الزقارة قبل الشهادة

السلام عليكم و رحمة الله و بركاته
صباح الخير اشلونكم بنات شاء الله بخير

ودي اعرف رايكم بشي مادري انا صح و الا غلط
مشكلتي اني ماني راضية اتقبل فكرة اني اخذ واحد يدخن لو شصير
انا ما احب الزقاير كللللش ولا احب ريحتها ولا احب اشوف منظر ريال قاعد يدخن

ومن اشمها اقعد اكحكح ولا عندي احد من اللي حواليي يدخنون لا ابوي ولا اخواني ولا عمامي و لاخوالي ولا عيال عمي ولا عيال خالتي يعني زواراتنا البيئة فيها نظيفة _والله صدقوني يمكن اتقولون ابالغ اني من ارجع من مكان عام سوق والا مطعم و اشم ريحة الملفع كلها زقاير تلوع جبدي من نفسي _ولا تقولون عادي يدخن بس مو جدامي حركات يدخن بالحمام و مادري شنو _ والله ان ايخطبوني ناس زينين بس من اسمع انه يدخن مادري شصير فيني اتكهرب واول شي اسأل عنه يدخن والا لأ قبل لا أسال شنو شهادته ولا تقولون اذا الريال زين الزقارة ما تضر _الريال الزين بالهزمن ما يبين الا بالعشرة انا قصدي اذا المواصفات الأساسية متفقين عليها الأخلاق و الصلاه و السمعة الطيبة .
انتو اشرايكم ؟؟

والله حبيبتي ان معااج ان الزقااارة مظرة وشكلهاا بشع
وانا زوجي كاان يدخن ومدمن عليها بشي موطبيعي بس انا حااولت فيه وماسكتت وظليتت معااه لمه تركها والحين صارله تقريبا شهرين تاركها

ولااتوقفين نصيبج عشان هالشي وخلج معااه لين يتركها وكرهيه فيها

والله يوفقج يارب

اهوا التدخين كلش ماله اي علاقه بالأخلاق
وايد شباب زينين ويدخنون والعكس
بس اذا انتي من النوع اللي مثل ماقلتي ماتتحمليت كلش مايصلحلج واحد يدخن
لأن بتصير من اولها نجره على سوالف التدخين
اذا انا اللي عادي عندي زقاير يعني متعوده من ابوي واخواني لما تزوجت قمت اكرها واكره يدخن جدامي
فأنتي اتوقع ماراح تتحملين كلش لأنج راح تعيشين معاه واغلب وقتج معاه
عسى الله يرزقج بالريال الزين اللي مايدخن يارب

المشكله ان في رياييل ذهبه بس عيبهم التدخين وفي مايدخنون واخلاقهم موزينه
السالفه قسمه ونصيب من وانا صغيره اقول مابي مدخن اول شرط ومردي خذيت مدخن بس اقولج صج صج صج معااانااااااااااااه بوايد اشياء بس هم بالنسبه لي الاخلاق اهم من الزقاير والحمدالله موندمانه بس اعاني بوايد مواقف

اهوا فعلا الزقاير مضر بس ما يأثر بالاخلاق انا عندي اكبر خوالي نسمي مدمن زقاير واخوي نفس الشي بس الحمدلله تعالي شوفي ولله احسهم اطيب ناس
بس تقدرين مع الايام تساحلينه ان يتركها ترى هذا مو سبب انج ترفضين واحد اخلاق و شهاده بس عشان الزقاير
والله يوفقج ويرزقج بالزوج الصالح

حبوبه وايد بنات مايبون مدخن بس النصيب ومايسوى بس انتى وشطارتج تقدرين تخلينه يترك التدخين وانا مازلت اعاني من هذى النقطه بس في تقدم خفيف انه قلل

شوفي حبيبتي … مسألة التدخين الكل متفق عليها ان شي مضر وياذي وما اتوقع في وحدة تحب ان ريلها يكون مدخن
لكن خليني افرض معاج ان تقدملج واحد ما يدخن واخلاقه زينه وكل شي … وتم الزواج … وبعد فترة صار يدخن تصير ولا لأ ؟؟ اكيد تصير
وفي احتمال ثاني … انج تاخذين واحد هم زين وولد ناس واخلاقه زينه … ويدخن … وبعد فترة يتركها تصير ولا لأ ؟؟؟ اكيد تصير
يعني المسألة احتمالية ما فيها شي مضمون … اذا الصلاة وهي الصلاة إلي من وجهه نظري اهم شي ان الوحدة تسأل اذا إلي خطبها يصلي ولا لأ وبالمسيد مو صلاة بالبيت ( واكيد انتي تسألين ) في رياييل بعد ما يتزوجون يلتزمون ويواضبون عليها … وفي الله يكافينا الشر ينتكسون ويهدونها
آنا رايي انتي شوفي الاساسيات المهمة بالنسبة لج … لو فرضنا انهم 5 اشياء اساسية وتوفرت بلي خاطبج 4 منهم فالريال يكون مناسب لج … لان ما راح اييلج واحد 100% لانج انتي نفسج مو كاملة ( واكيد كلنا مو كاملين )
نصيحتي لج … اذا خطبج ريال اهلج يشوفونه زين وانتي تشوفينه زين وكان عيبه التدخين … وافقي لاتردينه … وشوي شوي مع الوقت والعشرة اذا حس انج تتضايقين منها اهو بروحة بحاول يهدها … وصدقيني مثل ما المره تتضايق اذا حست ان ريلها كاش منها لاي سبب … الريال نفس الشي … واذا حس انج كاشة من ريحته وتضغطين على نفسج وتجاملينه … اهم بروحه بحاول يتركها

حبيبتي طبعا التدخين عاده مو زينه ومضره ……. بس ما ارفض الريال لانه يدخن…….انا اعتقد ان انت عندك مشكله معاها لان كلنا ما نحب ريحتها بس مو لهدرجه
انا زوجي لما اخذته كان يدخن والحين بروحه وقف والله يتمم عليه
بس اذا ياك الريال الزين مو سبب الزقاره علشان تردينه عليها
الله يوفقك

مشكورين وايد حبيباتي على تفاعلكم و ردودكم

اختي deeeena مشكورة وايد حبيبتي ردج وايد حبيته و حبيت صراحتج معاي صج انا احس ان التدخين راح يكون سبب بالمناجر كافي مناجر الأزواج من دون شي مع بعضهم

اخني الإسطورية اي والله انه احسها بعد معاناة واشكرج وايد على صراحتج
.
اختى lulu91 انا ماقلت يا بعد عمري ان التدخين يأثر على الأخلاق بس يمكن من وجهة نظري يكون الشخص ما يحترم رغبة الناس اللي حواليه و يتأذون من هالشي يعني ما يحترام الذوق العام

اختي غنايم اشكرج على اهتمامج و شرحج الوافي بس انا متفقة معاج ان اهم شي في الولد الأخلاق و الصلاه و السمت الطيب يعني اكيد ما راح ارضى بواحد ما تكون فيه وحده من هالصفات يعنى هالأشياء مثل ما يقولون امر منتهين منه بس الزقاير بالنسبة لي شريرررررررريجة

سوري تحملوني ادري اني دعلة

كل يوم قيمي الليل وادعي ربج يرزقج الزوج الصالح والي ما يدخن زقاير

واستغفري ربج بكل دقيقه

انا معاااااج مليون بالاميه.. وايد ناس يشوفونها مبالغه بس والله انا وحده ماقدر اتحملها وانا مثلج بالضبط محد من بيتنا يدخن وكنت شارطه على امي اي احد يدق حتى لو منو كان وزين بس تدري ان يدخن لاتعطيهم طريج ييون.. وفعلا لما امي كانت تسأل اذا الولد يدخن ويطلع فعلا يدخن امي تقولهم مافي نصيب.. انا موشايفه روحي ولا بتفلسف (مثل ماكانو الي حواليني يشوفوني ويقولون عني) وصج الزقاير مالها شغل بالاخلاق بس يا اخي اكره منظر الريال وبيده الزقاره وريحتها ياااااااو شنو خايسه وفوق هذا ييب لي امراض واحتمال ييب عيال هم معاهم مشاكل صحيه او موكاملين النمو لاسمح الله..والشي الثاني بعد الي خلاني اكره الزقاير اكثر ان لما كنا ندرس تشريج بالجامعه كانو يورونا رئة ناس ميتين كانو مدخنين وناس ماكانت تدخن لاتشوفين الرئه شلون تقمت وسووووووده ماتقولين هذي رئة انسان لا وصغير بعيد..
شالله حادني اوكي كل شي بيد الله لكن قراري بالموافقه على انسان جذي بيدي وانا الي ببني مستقبلي..
والحمدلله الله رزقني بواحد مايدخن وحتى بيتهم كلهم مايدخون.. والله يرزقج بعد مثل ماتتمنين..

الزبده: الي مقتنعه فيه سويه انتي بتعيشين مع الريال وحياتج كلها معاه.. وبالتوفيج يارب

حبيبتي من حقج هالشي
دامج تدرين ان هالشي ما تحبينه ويضايقج

والله يوفقج باللي تبينه

اختي om_ jsoom حرام عليج اقيم الليل وادعي انه يدخن
والله انه دايم ادعي ان يرزقني ربي الزوج اللي اذا حبني أكرمني و اذا كرهني ما ظلمني
و على قولة يدتي" ان شاء الله ربي يرزقج الريال الهين اللين الدين"

امبيي انا شمخربطه

قصدي ادعي ان ماايدخن

اختي cawcaw ما أقدر اقولج الا يا بعد جبدي والله احب اللي فاهميني