الله على الدنيا خانت ليالينا

صار لي فترة طويلة تعبانة نفسياً من الكتمان

ويمكن من الحمل زدت عن قبل

للاسف اني عاطفية وحساسة وايد وهالصفات اعتبرها عيوب فيني لاني تعبت بهالدنيا اللي يبيلها نفس طويل وقلب قوي

زوجي طيب معاي

بس احسه انه ما يحبني من قلبه

طبعاً لسبب واحد اهوا ان لما تزوجني كان يبي يبتعد عن المرا اللي حبها 9 سنين على انها كانت اكبر منه بسنتين ومتزوجة ومعيلة

احس يا بنات دايماً اهيا على باله وهالاحساس يذبح

تخيلي تتزوجين ريال ويصدمج بهالسالفة بعد ما حبيتيه وتعلقتي فيه و عاشرتيه معاشرة الازواج

طبعاً تتسائلون شلون

تييكم السالفة

اتذكر كنت ألح عليه وأسأله دايماً كنت اتعرف قبلي

وهذا كان من احساسي القوي لدرجة اني بيوم حلمت انه متزوج قبلي وقلت له الحلم

واهوا كان اول شي ينكر انه يعرف اي وحدة ومرات يخربط علي ويسويلي افلام انه تعرف على وحدة وكلمت رفيجه وطاحت من عينه وهدها

انا ما كنت اصدق كلش

وكنت واثقة باحساسي

لاني ما كنت احس انه يحبني من قلبه

ماكو لهفة ولا اهتمام مثل اللي يكون بين اي اثنين متزوجين

حتى لما كنت اكلمه كان دايماً يتعذر انه بينام او اي عذر عشان ينهي المكالمة

احنا عندنا بيوم الملجة البنت تطلع مع ريلها يتعشون يتمشون وغالباً ما يردها الا الفير

تخيلوا انا واهلي انصدمنا انه وداني بيت حمولتي عشان اسلم عليهم وردني البيت

هاليوم ما احب اتذكره

لاني ما نمت من البجي وحسيت انه يا مغصوب او تزوجني لمجرد انه يكون اسرة وعيال

وانا مثل اي بنت كنت اتمنى ريال يحبني واحبه واكون بس انا بقلبه وعقله

تأتي الرياح بما لا تشتهي السفن

مع الايام وبعد ما تعلقت فيه حيل وحبيته

كنا طالبين عشا وقاعدين نتعشا بالشقة

سألته كنت اتعرف بنت قبلي

وانصدمت صدمة حياتي

قالي يحب وحدة 9 سنين واهيا اكبر منه ومتزوجة وعندها عيال

انا من الصدمة حسيت اني برجع والدنيا قامت تدور فيني

بس مسكت نفسي بشوف معقولة يكون صج هالكلام

قالي انا اعترف لج لاني ادري راح تعرفين بيوم من الايام

ما ابيج تنصدمين

سكت وبلعت السالفة

بس حسيت غصة بقلبي

قعدت جم يوم لا اكل ولا انام وكنت احاول اوخر عنه

واتسائل بنفسي اهوا ليش قالي

هل لان علاقته بتستمر معاها وما يبيني ألومه واقوله ليش ما قلت لي من الاول اذا طحت عليه

والا شنو قصده

قلت لامي وانصحتني اتطلق لانه ما راح يتوب دام هذي سوالفه

بس يا بنات انا حبيته عشقته مو بس حبيته

تعلقت فيه حيييل لانه اول ريال بحياتي

فقررت اذا شفت بعيني او حسيت بشي

راح اتطلق مهما كانت الظروف

حتى لو عندي منه 10 عيال

لاني من الناس ما اسامح عالخيانة ابد ولا ارضى على كرامتي

حملت واجهضت

وما كنت احس باي تأثر من ناحيته علي

كثر ما تأثر ان الحمل ما استمر

وكان يسمح لاهله يهينوني بهالسالفة ويسكت ولا يدافع عني

دايماً يحسسني ان فيني عيب ودايماً ضايق خلقه وحزين

واللي مجربة هالاحساس راح تحس فيني

احساس انج تحملين وتفقدين البيبي صعب حيل ما ينوصف

اكتآب و النفسية تتعب حيل حتى صحتج تتعب

لا بيوم واساني ولا قالي ولا يهمج تونا صغار وباجر نييب والله يعوضنا

اهني زاد احساسي اللي حسيته باول يوم للملجة

انه ماخذني عشان اييب عيال ويصير ابو وبس انا بالطوفة

صارت سالفة ببيت حمولتي واغلطوا علي وعلى ابوي بكلام قوي ما ينقال

لا وقف معاي ولا دافع لا عني ولا عن ابوي

بالعكس كان مو عاجبه لما ابجي والا اكلمه بالموضوع

بعد هالسالفة قررت اني ما ادش بيت حمولتي

وكان كل مرة يقولي امشي واتحجج بأي عذر

لما يوم كان رايح لهم

ودق علي قالي تجهزي نروح السينما

يمكن كسرت خاطره لان نفسيتي كانت تعبانة من الاجهاض وكنت قاعدة في البيت

انا استانست حيل كنت انظف البيت

يوم دق علي هديت اللي بيدي ورحت اتجهز

لبست وقعدت انطره

ويوم وصل دش واهوا معصب وكان واضح ياي فيه بلا

انا استغربت ليش معصب ومنفس واهوا العصر كان قايلي بوديج السينما

سكت ما علقت

ركبنا السيارة وانا مستانسة واسولف واهوا ساكت

فجأة قعد يصارخ علي بدون اي سبب

فهمت ان اهله مكلمينه عني بس ما ادري شنو قايلين له

قلت له ودني بيت اهلي اتونس مع خواتي واسهر معاهم وانتا روح ارتاح

قالي اوديج وباجر اييب لج ورقتج

انا انصدمت وسكت بستوعب السالفة

ووداني لاهلي وقلت له وانا نازلة انا ناطرة ورقتي باجر ورقعت الباب ودخلت بيت اهلي

كنت منهارة حيل ومو مصدقة اللي صار

شسويت ما سويت شي

ولا غلطت عشان يهددني بالطلاق

كان ابوي واخوي في البيت كلمتهم وانا منهارة

واخوي عصب حيل اول مرة يشوفني بهالحالة

قالي انا اوريه والله اوديه ورا الشمس دواه عندي

وابوي ضاق خلقه كنت توني عروس واتطلق صعبة عليه

بس قالي ابوي خليه يولي ولا تردين عليه اذا بيكلم خله يكلمني

ويجي يكلمني اهو وابوه

من ثاني يوم دق علي وما رديت عليه وسكرت جهازي

و دق على ابوي وحقره ابوي ما رد عليه من اول مرة خلاه يدق جم مرة وعقب رد عليه

وكان يبي يكلم ابوي بالتلفون

ابوي قاله تعال ونتفاهم

قعدنا هو وابوي وناداني ابوي ورحت وقعدت معاهم

وقاله ابوي انا سمعت من بنتي وبسمع منك السالفة

طبعاً قعد يچذب ويقول كلام ما صار ومو صحيح

وما بقا عيب ما حطه فيني

خلاني اللي غلطت على اهله و ماني نظيفة في بيتي
و و و و و ……. كلام وايد خلاه يطيح من عيني وحلفت له ما ارجع له

قالي ابوي روحي وكان يبي يتكلم معاه بروحهم

طبعاً اعترف ان اهله قالوا له هددها بالطلاق ودوس عليها وانتا مو ريال اذا ما سويت چذيه

وعشان يثبت لاهله رجولته بهذلني وسوا هالسالفة

اهلي قالوله ان مو من حق احد يتدخل بحياتنا

ولا احد منهم يدخل بيتي ولا انا اروح لهم دامهم مو متقبليني ويبون يخربون حياتي

انا رفضت اني ارجع معاه

وقاله ابوي خلها تهدا وتعال لها باجر تكون هدت اعصابها

وشرط عليه ابوي يجيب لي خدامة

لانه من الخطبة اهلي اشرطوا الخدامة

وانا بعد الزواج رفضت لانه كسر خاطري لما قالي ما عندي فلوس

طبعاً نسيت اقولكم انه كانوا بالخطبة متفقين اهلي واهله ان لي شبكة وبيسوون عرس

وانصدمت انه لا شبكة ولا عرس

وقال لي اشتري شبكة من المهر 5000

كنت احس بالنقص اول مرة بحياتي على انه ما يحلم بوحدة ترضا فيه مثلي

وهذي شهادة امه قالت لي انتي ملكة جمال بالنسبة لحريم عيالي واصيلة و خلوقة و اهلج اهل دين ما نلقى بالديرة مثلج

بعدين هذي سواتهم معاي

الحمدالله على كل حال

بنفس اليوم اللي جانا وابوي قاله تعال باجر تكون هدت

جاني عوار قوي برحمي وقعدت اصارخ وابجي منه

ابوي كان طالع او نايم ما اتذكر

واختي حست فيني واتصلت على زوجي وقالت له

جاني وقعد يسكتني يقولي صوتج واصل للشارع

وقالي قومي اوديج للمستشفى

لبستني اختي وركبنا معاه ورحنا للمستشفى وسوولي سونار

وطلع عندي كيس من بقايا الاجهاض

المهم اختصر لكم السالفة

رجعت معاه وبديت اراجع دكتورة النسا

وكان حاله معاي اردا من قبل

دايماً يحسسني ان الحمل صعب واني مستحيل احمل ويحبط فيني ويتفاول علي

ورجعت اروح لاهله بعد تدخلات من عمي ابو زوجي اني ارجع ازورهم

ورجعت الاهانات من اهله والتنقز علي

وكأن هالشي بيدي مو بيد رب العالمين سبحانه

وهو ولا يجبر خاطري ولا كأنه الكلام قدامه كان يسكت ويطنش

ومع الايام والعلاج حملت لله الحمد

وما كان فرحان بالحمل مثل فرحته الاولى بالحمل الاول

كان ولا زال يتفاول علي ويتشائم ان البيبي بيموت وما راح يستمر الحمل

وهالكلام لعب بنفسيتي يا بنات لعب

فوق ما اني حامل وتعبانة يتعبني هو ببروده معاي وصمته ما يتكلم ولا يسولف ولا هو الاولي

كله منفس وقدام اهلي يمثل ويسوي نفسه احسن الناس

مليت وصرت اكره القعدة معاه وكرهت البيت من اقوم ودي اطلع والا اروح لاهلي

ولا اني اقعد واكل بصحتي ونفسيتي كل يوم بالنازل

يهمني اعرف رايكم بمشكلتي

واكيد فوفو ودي اعرف ردها هالاخت احبها بالله وأثق بآرائها

وسامحوني عالإطالة حبيباتي

Up

Up

الله كريم

الله يسمح أمورج حبيبتي بس الي بعرفه ليش رديتي حقه بروحج وبنفس اليوم الي اهلج كلموة وشرطوا عليه؟؟؟ رديتي من غير لا يعتذرون اهله ومنغير رضاوه ولا شي ولا نفذ اساسا كلام ابوج؟؟ يوم حسيتي بالالام وين اخوج؟ابوج؟السايق؟التكسي حتى؟؟من رايي هذا أكبر خطأ سويتيه وتبينهم يحترمونج ولا يقدرونج انتي ماعزيتي نفسج اسمحيلي على الكلام بس زعلانه عليج واحنا هني خواتج الي سويتيه ماله الا معنى واحد بس كأنج اتقولين انا كنت ادلع بس وابوي ماله كلمة وانا مالي غيرك انت!!!!!الله يعينج وصبرج ان شاء الله مع البيبي يتغير من نفسه والله يهديه حقج بس حبيبتي عيشي حق نفسج وحق البيبي استانسي وانسيه حتى وهو معاج

الله يكون بعونك ويهونها عليك ويسخرلك

انا لو بمكانك باجل فكرة الحمل عشان اشوف وضعي

بس خلاص حملتي وان شاءالله بعد مايشوف البيبي يتحسن

انت انسي سالفة اللي يحبها وانسي اهلها وانتبهي تقولين اهلك اهانوني اهلك يتكلمون علي

لا انت ركزي اول شي على زوجك وعلى نفسك بالاول قوي ثقتك بنفسك
حاولي تدلعين نفسك وتحبينها لان الرجل تلفت انتباهه البنت اللي تحب نفسها

خليه دايم يحس انك رايقه وهاديه وعايشه حياتك ومهتمه بنفسك

هذا اللي يحضرني والبنات وفوفو مايقصرون

الله يصلح حالكم ويهدي بالكم

مشكلتكم بعلاقته

والله يعينج يارب

يختي انتي انسانة نكدسة اسمحيلي
والا ماضي الزوج انتي شكو فيه عساه ماخلا وحدة ماكلمها انتي شكو
انتي مخلية زوجج محور حياتج معطيته اهتمام زايد وناااسية نفسج ابدا ماااعليج نفسج
حبيبتي والله ماارتحت مع زوجي الا لمن حبيت نفسي
حبيبتي زوجج ماراح يدوملج طول العمر ليش اتعلقين فيه
اصحي من الجحيم اللي حطيتي نفسج فيه
حولي مشاعرج لنفسج لا اتشيبين قبل اوانج
للعلم ترا الرجال يبغض المرة اللي تتسول الحب
ومايحب المرة اللي تسأل عن ماضيه
يحب المرأة المستقلة القوية اللي اتعيش فيه وبلياه
انتي ذكرتيه بحبه القديم من كثر حنتج
يختي عيشي لنفسج محد دايملج دلعيها وحبيها واهتمي فيها رااح يتغير زوجج مية وثمانين درجة

عسى ربي يسخره لج

صبري و صدقيني بعد العيال بيتغير و يحبج ولا يفارقج

لا تتضايقين الله معاج على طول

شوفي للامانه ومن غير زعل انتي غلطتي غلطه كبيييره يوم نبشتي بماضيه مالج حق تسالينه معروف كل الرياييل لهم ماضي وحبوا
اذا الحريم لهم يعني الريال ماله ماضي
الحريم يمكن مو كلهم بس وااايد منهم حتى لو تكون حبت من طرف واحد
بس الرياييل صعب نقول ان مو كلهم يمكن 1% ماعندهم
واهو اهله مالهم حق يغلطون عليج وعلى ابوج المفروض من اولها تجعمينهم تقولين لهم حدكم عن اهلي تاج راسكم هذيل
والحموله قطعيهم شكلهم ما وراهم الا الشر خل اهلج يمسكونه يقولون له يا تتسنع معاها يا لنا تصرف ثاني معاك والي ماترضاه على خواتك لا ترضاه على بنات الناس بنتنا ماتنداس بنتنا تنحط فوق الراس تعاملها بما يرضى الله واهلك ان تعرضوا لها يا ويلك انت وياهم
الله يصلح الحال بينكم

انا مع الاخت احلى المزايين في كل كلمه

وبقولج كلمه زوجج مب مايبي البيبي

زوجج شكله خايف تسقطين مره ثانيه بس الله يتتم عليج بعد ماتولدين بتشوفين شلون يتعلق بالبيبي

هونيها وتهون هالمشاكل بسيطه وتصير اول الزواج

تقولين ليش قالي وانتي اللي بالاساس قعدتي تحنين عليه وتسألينه عن ماضيه !!
انا اقول هذي غلطتج انتي دام سألتي واصريتي تحملي الجواب .. لا تزعلين مني ..

بس اهل زوجج لازم تحطين لهم حد ما يصير يعاملونج بهالاسلوب انتي مو ماخذينج من الشارع
انتي بنت ناس وراج اهل المفروض يعاملونج مثل بنتهم

بختصــاار زوجـج يبيـله نفضـه قوووووووووويه عشان يعرف ان الله حق

الله يسمح دربج ويسخره لج

الله يعينج
بسس انتي للاسف حييل كنتي متشائمه وواثقه ان زوجج فيه شي
وبعدين هذا ماااضي من وجهة نظري ماينتحاسب لانه بيتعبج انتي
الله يسساعدج

تبين الصج انت اللي غلطتي اول شي ليش سالتيه عن ماضيه
واصرتي عليه اذا في احد بحياته وثاني شي ليش ردتي معاه بدون شروط وان يراضيج
والله يعينج ويتمم عليج