الكليات والمعاهد ملتقى لأستعراض الحجاب شاركوني برايكم

: السلام عليكم ورحمة الله وبركاته :

الكليات والمعاهد
شقول شخلّي…..!! دور العلم صارت عرض للأزياء ومجتمع التفاهات بدلاً من المنافع

لا لبس موافق للمكان اللي رايحين له .. وتسيب تحت منظور الحرية المستغلة بدعوى الديمقراطية والرأي الشخصي..

بس بعرف يعني الحين كشخه هذولي؟ يعني اسكت الحين آنا رزة وكشخه..!!

مبدعين بالملافع شنوووو هذا !!
والله العظيم خربوا الحجاب..هالموضة اللي مادري من وين طالعه لا تمد للحجاب بصلة..طلع حجاب بو ألوان قلنا ميخالف..
بيج ورمادي وبني وهالألوان نسكت يالله ميخالف..ماتلفت النظر..
طلع الأحمر والوردي..قلنا لا اله إلا الله..شنسوي بعد..يالله عصر التكنولوجيا..

بس بو وردة وبو شريطة وبو سنامه شنو ذولي!

والله يموتون من الضحك..عاد ولا بو سنامه من أشوف وحدة لابسته أحس راسي ثقيل ويعورني..

أصلاً هذول صاروا محط السخرية من الجميع..والله إن دايما أسمع الصبيان وخصوصاً اللي من العايلة يتطنزون على هالحجابات.

فما أدري شرايكم بهالحجابات..كشخه يعني؟

الحين طرحنا المشكلة..مو يقولون كل مشكلة لها أسبابها
آنا أشوف أسبابها:

1.التقليد الأعمى.
2.حب الظهور بأي وسيلة.
3.الجهل بأحكام الشريعة السمحاء وقد تكون بسبب ضعف التنشئة منذ الصغر.

مادري يمكن انتوا بعد لكم أسباب ثانية..ف اللي اتشوف سبب آخر اتحطه لنا مشكورة غير مجبورة.

بنات ديرتي مني وفيني..
عزيزتي..تقدرين اتكونين داعية متى ما شئتي ورسولنا الكريم يقول أحب لأخيك ماتحب لنفسك فإذا انتي الله أنعم عليج بالحجاب الصحيح ليش تبخلين بالنصيحة ..وهالشغله مو صعبة يعني شيبيلها…؟؟
1.التوكل على الله وإحسان الظن به.
2.يمعاي معلومات وافيه عن الشي اللي بتدعين له.
3.طبعاً مو كل وحدة تقضبينها تنصحينها لاء..يعني وحدة قريبه منج وميانه بينج وبينها ليش ما اتحاجينها؟
4.الكلمة الطيبة والأسلوب الراقي ***..أنصحكم اتجربونه.
5.اذا مستحية تتكلمين شرايج اتحطين بجنطتج جم كتب صغااار ومايثقلون عليج ولا شي..شوفيلج وحدة سلمي قعدي يمها سولفي جم سالفة (هنيه الحريم مايتوصون ) ولابغيتي اتقومين عطيها الكتيب..
وآنا شخصياً أنصح بالكتيبات القليلة الصفحات لأنها اتشجع ع القراءة أكثر.

ماتعرفين شتعطينها؟؟
هذي كتيبات تمام..وخوش شي..
•فتنة النساء الموضة والأزياء>>اعداد القسم العلمي بدار الوطن-الرياض.
•صفات المرأة المسلمة>>اعداد القسم العلمي بدار الوطن-الرياض.
•80 مخالفة تقع فيها النساء>>للشيخ عبدالله بن عبدالرحمن الجبيرين.