الرضاعة الطبيعية

السلام عليكم ورحمة الله وبركاته

بنات آنا صار لي 19 يوم والدة الحمدلله يتني بنوتة مثل القمر

مشكلتي في الرضاعة الطبيعية

بالمستشفى عطوها حليب صناعي لأني ولدت قيصري وبعدين لما بديت أرضعها بديت أحس بآلام

والحين في البيت أحاول كثر ما أقدر أعطيها صدري بس مرات ما تعرف تمسكه ولما تمسكه أموت من الألم

قريت وايد وبحثت بالموضوع وعارفة أغلاطي

أول شي آنا مو عارفة أعطيها أكثر من (سوري) الحلمة

المفروض إنها تاخذ الحلمة وشوي من الهالة المحيطة فيها اللي يسمونها أريولا

وغلطتي الثانية إن قعدتي غلط

بس المشكلة إني مو عارفة أصحح أغلاطي مع إني كل رضاعة أحاول أجرب شي يديد

إذا عندكم أي نصايح فيدوني يزاكم الله خير

وأتمنى أتمنى أتمنى من كل قلبي إذا كنتوا تعرفون مستشارات أو أخصائيات رضاعة طبيعية ايوني البيت ويساعدوني أكون شاكرة لكم من كل قلبي

ويعطيكم العافية

الحمدالله على السلامه
حاولي قدر الامكان ترضع منك ولا تشيلي الحلمه اذا مسكتها الا لما تخلص وتكونين في مكان هادئ وسمي عليها
بس في بعض الاطفال مايمسكونها بس حاولي ولا تفقدين الامل

حبيبي الحمدلله على سلامتك
بدايه الرضاعه راح تحسين بالام وهذاشيء راح يخف مع الوقت
لازم تتحملين شوي
ولازم تهتمين بنظافة الثدي بعد الرضاعه بغسله بماء دافي وتتجفيفه
اما الحلمه ضعيها بفم طفلتك لاتخافين اهم شي تمص الثدي ومايضغط على انفاسها

[centerحمدالله عالسلامه ومبروك البنوته
اول شي حطي مخده ورا ضهرك وريحي حالك بالجلوس وارفعي البنت موتنزلي انت للبنت عند الرضاعه
بعدين بي تخلصي رضاعه لا تخلي صدرك معرض للهوا لانه بنشف ويصبح يوجع
دهنيه زيت زيتون او زيت السمسم كتير كويس انا كنت استعمله[/center]
واذا كانت حلمتك صغيره بنبتع بالصيدليه حلمه سيليكون بتحطيها على صدرك بتساعد بالرضاعه
واخيرا بدك تصبري واطولي بالك
والله معك
انشاءالله تستفيدي

يعطيكم العافية وحدة وحدة نصايحكم روعة وفعلا قريتها بعدة مواقع

الله يسلمكم حبايبي

بس آنا كانت مشكلتي إن اشلون تلقط الحلمة مع الهالة المحيطة فيها عشان يقل الألم

اليوم كان الوضع وايد أحسن وان شالله نستمر على هالحال

ماقصرتوا بنوتات … ادعوا لنا

موشرط اذا التقطت الحلمه مع الهاله يخف الالم حبيبتي
عن تجربه انا اكلمك لاني ارضع لي تقريبا 8شهور
حبيت انقل تجربتي

حبيبيتي الالم وقت الرضاعه راح يقل مع الايام ويختفي
اهم شي انتي قعدي عدل بالطريقه اللي ترتاحين فيها .. والافضل انج تستخدمين مخدة الرضاعه
والبيبي تلقائيا يلقط الحلمه اهو يعرف بالفطره

الله يوفقج

الف الحمد لله على سلامتج وسلامة البنوته(واسال الله العظيم ان يجعلها من الثابتات والصالحات ويجعلها ويناتي من حفظة كتاب الله ويرزقج برهاو تفرحين فيها بعد عمر طويل انشاءالله)
حبيبتي كلام الخوات كله صحيح والعمليه يبيلها صبر وطولة بال وجهاد,عيل اشلون الجنه تحت اقدام الامهات؟
بس انا بزيد شغله عن تجربه.لازم ترفعين بنتج لج بوضع مخده ورى ظهرج ومخده خفيفه بحضنج تحت بنتج ولا تدنقين لها لان هالشي يأثر على ضغطج ويحسسج بدوخه.

والله قاعدة أسوي كل اللي قلتوه حتى أول كنت أحط مخدة عادية بحضني الحين شريت مخدة مذركير أثبت بالحضن ما تزلق

ما قصرتوا على هالنصايح الحلوة والله يقدرني أرضعها كله طبيعي وأقطع الصناعي بالمرة

مسك أسود تسلمين على هالدعوات الحلوة الله يخلي لج بناتج ويوفقهم ياااارب

حبيبتي الحمدالله ع السسلامه
والله مايضيع تعبج
الرضاعه بالبدايه متعبه وراح تحسين بالم
بس مع مرور الوقت راح يكون الوضع مريح
انتي قيصريه فيفضل تحطين مخده ورا ظهرج
وترضعين عادي باي وضعيه حتى لو كنتي منسدحه تقدرين
الاهم انه البيبي يرضع

\

اي ونسيت اقولج انه راح تحسين انه الحليب قليل
وانها ماتشبع وصدقيني مع كل رضعه يدر الحليب سبحان الله
اهم شي لا تدخلين الصناعي هالفتره علشان الغازات
لاتأذيها

هلا حبيبتي اهم شي المواصله في الرضاعه يعني على قد ما تقدرين حطيها على صدرك سبحان الله يدر اكثر انا صار لي سبع شهور ارضع والالم اللي تحسينه هذا بعدين يروح لأنه يبداء يرجع الرحم مكانه اما بنسبه لألم الحلمه الله يعينك انا اعاني منه لانها تعض فجأه وهي ترضع

مشكورن كل اللي ردوا وسامحوني ما رديت عالكل لأني كنت لاهية مع البنوتة الله يخليها لي

برد عليكم وحدة وحدة ان شالله لأنكم ماقصرتوا معاي

ادعوا لي أستمر عالرضاعة الطبيعية وأقطع حليب البودرة كللللش ملللللش

يا رب

اي آنا لاحظت إن الإزعاج يشتتني وشتتها فقمت أدخل الغرفة وأرضعها بخصوصية

يعطيج العافية حبيبتي ماقصرتي

نصيحه اذا انت تطلعين وايد حاولي تعطينها حليب صناعي لو رضعه باليوم عشان ماتنحرجين عند الناس او في مكان عام
ويكون اسهل وقت فطام حليبك