الزوجات المخضرمات فيدوني

السلام عليكم ورحمه الله وبركاته حبيباتي ابي استشارتكم خاصه الي صارلهم مده متزوجات
انا وحده عمري 37 سنه
مومتزوجه موظفه شهادتي جامعيه معاشي مكفيني وزياده وضع الاجتماعي من ذوي الدخل المتوسط الاقرب الي العالي مثل اي عايله كويتيه الحمدالله كلشي متوفر لنا مستقرين من جميع النواحي الاقتصاديه والاجتماعيه والنفسيه كل شي

الحين الي حاصل متقدملي واحد معاشه 700 دينار قاعد يكمل دراسته عيشته علا قده متكفل بامه ومسئوليتها خليجي الجنسيه سمعته زينه خايف ربه عمره من عمري معاي بالدوام وقالي ان يبي يتقدم لي بس هل اقدر اتحمل معاه العيشه الضنك ولا ﻷ لين يتخرج ويكون نفسه ويجوز يتحسن مستواه المعيشي

الحين بنات انا محتاره وصليت استخاره ما ادري شقول اخاف اقول ايه وما اقدر علا العيشه الي قول عنها واخاف اوقول ﻷ ربي يعاجبني ومحد يتقدملي خاصه اني كبرت قربت من الاربعين والله ما عندي تفكير محتاره فابيكم اتقولولي من خبرتكم بالزواج ومصاريفه والنظره الاجتماعيه اشرايكم ومشكورين

انزين انتي موظفة بعد ليش ماتتحملين
العمر يمضي نعمة انج تتزوجين الحين والرجال مو عايبنه شي
اتوكلي على الله دام هالمواصفات في الرجال

وعليكم السلام والرحمة

حبيبتي راتبك على راتبه تعيشكم احلى عيشة
اذا انتي متأكدة من أخلاقه ويخاف ربه
توكلي على الله العمر يطير
واستمري على الإستخارة اذا تيسرت أموركم فهو خير لك واذا العكس خيرة من ربي

الله ييسر أمرك ويكتب لك الخير وين ما رحتي

اولا واخيرا استخيري

وتوكلي على الله

الله يكتبلج اللي فيه الخير يااارب

لو اني اشووفة مناسب جداا جداا صرااحة مشاءالله

اذا الريال مآيعيبه شي الحمدالله من رأيي تزوجيي والعمر يركض وبآجر لازم تبين ريآل يكون يمج والشغل لسن معين وتتركينه لكن الريل يشيلج طول العمر وخآصه انه بآر بأمه ومافيه شي واذا ع الراتب خذوهم فقراء يغنيهم الله وإذا ماتبين تشاركينه براتبج طبعا من حقج محد يقدر يغصبج على هالشي راتبج لج وهو بعد يمشي لج مصروف والله يوفقج من كل قلبي اقولهآ لج ويسعدكم يآرب

الله يختارلج الخيره وان شاءالله يكون يستاهلج وفكرى عدل لاتزوجين مجرد زواج وبس لاشوفينه يناسبج وله لا واستخيرى وان شاءالله اتيسر امورج وع بركه مقدما ياعروسه

مو مخضرمه توي بقراطيسي بس اقدر افيدج

اولا انتي تضمنين اذا رفضتيه انج راح تلاقين فرصه ثانيه حبيبتي العمر يمضي مستعده تصبرين كم سنه اكثر عاد ليش

الريال حسب كلامج وانتي ادرى انه زين

ونتي مرفهه نفسج بمعاشج الخاص يعني مو محتاجه احد يرفهج

محتاجه شعور المره بالقرب من زوجها وهو شعور فطري محتاجه اشيا معنويه مو ماديه

وهذا رايي وفكري

حبيبتي اذا انتي عندج معاشج خلاص بعد عمرج ٣٧ وتفكرين بسالفة المعاش !!! وخليتي سالفة الاستقرار والعيال
اذا اخلاقه زينه ورجال كفؤ وافقي تراج كوصغيرة
ومافي احلا من الاستقرار

والحين اغلب المتزوجات يشيلون المصاريف عن ازواجهم وساكتين بعد عشان عيالهم
وانا اشوف انه مناسب لج

حبيبتي لو معاشه مليون ماوح يكفي الحياه صارت صعبه و الزواج تعاون يعني حتى لو ما ساعديته بشي على الاقل مارح تطلبين منه شي معاشج خليه حقج ولو انا مكانج بصراحه اوفق ما ارفض اذا صج متأكده من اخلاقه والله يكتبلج الي فيه الخير و الصالح

أنتي مالج شغل ابعيشته دام بعيشج وإذا عن الفلوس ترى لفلوس أتروح وتي يعني مرده الفلوس بتي وإذا على أمه ميخالف شنو يعني أمه أنا أختي قاعده عند أهل ريلها وويا خالتها والحمدالله حياه سعيده مستقرين
شووفي حبي انتي مو اصغيره مشالله أنتي عمرج 37 فكري فيها واحد شاريج يبيج سألي عنه
زين مو زين دام يخاف ربه وكريم وخدووم خلاص نصيحه مني توكلي على الله حبي دام أنتي مو ناقصج شي واهو مو ناقصه شي وإذا عال العمر توكم شباب

صدقينى الفلوس مثل الوصخ حشاج تروح وترجع توكلى على الله العمر يمشى والرزق على الله

لى خلقكم اهو بيرزقكم ان شاءالله ..

الله يوفقج ويرزقج الذرية الصالحة عاجلا غير اجلا يارب العالمين.

اختي لاتكون موافقتج علشان بس انا كبرت ولازم اتزوج وهذا الموجود اخذه وخلاص
قعدي معاه شوفيه كلميه تناقشي معاه شنو اللي انتي تبينه منه وشلون بتعيشين معاه وعرفي شنو تفكيره يعني حاولي تتعرفين عليه وهذا من حقج طلبي من اهلج اني ايي ويقعد معاج ويكون احد من اهلج موجود
علشان تكونين صورة واضحه عنه يتراولي بعمرج وعمره بتكونون ناضجين لا اهو يلعب عليج ويمثل ولا انتي تنخدعين فيه
وعقبها القرار بيكون بيدج

انتي قلتي انج موظفة وراتبج مكفيج وزيادة
اذا انتي تبين الستر وراحة البال استخيري ووافقي
ولو يعطيج بالشهر ٥٠ اعتقد كثر الله خيره بالنهاية عندج راتبج وتقدرين تشيلين نفسج
اهم شي يوفرلج سكن مناسب وصدقيني واخذيها من وحده مجربه الفلوس عمرها ما تشتري السعاده ولا تحسسج بالاستقرار

ياعمري الريال تمام خليجي يعني مافي فرق انشالله ومابتحسين فيه بإذن الله ولحقي اتييبيلج ياهل ولا اثنين ينفعونج ويدعولج

انا معاها نفس رائي