اشرايكم بالي تمدح بزوجها جدام صديقاتها؟ ارجو المشاركه من الجميع

السلام عليكم
اشلونكم بنات ابي اخذ رايكم في الوحده الي تمدح زوجها جدام صديقاتها مثلا وحده من الصديقات او القرايب تقعد تمدح بزوجها وزوجي سوالي وزوجي وداني وسفرني …الخ لدرجه احيانا انها تتكلم باسرارها الزوجيه حتى عن المعاشره الجنسيه وتشرحها بالتفصيل وممكن ان الباجي يقارنون بين ازواجهم وزوجها وممكن في منهم يحسدونها ويغارون منها واحيانا يكون معاهم بنات مو متزوجات وبعضهم يحس بالغيره انتوا لو واجهتوا حريم من هالنوع شنو بيكون موقفكم ؟

اشدعوه ثلاثه يدخلون ولا اكو رد اتمنى الرد من الجميع متزوجات وغير متزوجات

حبيبتي brettey انا مومتزوجه بس مرت علي هالحالات
ووياي بالدوام والموضوع مو حسد ولا غيره لا ، الموضوع أن هالأمور أسرار
بيوت والمفروض ماتطلع خاصةً وأنهم يدشون بالعميق وغرف النوم …..الخ
ولو سالفة سفر وأسواق تهون يبه لكن التطرق لمثل هذه الأمور لايجوز شرعاً
ومحرمه .

عن نفسي ماقدرت اقولهم شيء غير النصيحه وكيفهم عاد ويا ربهم ينجازون .

موضوعج بريتي وايد يحصل بينا في مجتمعنا شوفي اللى اتحجا وتقول زوجي وزوجي

بالاخير تلقين فيها نقص وريلها مايسويلها شي كاشت فيها يعني حجي على الخرطي

والقول غير عن الفعل والحجي ببلاش وسهل والكل يقدر يقوله واللى يغارون منها ماعندهم سالفه

امدح ريلي بحدوود … بس مو حلو الوحده تتعمق !!!

يعني في شغلات عادي لو تقولينها و تمدحين فيها ريلج … و في شغلات مالها اي داعي تنقااال … اما اللي يتكلمون عن العلاقات الجنسيه و بالتفصيـــــــــل!!! هذا اصلا مايجووز
بس في بعض البنات خصوصا المقبلات على الزواج او اللي بسن زواج يحتاجوت بعض النصايح الخاصه بهالمواضيع فلازم يكون عالاقل هناك خلفيه بسيطه مو معقوله يتزوجون و يدخلون على رياييلهم مايدرون شالسالفه خذوة فغلوه .. فنقدر نفيدهم بمعلوماات عامه … اما تفصيييل لا حرام و مايجوووز ..
و مشكوره بريتي عالموضوع

brettey

اعرف بنات على نياتهم لمن يتكلمون عن ازواجهم ..
يعني لمن يكون الحديث بين البنات عن الرجال .. تقول مثلا اي انا زوجي
جذي وجذي وجذي .. يعني من غير قصد تتكلم .. وفي بنات لمن يتكلمون عن ازواجهم
يقولون عن الصفات السئيه فيهم ما تتخلي شي مو حلو في زوجها ما تقوله ..
والبعض الاخر منهم يتكلم عن ازواجهم بالصفات الزينه والحسنه وتمدح فيه طبعا المديح هو اللي يخلي البنت الثانيه اللي زوجها يعاملها بجفا وقسوه تحس بالغيره ..
وبارأيي ان اي موضوع يتكلم عن الامور الزوجيه يتكلم بحدود .. وان الامور الخاصه الزوجيه ما تتكلم فيها الوحده حتى لو اقرب الناس لها .. اتحاول اي وحده متزوجه انها تكتم الاسرار واي سالفه تصير مع زوجها ما تقولها .. حتى لمن تتكلم معاه بالتلفون وتتغشمر .. ترى اللي يكون قاعد يمها يسمعها راح يحسدها ويحس بالغيره ..
لو مثل تبي تذكر موضوع او موقف صارلها وفيه نصيحه للبنات او تبي تنصح رفيجتها المتزوجه تذكر بقصه مثلا .. او ان وحده من رفيجاتها صارلها نفس الموقف لكن ما تقول اي زوجي سوى جذي وقالي جذي ..
ترى ما قلت هالكلام الا وانا شايفه وسامعه .. يجوني بنات يقولولي هنيالها زوجها مدلعها ماقصار عليها شي .. وانا ياحسرتي على اللي عندي اغراض البيت بالحسره يجيبها ..
اهني راح يصير فيها حسد وغيره ونفس اماره بالسوء في بعض البنات الله يهداهم يحبون خراب البيوت ..
الله يكافينا الشر وياكم ويبعدنا عن الحسد والغيره والنفس ..
عسى الله يسعدكم ويهنيكم ويرزقكم بالزوج الصالح و الذريه الصالحه

وتسلمين ياbrettey على الموضوع وهو يلامس واقعنا للاسف ..

زمان كانت النصيحه ….بجمل…اليوم …ببلاش

موضوع واااااااايد مهم

مشكورة بريتي

ماله داعي الوحده تييب طاري ريلها بكل سالفه وبكل موضوع

انا ماحب هالسالفه ريلي احبه واعزه بيني وبينه مو لازم كل الناس تدري

العين ماترحم

مشكوره حبوبه على الموضوع

بس ترى ساعات الوحده على نياتها .. تمدح زوجها و من غير قصد .. ما تدري ان اللي حواليها مبققين عيونهم اللهم يا كافي ..

و عن نفسي .. ما اتكلم عن ريلي جدام الناس وايد .. لأن العين حق .. لكن حتى اذا ذكرته ما اذكره الا بالخير .. لأنه يستاهل بعد عمري .. الله لا يغير عليه .. بس مستحيل اتكلم بأمور خاصه جدام احد .. حتى لو كان اقرب الناس .. لأنه حرام ..

اي والله العين ما ترحم

وانا اتحجى عن ريلي بس بحاول اني ما اتحجى

ومشكورة على فتح باب هالقضية

اشكركم كلكم على ردودكم الحلوه وفعلا قضيه تستحق النقاش وحلاته الوحده ما تتكلم عن ريلها لا بزين ولا بشين الناس ما وراهم الا الحسد اذا الوحده قالت انها مستانسه ومرتاحه بزواجها احسدوها واذا قالت انها مو مرتاحه وزوجها محسر فيها تشمتوا فيها تصدقون انا اعرف وحده يوم تزوجت كانت وايد تتفلسف بزوجها اهي من نوعها فيها غرور شوي فكانت كله تقول زوجي سوالي و…الخ وانها حيل مستانسه كانت تبي تغث البنات الي وياها لان في وحده منهم ماكانت تتوالم وياها بس عقب اشهر سمعنا ان بينها وبين زوجها خلافات كبيره لدرجه انهم بقوا يتطلقون بس الله ستر

انا اقول يالغاليه الزوج اشبهه بالملكيه الشخصيه اذا انا رضيت اتكلم عن ملكيتي لهذا الشي طبعا راح اتحمل كلامي وكل شي راح يطلع من ورى هالكلام

بس في حاله ان مدحه جدام البنات واقول انه فيه وما فيه لاء وحتى وان صارت عن غير قصد وبحدود

والله يتمم على الجميع يااارب

ان اعرف وحده من كثر ما انها مخليه ريلها جنه وحده من صديقاتها واهو ادخله بكل سالفه من سوالف رفيجاتها والعكس مع رفيجاتها تزوج عليها في الاخيرر فيجتها والسبب نفسه الكلام اللي يتنقل بين الزوجه والصديقات والزوج

الله يستر ويتمم على الجميع

اي والله على قولتكم اصلا من الناحية الشرعية ما يجوز ان الوحدة تتكلم بموضوع المعاشرة ..

أما من النواحي الثانية مثلا زوجي يروح معاي السوق ويشتري لي ويسفرني ووو .. من راييي انه ان الوحدة تحتفظ بهالاشياء حق روحها وماله داعي تتكلم جدام خلق الله وتقول بروحهم هالريايييل ما يطلع منهم شي إلا بالزور لووووول وبعد نروح نتكم جدام الناس عشان العين ما ترحمنا

الله يكفينا الشر .. بس يعني عادي الوحدة تقول انه مرتاحة مع ريلي الحمدلله مو مقصر معاي بشي واحنه عايشين مع بعض حالنه حال غيرنه يوم حلو ويوم مر .. يوم متفاهمين ويوم متزاعلين

عشان تحفظ نفسها وزوجها وبيتها من العين ومن حجي الناس ..

بنات كل شي وله الحسد الله يكافينا شر الحسد علي قولت المثل سكر بابك بطين وعيين
مادري المثل صح او خطا وشنو مكانه في الموضوع شكرا

انا الحمدلله ريلي مو معطيني مجال امدحه زود ما يمدينا نطخ شوي الا رد وعر مرة ثانية
وبالنسبة للاسرار يفترض انها تظل اسرار بيننا
اما السوالف العادية فاعتقد ان ما فيها شي الواحد يسولف عنها لكن بحدود بعد
و مو بتعمق وتفاصيل

واي رورو سالفتج نفس سالفة وحده اعرفها …. ريلها تزوج عليها صديقتها وهالصديقه مالت عليها تطلقت من ريلها عشان تتزوج هذا

عاد هالمره اللي اعرفها ان ييتي حق السنع سنعه حيل حيل وبنت عايله وناعمه وقلبها طيييييييب لا وبعد متزوجه عن حب يعني ماكو مقارنه مع صديقتها هذيك جكر وتخرع وحتى اسمها مقلقص … وكانت صديقتها كاسره خاطرها لأنها بمشاكل مع زوجها فكانت تسولف حق زوجها عن صديقتها ومشاكلها أثاري الريال حطها اباله وهذيك استغلت طيبة صديقتها (( الله يكافينا الشر ))

أما من ناحية الكلام عن الزوج فأنا ماخذه نصيحة أمي الله يخليها لي …. اذا شكيتي الناس تشمتت واذا قلتي عن شي زين الناس حطو عيونهم عليج … وهالشي مو بس عن الزوج عن كل شي …