انا وحمولتي والمطبخ

يمكن مو متعودين عليج معاهم في المطبخ او مو متعودين على طريقه طبخج لان كل بيت غير عن الثاني

واستحملي وطوفي دام يعاملوج زين

السلام عليكم
اولا حبوبه العصبيه ماتفيدج خلج دايما ريلاكس وعامليهم بالمثل يعني على قولتج حسسوج انج غبيه محشومه طبعا حسسيهم انهم اغبى وقوليلهم تعالوا شوفوني عند اهلي بعدين اضحكوا

ولاتاخذين الامور بجديه ضحكي لما يسوون معاج جذي اخذوا القفشه من ايدج فتحي الدرج (( اليراره )) واخذي ثانيه ودزيهم وقوليلهم زوجي يبي الطبخه من ايدي مو منكم لو سمحتوا المطبخ يتعذركم طبعا على مزح مو تاخذين الموضوع جد عشان لاتقلبين حياتج نكد

الحموله يبيلهم وحده ملحلحه مفتحه باللبن ههههه كلمات وايد اسمعها ومعناها حركيه ولهلوبه بالبيت وبالسوالف بعد
ودام يحبونج وماشفتي منهم شي يجرح فمعاملتهم هذي من زود الميانه وصدقيني شي عادي مااحس انه مشكله شوفي مشاكل غيرج اللي حمولته مابقى عيب ماحطوه فيها اهي نازله يسمعونها كلمه واهي صاعده يسمعونها كلمه احمدي ربج وقولي الله لايغير عليج فيهم

اخذي الامور دايما من منظور سليم علشان تمشي حياتج وماتتعبين

الله يسخرلج كل خير حبوبه ولجميع المسلمين

تقبلي رايي
تحياتي

السلام عليكم

حبيبتي اخذيهم بالكلمة الحلوة والغشمرة وقولي لهم زوجي يحب طبخي لو كان موشي واهوا وصاني اني اطبخ له كل شي بإيدي .. وقوليلهم حبيباتي انتوا ارتاحوا وريحوا نفسكم اي شي يخص زوجي انا مسؤوله عنه … نصيحة يا اختي لا تسمحين لأحد يتدخل بحياتج من البداية وإلا راح تفلت منج زمام الأمور … بس لا تشدين ولا تعصبين كلشي بالهداوة والضحك ودايما خليج هادية لأنج إذا عصبتي وشافوج متضايقه راح يفرحون فيج ويستمرون بهالسوالف .. حاولي انتي اول وإذا ما تغيروا كلمي زوجج يقول لهم لحد يتدخل بزوجتي إذا دخلت المطبخ بس برضو بدون عصبيه ولا صراخ عشان ما تكسبين احقادهم وكرههم .
وحبيبتي خالتج كثر ما تكونين زينه معاها راح توقف معاج ويمكن لأن البنات حسوا بإهتمام خالتج فيج حسوا بنوع من الغيرة .. هذا شي طبيعي وراح يزول مع الأيام … خليج حكيمة بتصرفاتج …ولا تتنازلين عن حق لج … عطي الناس حقهم واخذي حقج

موفقة خير حبيبتي …. ويارب ما نسمع عنج إلا كل ما يسر

حديث التوت

حبيبتي يمكن اهم مستحين منج لانج توج تعتبرين انج عروس ومومتعودين عليج تشتغلين جدامج بالعكس حمدي ربج يطبخون عنج ولا انهم يغثونج او يقهرونج بالرايحه والرااده .. صدقيني شوي شوي راح يصير الشي عادي وتسوين اللى تبين

وسعي صدرج وديري بالج انج اتعصبين اذا اهم زيينين معااااج كسبيهم بصفج
انا اقولج اشلون حاولي اتقسمون الشغل عليكم وكل وحده لها يوم اتعلم الباجي طبخة معينه وحاولي انج تسولفين معاااهم وتتغشمرين بامور الطبخ خليهم يحسون انج اتعرفين امور كثيره
او قولي لهم اليوم بعزمكم علي طبخه من ايدي وابيكم تذوقونها
بس نصيحه مني يالغاليه لاتعطينهم اكبر من حجمهم يعني لاتبينين لهم انج شاااطره بالمطبخ واااايد بعدين راح يصير عليج الشغل كله واذا ربج رزقج بالذريه الصالحه وانتي حامل وحسيتي بالتعب راح يلومونج اكيد نايمه ماتبي تطبخ ينقلبون ضدج
تشاركو بالطبخ احسن واي معلومه يديده احتفظي فيها حق نفسج وان شالله ربي يرزقج في بيت ملكج سوي اللي اتسوينه
هذي نصيحتي واتمني انج تتقبلينها

قولي الحمدلله ….وكرريها …..والحمدلله إن حماتج تحبج ….ويمكن يبون يساعدونج ….أو هم متعودين ع المطبخ ….إصبري وإن شاء الله يتعودون على وجودج بالمطبخ ….

عادي ياقلبي هذول مهما يكوون حموات

وانتي توج يديدة

سوي طبخه وكوني متأكدة انهم مايعرفووووونها علشان تفحميييينهم

ودايما قولي هذي انا مجربتها من قبل و هذي انا كنت مسويتها من قبل

وهذي الطبخه ماحبها لاني سويتها وماعجبتني ومن هالكلام

بس سالفه العصبية خليها عنج عشان لا تخترب العلاقة ، و لا تنافسينهم على شي دايما عطيهم على جوهم

مثلا اذا علمووج ولا اخذوا منج القفشه قوليلهم ومنكم نستفييييد

ولامشكووورة سوي هالشغله عني انا بروح شوي غرفتي وارجع

علشان ماياخذونها منج يمكن هم يتعمدون يغيظونج فانتي خلج ريلااااااااااااااكس

عادي لا تزعلين وخلج كووول وهاديه وضحكي واستمتعي وانتي تطبخين حق ريلج اهم شي ريلج يعجبه ويستانس من اكلج واذا انتي طباخه بريمو وتعرفين وكليهم وسكتيهم بطباخج وسنعج

__________________

تشكيلة ملابس ماركات من الصين ( شتوي )
https://www.q8yat.net/showthread.php?t=543753

منظم الشنطه شيل يا بلاش باسعار تنافسيه
https://www.q8yat.net/showthread.php?t=558878

سكر للمناسبات
https://www.q8yat.net/showthread.php?t=428165

تشكيلة ملابس ماركات من الصين
https://www.q8yat.net/showthread.php?t=428314

الله يعينج حياتوووو
مالج الى الدعاء وخليج سطحيه احسن معاهم

شوفي ياقلبي،،
حاولي تستغلين الفرصة اللي يكونون مو موجودات واطبخي اللي تبينه وحطيه خل يعرفون ان مو ناقصك شي!!
او ليش ما تحطين لك ركن صغير كمطبخ تحضيري لك ولزوجك وتفتكين من الغثة!!

إنسانه واكثر قالت كلام حلو اخذيه بعين الاعتبار والله يوفقج

صحيح

الله يسر امورج ان شاءالله

صبر الجميل والله المستعان……..