بنات تكفون الافنيوز!! اه

بنات بدش بالموضوع على طول
اذا زوجج قالج انا رايح الافنيوز مع ربعي بنقعد بالقهوه::: ترضون عادي؟؟؟؟؟
بنات انا لما زوجي يبطل هالسالفه معاي احس بموت والله
والله والله والله والله والله مو مسألة شك صدقوني انا واثقة فيه اكثر من نفسي زوجي ماعنده هالسوالف بالمره بس للاسف من بطل هالافنيوز واخوانه وربعه اسبوعيا يتواعدون فيه يقعدون بو ساعتين بالقهوه والمصيبه مايروحون الا يوم الجمعه وبعد الساعه سبعه وانتو اكيد شايفين الاشكال اللي يتمشون هالحزه هناك
أغار بهبل عليه ما ابيه يشوف هالبنات كل ثنتين مع بعض ضحك وخز بالشباب ولبسهم ومكياجهم ينرفز يخلي اللي ما يشوف يخز اللي يشوفهم يقول رايحين حفله مو سوق
بنات والله لما ادق عليه ويقولي قاعد بالافنيوز احس كنه حاط سجين بقلبي اقعد اصارخ عليه بدون ما احس بنفسي وادز له مسجات عشان اكرهه بالطلعه ويرجع البيت. اقعد ابجي كنه احد ميت عندي
والله مو بيدي اغار عليه بشكل مو طبيعي مابيه يشوف هالاشكال
قبل الافنيوز كانت حياتنا جنه . ما نتزاعل ابد . كله قاعد عندي او عند اهله او بالدوانيه .
شدعوه الدواوين ما صارت تعجب هالشباب الحين ,صاروا مايتجمعون الا بهالقهاوي اللي بالافنيوز؟
بنات صارت حياتنا كله هواش ؟؟ انا ماالومه يقولي انتي تبي تتحكمين فيني؟ مو عيب عليج تشكين فيني؟ بعدين كلهم يطلعون اقعد انا بروحي بالدوانيه؟؟ تحملني اكثر من مره بس الحين احس راح اخرب بيتي بيدي بسبت هالغيره احسه قام يبعد عني" يقولي تفشليني عندهم ما كو احد من اخواني والا ربعي يدق تلفونه الا انا حتى مسجات ما يبطل تلفوني بسبة حنتج
اخر مره قبل امس لما دقيت عليه وقالي قاعدين بالافنيوز قمت ابجي واصارخ وادز مسجات خايسه بدون ما اثمن كلامي لدرجة انه دز لي مسج انا صبرت عليج وايد والحين طقت جبدي
احنا ما نصلح لبعض انتي ماتحترميني وانا ما ابيج خلاص…………………
وااااااي بنات حسيته عطاني طراق من قلب صحاني
حسيت اني صج مصختها وان بيدي كرهته فيني وان اللي كنت اسويه عيب واكبر غلط
بس والله والله غصبن علي احبه حيييييييل واغار عليه حتى من انه يشوف احد غيري
ادري غلط و حاولت اكثر من مره بس طاري الافنيوز يخليني بدون عقل
تكفون ساعدوني شسوي
بخسر زوجي بغبائي

الله يصبرج ويعينج ويحفظلج زوجج

حبيبتي ما يصير جذي . كلنا نغار وصج البنات صايرين على سنقة عشره بس شتسوين بعد هذا مو حال تحطين نفسج وريلج فيه

قاعده تسبينه وتفشلينه جدام ربعه وتضايقين عمرج وصدقيني شي ما يسوى

ادعي الله يحفظه ويسخره لج ويبعد عنه بنات الحرام .. لي قالج جذي كلميه بسنع و وصيه يدير باله والله عليه حافظ

تأسفي منه وقوليله هذا من زود حبي أغار ورقعي الكلام اللي قلتيه ..

وبعدين اهوا رايح مع ربعه واخوانه .. وقاع يقولج وين رايح حمدي ربج .. في ناس ما يقولها اهوا وين ولا تدري عنه .. فحمدي ربج عالنعمه اللي انتي فيها غيرج على كلامج ممكن اييلها طراااق صجي يصحيها مو كلام

نفس كلام z8rtia لا تخربين حياتج وكبري عقلج رايح الافنيوز مو دسكو حبيبتي عادي مافيها شي

ليش جذي تسوين
تخربين حياتج بيدج
مثل ما انتيتبين تطلعين وتروحين
ترى هم الرياييل جذي
تحملي ياقلبي
وروحي اعتذري منه
وحبيه على راسه
فهميه انه مو قصدج
دام انتي واثقه منه ليش جذي تسوين
طرشيله مسجات واهوه قاعد احبك مشتاقتلك …. الخ

لاتخربين بيتج بيدج
اعتبريه رايح الدوانيه

حاولي روحين معاه هالقوه بالذات

خلي طلعاته وقعداته معاج مو مع ربعه او اخوانه عشان بالتدريج يخف ويهون

ما اقول الا الله يصبرج حبوبه

ادري هالشي ينرفز ويضايق شي طبيعي بتغارين بس صدقيني لاتحسسينه يعني اذا قالج بروح قوليله اوكي حبيبي بس لاطول علي راح اشتاقلك
وخليه لادقين عليه صدقيني اهو من نفسه راح يقولج ليش مادقيتي علي ولا سالتي عني
واشوي اشوي اهو راح اييج لان بفكر انتي بشنو منشغله عنه
لاتخربين بيتج

حبيبتي انتي وايد مكبرة الموضوع, و منو قال لج ان الافينيور للمغازل؟ و وين سنعتي ان الحريم يخززون الرياييل؟ انا من رواد الافنيوز و بحياتي ما شفت الي تتكلمين عنه, مجمع عائلي 100% اغلب البنات الي تشوفينهم مع اهلهم او رفيجاتهم يبون يغيرون جو مو رايحين للمغازل, الشباب اهم الي يتحرشون بالبنات و مادام واثقة من ريلج ليش تسببين مشاكل من ولا شي؟ لا تخنقين الريال لا يطفش منج, انا بالعكس استانس اذا ريلي راح الافنيوز او اي مجمع مع ربعه, على الاقل يغير جو من ديوانيته القمته الي لما يرجعلي منها ريحته زقاير قويه, مدام الثقة موجودة حطي فبطنج بطيخة صيفي, حطي فبالج ان لو حصل وبنت خزته الا اهو ريال بمعنى الكلمة راح يصد عنها, حطي الشي الايجابي فبالج لان الشي السلبي راح يهدم حياتج لا سمح الله
الله يسخر ريلج لج يا رب

الله يكون بعونج
صج شعوريضيق الخلق
دايما استودعيه الله وقعدي استغفري علشان ربي ينزل الراحة و الطمأنينة بقلبج وهو هناك

كلامكم عدل بس شسوي والله حاولت اكثر من مره اريح بالي اشغل نفسي بس من يجيب موضوع الافنيوز مخي يضرب اقعد ابجي واصارخ مثل الهبله واقط كلام استحي حتى اقوله لكم
بس لما يرجع وهو مطنقر وزعلان اصحى واحاول اراضيه .مقدر على زعله
بس مااحب الافنيوز عساه يحترق

الله يعيينج ويآجرج

استغفر الله العظيم
والله زهقت واحسه زهق مني
انا مو جذي ولا كنت جذي بس الافنيوز قلب حياتي فوق حدر
بصراحه اهو مرات يروح مع اخوه ورفيجه (مو متزوج) واثنينهم احسهم مو تكانه ومابي زوجي يكون معاهم اخاف يقطن حجي على جم بنت
والله اعصابي احترقت ونفسيتي صارت صفر

حبيبتي كبري عقلج وشفيه الافنيوز مافيه شي !!!!!! قتلج كلنا نغار بس نصير أكبر من هالسوالف

شلون حاولتي؟ .. حاولي اذا قالج بالافنيوز تقوليله اوكي دير بالك .. مو تسبينه

وبعدين حطي نفسج مكانه رايحه الأفنيوز يوم اليمعه ..

أحد بيدري عنج بهالزحمه !!؟ ولا انتي بتلقطين ويه أحد من الزحمه ؟؟
كلن بحالو صدقيني وريلج نفس الشي بحاله مع ربعه ..
إنتي قاعده تحطين أفكار بمخج مالها داعي.. شكو خو البنات كل مكان .. لا تحطين ببالج انه الأفنيوز كله بنات بيوقفون يطالعون ريلج .. ليش مهند ؟

سوري عالكلام بس قصدي أصحيج ..

كبري عقلج .. و حسبي حساب احساس ريلج وخافي على بيتج..

الله يعينج
بس أنا أقول الي يبي يشوف يشوف ما يهمه أحد والتكانه تكانه لو منو تحرش فيه
وانت تقولين ريلج واثقه فيه فليش المشاكل أدري أن قهر بس تحملي والله يبعد عنه وعن رياييلنا بنات الحرام
ان شاءالله

الله يصبر قلبج بس ويهديكم ويسخركم حق بعض المفروض تقعدين وياه واتفهامين معاه ونصيحه لاتخربين بيتج بيدج والريال هم له حق يطلع مثل ما احنا نبي نطلع ولازم تكون الثقه موجوده بينج وبينه والله يوفقكم انشالله