|
|
بنات انا يمكن اللي يعرفوني عارفين حالتي وشنو صار فيني ……..زكنت احب زوجي واعشقه وكان زين معاي وبعد جم فتره خانني وغفرتله وبعدها خانني وكشفته وبعدها تزوج والحين انا صابره وعايشه معاه مذلوله مهدده علشان حياتي …………
انا سويت هالموضوع موعلشان اسوي مشاكل أول أزيد الطين بله على البنات وخصوصا اللي واثقين برياييلهم ولكن حبيت أفيد البنات علشان اللي تحس انه زوجها يخونها تتدارك الموقف وماتخلي الفاس يطيح بالراس وتفتح صفحة يديده معاه ( موتتهاوش )
أول شي اللي زوجها يخونها بدون لاتدخل على موضوعي إهي راح تحس بهالشي عاطفيا لأن راح تحس في أشياء تغيرت ( للأسوأ ) أو ( للأحسن ) بصورة مفاجأة في زوجها …..وبعطيكم أهم النقاط اللي طبعا راح يكونون من واقع تجربتي مع زوجي ومع سوالف رفيجاتي عن رياييلهم لما خانوهم شنو التغيرات اللي طرأت عليهم ..
1- نفور الزوج من البيت : هذه أهم نقطة راح تلاحظينها بزوجج الريال مايقعد نهائيا كله يطلعله أشغال بس بشكل شبه يومي مو مره مرتين بالأسبوع …
2- لما يطلع من البيت مايرد على أي أحد بتلفونه أو يكون جهازه مغلق وإذا سألتيه يقول ماسمعته أو ناسيه بالسياره أو حاطه سايلنت أو إزعاج ماأسمع وبعدين يعصب ويقولج ليش شنو تبين داقه علي إذا تبيني دقي للضروره ( مع العلم إن قبل عادي يرد عليج بأي وقت ) بنات الله يخليكم ركزوا شوي هذا العذر كل مايطلع من البيت وإنتي مو معاه يعني بروحه يقولج عندي شغل ويكون بشكل متكرر
3- يروح أماكن ماكان متعود عليها ويضحي بطلعاتج معاه وبشغلج علشانها ( يعني الريال موراعي حداق فجأه كل يوم يحدق أو يروح قهوه وبنفس الوقت خلال هالشي يشترط انه مايرد عليج أو على أي أحد أو على أي رقم غريب . لأن التلفون بهالحاله موعنده ( بدرج السياره )
4- كل ماتبين تطلعين مع اهلج او يطلعلج مشوار اهو مو معاج تلاقينه بدون تردد يقولج روحي انا عندي شغل .
5- إذا بتطلعون مع بعض تلاقينه ماله خلق وينزل السياره قبلج علشان يخشش اللي بالسياره وينظف البلاوي ( طبعا هالشي بصورة متكرره مو مره او مرتين لانظلم أحد بليز )
6- تلاقين بسيارته شحن مونفس نوع تلفونه ( يعني عنده آي فون تلاقين شحن بلاك بيري ) ولما تسئلينه يقولج شحن رفيجي .
7- تلاقين بسيارته كرت مختلف عن نوع الشركه اللي عنده يعني أهو خطه فيفا تلاقين كرت وطنيه أو زين ( وهم مانظلم أحد هالشي تشوفينه لازم بشكل متكرر )
8-اذا حظج حلو تلاقين تلفون بسيارته أو كرت ( يقولج مال رفيجي ) كلمتهم المشهورة لما يخونون .
9- كله يتعذر يقولج بمر رفيجي بروح السوق ودايما يعطيج إسم رفيجه لأنه يكون عارف انه غلطان فيموهلج ويطمنج وخصوصا اذا طلع ودقيتي مارد عليج .
10 – اذا رد البيت عندج كله يبي ينام ماله خلق .
11- فجأه إذا طلع تقوليله أبي فلوس يسحبلج بدون تردد ويقطهم عليج ويقولج روحي السوق ( يبي الفكه )
12- اذا كنتوا طالعين ورديتوا البيت دايما يقطج عند الباب ويقولج بمر الدوانيه وبشرط يكون قبل مايسوي هالحركه ( ولما تدقين مايرد )
13- ينام بره ( هذا لما كان متزوج إسم الله عليكم )
14- كله تعبان مونايم وكله دايخ .
15 – ياخذ اجازات من الدوام فجأه وإذا طلبتيه يوم إجازة يقعد معاج مايرضا.
16- يسافردول قذره ( تايلند _إلخ إلخ ) مع ربعه .
17- تلفونه مقطوط عندج مايحاتي شي لأن عنده خط ثاني خاشه ( يتعند أعز ربعه أو بكشن السياره أو بالدبه ) ههههههههههه كلهم انا شفتهم بعيني .
18 – مايحب ينام معاج وايد وتلاحظينه يطلب حركات وهو ماكان يسوي هالشي .
19-اذا اشترالج هديه يقطها عليج ويمشي مايقعد ويقدمها لج باليد بدون حركات رومانسيه يعني يخرسج ( والهديه تكون حلوه وغاليه ) يعني انا ريلي يابلي طقم عطاني اياه بعد ماكان نايم بره والله بس دخل عطاني ومشا طلع بره .
20-مايرجع البيت إلا متأخر حتى أيام الدوامات . بشكل ملحوظ
21-مايقوم بواجباته تجاه البيت وتجاه العيال إهمال ملحوظ .
22- يهتم بشكله زياده عن اللزوم وكله يشتري ملابس يديده مع انه قبل ماكان يهتم بهالشي.
23- تلاقين عنده عطر يديد وغالي واذا سألتيه يقولج بقته من صاحبي .
24-اذا تحلطمتي على شي مايصدق على الله يتهاوش معاج وتحسين إنه بدا يغلط عليج ومايهتم بمشاعرج حتى لو تبجين يمشي ويخليج .
وطبعا في شغلات وايد بعد بس ذاكرتي تخونني الحين …
طبعا أرجوكم يابنات مو كل وحده تختار لها نقطه وتقول زوجي يخونني لازم كل الشروط هذه تكون بزوجج أو نصها على الأقل إذا 2 أو 3 ترا انا أبري ذمتي ……
حسيتي مجرد إحساس ان زوجج يخونج قعدي معاه بعيد عن البيت كلميه قوليله ودي اعرف شنو ودك أغير من طبعي مو تقوليله انا حاسه إنك تخونني ترا هذه مشكله بحد ذاتها ….
وسامحوني يمكن الموضوع مو مكتمل بس هذا اللي الله قدرني عليه وأي استفسار انا حاضره والله يبعد عنكم الخيانه يارب …
لن اغلب الي يخونون يكونون شطار ويعرفون شلون ما يخلون الشي واضح
بس هذا الله يهديه كل شي واضح
ومكشوف
الله يعينج ويفرج همج
وهو احساس قلب الزوجه
وربي يحمي ازواجنا وذرياتنا عن الحرام ويزين بعينهم الحلال
قولوا امين
فوفو
يعافييييج ربـــــــــي
تسلم هالانامل الذهبيه
اللي صاغت العبارات والعلامات!!!
واااضح من تجربة عاشها ذاتج .
_________
_________________ ____
قلب الزوجه مثل قلب الام وعن تجربه كثير بنات اعرفهم يكونون متوترين ويحسون ان الموضوع فيه شيء ولما ينبشون يصيب احساسهم..
يعطيج العافيه حبيبتي الله يعوضج ويصبرج يارب
وصارت جم شغله ششككتني فيه اكثرر
الله كرريم
وفي بنات تشوف وتسكت وفي ناس تتصرف وتنقذ حياتها الزوجيه
هذه مجرد أسباب يمكن الزوج يكون روتينه هذا من قبل وأول الزواج وانا حبيت أضيف نقطه ألا وهي التغيير المفاجيء اللي من خلاله تحس الزوجه بهجر زوجها لها ….
شكرا لردودكم الحلوه وياريت نفيد وننقذ حياتنا الزوجيه بأسرع وقت ممكن لا تتجهون إتجاه سلبي بليز