بنات عسي ربي يفرج همكم محتاجة لدعائكم

السلام عليكم خواتي ومبارك عليكم مابقي من الشهر الفضيل

خواتي يعلم الله أن المنتدي هو متنفسي الوحيد وأدري أن الواحد يشتكي لربة مو للعباد

بس والله أكتب لكم وقلبي يتقطع علي بنتي وحيتي والدعاء بظهر الغيب أن شاء الله يكون مستجاب

أكتشفت بعد 10 سنوات أن فرحة حياتي ودنيتي بنتي فيها تخلف عقلي والله يا بنات أنكسر قلبي أنتهت حياتي

كانت دايما تقولي ماما أنا مو نفس البنات البنات يجاوبون أنا لا كنت أظن أنة كسل وكنت أشد عليها بالدراسة

وياما كانت تنام وهي تبجي علي دفترها وقلبي يتقطع عليها أثاري مو منها من قدراتها العقلية حطيت لها مدرسات للمواد

الأساسية كانو يقولولي بنتك بطيئة يبيلها وقت لما جأ الوقت الي أتصلت فيني الأخصائية النفسية تقولي أم فلانة قلت نعم

قالت نبيج اللحين بالمدرسة ضروري رحت وأنا ميتة من الخوف طمنتني قالت بقعد وياج ورحت لها صدمتني صدمة حياتي

قالت بنتج فيها تخلف عقلي ومستحيل تكمل بمدرستنا جدامج حل أن تحولينها للمركز الأعلي للمعاقين تدرس للمتوسطة بعدها

يعلمونها حرف يدوية مثل الخياطة وتعيش حياتها أهي أتكلم طبيعي وأنا أسمعها وعيوني غرقانة من الدموع قلت لا تكفين

أي حل ثاني أنا مستعدة أقط فلوس الدنيا بس بنتي تصير طبيعية نفس البنات حاولت تهديني لأني كنت منهارة قالت حاولي

أدخلينها وعطتني أسامي مراكز ودكاترة أتابع معاهم وكل واحد يقولي كلام غير عن الي قبلة والله أحترت أحس أن بنتي

ضايعة بدنيتها وماتعر أدبر أمرها ولا تأخذ حقها لما نطلع مكان أشوفها بمواقف يتقطع قلبي عليها أحاول أعزز ثقتها أقولها

روحي أطلبي وجبة من ماكدونالد تصف دور مع الي واقفين الي وراها تطلب قبلها واهي ساكتة ماتعرف تأخذ حقها أقولها

أنت قبلها تبجي تقول عادي والله تعبت حيل حيل وحالتي ما يعلم فيها الا ربي خواتي أنا طولت عليكم أدري بس والله من

حرقة قلبي علي بنيتي وحيتي الي أبية منكم دعوة لها بظهر الغيب عسي ربي يرزكم الفردوس الأعلي ويرزقكم السعادة في

الدارين وأسفة عالأطالة

واي عورتي قلبي

ميخالف حبيبتي قولي الحمدلله

والله يشفيها ويوفجها يارب

اذا اهيا بالبيت تفهم وتحسين بنتج طبيعيه ؟؟ هذا شي عادي ترا مو تخلف عقلي استيعاب بطيء وانتي حاولي تتفهمين معاها ومافيها شي الحين والله صار شكثرهم ذوي احتياجات الخاصه وربي يشفيها يارب العالمين ويستر عليها والله يهون عليج وياجرج يارب

السلآم عليــكم

ياحبيبتي انتي حسـآسه وعاطفيه حييل
ياقلبي اسمعيني .. اولا عليج بالاستغفار وحمد الله على هالنعمـه
لان اللي يشوف مصايب غيره تهون عليه مصيبته
يالغاليه كل الاطفال جذي ساعات تحسين فيهم خوف فيهم رُهاب من العالم الخارجي
> بخصوص موقف ماكدونلدز اللي ذكرتيه..!
فـ هذا شيء عادي لاتخلينه يأثر عليج وعلى نفسيتج .. لان بنتج اذا شافتج مكسوره بتنكسر بعد..!!

/

بخصوص التخلف العقلي اللي اكتشفتوه فيهـآ..!!
اول شيء لازم تتقبلييين هالحاله اللي عند بنتج انتي قبل أي احد..!
لان بنتج اذا شافتج متقبله الوضع والحياه ماشيه وطبيعي..!
هالشي ينعكس على ثقتهـآ بنفسها وبتحس ان كل شيء عادي وانها انسانه عاديه حالها حال اي طفله ثانيه؟!

:

اما لو شافتج حزينه ومتضايقه وتبجين ومكسوره..!!
بتحس انه فيه شيء .!!
بالتالي هي ايضا راح تنكسر وتحس بنقص او شي من هالقبيل.!!

/

اخيرآ ..
خالص الدعوآت بهالشهر الفضيل !!
لج ولبنتج يالغاليه
عسى الله ان شاء الله يبلغج فيها ويفرحج فيها ويحفظها ويحميها
ويشفيها ويؤتيها من فضله يارب!!
/

عسي ربي يريح قلبك دنيا وأخرة ويرزقك الفردوس
كلامك حيل يريح والله دايما أقول الحمد للة علي النعمة وعالبلاء
والله الي يكسر القلب أن أنا مو دايمة لها ما أدري عقب عيني شبيصير فيها والله الناس ما ترحم
من أمور أشوفها تخيلي عيال عمها يقولولها أنتي غبية ما نبي نلعب وياج ؟وتجي منهارة تبجي
بدون صوت ما تبيني أشوفها * واللة مواقف جدا صعبة عسي ربي يقويها ويرفع عنها

اللهم أني أستودعك أبنتي فحفظها برحمتك وأنت خير الحافظين

في مرااكز بره بامريكااااااااااااااا قوويه حيل لدرجه ان توصلها الجامعه شدعوه شفيها هذي الاخصااائيه ولاتكبرين الموضوع ترا والله شي عاادي بس بنتج يبيلها شوي توجيه
والله يوفقها ان شاء الله بس لاتحاتين

حبيبتي مدام اكتشف التخلف العقلي بعد 10 سنوات فاكيد انه بسيط وانا سامعه ان المتخلف العقلي المتوسط ممكن يشتغل ويكون اسره فما بالج ببنتج اللي فيها بسيط
وبعدين لوانا منج وصارلي نفس الموقف
اولا اطلعها من مدرستها واحطها في مدارس بطئ وصعوبات التعلم لوتقطين من فلوسج عليها اهم يصبرون عليها ومناهجهم مناسبه لقدراتها العقليه ويخلونها تكمل للثانوي
ثانيا لاتفكرين لحظه وحده تسجلينها بالمجلس الاعلي للمعاقين انتي تقولين انها من جميع النواحي طبيعيه ماعدا سالفه الاستيعاب الدراسي وهذي بنت اذا دروا الناس ان لها ملف بالاعاقه حتي باكر لي كبرت يوقف نصيبها واناعندي يقولون طيبه وعلي نياتها ولايقولون متخلفه

لاتخلين بنتج بمدرسه الحكوومه لأنها راح تتهمش

دخليها مدرسه خاصه والله يشافيها لج وتشوفينهااا دكتوره وعرووووس

يا بعد قلبي والله
الله يشافي بنيتج يارب صدقيني مالج شغل بالدكاتره انتي شنو اللي تشوفينه في بنتج صدقيني انتي بإيدج تقدرين تسوين كل شي يقولولج بسيط ولا شديد مالج شغل فيهم حطيها بعيونج
والله انا مريت نفس موقفج انا كاتبين لي بشهادة الاعاااقه انه ولدي يعاني من إعاقه ذهنيه شديده منذ الولاده انتي لما قريتي اللي كاتبته لج عن ولدي بالشهاده شنو فهمتي انه ولدي متخلف عقليا والله قلبت عليهم الدنيا عاليها واطيها وقلت لهم انتو علي اي اساس حطيتو انه ولدي شديده والله الحمدلله الف الف مره انه ولدي لاشديد ولا فييه شي والله أهم اللي متخلفيين الله ياخذهم وياخذ تشخيصهم بس يصرقعون الواحد والله قالو انه ولدي ما يسمع للاسف اكتشفت انه أهم صمخااان وما يسمعون
واللحين والله مالي شغل لا بدكاتره ولا احد انا اشخص ولدي واعرف شنو فييه وابرك منهم والله عزيزتي انه ولدي اذا صااار مريض والله اعالجه بالبيت ولا اعرف طريج المستشفي ولدي من اهمالهم صار فيييه فلونزا الخنازير وطلعته علي مسؤليتي وطقيتهم بالطوفه والله كانو بياخذونه مني بالغصب علشان اللي فيه بس ريلي وقف لهم ولا واحد قدر يوقف بويه وعالجته بالبيت ولا عزلته عن خوااانه مع بعض بالبيت
ادري حبيبتي طولت علليج بس ابي اقولج حطي بنتج بعيونج ولا لج شغل فيييهم وسوي اللي تقدرين علييييه وربي يسهل كل امورج يارب ويشفي بنيتج وتشوفينها بحسن حااااال
اسال الله العظيم رب العرش العظيم ان يشفي بنيتج
اسال الله العظيم رب العرش العظيم ان يشفي بنيتج
اسال الله العظيم رب العرش العظيم ان يشفي بنيتج

انا اللي فهمته انو البنت فيها بطء في التعلم..
وهذا مو شي يخوف.. بس يصير يبيلها تبذل مجهود اكثر من اللي يبذلونه اللي بنفس سنها..

واصلا خيره ان المدرسه قالت خلي تنقلينها..هذا مبين انهم مو مدرسه كفو للحاله هذي..لان اللي عنده بطء مو شرط يروح مدرسه خاصه..بس تصير البنت تبذل مجهود ازود عن زميلاتها..

بس انتي شوفي مدرسه سنعه تقبل فيها..سواء خاصه لحالتها ,, او عاديه بس لازم يفهمون الحاله ويتعاونون معاكم..
و بالبيت تبذل مجهود اكثر وخلصنا..السالفه مو كبيره ياقلبي هدي نفسك ولا تكبرينها

واذا على موقف المطعم..ترا عادي انا اشوف بنات والله كباااار مو صغار ونفس الشي ..السالفه تصير بسبب الشخصيه , يعني مافي جرأه وطلاقه..مو شرط من الحالة حق بطء التعلم..

انا بنت خالي كان عندها نفس الحاله..بس تدرين متى اكتشفوها؟؟؟
تخيلي لما وصلت الثانوي..كانت تآخذ السنه احيان بسنتين..وتبذل مجهوود بزياده عن زميلاتها..
ولا قدرت تدخل الجامعه لان ماجابت نسبه زينه<< هذا كله لان مادروا عن حالتها الا متأخر

انتي زين دريتوا وهي بهالسن يعني تقدرين تلحقين عليها..وترا لما تكبر وحتى الحين عادي طبيعيه زيها زي غيرها..بس انو في مجال الدراسه يكون عندها تأخر..بسسسس

يعني لاتضيقين صدرك وتحسين ان خلاص بنتك متخلفه..لا لا ترا طبيعيه..بس يبيلها متابعه زود عن اللي في سنها..بس

ولا تحطين في راسك انها غير عن الباقين.. والا هالشي بينعكس على تعاملك معاها وبكذا تنقلين لها هالاحساس..

والله يعينك على الاهتمام فيها وييسر امورك ويفرح قلبك لين تشوفينها متخرجه من الجامعه ومتزوجه بعد يااارب

حبيبتي ليش مضيقه خلقج عااادي اهم شي ان بنتج طبيعيع وتمارس حياتها بشكل طبيعي
اما من ناحيية الدراسه فهذي قدرات وانا مدرسه ويصادفني هالاشياء ساعات تلقين طالب استيعاب سريع يعني يفهم من اول مره وفي طالب وسط واتوقع انهم الفئه الاغلبيه يفهمون من المره الثانيه وفي طلبه بطيئين الاستيعاب مو لعيب فيهم بس معناته انهم يحتاجون لتكرار المعلومه اكثر من غيرهم حتى تثبت المعلومه وما فيها شي اذا وديتيها المراكز المختصه لانهم راح يراعون هل حالات اما بالمدارس العاديه فالمدرسه ماتلحق عرفتي فانتي ليش ماخذه الامر بسلبيه بالعكس ترى في وايد نفس الحاله بس اهلهم مصرين يخلونهم بالمدارس العاديه مما يؤدي الى رسوبهم وضياع عمرهم لانه اساسا حتى الابلات الي بالمدارس العاديه بعضهم غير مؤهلين لمثل هذه الحالات اما اهناك بيراعون بنتج وبيعطونه الاهتمام والموضوع اولا واخيرا بيدج وانتي استخيري
واسال الله العلي اعظيم ان ييسر لك الخير اينما كان

للي ردو علي أسأل الله العظيم أن يبشرك بما يسركم ويسعدكم بالدارين ويرزقكم راحة البال

ويبلغكم بأولادكم ويرزقكم الصحة والعافية ويلبسكم لباس التقوي والأيمان اللهم أمين

عورتي قلبي حبيبتي
ذكرتيني بنفسي قبل سنيتين
ثقي بربج وان شاء الله بيبلغ عيالنا الشفا ويرزقهم نعمة العقل والصلاح

كلنا هني امهات التحدي بدات فينا القصه بالصدمه .. وبعدها الرفض .. واخيرا تبدا فينا تقبل للامور
اللي صار فيج مرينا فيه كلنا امهات التحدي .. لكن الصبر هو مفتاح كل وحده فينا

اول شي تسوينه حبوبه تروحين تسوين لها اختبار قدرات ويفضل انج تسوينه بخاص
مركز تقويم الطفل بالسره ممتاز ويمدحونه

وعليه تحددين مستقبل بنتج .. الإنسان لا يعلم الغيبيات فديتج وكل واحد فينا لازم يمسك مصباح الامل بيد
ومصباح الصبر بيد حتي يقدر يكمل مسيره ومثل ماقالت لج الاخت (( لحظات ))

انتي بالنسبه لها الحياه .. علميها وعايشه الحشاش مثال للام الصبورة

اسأل الله العظيم رب العرش الكريم ان يشفيها

لا يا قلبي لا يضيق صدرج كلنا مرينا بلي انتي مريتي فيييه ذكري ربج حبيبتي وربج موجود
عسى ربي يشافي بنيتج يارب ولا يضيع تعبج معاها