بنات الآداب وبنات التربية نوريني وفهموني وادعيلكم

السلام عليكم ورحمة الله وبركاته
خواتي عفية ابيكم تقولون لي طبيعه الدراسة بكلية الآداب وكلية التربية
ان شالله بتخصص انجليزي
بعرف شنو المواد اللي لااازم ادرسها بكلية التربية لأني عرفت من احد المواقع مواد كلية الاداب انجليزي فأبي اعرف بس عن مواد التربية انجليزي
شي ثاني:
شلون طبيعة الدراسة في كلا الكليتين هل هناك الزام بشرح أو شنو طبيعه المشاركة بمواد الكليتين
شي ثالث انا خواتي قالوا لي شلج بعوار الراس ليش ماتدخلين التربية اسهل بس انا يابنات ابي اتقن اللغة الانجليزية واتحدث فيها كأنها لغتي الام مابي اصير مدرسة أنا بخاطري اصير مترجمة مثلا
ومشكورييييين

هااا وينكم؟؟!!
توقعت القى ردين ثلاثة !! شدعوة ١٦ وحدة شايفين الموضوع اتمنى احد يجاوبني

وعليكم السلام ياهلا
انا مستجده بالآداب فـ ماعندي خلفيه واضحه عن هالموضوع
بس اللي اعرفه ان التخصص بكليه التربيه أسهل حسب مايقولون
بالآداب من اسمه أدب فـ أتوقع دراسته تكون بعمق :
ودامج ماتبين تصيرين مدرسه عيل درسي بالآداب لا تفكرين بالتربيه ، التربيه دايركت تصيرين مدرسه
وانشالله تقدرين تصيرين مترجمه اذا تخرجتي من الآداب
وعن طبيعه الدراسه انشالله يفيدونج البنات
بالتوفيق =)

مشكوووووورة عيون الحب ماتقصرين وان شالله البنات يفيدوني

العفوو حبي ولو

اب اب اب

الووووووووو!!

وعليكم السلام ياهلا
امم طبيعه الدراسه طبعن مثل ماقالتلج "عيون الحب" التربيه دراستها اسهل لكن الوظيفه تعب احس
وبالنسبه للمواد تختلف ع حسب ..يعني اذا بتخصصين انقلش ابتدائي او متوسط وثانوي
و هاذا موقع الجامعه

https://www.kuniv.edu/ku/Students/Programs/index.htm

اختاري كلية التربية وبالصفحات نزلي لي يطلع لج تخصص انجليزي وحاطين لج المواد

شنو قصدج بإلزام شرح..قصدج برزنتيشن؟ ..اكيييييييد لازم سواء تخصصتي اداب او تربيه

نصيحه لاتخلين احد يضغطج ع شي ماتبينه حبوبه
و لاتدشين بس عشان تتقنين اللغه ..اكو دورات ومعاهد للهشي..
واستخيري وشوفي شنو تحبين وشنو ميولج وتالي تخصصي ..وبالموقع حاطلج كل الكليات مع التخصصات ان شاء الله تلاقين التخصص اللي يصلح لج

موفقه ~

*مادري والله توني مستجده بس لو انا كنت محتاره بين تربيه [ انجلش ] واداب [ انجلش ]

بختار الاداب حتى لو كانت اصعب اهم شي المستقبل واقدر انقي الوظيفه

اللي ابيها عكسس التربيه ع طووول تربيه ومالج غيرها (لانها شهاده خاصه) ><"

*واهم شي استخيري واختاري اللي يريّحج والله يكتب لج اللي فيه الخير

اتقان اللغه مايعتمد على تربيه او اداب ..
المهم انج تطورين من نفسج وتتعلمين تعليم ذاتي بالدرجه الاولى
لأن الدكاتره بالجامعه يعاملون طلبه الانجليزي على انهم فاهمين
اللغه مو يفهمونج اللغه ! ف لآزم تكونين طموحـه وحآبـه الشي هذا
وتجتهدين فيـه ..
التربيه اسهل نسبيـا ً .. مع ان مواد التخصص كثيره ..
لكن عندنا مواد الاعداد المهني .. اللي تهيء الطلبه في كليه
التربيه على انهم يكونون مدرسين بالمستقبل ..
والاداب دراستها بتعمق اكثر .. وبمآ انج تبين تصيرين مترجمه
دشي أداب وتخصصي ترجمه ,

متطلبآت التربيـه
على ثلآث كورسآت كل كورس تاخذين فيه ماده والمواد اهي ..

انجلش 141
الكورس اللي بعده
انجلش 142
الكورس اللي بعده
مقدمه في الادب
وشرط ماتقل درجتج بالمواد عن c

وبعد ماده مقدمه في الادب تتخصصين ..
اما بالاداب مادري شنو المتطلبآت ..

موفقـه حبيبتي وأي سؤآل لآ يردج الا كيبوردج

حبااايبي بنات فرحتوني بردودكم ..أنا مابي دورات ..أبي شهادة ..ابي اصير خريجة آداب ..بس مثل ماقلت لكم خواتي خوفوني ..مع انهم مومجربين الاداب..
إحساس مشكووورة غاليتي ماقصرتي ..
انزين ترا انا مااعرف نظام الجامعه..شلون اقدر آخذ 4 نقاط ؟؟أنا زوجي شرح لي شوي ومافهمته هو موفاضيلي اصلا هههههه
يقول من اول كورس آخذ a بمواد الكورس الاول عشان اظمن المعدل الحلو
بس انا بفهم يعني باجي الكورسات عادي اخذ c والا f مثلا ؟؟؟؟
أنا عندي عيالي ادرسهم متوسط وابتدائي هل راح أقدر أوفق بين دراسة الآداب وبين دراستي؟؟
اللغة الحمدلله انا تقريبا متمكنة منها وأمارسها ع طووول وأسمع اخبار الجزيرة بالانجلش واشوف افلام غير مترجمة
وابي تفهموني هل اذا نجحت بامتحان القدرات فوق 70% هل راح ينلغي التمهيدي؟؟
ومشكووووووووووووورة عسى ربي يحرم ايدج وكل جسدج عن النار يارب

ماعندي تجربه انا خريجة تطبيقي

لا حبيبتي مو عادي !!

الكورس الاول لازم تجيبين a عشان تضمنين انه معدلج يضرب يصعد فوووق
عكس لما اول كورس سي وبي ودي … ما راح يصير اساس المعدل قوي عرفتي ؟؟

لازم من اول كورس تشدين حيلج تأسسين معدل حلو وممتاز
حتى باقي الكورسات
الاف يعني رسوب يعني تلعبين بالمعدل
والسي اقل من البي .. جيد يعني
انتي تجنبي هالدرجتين
خلي طموحج أ و ب

مادري
اتوقع بس اللي يسقطوون بالامتحان هم اللي ياخذون تمهيدي
انتي شدي حيلج بالامتحان عدددددل عشان تنجحين وتدشين دايركت مواد مايضيع كورسج الاول بس تمهيدي

بالتوفيق قلب

اها
حلو
مشكووورة جوري الحين بديت استوعب السالفه مشكووورة ياقلبي

أختي أنا أدرس آداب انجليزي وتخصصي المساند ترجمة. اذا تبين اي مساعده راسليني وماراح أقصر معاج ان شاءالله.

بالنسبة للكليات: أولا، إذا تبين تدريس دشي تربية وترا موادهم سهلة وما أحس بتستفيدين منها وأغلب تركيزهم يكون على مواد التربية بس.
أما الاداب، موادنا أحلى والتخصص تدرسينه بضمير وماكو شي صعب إذا درستي وترا يعتمد على الدكتور بعد مو المادة بس يعني الدكتور يصعب أو يسهل المادة والطالب بذكائه ومجهوده بس
أما سالفة المعدل، تقدرين اكيد تاخذين 4 نقاط اذا حذيتي بكل المواد a
اما ال f , C السي تنزل المعدل والاف تعني سقوط يعني تعيدين المادة فاكيد المعدل ينزل!! وفوق هذا تاخرين.

أنا عن نفسي أنصحج بالاداب لأن الخيارات عندج وايد: مثلا اداب انجليزي في لغويات وهذا خاص لكل شي باللغة وشوي علمي يعني مثلا فيه قواعد واتصال اللغة بالمخ وامراض متعلقة باللغة وجذي والتخصص الثاني ادب وهذا للي يحبون يقرون ويحللون.

انتي تختارين تخصص واحد منهم بس والشي الثاني اذا انتي حابة ترجمة، اخذي تخصصج المساند ترجمة، انا ترجمة وحابة التخصص بس يبيله طالب شاطر بالعربي والانجليزي ولازم تكونين قوية بالقواعد وعندج ثروة لغوية كبيرة.
التخصص حلو ومواد الترجمة 8 مواد تترجمين من عربي لانجليزي وبالعكس.

الله يوفقج ان شاءالله واذا بغيتي شي لا يردج الا الكي بورد وانا ما راح اقصر معاج لأن حاسة فيج وذكرتيني بنفسي اول ما دشيت الكلية كنت كله ضايعه وما اعرف شي.