انا وحبيبي تفارقنا والسبب دخلوا وبتعرفون

تفارقنا وقلبي يتقطع..

بنات انا بخبركم سالفتي وانتوا احكموا اذا انا على حق او ظلمته..

انا حبيت واحد ومن سنتين على علاقه معاه..والحين عمره 30سنه..بصراحه ما اذاني ولا قلل من احترامي ..احسه رباني مثل امي وابويه..كنت اعتبره اهلي وربعي وناسي …..بصييييييح…
المهم الريال هذا محيرين له وحده من اهله بس ما استوت خطوبه رسميه..وهو مصارحني بهذا الشي..المصيبه اني يوم ناقشته في موضوع الزواج قاللي اسمحيلي انا ما اقدر اخطبج ولا اقدر ازعل اهلي اوعدج بالزواج والبنت هاذي مخلينها لي من سنين والحين ما اقدر ارفضها من بعد ما انتظرتني سنين..وهو بدوي وانا حضريه ..

عاد انا قررت ابعد نفسي شوي شوي لاني ما بقدر انتظره يجي ويقولي انا بعرس وانتي بكيفج حابه تستمرين حياج الله واذا مو حابه الله يجفظج..احسها بتكون اصعب..

يوم حاولت ابتعد اتصل فيني وقاللي انتي اكيد تكلمين واحد ثاني ..بس انا قلتله انا ابعد نفسي من الحين وابغي اعود عمري على فراقك عشان ما تتدمر نفسيتي ..وما فيني اترياك اتعرس وانا اقعد اتخيل وحده ثانيه في حظنك..تعرفون شو قاللي؟؟؟؟
قاللي انتي انانيه وتحبين تتملكين ..انتوا خبروني في وحده ما تحب تكون مع حبيبها..؟؟
حتى انا قلت له اني مستغربه من حبك هذا اللي ما فيه اي تضحيه..شو هالحب الفاضي..اعتقد اللي يحب يضحي وانت ما حاولت تخطي خطوه وحده عشاني وكيف تحكم ان اهلك بيزعلون؟؟ واللي اعرفه ان الريال محد يفرض عليه شي وخاصه في موضوع الزواج..صح والا انا غلطانه؟؟

المهم اني اليوم كتبت له مسح اني احبه واموت فيه بس ما اقدر اعيش نفسي في وهم وتخيلات ما منها امل والله يحفظه ويرزقه بالبنت اللي تصونه وتسعده..وبجذي انتهت علاقتنا..

الحين قولولي هل انا غلطانه في قراري او انانيه مثل ما قال؟؟

من صجج تسألين
حبيبتي اللي سويتيه عين العقل الريال اذا بغى شي محد يوقف بويهه الحين البنت ما تنغصب هالدور الريال واهو مو صغير 30 سنه يعني عاقل ويدرك شيقول
حبيبتي نصيحه من اخت لج ولكل وحده الريال يتعذر باهله عشان ما يتزوجها
صح الزواج قسمه ونصيب بس اللي يتعذر هذا مو جاد ويبيج وما يبيج بنفس الوقت يعني بتكونين الاختيار الثاني او الثالث او يمكن الرابع انا اسفه يمكن كلامي ما يعجبج
بس انا تعور قلبي البنت اللي تصدق الريال يحبها وما يفكر انها تكون معاه لآخر العمر بالحلال.ويحرني الريال اللي مو قد كلامه ويعلق بنات الأياويد بكلمه الحب .
سوري احس استنيت
انا أقول لج احسن قرار اتخذتيه انج أنتي اللي انهيتي كل شي وصدقيني اذا المسأله ان طولت شهور وبتحسين فعلا انج ارتحتي
الله يكتب لج كل خير

يا بعد عمري و الله صج قطعتي قلبي واي عاد كلش و لا الحب

حبيبتي اللي سويتيه صح خليه ما عليج منه اهوه الخسران لو كان جدي ويحبج

جان قال و الله ما اقدر استغني عنها وابيها مو يكلمج على ابوووو تقزووره او انه

يتسلى على ما يجي زواجه حرام والله ليش الرجاجيل جذي يتعذرون دايما باهلهم

يعني معقوله رجال طول بعرض ماله كلمه ما يقول لا و الله انا ابي اللي قلبي اختارها

الحين البنت ما تنغصب على الزواج وتقول رايها بكل حريه اذا كانت تبي الشخص

اللي متقدملها او لا .. بس يا حياتي لا يضيق خلقج وهذي ترى خيره يمكن ربج كاتبلج

بواحد احسن منه لا تحزنين من من عافنا عفناه و لو كان غالي والله يبيعنا بالتراب

نبيعه لا تضايقين يا قلبي و قولي بينج وبين نفسج انها خيره حتى لو كنتي تحبينه و

مع مرور الايام بتنسين صدقيني ما فيه احد يظل على حاله يمكن مع السنين

بتضحكين على عمرج .. تقربي من ربج و ادعي بصلاتج انه ربي يرزقج باللي احسن

منه و يعوضج ان شاء الله و لا تندمين و لا تتحسفين على اي شي راح بالعكس

تجربه و عدت .. الله يوفقج ان شاء الله

والله ياختي انا مستغربه ان سنتين ضيعتيهم من عمرج
انتي تدرين ان ماراح يتزوجج واهو يدري ان مافي امل بالزواج عيل ليش مستمرين؟
حرام عمركم اللي يضيع وتتعلقون ببعض بدون فايده
اهو مايبيي يواجهه اهله وعنده التزام وعارف مصيره بياخذ البنت المسكينه اللي محيريتنها له ! علي اي اساس مستمرين
اللي انتي سويتيه عين العقل
ونصيحه قطعي كل علاقه وياه وغيري تلفونج ولاتعطينه اياه اخذي موقف وخلصي الامور بدال لاتعلقون بعض بدون نتيجه تعذبون عمركم باديكم حرام جذي
والعمر حراااااااااااااااام بضيع اهو ريال مايضره ومرته ناطرته وقت مايبي يملج وانتي؟ عمرج يزيد ماينقص وفرصج تقل للزواج حرام عليج عمرج ياختي
الصراحه اهو قمه الانانيه يبي زوجه محجوزه ناطرته من عمر ، ويبي وحده يحبها ومعلقه له

اللي سويتيه عين العقل .. و الافضل انج تشغلين نفسج بشي عشان ما تفكرين بالموضوع او تضعف ارادتج .. مارسي هوايه او تعلمي خياطه و الا كروشيه .. المهم سوي شي يخليج تنسين .. و النسيان نعمة من رب العالمين .. ماني راده و فاتحه الموضوع و مناقشتج باللي فات .. الاهم اهو الياي .. و ادعي ربج يرزقج الرجل الصالح اللي يعوضج عن كل شي .

اختي الي سويتيه عين الصواب ولوماسويتيه برضاج اليوم بيصير غصبن عليج باجر

وبعد جم سنه لمه تتذكرين الماضي بتضحكين وتقولين الحمدالله اني انا هديته مو اهو هدني

شوفي حبيبتي سنتين ضاعوا من عمرج لا تضيعين أكثر من جذي حتى الأجانب إلي لا دين ولا مذهب إذا ظلت الوحدة على علاقة مع الريال 6 أشهر و ما إييبلها طاري الزواج تقطه و تنساه …هذا يقول لج ليش ما تكلميني إنتي تحبين واحد ثاني مو لأنه يحبج لأنه ما يبي يحس بالفشل ما يبي يحس إن تقدرين تتخلين عنه ارتباطج فيه على الرغم من صده عنج يغذي غروره …ابتعدي عنه و فضي نفسج و صفحتج حق إلي إيي لي باب بيتج شاريج و الله يوفقج

تصرفج حكيم وديري بالج راح اتييييج حالة من الضعف والشوق له واهو راح يستغل هالشي ديري بالج تضعفين وترضين بالقليل منه ابتعدي احسن وقولي هذي خيره من الله ربج كريم ان شاء الله الله يصبر قلبج ياحبيبتي على الفراق تراه شين بس خلي ثقتج بالله أكبر وقولي رب ما راح يقصر معاج ان شاء الله

حبيبتي اصلا قولي له انا انخطبت وابدي انتي بتركه والله يعوضج احسن منه وسمعي نصيحة اخت لا يروح عمرج يوم ورا يوم ورا يوم بدون ماتحسين الا انتي بروحج وهو مع زوجته وعياله يروح ويجي وترى الريال لما يشوف عنده اسرة يصيرون اهما الأهم

والأهم انتي الحين حبيبته والأولى عنده ….. بس اذا تزوج وصار يكلمج وطاحت عليه مرته تعتبرين في نظر المجتمع كلمة تعرفينها وما تعتبرين حبيبته وباجر تشرشحج جدام اهلج واهله وسمعتج زفت تصير ……

عسى الله يوفقج مع الي يستاهلج

وهذا انسيه خلاص ولا عاد تكلمينه

الصراحه كلامه غريب شنو يعني انتي أنانيه؟؟؟؟؟؟

عيل أهو شنو؟؟؟؟؟؟؟

يبيج انتي ويبي بنت عمه بعد شلون يعني بنات الناس لعبه بأيده؟؟؟؟؟؟؟؟؟

مو غلطانة

هذا معناته انه عمره ما حبج ، شلون يعني يتزوج غيرج ويبيج تضلين تكلمينه اذا كان يحبج حلاته يخاف عليج من الحجي يا امه يخطبج او اهو اللي يبعد ، وبعدين اهو الاناني وما يفكر الا بنفسه يعني زوجه وحبيبه بنفس الوقت ….. وبعدين صدقتي انه اهله مارضوا اهو اصلن كلم اهله عنج
يا بنات ترا موكل كلمه يقولها الشاب تصدقونها ترا لا خلص منج ومل يقطج مثل اي دشداشه قديمه توصجت وقطها

اسفه اني قسيت عليج بس هذا علشان مصلحتج

هلا اختي
انا معاج 100% والله يوفقج انشالله

تبين الصراحه اهو الاناني يبي يملكج وحتي اهو بعيد عنج لا هو اللي راحمج ولا مخلي رحمة الله تنزل وعلي قولة فوزية الدريع اللي يتعذرلج باهله او باي شي هذا بيتسلي فيج مايبيج زوجه اهو ريال كلمة بايده لو يبيج مايتزوج غيرج كان سوا المستحيل بس علشان ياخذج وهذا خلاج تتعلقين فيه بالرغم انه عارف بياخذ بنت عمه واللي سويتيه عين العقل مثل ماهو يبي يتزوج ويخليج انتي بعد شوفي حالج والله يرزقك باللي احسن منه