اخذواا حذركم من العيادات التجارية

سلااام بنوتات
بغيت اقولكم عن تجربة مريت فيها واتمنى الكل ياخذ العبرة

شفت اعلان بالجريدة عن عيادة معروفة يايتهم خبيرة يونانية وان العرض فتح ملف مع استشارة بلاش
قلت اروح واشوف وانا بشرتي تعبانة من ناحية الجتوف والريول وفيها نمش خفيف سالتها اذا يروح ولا لا قالت لي ان يروح بالتقشير وكانت وحدة زلمة اهي لي ترجم (وللاسف مادري شنو نوع تقشير بعد)
وتفقنا على انها 6 جلسات وسابعة مجانا وتكلفة الجلسة للايدين وريول 50 دينار يعني التكلفة شاملة 300 واخذ انا منهم كريمات بتكلفة 60 يعني كله على بعضه 360
اتفقت معاهم اني ادفع بعد كل جلسة سويت الجلسة الاولي وثانية وادفع وراهم مباشرة
في الجلسة الثالثة كان ابوي اموديني ومايدري شطبخه وانا داخل اسوي جلستي راحت عند ابوي وقالت له كيش المبلغ
ابوي كمله المبلغ لهم
بعد جم يوم رحت لمطعم وكليت سلطة عليها صوص سببت لي حساسية وتعبت حييل من الحساسية وكلمت دكتور جلدية بالحكومة قالي وقفي تقشير لان بشرتج متهيجة وتعبانة والمصيبة انه صدمني وقالي الحبوب الي فيج تطلع من الشيرة يعني بس اتسوين ليزر ترتاح بشرتج من شيرة يعني ماله داعي التقسير من اساسه
قلت اوك بروح واخذ فلوسي لان باجيلي 3 جلسات وانا خلاص بوقف لان اساس طلعت ما احتاج تقشير وان بشرتي متهيجة من الحساسية مايصير اسويلها شي
كلمتها قالت لا مايصير ارد افلوسج….قلت انا الحين دافعة لج مبلغ جلسات ما سويتها ليش ما تردين الفلوس قالت لا مايصير
الا اذا بتكلمين الدكتور..(اهو دكتور كويتي معروف ويشتغل بالبابطين وهي قالت اني بقابلة الصبح قلت لها مايصير عنده دوام الصبح قالت لا بيكون موجود)
المهم رحت اصدمتني الا اهي اتقول الدكتور المصري بيتاخر قلت اي مصري انتي قلتي الكويتي وانه بيكون موجود قالت انا ماقلت هالحكي
قلت انشوف المصري وننطر
الله وكيلكم ساعة الا خمس دقايق وانا وامي المسكينة ننطر ونقعتنا والعيادة بالجابرية وبيتنا بالاحمدي يعني تعنينا عالفاضي والدكتور ماشرف
قلت لها عطيني رقم الدكتور قالت مايصير وانا صراحة افتلت اعصابي قلت الحين بقلب العيادة عليهم
طلعت وحاجيت ابوي ..وابوي الله يهديه يقولي كلها 150 خليها اتولي
الي يقهرني انهم قاعدين يلعبون عالناس وياخذون افلوسهم
واتمنى الكل ياخذ حذرة من هالاشكال
وسووووووووووووووووووري لاني طولت عليكم

عمه بعينهم زقوووم حتى لو 150 شكو البوق
لاتسكتين عن حقج احتريت والله

حياتي تسلمين
بس شسوي كل ماحاجيت الوالد قالي كلها 150
حسبي الله عليهم

هذي اهيا العيادات بالكويت للاسف ماعندهم الا تقشير سواء للوية ولا الجسم انا شهر ونص عطاني تقشير كريمات وتقشير كرستال سويت جلستين واهيا ادقولي لازم كل اسبوع معنة بشرتي وايد زينة بس يبيلها نضارة عاد خلصت جلستين وسافرت لبنان ورحت حق دكتورة بشرة مووو صج اتينن قالتلي هدي كل شي بشرتج زينة سوتلي تنضيف وحطتلي شي حق النضارة ولا ابر ولا تقشير ولا بطيخ ولا ارخص من اهني بالف مرة سويت تنضيف بشرة ونضارة وعطتني كريم حماية من الشمس وصابونة وكريم ملتي فيتمنز طلع كلة 200 دولر …..

يعني خلاصة تجاربي و واللة الي تمشي عليها بتشوف بشرتها شبتصيير اول شي غسوول زين انا استعمل نيتروجينا بالحبوب الزرق ثاني شي ترطييب ترطييب ترطييب لانة سبب المشاكل للبشرا الجفاف سواء مشكلة الاسمرار ولا الجفاف والا النضارة انا استعمل فيجي وايد حلو واذا بشرتج وايد تعبانة استعملي السيرم مو الكريم وبعدين حق التفتيح فيتامين c اخذي ماركة زينة وبس شوفو وادعولي

العيادات كلهم جذي
أمي كانت تروح عيادة بالجابرية تسوي علاج طبيعي عندهم وهم نفس الشي كان عندهم عرض عشر جلسات ووحدة مجانا شي جذي
المهم ادفعت لهم كاش
وبعد جم جلسة اخترب عندهم جهاز وقالو لازم يي الفني يصلحه وبعد فترة صكرو العيادة وغيرو مكانهم وارقام تليفوناتهم
وهذا احنا لا نعرف وين عيادتهم ولا شلون نوصل لهم والفلوس راحت على الوالدة

يؤؤؤ شنو هذا نصب أشكرة ..

لا تسكتين لو كانت 150 فلس ..

طالبيهم فيها ..

حسبي الله عليهم ان شاء الله
مالت على جذي عيادات

يسلمووو عالردود
وانشاء الله مايصير فيكم الي صارلي

حسبـــي الله ونعــم الوكيـــل ….

ياويلهــم من الله

يسلموو سر ابتسامتي

معروف هذي سوالف العيادات انا سويت ليزر لوجهي حق الحبوب وماشفت تحسن رحت لطبيب ثاني قال انتى تحفين وجهج قلت ايه قال هذا السبب..؟؟