الزواج المختلط

السلام عليكم ورحمه الله وبركاته مثل ماانتو شايفين اول مشاركه لي بهالمنتدى الحلووو
عندي سؤال امأرقني وامعور راسي
وهو الزواج المختلط يعني لو كانت الزوجه اصيله والزوج مو اصيل
او العكس
تتوقعون الحياة بتمشي بينهم مافي شي ينكد عليهم خاصه عند العوايل الي تشوف هالشغله اهم شي عندهم
قولوا لي ارائكم علشان افضفض لكم بالي امتعبني بنات صدج انا تعبانه بس بشوف ردودكم يمكن اتشجع اقول مشكلتي

وعليكم السلام أختي ركاز

أنا رأيي بكل صراحة أنه زواج فاشل
وها الرأي خذيته من مشاكل الناس في مجتمعنا

يعني إذا الوحده أصيله وأخذت واحد مو أصيل راح تحس أنها منبوذه بين أهلها وأكيد بيجي يوم تصير خلافات مع زوجها مهما كان الحب بينهم كبير فراح تعيره وتذكره أنها أحسن منه

وإذا أهو الأصيل وأهي العكس راح تكون منبوه من أهله وأهو ألي دايم يذكرها أنه ضحى بأهله وخذاها
وللأسف الضحيه هم (((((((((((الأولاد)))))))))))))))

أنا هاليومين أعاني من هالمشكله
عندي طالبة مؤدبه بس كسلااااااااااانه وراسبه
لما كلمتها وخذيت وعطيت معاها اكتشفت
أن عندها مشاكل في البيت
أبوها خذا أمها مو من مواخيذه فأهله قاطعوه وأهو حط الحره بهالمسكينه وعيالها
وتقول أبوي يطق أمي ويقولها أنتي السبب
والنتيجة أولاد منبوذين ويعانون من الحيره والألم

أنا أدري أن مافي فروقات بين البشر
وأن أهم شي الدين والصلاح
لكن خلونا نعيش الواقع

سلااااااااااااام

انا من رايي

ان هذا كله يرجع للزوج و الزوجه

يعني اذا اهمه ما يهمهم كلام الناس

و يحبون بعض

مار اح يهميهم احد

و لا راح يهمهم الاصل

فاعتقد ان كل هذا راجع لهم و لعقلياتهم

و عليكم السلام و رحمة الله و بركاته

هل الزواج ينجح أو لا؟
هذا بيد الله وحده سبحانه
و القدر مكتوب قبل لا نخلق.

يعني ياما اصيل خذا اصيله و هم صار بينهم خلافات و سوالف….مو احنا اللي نقدر نقول هل ها الشي راح يسبب خلاف أو لأ…

و بعدين تعالي أقولج…يعني شنو اصيل؟
أول شي الاخلاق و الدين هذيلا اللي يحفظون للوحده سعادتها .هذا من ناحية الرجال.
و من ناحية المره نفس الشي
اذا كانت لبجه حق الريل و ربي معطيها الدين و الاخلاق اللى يوفقها فيهم انها تاخذ قلبه …هم راح يلقون السعاده.
لكن المشكله وين يا ترى؟؟؟

البلوى و المصيبه في الناااااااااااااس و ما ادراك ما الناس.
يعني لشافوج رايحه يمين قالوا هو !!!شبلاها رايحه يمين؟!!!

و اذا لفيتيلهم شمال قالوا……طاع هذي عميا ما تشوف هناك يمين…..

يعني ماكو فكه ابد.
فعشان جذيه تلقين وايد يراعون نظرة المجتمع للأمور عشان يتجنبون كثرة القيل و القال.
بس من رأيي الواحد يمشي على حسب قناعاته و يصك باب بيته بوجه الكل .

تبقى نقطه صغيره…اهي التكافؤ الاجتماعي.
بالزواج الاهل يحرضون انهم يلاقون البنت//الولد اللي يناسب عيالهم و غالبا اللي من نفس المواخيذ يتوافقون اكثر لأنهم نشأوا بنفس الاطار العام من التقاليد و الافكار.
فاذا توفر التكافؤ الاجتماعي بين الرجال و عروسته يكون هذا ادعى للاستقرار مستقبلا.

و من واقع تجارب الحياة….

سعادتنا تنبني على حسب نظرتنا للأمور.
و الله الموفق

رايي الشخصي في هالموضوع .. راح يكون الزواج فاشل في الحاله اللي ذكرتيها ..

تدرين ليش؟؟ أنا بقول لج ليش …

باجر لي يابت هالمره عيال وكانو تابعين لإسم إبوهم طبعاً ( سواء أصيل أو مو أصيل ) !!

راح يحسون إنهم غير عن باجي عيال العايله .. هذا غير النقزااااااات اللي بتاخذها الأم من أهلها كل ما تمو قطو عليها كلمه ..

ليش أحط نفسي في هالموقف ؟؟ الدنيا خلت من الرياييل؟؟

الأفضل تسوين اللي تشوفينه مناسب لج ويريحج من كل هالبلاوي ..

وتاخذين واحد من ثوبج ومواخيذج .. وإشعلي أنا من الناس وإشعلا الناس مني

<— حاولت أتم جد ماقدرت ههههههههههه

أنا أتكلم من ناحيه إجتماعيه ..

ومالج شغل باللي قالته إختي رنين !!!! لأنه الناس عندهم قدرات متفاوته يمكن إهي عندها القدره تتحمل الكلام اللي بيييها من الناس لكن إنتي ماعندج هالقدره!!!

يعني إهي ماشاء الله عليها تسوي اللي براسها ولا يهمها أحد بس أنا ماقدر!! <– مثال على القدرات المتفاوته ..

ومثل ماقلت هذا رايي الشخصي .. وإنتي حره

يالله قولي موضوعج

( ترحمو على العضوه تفاخيه لأنها راح تروح من جيس أهلها والسبب العضوه رنيييين ) <— خلوها في بالكم وإذا فقدتوني ردو لها

اهلنا ديما يقولون من اول .. حلات الثوب رقعته منه و فيه .. و هالمثل ما يا اعتباطا .. ندري احنا ان الكل عند الله سواسيه و ماكو فوق الا بالدين و التقوى .. بس الوضع بالمجتمع غير .. مهما يكون راح يحس الزوج او الزوجه انهم انتموا لمجتمع ما كانوا فيه ..و راح يصير تحفظ في الكلام و خاصه مسالة الاصول و تاريخ العوائل لا تكلموا الاهل عن هالموضوع .. هذا غير الابناء اللي بيكونون شايلين اسم الابو و يحسون فرقهم عن عيال عمامهم او عيال خوالهم .. و نجاح الزواج مكتوب عند الله لان ياما ناس من ثوب بعض مالله وفقهم و ياما ناس غير عن بعض و توفقوا … عموما هذا يعتمد على عائلة الزوج و الزوجه لان في ناس عادي عندهم الموضوع .. و ناس لا بمكن ابد ياخذون ناس مو من مواخيذهم .. ارجع و اختم باللي بديت ان حلات الثوب رقعته منه و فيه

والله حبيبتي على حسب الاهل عرفتي
في ناس مايبون الا ولد الاصل لوكانت اخلاقه بلارض وراعي خرابيط ومايسوى بس اسمه مايبون سعادة بنتهم الحمدالله والشكر
وفي ناس لا وين في سعادة البنت يعطونها
حبيبتي اللي الغلط انه الوحده تاخذلها واحد اهله مايرضون فبها او العكس
اذا اهلج واهله راضين اوكي سواء اصيل او مواصيل توكلي على الله كلنا مسلمين لاكن اذا في احد موراضي وسوالف وهواش هذا الغلط خصوصا اذا اهل الولد مايرضون يمكن اهل البنت اذا شافو البنت مرتاحه ومتهنيه يفرحون لها ويسامحون بس اهل الولد لا ماراح يسامحون
وانا اعتقد انه هلسوالف قلت الحين موواجد نفس اول والناس تفهم وتعرف انه مافي فرق بين احد عرفتي

واااااي والله ياربي هالناس شلون تفكر؟؟؟؟؟
الدنيا تطورت…والناس تغيرت …هذا غير البلاوي والمصايب اللي قاعدين نشوفها ونسمع عنها كل يوم…وهالامراض وهالحروب والمشاكل اللي نعيشها بالديرة….
كل هذا وليحن الناس تفكر وقت الزواج ..ب اصيل ومو اصيل!!!!!!!!
ياجماعه والله موضوع مايستحق ان الانسان او البنت توقف حياتها عشانه!!!!
الحين انتوا بالذمة ماتسمعون عن بلاوي الزواج والطلاق وخلافه!!!!!
تعالو شوفوا المحاكم وشلون مترووووووووسة قضايا رهيبة…
اللي تتزوج ويطلع الزوج مدمن
سكير
نصاااب
شااااااذ
مريض بمرض مزمن..والحمدالله والشكر على الصحة والعافيه…
هني تعالو عاد فكوا عمركم من هالزواج!!!
وترى كل اللي ذكرته من واقع تجربة عشتها خلال 4 سنوات فاتت بالمحاكم كوني محامية…
وعلى فكرة اغلب القضايا الغريبه كانوا الزوجين من مواخيذ بعض…يعني اصيل واصيله (على قولتكم..لاني ماحب هالالفاظ احس جنه تصنيف خرفااان!!)
او مو اصيل +مو اصيله

بنات خلوا عنكم هالسوالف..اللي ماراح تعيش معاكم ولا راح تنفعكم….
اذا لقيتوا الزوج الطيب والخلوق والمحترم واللي يحبج ويعزج لاتفرطين فيه نصيحه..باجر تندمين اذا ابتليتي

انا هذا رايي الشخصي بصراحه

عندي قناعه أختي الزواج بدون رضى الأهل زواج فاشل … و قيسي عليه الأصل المذهب الحب …. إلخ

الصراحه الأهل لهم نظر غير عنا … علشان جذي ما أعتقد راح ينجح الزواج ….

هذا بالمختصر المفيد رأيي

انا براي الخاص
ان يرجع للزوج والزوجه لانهم راح يعيشون مع بعض فاذا نظر كل واحد للثاني هذي النظره ما راح يستمر
وبعدين لا تنسين اللي يبني اساس قوى عمرى ما ينهدم

سوري بنات قاعده افكر في البنيان

أم أحمدووود ..

نقوم إحنا نزيد القضايا اللي بالمحاكم يعني !!!

إذا كنت عارفه إنه قراري راح إييب لي مشاكل بالعايله وعوار راس ليش أتخذه؟؟

أوكي رضيت بواحد من مواخيذي وعقب صارت لي معاه مشاكل هذا شي ممكن يصير بنسبه بسيطه ..

لكن الزواج من واحد مو من مواخيذنا راح يسبب لي مشااااكل بنسبة 80% إذا مو أكثر !!!

وتزيد القضايا على مكتبج وإحنا نبي راحتج

أنا أقول التطور ماله علاقه بهالشي .. إذا كان رسولنا حريص على التوافق الإجتماعي

يعني عشان تطورنا أقوم أحط على راسي بلاوي ومشاكل !!!! ليييييييييييش؟

أم أحمدوووه .. وجهة نظر مو أشوفج حاطتلي ملف مع الملفات اللي على مكتبج وفاتحتلي قضيه

وووووويه…. والله يابنات انا قريت العنوان عبالي زواج مختلط يعني عرس حريم ورياجيل مختلط
داااااشة بقوة حدي بشارك
الزواج قسمة ونصيب وفعلا الاهل بس يهمهم الاسم والمستوى الاجتماعي…. بس احنا اللي بناكلها بالاخير

بس هم غلط الزواج من دون موافقة الاهل…. وماشاءالله البنات كفوا ووفوا في الردود>>>ترى والله موحاطة في بالي موضوعج عبالي عرس مختلط

تفووووووووووخ حبيبتي هذي وجهات نظر…وانشالله مانختلف
والرسول عليه الصلاة والسلام وصى بالاتفاق وان يكون زوج صالح وذو دين وخلق …ماعتقد كان في عهد الرسول اصيل ومو اصيل ههههههه

عموما الله يبعدكم عن المشاكل …ويارب تتزوجين اللي يسعدج ويفرح قلبج …
والله يبعدكم عن المحااااااااكم والقضايا رب

يمااااااااااااااااااااااااااااااااااااااااال العافية تفاخيوووووه

توني انتبه لردج ياعلج الصلاح

هذا انتي قلتي الناس تتفاوت…شعرفج بالبنيه تقدر و الا ما تقدر؟!!!!!
كون طالعه فيها يعني!!!!

يبي حبيبتي……… المشكله براااااسج

بقناعاتج اذا قدرتي تضبطين نفسج على ان شنو ما يقولونه الناس مايهمج ما راح يهمج…لكن اللي يشوف نفسه صغير للناس حق يقيمونه و يعطيهم اهو ها الحق و يدخلهم بيته مارااااح يرتاح ابدا.

يعني خذت لها من مواخيذها بيدورون على عيب ثاني يغثونها فيه و بتظل منغثه ماكو فايده.
لكن اذا صكت الباب بنفسها لو شنو يقولون ماراح يهمها….

لكن نبهتيني لشي مهم في الموضوع ماكنت منتبهه له.

اذا الاهل مو موافقين…..اهني شي ثاني.
يعني مو موافقين و رافضين بشده و خصوصا اذا هم أهل البنت اهنى لأ طبعا
مو عشان اصيل و بيسري لا ….بس عشان الرحم و الاهل و عشان تلقى من يمسح على قلبها لو سبحان الله حصل لهم شي.

و الله يوفق.

بصراحة الموضوع معقد وكل واحد وله قناعاته

بس أرجع وأقول أن الأهل لهم نظرة

وأغلب الزيجات اللي ما فيها توافق اجتماعي فاشلللللللللللللة

حتى اللي يقدم على الزواج من غير أصله …ويتخذ هذه الخطوة …بينه وبين نفسه وبعد مرور سنوات عديدة على الزواج راح يتندم

وحبيبتي أم أحمدووه

منو يقول ان في عهد الرسول ماكان فيه أصيل ومو أصيل

بالعكس … من قدم العرب وهم ما يفتخرون إلا بأصلهم

والرسول صلى الله عليه وسلم يقول في الحديث الشريف " تنكح المرأة لأربع ……….ومن بين الأربع حسبها …الخ الحديث "

ويقول الرسول صلى الله عليه وسلم : " تخيروا لنطفكم …الخ الحديث

ومافيها شي إذا الواحد افتخر بأصله وشرط ان ياخذ أصيلة أو العكس الأصيلة هي بعد تبي الأصيل

وما أقول ان مافي مشاكل …بس مو ظاهرة

وأغلب زيجات التوافق الاجتماعي أنا أشوفها ناجحة

هذه وجهة نظر وإن شاء الله يكون فيها قبول