المتزوجات الموظفـات

السلام عليكم

اشلونكم بنات وشخباركم
صراحه انا اول مايكون بقلبي مشكله او عائق مااحب اطرح مشكلتي الا لكم

حبيباتي مشكلتي كالتالي:

انا كنت اداوم قبل زواجي بمكان وايد قريب من بيتنا والمكان وايد مريح الحمدلله بس من تزوجت انتقلت منطقه بعيده عن اهلي ومكان الدوام بحوالي عشرين دقيقه

انا حابه ابقا فيه لسببين الاول قريب من امي واذا صار بالمستقبل عندي طفل اقدر اخليه عندها وازرق متى مابغيت اطلطل عليه
من ناحيه ثانيه ريلي مو حاب هالمكان ويحاول يقنعني انتقل لمكان اقرب عشان الطريج ويقولي المكان اللي يبيني انتقله فيه معارف وبرستيج اكثر من مكاني الحالي

رفيجاتي اغلبهم يقولون خلج بنفس المكان لانه مريح وعالاقل تردين فيج حيل تجابلين ريلج وعيالج بالمستقبل اريحلج بس انا عارفه انه كلش مااراح يطورني من ناحيه المعلومات والترقيات والمعارف والواسطات

شنو تنصحوني بنات واذا صار عندي طفل وين اخليه اذا برايكم اروح للمكان الاقرب مابي خدامات يمسكون عيالي مستقبلا

فيدوووني بنات انا محتاره

اب
اب
اب

اهوه يعني ملزم ملزم ؟
كلش مو عاجبه
والا مجرد ابداء راي ؟

شوفي الي انتي ترتاحينله

لا هو يقولي كيفج

الاستخارة وفقط
لأن الموضوع محير
هذا فيه مميزات
وهذا فيه مميزات
استخيري وربنا سينير لك الطريق

حبيبتي إنتي عذرج الوحيـد إلـي يمكن تحتجين فـيـه إن عيآلج
بِ المستقبل تقطينهم علـى آمج
لـكن
إذآ عندج حضآنه قريبه من شغلج الجديد آو رآح تجيبيـن خدآمه آو شـي فّ أنا آقول عادي روحي
منهآ ترقيه ورآحه آكثر وبِ النهآيه إنتي رآعيةة القرآر
حبينآ نفيدج

شوفي وين المكان الي مستقبله افضل واخذيه
سواءً هذا او ذاك والله يوفقج

التغيير حلو…
وبالنسبة لسالفة التغيير عشان الوقت والمدة مايفرق خمس دقايق عن عشرين دقيقة…

بس نصيحة مني التغيير من الدوام يكون اذا كنتي منغثة من الوجيه اللي فيه

اما غير ذلك لاتنتقلين؟؟

الراحة النفسية اهم من المعارف والبرستيج والطريج

اخذيها عن تجربة

اذا مرتاحة بمكانج والمسؤول زين خلاص انشالله لو ساعه كاملة طريج عادي

اختاري المكان اللي ترتاحين فيه

حطي ابـ بالج ان الوظيفة الثانية مو عارفه الوضع فيه !
صج ان الواحد يشتهي يحسن من نفسه ، بس فكري فيها عدل واستخيري وايد ..

حلو تفكيرج ابـ باجر لي ربي رزقج بعيال فعلا حلو ان بيت اهلج قريب لاني ضد ان اليهال يتمون عند الخدم وغيرهم
أأمن مكان لهم بيت اهلج هذي شغله ، والشغله الثانيه مثل ما قالت ام مريم الوظيفة مو بس مادة ومنصب ،
مهم جدا انج تكونين مرتاحه بالمكان اللي تشتغلين فيه !

ومسألة الطريج ماشوفها مشكلة 20 دقيقه ولا شي هذا لول
عدنا ما شاء الله موظفات ايونا من راس الخيمة

موفقة يارب

اهم شي الاستخارة ثم الاستخارة والله يكتبلك اللي فيه خير

ربي يجزاكم الخير حبيباتي ولايحرمني من ارائكم

بالفعل امر جداا محير

وانا حاليا قاعده اسال عن الستاف بالمكان اليديد وهم قاعدين يمدحونه

وسالفه الحضانه خايفه اهل ريلي يتدخلون فيها ومايخلوني اودي لها خصوصا اني معاهم بالبيت بس بشقه منفصله.. يعني خايفه يقولون لريلي ويقنعونه يتم الياهل مع الخدامه عندهم وانا مابي جذي

ان شالله لازم اصلي استخاره اكثر من مره

بس برايكم لو المسوول بالمكان اليديد هم زين وحقاني انتقل والا اظل؟؟