امهات انتبهو حق هالشغله قبل لا يفوت الوقت

السلام عليكم ..

شلونكم بنات ..

احب انبهكم لشغله انا نفسي كنت غافله عنها ..

هل انتو تدرون عن عيالكم ..

بمعنى .. كلنا ندري شكلو وين راحو وين ردو .. بس هل تعرفين التفاصيل الدقيقه الي تصير مع عيالج ..

هل انتي من النوع الي كليوم باليل مثلا او باي وقت تقعدين مع كلواحد من عيالج وتسولفين وياه تسالينه عن يومه شصارله ؟؟.. اذا في شي مظايقه ؟؟ اذا مر بمواقف خلال هاليوم .. يعني تسالينه عن كلشي ؟؟؟

هل انتي من هالنوع ؟؟؟

ولا تنطرينه يسولف عليج واذا ما سولف ما تسالينه ؟؟؟

بنات انتبهو لها النقطه … عودي عيالج انج تكونين مستمعه جيده لهم علميهم يسولفون وياج مو يخشون عنج ..لا تصيرين غريبه عنهم لما يكبرون ..لاتخلين اصدقاءهم يكونون اقرب لهم منج ..

علميهم اذا صارشي يلجأون لج مايدورون بديل عنج يفضفضون عليه او يسولفون معاه ..

كوني الصديقه الاولى لجميع عيالج بدون استثناء ..

ترى باجر اذا كبر وماتعود منج هالشي تلاقينه يخش عنج يثق بالناس الي يمكن مايستحقون الثقه بس مايثق يقولج او يسولف عليج همومه واسراره ومواقفه وغيره ..لا ويمكن يستنكر يسولف عليج ..

صدقوني ترى هالشغله لها مزايا وايد ..

اولا : عيالج يكونو قريبين منج على طول ..

ثانيا : عيالج يلاقون صدر حنون واذن منصته اذا احتاجو الى من يسمع همومهم ومشاكلهم .

ثالثا : تعرفين عنهم كل تفاصيل حياتهم وبالتالي تعززين وتشجعين ولدج على اي سلوك زين سواه او تراقبينه اثناء حل اي مشكله تعرض لها او قد يتعرض لها او تساعدينه في حلها اذا ماقد يحلها بنفسه او يكفي انج تكونين مطمنه عليه وعلى وضعه ..
بس هاااااااا استخدمي طريقه حلوه جذابه غير منفره في التعامل معاهم ( مو تسوين لهم تحقيق ) لا سولفي معاهم وكلوحده وشطارتها بالاسلوب ..

وطبعا لاتزفينهم على شي غلط هم سووه انصحيهم بلطف ولين وشدي بس بطريقه خفيفه غير منفره وبينيلهم عواقب الشي اذا استمرو فيه ..

رابعا :يصير عندهم اكتفاء مايروحون يدورون على احد يسولفون له ويمكن اختيارهم يكون خاطيء وبالتالي خصوصياتهم تكون عند ناس غلط ..

خامسا : .. هالطريقه تساعدج لى التدخل في الوقت المناسب .. بمعنى .. لازم نخلي عيالنا يعتمدون على نفسهم بالحياة عشان مايصيرون اتكاليين .. والطريقه هذي تساعدج في انج تتدخلين اذا بغى يصير شي جايد لاسمح الله او تساعدين ولدج او بنتج اذا توهقو بشي .. ( بس مو تحلين كلشي بنفسج عشان مايطلع ابنج متكل وما يتحمل مسؤليه ) ..

ومثل ماقلتلكم هذي شغله مهمه جدا لازم ما نغفل عنها ونطبقها على عيالنا قبل لايفوت الفوت ونندم باجر ..

ادري ان مجتمعنا الخليجي قد تكون هالشغله صعبه فيه لكثرة العيال بالعايله الوحده .. وكثرة المشاغل .. لاكن الواحد يحاول على قدر ما يقدر انه ينسق بين عياله وهذا راح ينصب في مصلحة العيال ومصلحة الوالدين ..

وتسلمون ..

كل هالاطروحات الحلوة ومسمية نفسك الغشيمة؟!
تسلمين ياعسل على هالموضوع المهم جدا وانصح بعد باتباع هذي الطريقة مع الاخوان في البيت سواء بنات او اولاد

الف شكر لج اختي على الموضوع يعطيج العافية

واي انتي يالغشيمة ……… فعلآ موضوع مهم وعلى كل أم تتنبه لهالنقطة ويعطيش العافية عزيزتي ……..

يجزاج الجنة يالغشيمة ويرزقج الستر بلدنيا ولاخرة

موضوع مفيد وقيم

الحمدالله صج عمر بناتي 2.5 بس فتانين درجه اولي مايحتاج اسال اييون ويخرون الاكو الماكو

المشكله يا بنات ان الحين منتشرة سالفة الجنوس وعبدة الشيطان حسبي الله عليهم
وخصوصا في المدارس

وما كفاهم المخدرات والسوالف البايخة

ديروبالكم

ترى قاعدين عيال ابليس يخربون على عيالنا الله يزولهم

وسوالف الارهاب اللي صار في كل الدول مثل الفايروس يمشي

خواتي ..

ام لبنه .. دموع ..مون ..فروحه توحه .. كوين ..

يعطيكم العافيه على المرور وتسلمون على المشاركه ..

ومثل ماقالت ام لبنه هالشغله تنفع مع الاخوان بس مع الصغار الكبار لو تموتين مايسولفون عليج شي

كوين الله يخليلج بنات .. حطي بالج الحين فتانات ومايخشون شي ( جنهم بنت اختي مفتنه على ولدي عند يدتها ام ابوها تقولها ريحته خايسه ( وعليه عليه كان توه مسويها وبنغير له ) ههههه

بس باجر اذا ماتعودو مايعلمونج بشي .. عوديهم منالحين دامهم صغار ..

وتسلمون

مشكورة الغشيمة فعلا موضوع مهم

جزاج الله خير على التنبيه

تسلمن عالتنبيه …

بس المشكله بالتطبيق …. يعني انا قاعده احاول اني اعود بنتي الكبيره انها تحجي لي (( عقب شهرين تصير 7 سنين ان شاء الله )) بس اهي من النوع اللي تكتم وتسكت … وكل ما اسألها عن شي تقولي زين … وبسسسسسسسسسسس هذا حدها نااادر حيل اذا نطقت ..

ساعات تقول انها تخاف من اني اخانقها مع اني دايما اقولها لما انتي تيين تقولين لي الشي ماراح اخانقج عكس لما انا اعرفه بروحي …… وساعات تحس ان ما عندها شي تقوله … تهقون شلون اسحبها بالحجي واخليها تتعود تتكلم معاي ؟؟؟

حياكم الله بنات

الله يعينج انا وين حاولي معاها شوي شوي .. يعني سولفي وياها عن مواظيع مختللفه مو شرط عن شي معين يعني وجهيلها حجي اخذي رايها ببعض الامور البسيطه يعني عطيها ثقه بنفسها وشوي شوي هي راح تتقرب لج اكثر وراح تلاقينها تسولف وياج .. قوليلها قصص فيها عظه وعبره يعني وجهيلها الحجي بطريقه غير مباشره ..

يعني مثلا فلانه مسكينه صارتل ها مشكله وخافت تقول لمها لاتزفها وعقبها حطت نفسها بمشكله اكبر انا لو هالشي يصير لبناتي اساعدهم وما ازفهم واسويلهم كذا .. يعن يبينيلها ردة فعلج تجاه الاشياء الي تخوفها مسبقا يعني( مثلا تقولين لها ) لو احد من عيالي يسوي جذي انا راح ازعل وهذا الشي مو زين ومن هالحجي بس ماراح اطقه ولا ازفه راح اساعدع انه يصلح غلطه ) ومن هالحجي بس باسلوب ابسط يناسب بنت بهالعمر يعني حاولي ولا تياسين وانشاء الله بتتغير بنتج ..

اهم شي اعطيها الثقه فيج وانها ماتنظر لج نظرة خوف وانج بتعاقبينها ..

والله يهدي بنتج انشاء الله ويقربها لج اكثر واكثر ..

وتسلمون على المشاركه ..

مشكوره الغشميه …

بحاول ان شاء الله والله كريم

تسلمين اختى الغشيمة ويعطيك الف عافية
وفعلا مثل ماقالوا ((ابنك على ماتربيه وجوزك على ماتعوديه)) واللى نزرعه في عيالنا اليوم نجنيه باجر ومو دايما فاقد الشيء لايعطيه يعنى مثل ماربونا اهلنا على الاستماع فقط وكلمة حاضر نكرر هالشىء مع عيالنا لا ممكن نغير هالشىء للافضل والحين الناس مو مثل اول تثقفوا وافهموا وتعلموا وما انكر فضل اهلنا وتربيتهم لنا الله
تحياتي وعذريني على التطويل
وبانتظار مواضيعك الجديده والحلوة والمفيدة

عاد انا كلش مااسولف ويا عيالي مادري ليش مالي خلق

بس ان شاالله بحاول اسولف وياهم

حياكم الله بنات ..

تصدقون بنات عن تجربه لي ما تسولف مع عيالها ولا تعود عيالها يسولفون مع بعض لما يكبرون يصير مثل الاغتراب الاسري ناس عايشه مع بعض بالبيت لاكن كلواحد بعيد عن الثاني ومحد يعرف عن الثاني شي ..

خلونا نصحح هالخطأ ونتداركه بعيالنا والله يعين ..

وتسلمون