انا شفت ناس حقيره وعديمه إحساس بس مثل هالناظره ما شفت

هالسالفه اليوم امي قاعده تقولنا اياها

وياهم بالدوام بنت تسولف عن خالتها

فيها كانسر ( سرطان )..الله يشافيها يارب ويردها بالسلامه..

و هالأم عندها 3 بنات وحده بالمعهد و اللي وراها بالمتوسط و الصغيرونه بالابتدائي

راحت علاج اهيا وريلها 6 شهور مو شايفين عيالهم متقطع قلبها عليهم و اهما بعد عمري ميتين على شوفه امهم و ابوهم

منزمان حاجزين حق عطله عيد الاضحى عشان يروحون حق امهم وابوهم و يعدون الايام متى يسافرون

صارت ردتهم عقب ما تخلص العطله بجم يوم البنت اللي بالمتوسط طافها جم امتحان

يروحون المدرسه عشان يعيدون لها الامتحانات ولا يعطونها مؤجل الناظره موراضيه !!

ما بقا احد ماراحلها الاخت الكبيره الخالات العمات

يقولون لها يهال مو شايفين امهم وابوهم 6 شهور وامهم مريضه غير نفسيتهم الزفت يحاتون امهم غير انهم متشفقين على امهم وابوهم .. ماعندهم احد يجابلهم ويدرسهم و يقوم فيهم

تقول هذا الظرف انا ما اعتد فيه !!!

عادي خل تييب اصفار بالامتحانات اللي طافتها و تمتحن المواد اللي بقت

ما نأجل الا حق الحالات السريريه يعني البنت نفسها تكون مريضه

مصدقه عمرها وايد اقصاها متوسط

والبنت حبيبتي ميته من البجي تقول ليش ما تبي تأجلي انا مسافره عشان امي وابوي مو مسافره بس جذي

وااااي والله و امي تقولي السالفه انا عيوني غورقت بغيت ابجي

راحت لهم اختهم الكبيره مسكينه تقول حق الناظره انا اللي بالكليه و دكاترتي اجانب وفي منهم مو مسلمين لما سمعوا بظرفي اجلولي بدون مناقشه و انتي المسلمه وين قلبج وين رحمتج ماتخافين الله يسلط على عيالج ناس يسوون فيهم نفس اللي قاعد تسوينه بالبنت مو مراعيه ظروفها

و طبعا الصنم ولا راضي يحس

جان تقولها البنت انتي بتعيدين الامتحان غصبا عليج رضيتي ولا مارضيتي بتعيدينه

لانهم راحوا الوزاره و كلموهم و قالولهم اكيد الامتحان ينعاد حق البنت بدون واسطات حتى !! بس على ما يطلعون كتاب مادري مذكره و عمتي الست الناظره ذلتهم على جم امتحان مالت على ويهها

السؤال الحين ليش هالحقاره؟؟؟

شهالقلب الصخر اللي مايحس؟؟

شتسوى عليج دعاوي الناس عليج ؟؟؟ مو بس اخت البنت ولا امها ولا ابوها لانه امها وابوها دقوا عالمدرسه من برا يكلمونهم وهم مارضت ست الحسن

اللي ويا امي بالدوام لما سمعوا السالفه قامو يتحسبون عليج

انا لما سمعت السالفه قمت اتحسب عليها

ليش تعصلقين السالفه و تغثين البنت و اهيا اللي فيها كافيها؟؟؟

وين الرحمه وين الانسانيه؟؟ هذا وانتي يفترض تكونين انسانه تربويه جذي تسوين

واي انا حدي انغثيت من السالفه حسبي الله عليها وعلى اشكالها اللي مايعرفون الانسانيه

حق كل ابله ولا وكليه ولا ناظره تقرا الموضوع اقولها خافي الله عاللي انتي مسؤووله عنهم المسؤووليه مو نحاسه و حقاره ..