الصداع النصفي وحبوب منع الحمل

السلام عليكم يا امهات …

ابي كل وحده منكم تفيدني بالي يعرفه او الي تقدر عليه معلومات..
انا صارلي 6 شهور من بدا معاي الصداع النصفي , اول شي ما كنت ادري انه صداع نصفي ليما تاكدت من طبيب الاعصاب الي رحتله, الدكتور سالني شنو تاخذين من حبوب قلت له ماكو شي معين بس اخذ حبوب منع الحمل اهني قالي اشلون تاخذين مانع وانت معاج صداع نصفي روحي حق دكتورتج خل تبدهم لج, وسالت جم وحده عن الحبوب والصداع كلهم قالولي ويه عادي ويه اكلي بنادول ويه وويه جان اخلي الدكتور اولي وكملت على حبوبي.
ليما ذاك اليوم رحت حق دكتوره دلال السالم واهي دكتورتي وقلت لها بالصدفه عن هالموضوع جان تفج حلجها وتخانقني : انت اشلون تاخذين الحبوب اني معاج هالصداع قطعيهم حالا , ترا مو لعبه الصداع النصفي.

الحين انا قاطعتهم صارلي شهر بس ما ياتني الدوره , نطرتها اسبوعبن فوق الشهر وما ياتني, حللت 3 مرات وما طلعت حامل ولا شي, عيل شالسالفه..؟

والحين ابي اعرف شنو راح يصير بعد ما قعت الحبوب هل صج ان يصير معاي عقم مؤقت ولا شنو.. وهل راح تنتظم دورتي ولا شنو..؟ علما بان كنت اخذ حبوب ياسمين وخذيتهم لمدة سنتين.
ياليت الي تعرف بهالموضوع شي تفيدني ,يعني بالعربي الفصيح كل وحده قطت حبوب المانع ولا غيرته الى طريقه ثانيه مثل اللولب تقولي تجربتها..

بليز هلب مي ولا تطنشوني..

حبيبتي ما تشوفين شر انا كلش ما جربت و لا اي شي و الحين انا حامل بالبجر بس حبيت اطمنج انشاله مافيج إلا العافيه يارب
و انشاله البنات يفيدونج بتجاربهم
و انا اشوف انج لازم تراجعين عند د كتورتج و تقولين لها كل إلي قاعد يصير معاج و انشاله خير
و لا تنسين تطمنينه عليج

مشكوره بنات حواء حبيبتي وما قصرتي.

وبعد ابي ردود …

هلا حبيبتي انا خذيت حبوب ياسمين 5 سنين كانوا زينين بعدين سببوا لي صداع نصفي لي درجة قمت أزوع والمهم رحت حق د.خالدة المجيبل وغيرت لي نوع الحبوب الحين اخذ منيوليت لانه فيه الهرمون قليل فما يسبب صداع .
وسلامتك وما تشوفين شر

واي بلي استيشن فرحتيني لان عن جد مابي اقعد من غير حبوب وريلي مو راضي عاللولب واخاف احمل, دكتورتي قالتلي ما اقدر اغير لج الحبوب لان الصداع بيرد لج مره ثانيه , ما ادري شسوي..؟
رفيجتي اييها صداع نصفي بس دكتورتها قالتلها عادي شربي فيتامين سي فوار وما راح يعورج راسج وما وقفت الحبوب.

اشلونج الحين مع المنيوليت.. ما يمتن ولا يطيح الشعر..؟

لا حبيبتي ما يمتنون ولا يطيحون الشعر بس بعد اخذي معاهم primose oil هذي حبوب زينة حق الصداع مع الدورة والنفسية والشعر

بلي ستيشن هذول حبوب شنو فيتامينات ولا شنو بالضبط..؟ واخذهم باستشاره الطبيب ولا من كيفي اروح اشتريهم..؟

هذي حبوب مو فيتامينات مثل الفيتامينات يسمونها زهرة الربيع وااااايد زينة حق الوحدة لما تجيها الدورة عشان العوار والكآبة- واحنا من غير شي – فينا كآبة-خخخخخخخخ
وبعد حق الصداع النصفي بس لا تنسيني بصالح الدعاء

سلامتج حبيبتي ماتشوفين شر
والله انا اخذت حبوب منع الحمل 3 سنين وقطيتهم ماحملت الا بعد سنه ونص

سوتلي مثل العقم المؤقت بس الحمدلله ربي ماقصر ورزقني والفال لج يارب

بعد عمري بلي ستيشن , الله يوفقج ويخليج ويعطيج مرادج انت والبنات كلهم.
لولو مشكوره حبيبتي والله يتمم ويهون عليج يارب.