييييييييل ؟؟

و حييييييل حيييييييييل استانست شكثر سالتوا عني …و الي دقت جزاها الله خير و الي دزت مسج و الي دزت على الخاص ….كل هذا صدج حسسني ان لي خوات يسالون عني اذا غبت ..صدج ما في معرفة شخصية بس و الله محبتكم في القلب …

انا كنت راجعت عند دكتورة ماجدة ..و انصحتني اني اولد بالصباح لان و لادتي مبكرة و يمكن يحطون البيبي بالحاضنة فقالت لي احسن اتروحين للحكومي تجهيزاتهم احسن و اطور من الخاص ..

ففي يوم من الايام كنت طالعة اتسوق بالجمعية و لا احس بطلق خفيف … ما عليه خلصت اغراضي و حاسبت و رديت للبيت …
تعشيت و تسبحت ( اهم شي اكل ترى ما احب اولد و انا جوعانة ) الموووهيم كثرت التفاصيل ..
يوم دشيت المستشفى فحصتني الدكتورة و قالت لي ان الرحم مفتوح 5 سانتي ..و ذخلوني جناح الولادة

من اول ما دشيت جاني دكتور التخذير ( هندي ) قال لي تبين ابرة ظهر ..قلت له اي و الله يا معود ..حطها لي ..بس اتضح بعدين ان الابرة هاذي يسوون لها تحليل ياخذ ساعتين و نص على ما تطلع نتيجته …. عاد انا هني عصبت …اشلون يبوني انطر ساعتين ..و اسوي لهم سالفة خصوصا ان الرحم كان مفتوح 5 سانتي يعني يمكن خلال ها الساعتين اولد ..فجاني دكتور مصري و قال لهم خلاص عطوها ابرة بيتادين …

عطوني الابرة هاذي و لا بعد 5 دقايق انادي السستر و ازفها شنو يا سستر شسالفة انا ابي ابرة ظهر هاذي ما اتسوي شي ..جان تقول لي يا ماما انتي بس نامي و خلاص ..و اطالع الساعة كانت 1 و ربع ..و لا شوي الدكتور واقف عند راسي و يقعدني ياماما انتي تبين ابرة ظهر و لا لا ؟؟ عاد طالعته و قلت له شدعوة الحين جبتوا التحليل يوم زفيتكم …هههههه و لا اطالع الساعة 3 و نص …يعني كل هذا و انا نايمة مو دارية عن نفسي ….هههههههههه صدج ماساة
عاد قلت له لا انا مصممة ابي ابرة ظهر …فسوا لي الابرة ==== كل هذا و انا نص متخدرة يعني صدج الابرة الي طقوا لي حلوة و اتخليج اتنامين و ما اتحسين باي عوار ..بس العيب الوحيد انها اتخليج اتخبصين بالحجي يعني انا من باجر الولادة يوم قمت اتذكر موقفي بالتخذير برد وجهي و استحيت …… زفيتهم زف …بس اشوى انهم ما يعرفوني و لا رح اشوفهم بعدين ههههههه

ابرة الظهر خذيتها وولدت بعدها على طول يعني ما امداني احس بالتخذير الكامل ….

عموما الولادة بالصباح زينة و اهتموا فيني حيل و حتى البيبي حطوه بالحاضنة 3 ايام و السسترات يهبلووون … ( بس بيني و بينكم زوجي عطاهم اكراميات يمكن عشان جذي لاني كنت اشوف الي يمي بس ايزفونها )

اكل المستشفى ما ذقت منه اي شي …كله يجيبون لي اهلي و طلبت من كنتاكي بعد ….

الغرف نظيفة و بمعدل كل ساعة و نص تجي عاملة نظافة اتشيل الزبالة عزكم الله …

عموما بشكل اجمالي الولادة بالصباح لا باس بها …و حاليا اظن انها ما تفرق عن الخاص الا بالغرف و الترتيب