|
|
السلام عليكم…
شلونكم بنات
قبل 3 اسابيع تقربين اختبرت اختبار التوظيف في البنك الوطني كان وااايد سهل وتاااافه عباره عن 4 اوراق ورقتين رياضيات وورقتين انجليزي… بكتب لكم اسألة الاختبار اللي اتذكرها انشاء الله تفيدكم انا دبلوم واللي اختبرو معاي كانو كلهم دبلوم فمادري اذا اختبارات الدبلوم نفس اختبارات البكالريوس ويلا لا ومادري اذا اييبون لكم نفس اختباري ويلا يغيرونه بس عالعموم حتى لو غيرو بغيرون بالارقام وقواعد الانجليزي بس ما اييبون شي صعب…
بسم الله الرحمن الرحيم..
الرياضيات :-
-ضرب (حفظو جدول الضرب لان ممنوع استخدام الاله الحاسبه) يعني مثلن يقولج 8×5876=؟؟
-قسمه مطوله
-جمع
-طرح
-8.3 جم من 160 ؟
-العدد 2 كم ثُمن فيه؟
-جمع وطرح وضرب وقسمة الكسور مع الكسور
-جمع وطرح وضرب وقسمة الكسور مع الاعداد العشريه
-جمع وطرح وضرب وقسمة الاعداد العشريه مع الاعداد العشريه
مسائل:
-شخص اخذ قرض نسبة الفائدة 8.5 والقصط 100 دينار احسبي قيمة القرض؟
-اذا 1$=300 فلس اذا 1000$ تساوي كم دينار كويتي؟
-معاش محمد 100 دينار يصرف ربع معاشه لشراء الملابس فكم يبقى من المعاش؟
-يرسملج دائره امقسمه 3 اقسام قسم 50% وقسم 25% وقسم 15% يسألج كم الربع في هذه الدائره؟
الانجليزي:-
-يعطيج كلمات اترجمينها من عربي لي انجليزي (اجتماع-دوله-فائده-قرض-مكتب) هذي الكلمات اللي اتذكرها طبعن في غيرهم
-كلمات اترجمينهم من انجليزي لي عربي
-قواعد انجليزي وااايد تافه قواعد عامه حروف الجر (in-on-out-from-for -at) هالسوالف طبعن كله اختياري
-اكملي الفراغ يعطيج قطعه فيها فراغات ويعطيج كلمات عاد انتي ركبي الكلمات وحطيهم بالمكان المناسب
الحين خلصنا من الاختبار بس طبعن هذي مو كل الاسئله انا كتبت اللي ذكرته بس
المقابله:-
وقت المقابله دخلوني انا والمجموعه اللي وياي كلنا مع بعض ووزعونا احنا كنا 6 قالولنا كل 3 يقعدون على طاوله ويابولنا اوراق قالولنا كل مجموعه تختار لها اسم خلال دقيقتين انتو خالصين وتسجلونه على ورقه اخترنا وخلصنا عقبها قالو كل مجموعه تخترع لنا مشروع او خدمه مو شرط بالبنك اب اي بمجال ثاني يعني مطعم او محل ملابس او اييي شييي بس تكتبون اسم المشروع وتكتبون جم راس مالكم وجم ارباحكم بالسنه وبشهر وشلون اموزعين الشغل على بعض وشنو فايدة هالمشروع شلون يخدم الناس واذا مثلن انتو فاتحين محل سفريات في وايد محلات سفريات شلون تميزون نفسكم عن غيركم وتخلون الناس تييكم وبعدين عقب ماتخلصون المشروع تقسمونه على 3 اقسام كل وحده بالمجموعه تاخذلها قسم وتطلع تشرحه حق اللجنه والمجموعه الثانيه وهالشغل هذا كللللللللللله خلال 45 دقيقه انتو امخلصينه بس الشرح مو من ال45 دقيقه هالشي يسوونه عشان يشوفون مدى روح التعاون فيج عاد وانتي تشرحين لازم تطلع وحده من اللجنه تناشبج وتطلعج انتي غلط ومشروعج مو ناجح حتى لو كان ناجح وتكلمج بسلوب ما يعجبج عشان تشوف قدرة تحملج عاد انتي لازم تسوين نفسج ريلاكس وتبتسمين وتخلين الوضع هاااادييي هذي كانت المرحله الاولى بالمقابله…..
بالمرحلة الثانيه يعطونج بريك 10 دقايق بعدين يدخلون واحد واحد حق المقابله الشخصيه الاسئله اللي اتذكرها
-عرفينا عن نفسج منو فلانه (اسمج) عاد انتي لازم تتكلمين عن نفسج مثلن فلانه فلان الفلاني عمري كذا حاصلة على دبلوم او باكالريوس من المكان الفلاني اذا موظفه تقولين انا حاليا موظفه بالمكان الفلاني متزوجه عندي كذا طفل لو متزوجه
– انا موظفه اسألوني ليش بتهدين دوامج؟يعني الحكومه احسن واريح ودوام على كيفج…عاد انا شرحت لهم مأساتي بالدوام وحسيتهم تعاطفو معاي وايد وعلى فكره اللي قابلوني كانو 5 حريم
-قالولي عطينا مثال ابحياااتج انج قدرتي تنجزين شغله تحت ضغط وبوقت قياسي… وانا عطيتهم مثال
-اسألوني ليش نختارج انتي؟ اشمعنه انتي ليش مانختار واحد من زملائج اللي كانو معاج؟ شنو اللي يميزج عنهم؟
-اسألوني وين ساكنه وقلتلهم جان يقولون ترا مو شرط انوديج نفس منطقتج ترا احتمال انوديج مكان بعييييييييد وعطوني امثله على مناطق ابعيده عن منطقتي بس قريبه من بيت اهلي يكلموني بسلوب تهديد قلتلهم عادي بيت اهلي قريب من هالمنطقه يعني ريلي ماخذه عالخط طبعن اهم مايقطونج مكان وايد بعيد بالذات البنات يدورون لهم المكان الاقرب فالاقرب عان انتي وحظج
-الحمداللله الاسئله كانت سهله بس في شغله كللللللللللللللللش ماحبيتها تخيلو اهم 5 حريم وحده طالع ايدج ووحده تطالع عيون وحطه مادري شنو اتطالع يشوفونج ترتبكين ويلا لا.. انا اول مادشيت كان الوضع عادي وحسيت اني اخذت عليهم شوي لان بالمرحله الاولى كنت قاعده اسولف وياهم واضحك عاد بس لمن شفتهم قاعدين يطالعوني جذي جان اخترع وايدي قامت تررررررجف بس طريقة كلامي كانت اوكي الحمداللله كنت مو امبين اني مخترعه
نصيحه:-
لي رحتي حق الاختبارو بالذات المقااااابله لا تلبسين جينز ولا الوان فاقعه ومكياجج خلي خفييف وبالنسبه حق المتحجبات لا تلبسين شيله فيها ستراس واذا تبين لبسي شيله فيها ستراس خفييييف وناااعم ورفة الشيله الله وقوطي الروب اللي هالايام ممنووووووووع منعن باتن…
في نهاية المقابله قالولي انتي شكلج ولبسج ومكياجج وايد مناسب للبنك وعطوني هالنصايح قالولي ترا ممنوع الالوان الفاقعه ولا الشيلات الملونه ابالوان فاقعه ولا المياج الاوفر لازم شي ناعم ولا جينز وبما انج متحجبه ممنوع شيلات الستراس الللي هالايام والكبه بعد ممنوعه
انا اتصلو علي امس بس تعذرت منهم الحمدلله توظفت
صح انا لاحظت بموظفات الوطني لبسهم فواتح و شيلاتهم طبيعية والله احلى و تونس اشكالهم ماشالله
بالتوفيق
يم يم التقديم لي الحين مفتوح
فوجير قيرل مادري صح نكج جذي ويلا لا تسلمين علي هالدعوه الحلوه حبيبتي ويوفقج انتي بعد يارب
تسلمون بنات على دعواتكم ماقصرتو
هذا كان الامتحان القديم انا ممتحنه قبل هالمره.
اليوم غير بالكمبيوتر كلشي منوعه الاسئله انجليزي ورياضيات بس سهل الحمدلله شوي في أسئله نفس اللي قبل(الامتحان اللي بو أوراق).
قبل ممنوع الكالكوليتر اليوم عادي اصلا اهم حاطينها لي مع اوراق وقلم اذا احتجتي.
اعولي بالتوفيق والسهاله من رب العالمين
انا اختباري كان مره وحده كان بأوراق وعقبها المقابله يمكن انتي امقدمه يوم نزولو الاعلان بالجريده… انا عقب ما اختبرت بيومين نزلو الاعلان بالجريده كنت امقدمه بالسايت
مادري والله عن المقابله بس امس كان الامتحان بالكمبيوتر وحاطين لي آله حاسبه و أوراق بيضا فاضيه وقلم.
انا كنت مقدمه بمعرض الفرص الوظيفيه مال الرايه.
بس ما سوولي مقابله قالي انشالله ندق عليج والله كريم.
على فكره انا شهادتي دبلوم
وانتي شنو شهادتج؟
بنات انا صارلي جم يوم مقدمه على السايت .. تتوقعون يطنشون ولا يدقون !!!