التقويم آخر قرار

السلام عليكم ورحمة الله وبركاته

شلونكم بنات

شخباركم

بعد الحوسة والفرارة من عيادة إلى عيادة

وما تم دكتور إلا وبطلت له حلجي

تقرر إني لازم أسوي تقويم

وما في حل لهم غير التقويم

فبديت حملة الفرارة والدوارة على عيادة شغلها زين وسعرها مناسب

آخر عيادة اللي شكلي نهاية الأسبوع بروح أتفق وياهم خلاص

عيادة المنار كلينك اللي بالسالمية دوار البدع

سويت سيرج بقوقل شفت ناس مادحينهم

وهم اتصلت عليهم اللي رد علي قالي إن التقويم يبدأ عندهم

من 800 إلى 1100

وأول دفعة 100 دينار والباجي أقساط شهرية 50

وسألت عن اسم الدكتور عندهم قالي اسمه د.حسن حلالا

مو متأكدة من الاسم الثاني عاده لي بس هم ما ثبت <<< الصمخ اشتغل حزتها

فمادري اشرايكم حدي متوهقة

بنات بليز اللي مجربين نصحوني

أنا أدرس بكلية التربية الأساسية والكورس الثاني ميداني

تهقون يأثر علي ؟ مادري

بس أنا لازم أسوي بهالعمر الحين جدا مناسب

أنا عمري 21 سنة

أدري متأخرة وايد بس شسوي ظروفي ما كانت تسمحلي

بس خلاص أحس ببجي

بليز لا تطنشون حدي صاكة فيني الدنيا مو عارفة شسوي

لا حبيبتي عادي وانتي مو وايد كبيره بالعمر في ناس يصيرولي اعمارهم 30 مركبين عاادي !!

ومتزوجين ومركبينه هم عادي

وانا الحين مركبه والحمدلله تغيير واضح بس انا مركبه بالحكومه فما اقدر افيدج الا باللي قلته وموفقه وبدوون نقااش انصحج تركبينه

لووووول
حلووة مابقي دكتور وبطلتي حلج له خخخ
عجبتني

انا بعد قررت بعد ماخلص امتحانات اراجع الطبيب واحط تقويم
اخر قرار ع قولتج يممااا خايفه حدي

FsForya
وين حاطه تقويمج اي مستشفي اذ بنيدالقار التابع للعاصمه عفيه فيديني
لانو اذا زين بختصر الطريج واركب عندهم بلا عواار رأس وخاص ومادري شنو
يارب يسهل

سوري بنوته طموحه طرحت سؤالي بموضوعج
السموحه بس شفته مقارب لي

^^

لا انا بالاميري وترى والله الحكوومه مافيهم شي وشغلهم وايد زين بس فيهم عيب واحد اللي اهوه الموااعيد يعني بس لا بغييتي تروحين تحطين موعد حق التركيب بس المراجعات بعدين عادي كل شهر او شهرين حسب الدكتور شيقولج

لا ما تاخرتي اذا انتي تاخرتي انا شقول عمري 27 وباجر بركبه وصار لش شهر من تنظيف سوسات وشلع وتنظيف

والحين حاطين سيور عشان يفتحون الاسنان شوي ويركبون التقويم وان شالله باجر بحطة

طبعا اناا اسويه عند مركز ابها .. دكتور وليد العلي

بس حق التقويم دكتورة هنديه والله ماحفظت اسمها صعب

طلع علي 1000 والمخفي 1200

اول دفعه 300 وكل شهر 60 ما اجري 50

وان شالله يكون شغل الدكتورة مريح

لا حبيبتي مو متأخر عادي ..
انا 30 وتوني اركبه .. لظروف صحية واجتماعية ما ركبته من قبل بس الحين خلاص مصختها لازم اركبه غصبن علي ..
ركبته بالميدان اللي بمجمع بيروت .. دكتوري هندي اسمه أنيل واااايد زين .. ويصلح للخوافين مثلي ..
تقويمي اللي يصير شفاف نفس لون الاسنان فما يبين بشع وايد .. كله كله يطلع 1675 اول دفعة 600 وبعدين جنه كل مرة 100 ..
ما يأثر عادي .. انا مدرسة وما فرق معاي بس عوار اول جم يوم ومحتمل عادي تاخذين بنادول ويخف

ركبيه ما راح تتحسفين

الله يوفقج

تصدقين عطيتيني أمل

كله من هالدكاترة كل ما أروح لواحد يقولي لحقي على نفسج هذا أحسن عمر

حسسوني عمري 50 سنة

خخخخخخخخخخخخ

أفا عليج الموضوع موضوعج

انتي الداشة وحنا الطالعين

طيب عوار قلب تكفين طرشيلي رقمهم وعنوانهم عالخاص

يمكن يكون أحسن

والله يوفقج يا رب

أنا الميدان هم رحت لهم

بس صراحة مالي قدرة بالدفعة الأولى

وايد يطلبون دفعة أولى يعني لو 300 جان زين

اب اب اب

يارب إن شاء الله

أمانة ادعيلي تتيسر قصة التركيب

والله تعبت من أسناني

الله يرفعج دنيا وآخرة

تشجعوووون

ان شالله " بعد الامتحانات "

ابلش مراجعات واركب تقويم معاكم :$

<< هذا اذا ما تكيسلت وطنشت