انفلونزا القطط

السلام بنات

أنا كاتبه هالموضوع من فترة واليوم قررت أنزله… وحبيت يكون مرجع لي و لغيري وعلى قولة المثل إسأل مجرب و لا تسأل طبيب …

تجربتي مع قطوي و الانفلونزا

طبعا الموضوع مبين من عنوانه وصلني Blue هدية يوم عيد ميلادي وكانوا مسبحينه واليوم الثاني قام يعاطس وانا حسبالي من الغبار، وديته عيادة الدهماء عند دكتور جوزيف عشان الجيك اب والتطعيم قالي فيه "فلو" انفلونزا وما راح يتحمل التطعيم وعطاه ابرة مضاد حيوي ونوعين حبوب قالي ابلش فيهم من ثاني يوم وكان فيه شوية جرب بإذنه عطاني قطرة اسمها EARMITEfree وقال راجعيني عقب خمس ايام للتطعيم رديت البيت وقطوط لي الحين احسه تعبان و بالليل زاد العطاس ماله و بدى خشمه يصبصب و أنا أول مرة أشوف جذيه حالة وضاق خلقي عليه هاللي دخلت هني و طلبت مساعدتكم و ما قصر كل من رفع الموضوع و دعي حق قطوطي و سمعت نصيحة اختي VET-Nour و قلت اراجع دكتور ثاني ، موقصور بدكتور جوزيف ، دكتور جوزيف برأيي ممتاز و طول عمري كنت اوديله قطوتي الاولى " دكتور جوزيف دكتور صح بالمكان الغلط " العيادة اهيه اللي تعبانه و تلوع الجبد ، المهم قررت احجز موعد عند مستشفى رويال لأن علاج دكتور جوزيف ما برد جبدي و لأن و الاهم انه قطوي لما صار اليوم الثاني و كسرت له الحبوب المطحونه على الأكل ما رضي ياكل و لا قرب صوبه مع اني حطيتله كذا نوع اكل ، و اذا ما رضي يا خذ الدوي أكيد حالته بتصير أسوأ .

راجعنا يوم 6/3 عند دكتورة جيل مولين بمستشفى رويال كشفت عليه و قالت انه معاه انفلونزا و سألتني معاه اسهال او ترجيع قلت لها لأ قالت انه هذي علامة زينه اني لحقت على الانفلونزا بأولها و ماسكت لما يتطور الوضع للأسوأ ، و انه كل مابدى العلاج أبكر كانت النتيجة أحسن ، وريتها الحبوب اللي عطاني اياهم دكتور جوزيف و قطرة الاذن قالت اوكي قطرة الاذن ما فيها مشكله بس الحبوب قطيهم بالزباله لأنهم "ستيرويد" منشطات تخلي القطو يحس أحسن بصورة مؤقته و بعدين يتدهور بسرعة ، وقالت انه طبيعي القطو ما راح ياكل و ياخذ العلاج لأنه اهوه اوردي مريض و حاسة الشم عنده ضعيفة و نفسه مسدودة عن الاكل شلون و اهوه يشم فيه ريحة دوا وريحة غريبة شي طبيعي ما راح ياكل ، عطته ابرة أعتقد مضاد حيوي و ابرة عشان الحرارة و قالت لي اسوي له حمام بخار حتى لو ربع ساعة مرتين باليوم و ما احطله اكل غريب و اخليه دافي و عطتني قطرة حق عينه اعتقد بنسلين إسمها Fucithalmic " مع اني ماكنت احس عينه فيها شي بس بعدين اكتشفت انه انفلونزا القطط تأثر على العين لأنها مع الأيام صارت حمرا وتدمع أول اليمين بعدين اليسار ، والبنسلين علاج يحمي العين و يخليها نظيفة و يفتح مسام الخشم و الدليل اني كل ما اعطي القطو القطرة يقعد يعاطس يعاطس و بعدين يروح يم الأكل لانه يبدي يشم أحسن " و قالتلي الدكتورة اراجعها كل يومين عشان ابرة كورس الابر …..

و تميت اسبوع اوديه يوم و ترك عشان الابرة و اقطر بعيونه مرتين باليوم و أسوي له حمام بخار مرتين باليوم ربع ساعة مع قطنة فيها شوي فكس بس من بعيد جدام خشمه ، وافتح الدرايش عشان التهوئة واخليه بفراشه دافي ومرتاح و احطله ويت فود لأن البسكوت ماياكله عشان حاسة الشم عنده ضعيفة وحتى الماي كنت اخليه دافي بس ماكان يشرب ماي وايد ، و الدكتورة مع المراجعات انصحتني احط ماي دافي وشوي فيه ويت فود يصير مثل الشوربة الدافية ، سويتها له ووايد حبها ماكان يشرب سوائل الا هالشوربه ، كان ينام وايد بس الحمدالله ماكان فيه لا اسهال و لا ترجيع ، وكنت اسأل الدكتورة في أمل يتحسن كانت تقول ان الانفلونزا لما تحوش قطو صغير حيل أو كبير حيل بالعمر يصير صعب يتعالج ، وزيادة اذا مناعته ضعيفة نتيجة للتزاوج بين قطاوه يصيرون حق بعض يعني اخوان و هالسوالف ، كل ماصار القطو انتاج من قطوين غريبين صارت مناعته الطبيعية أقوى و العكس …. " عشان جذيه أغلب قطاوة سوق الحمام صحتهم ضعيفة بسبب هالشي زائد الاهمال والرعاية الX"

لما خلص كورس العلاج Blue بدى شوي يصير أحسن و يحاول يلعب بس بالالعاب القريبة منه يعني مافيه شدة يركض لأنه صدره تعبان ، قالت لي الدكتورة استمري على القطرة و البخار وخليه يرتاح اسبوع ويصير أقوى و بعدين نطعمه …

مشى الاسبوع تمام وكنت ماشية على العلاج بالساعة و الدقيقة ، وفرحت لما القطو بدى حقيقة يتحسن ،لعبه زاد وقام يناقز وينظف نفسه " كنت أنا أمسح ويهه قبل ماكان فيه شدة ينظف روحه " صار تقريبا قطو طبيعي قلت الحزن خلص و غدى شرنا قعدت أعد الأيام عشا ايي يوم التطعيم وترتفع مناعته وأقدر أسبحه ، قبل موعد التطعيم بيومين قمت الصبح و لا اهوه مسوي اسهال :/ شنو ضاااااق خلقي وإكتأبت بس قلت يمكن من الحليب لأني وقتها كنت أعطيه حليب مخفف دافي عشان أشجعه يشرب سوائل ، وقفت الحليب و قلت بأوقف عنه الويت فود و اعطيه بسكوت بس المشكلة كانت انه لي الحين حاسة الشم عنده ضعيفة و مستحيل ياكل الدراي فود ، فقمت و خلطت الدراي فود بشوية صلصة من الويت فود و الحمدالله أكل شوية ، بس للأسف على نهاية اليوم بليل تعب زيادة ، ما أدري شصار فيه أقعده بحضني ينام أحاول العبه ينام أشيله أوديه الصالة يرجع غرفتي و يقعد بفراشه و ينام ، قلت خله يمكن باجر يصير أحسن و دقيت قدمت الموعد ماله ويالله وافقوا بصعوبة لأنه زحمة ، المهم لما صار الصبح و لا اهوه كلش تعبان وعفوا بس سوائل صفرا تطلع من خشمه وشي ابيض يطلع من حلجه مثل رغوة وعيونه اتدمع ، أنا مت من الخوف قعدت اشيله و أحركه .. أحاول أخلية يمشي يتحرك مو راضي كلللللش ، حتى مايمشي بس خطوتين و يقعد ، و المصيبة الكبيرة انه صااام ما رضى يحط بحلجه ولاشي، طرت فيه الطبيب قالت لي الدكتورة شفيه ؟ ليش صار جذيه ؟ قلت لها ما ادري؟ قالت شلون أكيد فيه سبب ، صحته تدهورت وشكله صار أسوأ حتى من أول مره يبتيه ، فحصته وكانت حرارته اربعين تخيلوا حبيبي ، المهم اسألتني وايد أسأله و عرفنا أخر شي انه احتمال حمام البخار والتكييف اهوه اللي ضره لأنه وقتها الجو بدى يحتر و شغلنا التكييف بالبيت و لما كنت اسويله بخار و اطلعه كان الجو بالحمام دافي و بره برد فانتكس " الحين عرفت ليش كان يقعد فوق الرسيفر ومايرضى يتحرك ، حبيبي لأنه الرسيفر دافي واهو بردان" ، و لأنه صحته اوردي ضعيفة لما انتكس النكسة صارت قوية و نصحتني أخليه عندها بالمستشفى يومين عشان ينزلون حرارته ووافقت لأنه قطع قلبي و كنت خايفة ارجع فيه البيت يموت ، و هالشي كان فوق طاقتي ، المهم خليته عندهم حبيبي وقالوا لي اقدر ازوره من ثمان الصبح لي ست المغرب إذا أبي ، ثاني يوم العصر قبل لا ازوره دقت علي النيرس وقالت لي إذا تبين تقدرين اتيين تاخذينه لأنه حرارته استقرت وبدى شوي ياكل ، بس البيت أحسن له و انظف لأنه مستغرب من المكان عندهم ….

رحت لقيت حالته تكسر الخاطر ضعفان وذبلان ودايخ بس اللي فرحني انه على الأقل كان واقف على ريله ، السستر انصحتني اخليه بمكان دافي وأوخره عن التكييف وأقطر بعينه وأمسحها بجاي "شاي" دافي وزياده عطوني مرهم قابل للأكل اسمه Felisine لون العلبة أخضر والكريم بني أخذ منه كمية صغيرة بأصابعي وأدهن حلجه فيه من داخل عن الفطريات مالت الحرارة مرتين باليوم … واستمر بالتهوئة والأكل والسوائل الدافية وقالت لي انه عطوه مضاد حيوي يستمر مفعوله لعشرة ايام ، وانه الحين مو محتاج الا الرعاية المنزلية ومايحتاج اراجعهم الا اذا لقيته تعب زيادة أووقف اكل ، رديته البيت حبيبي كان فرحان قام يتمشى شوي شوي و يتمسح بريولي "حسباله رحت وخليته" طفيت التكييف وقعدنا اربع ايام بالحر عشانه ، امي قامت تقول يامن شراله من حلاله عله ، بس كان كاسر خاطرها حتى عطتني "مره" عشان اشربه و امسح عينه فيها وسويتها بس ماقلت حق الدكتورة خفت تزفني ، الحمدالله عقب ايام بدى يتحسن العطاس خف وعيونه صارت صافيه وتكرمون الاسهال وقف وافرازات الحلج وقفت وخشمه قلت افرازاته وعفوا عالشرح بس بدت تصير شفافه عقب ماكانت صفرا ، راجعنا عقب عشر ايام قالت الدكتورة انه الحمدالله وايد تحسن وزال عنه الخطر بس ماودها تطعمه وتستعيل عليه ، قالت لي استمر بالقطرة مالت العين وكريم الفم مرة باليوم ، وعطتني علبة صغيره فيها محلول ملحي NormalSaline عشان اقطر منها بخشمه عشان اساعده ينظف مجرى الهوا ، ردينا شغلنا التكييف بس حطيت بفراشه " مطارة الماي الدافي اللي استعملها وقت الدورة " لفيتها بويه مخدة وحطيتها على كتر عشان اذا استبرد يدني يمها أحسن له من الرسيفر.

عقب اسبوع الحمدالله وااايد تحسن وصار يلعب وخشمه نشف و خف العطاس لي عطسة ولاثنتين يعني طبيعي ، حتى العطسة قبل كان معاها سوائل بس مع العلاج صارت ناشفه ، سبحان الله مثلنا احنا البشر ….

و أخيرا بيوم 5/4 عقب شهر كااااامل من المعاناة طعمت حبيبي Blue ، وكتيت عليه نون بمناسبة انه صار له شهر عندي |و انه طاب ، صج ارتفعت حرارته شوي من التطعيم وكانت بزيادة لأنه صحته ضعيفة بس الدكتورة عطته ابرة خافض حرارة عقب خمس ايام يوم 10/4 والحمدالله ماشاء الله ماشاء الله صار احسن ومن ثلاث ايام سبحناااااه أخيرااااا وسشورنااااه عدل وطفينا التكييف وحبسناه ببيته لما نشف وصار اينن والحمدالله عاطس شوي بس عدت على خير، وعقب شهر عنده تطعيم ثاني ان شاء الله …

وبس ، أدري تكلمت واااايد بس حبيت أوثق تجربتي مع انفلونزا القطط ، و على فكرة انفلونزا القطط ماتعدي البشر ولا تعدي الحيوانات الثانية ، بس تنتقل من قطو لي قطو ….

أتمنى الموضوع يكون نافع ، أسفه عالهذرة