اللي عندهم خبره لاتخلوني

السلام بنات

موضوعي باختصار( ام زوجي )

طبعا اهي ذكيه بدرجه محد يتخيلها وكان لها سوابق بالشطانه مع ام ريلها بس الله هداها والله يغقر لعباده
وتحب ولدها( اللي اهوا زوجي) بدرجه غريبه غريبه وحتى اهيا تقولي احبه اكثر من اخوانه الباجي !! (معنه كلهم عيالها ) وماتقدر تفارقه ولا دقيقه عشان جذي انا رضيت اسكن عندهم مع انه خيروني بس انا اخاف اسكن بروحي وماحب الوحده (لان دوام زوجي شفتات )

الزبده……….
من بعد ولادتي بولدي الاول الله يطولي بعمره وهي متغيره معاي وايد وايد
انا اقولكم شلون …………..
1_تتكلم بنفسيه معاي بس لما زوجي يكون مو موجود تصير وحده ثانيه ولما يكون موجود يازينها ويازين سوالفها سالفه ورا الثانيه!!
2_اذا بغت تسال عن اي شي او عن ولدي دقت على تلفونه مادق علي معنه اول كله ادق علي (وللعلم انا موجوده بالبيت).
3_(وهذي الاهم) ادلعه بشكل مبالغ فيه بزياده عن اول وكل ماحست اني سويتله سي او يبتله شي ثاني يوم تزيد عليه بالدلع والمصاخه( تعال اوكلك تعال لمني من زمان مالميتني!!) وهالسوالف………استغفر الله
4_ادق على تلفونه عشان تقعده حق الدوام حتى لو 5 الفير واحنا نايمين يم بعض !!
5_بالطلعه وبالدخله( وين رايح وشحقه ومتى بتيي) !!طبعا بتحقيييييق وذا يوم ماراح الدوام عشاني تعصب ليش مارحت وشحقه مارحت!!
6_اذا بتروح مكان لازم اهوا اللي يوديها او ريلها والاغلب طبعا زوجي لان ماراح يخلي ابوه يوديها واللي يبط الجبد ان عندها ولدها الثاني بس مادق عليه كله زوجي حتى لوبنطلع يوديها بعدين يرد يوديني ……وساعات نكون بنطلع عند الباب تقوله ابي برد من ماكدونالدزاو برجر كنج !!!! واهوا مايقدر يقولها لا نروح نييبلها وبعدين نطلع !!

المشكله ان انا ماقدر اقوله لاتييبلها او لاتوديها لان انا الخسرانه هذي امه ماراح يرضى يضايقها وبنفس الوقت مادري شسوي؟؟؟ ساعدوني بنات لاتخلوني ترا موقادره انام من التفكير

تحياتي

الله يعينج

سايسيها مشي وياها شتسوين بعد كسبيها صوبه

الله يعينج حبيبتي .. سايسيها وحاولي تكسبينها لأن بالاول والاخير انتي الكسبانه
وعشان ان شاء الله حريم عيالج يسون فيج الطيب مثل ما سويتي فيها
وازرعي وان شاءالله تحصدين

والله حاولت شكثر………تسلمون حبيباتي

اخذيها على قد عقلها مره كبيره وللأسف تفكيرها مو شي
يعني انتي بالنسبة لها وحده ثانية خذت ولدها منها!!!
وهذا تفكير غير سليم بس شتسوين الشكوى لله ..

خليج مسايستها ولي شافت ان ولدها ما تغير عليها من تزوج نفس معاملته لها ونفس تفرغه موجود لها
وانه يفضلها عليج بتهون .. حتى انتي لي صرتي معاها بروحكم قوليلها اشكثر اهو يحبها ويموت عليها ويفضلها عليج
وطيريها وصليها السما ، وعطيها فكرة انج مستانسة بهالشي لانه لان مافيه خير لاهله ما فيه خير لمرته
حببيها فيج غصب ييبيلها سوالف اهي تحبها عرضي عليها اتودينها واتييبينها صادقيها
صدقيني ان شافتج جذيه .. بتكبر مخها وبتفج عنج وعنه ..

الله يهدي بالج .. ويهديها لج يارب

استغفرالله واضح ان تفكيرها خبيث

طلعي وقعدي بشقه بروحكم شلج بعوار الراس

مسكينه ولدها واتحبه اتوقع انها اتغار منج لانها اتحس انج اخذتيه منها وبعدين ما اشوفها مشكله الله يخليله اميمته بالعكس شي حلو ان يهتم فيها ويرد لها طلب وقايم فيها والحمدالله انج ما اتقوليله لا اتييبلها ولا توديها زين اتسوين عشان لا تصير بينكم مشاكل والله يوفقج ويتمم عليج لا اتفكرين ولا شي ان شاءالله باجر اعيالج اقومون فيج نفس ما اهو اقوم بامه
موفقه

تسلمون حبيباتي ماتقصرون على النصايح الله يوفق الجميع

حبيبتي _ رنه خلخال _ انا موقايله شي بس مولدرجه تطلب (برد ماكدونالدز ) واحنا بنطلع او ادق عليه الفير تقعده جذي اهيا قاعد تلغي وجودي معاه
وبعطيج العافيه

السلام:
الامر عادي اختي ..كل ام عندها واحد تحبة اكثر من اخوانه يمكن هو واصل فيها ..والله ياختي انا ما اشوف فيها ابد شئ ..انا ام زوجي وابوه( الله يرحمهم ) رغم ان عندهم اربع اولاد وخمس بنات غيرة لكن يحبونه اكثر ورغم ايش كبرة يعاملونه كأنه ياهلهم الصغير ويعيشون عندة وفلوسهم عنده الى ان ماتوا ..
يا اختي تراها ولدها وغالي عليها وما فيها شئ لما تقوله تعال المك تعال بوسني تراها تتغلى عليه وتشوف يوم تزوج نساها ..شوفي انا كانت الله يرحمها كله معقدتني لاني ما اتغشى ..ولان زوجي يسوي لي كلش شئ ..وكانت تقوله ثور معمعم ..بس والله كنا نضحك عليها واذا شال اغراضي اللي اشتريها بالسفر يقولي واينك يا الوالدة تشوفين ولدك ثور معمعم ..وكنت اصوره لها وهو يشيلي الاغراض وتهاوشة وبعدين تقعد تضحك ..
وابوه لاني ما اجيب عيال كان يسميني قربة مبطوطة ويقولة تزوج عليها ..
بس تعالي لما اشتكي لهم منه لو ضحكة يختاظ ابوه ويقولة لو تموت ما تلقى مثلها ..وامه يما تمدحني عنده من وراي ..واذا قلت لهم شئ هم كانوا يعايروني فيه ..تقوله امه ترا فلانه تستاهل سو لها اللي تبية ..
تعرفين ليش لاني اوسع الصدر لهم واذا قالوا كلمة ما اكبرها اقعد اجر شكلهم واضحكهم.. ترا يا حبيبتي هم خير والبركة والامور اللي تشوفينها مبالغة هذه لازم تفرحك لان وزوجك الله راضي عليه لان امة تحبة وابوة ..ترا هم جنته ونارة واذا تحبيه من صج وسعي الصدر لاهلة ..وبالعكس لا تغارين من اللي تسوية امة ترا هذه مصيبة ..انتي غيرانه والام غيرانه واللي بيطيح فيها زوجك مسكين ..
مثل ما قلت حبك عنده غير وحب امة غير ..
واذا وصلها ووداها وجابها ايش فيها هي يا ما سهرت وشالت وحطت وانتي ماخذته رجل كبير عنه خير ..بصراحة هي اولى به منك وبعنايته ..
وانتي شجعيه وبتشوفين باكر ان ولدك ببيرك مثل ما خليتي زوجك يبر امه وابوة …

تسلمين _ وهج الحب _ على المشاركه الطيبه بس الغريبه انها تغيرت من بعد ولادتي
وانا مااتكلم وصابره لان اخاف الله فيها
ويعطيج العافيه

وااااااااي قسما بالله جتج تتكلميييين عنيييييييييي بالضبط لا وزيااااااااااده كل دقيقه مسجات اشتقت لك احبك وينك نص الليل ابي موكا واهي اصغيره خالتي عمرها 36 بس لانها متزوجه صغيره حيل بصراحه انا بالبدايه كنت مستانسه بس الحين اوووفر من تشوفني تقعد يمه تلزق فيه وتوكله وتقوله وكلني يعني اوووووووووووووووووفر مومخلتنا انا ادري انها امه جنته وناره وعمري ما منعته منها ولا افكر ولا عمري بينت له اني متضايقه لاكن بالصج الي تسويه وايد موعاجبني وهذا واحنا بروحنا عايشين تنام عندي ولانها بتتطلق من زوجها فاا زاااااااايد تعلقها فييييييه والله احسها شريييجتي واحس مالي معناااااا كلش وايد تعبت مومخلتنا يوم نرتاح فيه آااه بس شقووووووول والمشكله نفسج عنددها ولد ثاني لاكن اتقوله انت غيييييييييير وكله لازقه فيييييييييييه وتبي تسكن معانا اهي وبناتها الله يعييين بلييييز بنات عطونا حل حق الخالات الي من هالنوعيه الله يفرج همهها الي اتسااعدنا

وسوري قرقت وايد بس يبتيها على الججرح

وهج الحب الصراحة كفت و وفت
مهما كان هذي امه
باجر ولدج يكبر ويتزوج راح تصيرين مثلها
حطي نفسج مكانها لا تلومينها
مو زين والله حرام بالعكس سايسيها عشان تكبرين بعينها

_ احلى كيووته _ صج محد يحس الا اللي عايش هالحاله .. المشكله يقولون غيره وانا اللي احسه شي ثاني واللي اعرفه انها مثل امي بس حركاتها تقول شي ثاني !!! وانا اللي اعرفه ان بعد الزواج الام والاب يصيرون واجب علينا نبرهم ومانقطعهم بس من ناحيه المسئوليه الزوج مسئول عن زوجته والزوجه مسئوله عن زوجها …. والمشكله ريلها مومقصر معاها بس مو مخليتلنا مجال مع بعض وللعلم ماصارلنا سنتين

_ روح امها _ هلا حبيبتي احترم رايج بس ممكن توضحين( حرام )على شنو قصدج؟؟