|
|
قصتي قصه مع زوجي وربي مادخلت هالمنتدى الا من متابعتي لكم ولمشاكلكم واحتوائكم واحساسكم الجميل
انا من قبل ايام تهاوشت مع زوجي لانه كذبني بسالفه يعني قاللي انتي قلتي جذيه و جذيه و جذيه
فحلفت له اني ماقلت هالشي وهالشيء من تأليفك انت عشان تحقق شي ببالك
قال والله العظيم انج قلتي ((( وانا ماقلت هالشي ))) والسالفه تافهه يعني ماقدر اقولها لانها بتطول الموضوع
لكن محور الهوشه هو انه اتهمني اني قلت شي وانا ماقلته
فقلت له جعلها بذمتك انشالله و صدقني حرام عليك هالشي مو زين تقولني كلام ماقلته لغرض ما في نفسك
تم يهاوش ويحلف وسكتت انا وقلت له ماعليه حقق اللي تبيه وقولني مو مشكله لكن صدقني ربي بيردها لك
وسكت عني والحين صايره علاقتنا ببعضنا كأننا اخوان او زماله
والله اني احس اني عنده موظفه مو زوجه
ساكت عني و متكبد وماله خلق يناظرني ابد ولو كلمته يرد وهو يشوف شي ثاني
وما ادري عندي احساس من زمان وماعرف ليش انه يحب يتزاعل معاي عشان ماينام معاي
او بمعنى اصح عشان يفتك وينام براحه ويقوم براحه
مع اني ريلاكس دوم وعمري ما جبرته على شي ودوم اقدر ظروفه علما انه انسان مثقف و منصب و خلوق ونظيف ماعنده سوالف خربطه ولا علاقات ولا بنات وهالشي مو بس كلام لا هالشي سمعه خارجيه عنه عند الكل عند ربعه وهله وناسه ومجالسه ،، حاولت اتقرب منه والاطفه بس مافي تقرب منه ولا تودد يعني كأن طوفه مقربته
حتى بالسرير اقرب منه وامسك ايده يشيلها ويقول لي تصبحين علخير وينقلب
وعلما اني ما ابي اعتذر له لاني ما اخطيت
وهو مو راضي يفهم اني ملاطفتي له تقرب يعني كأنه يبيها كذا وفرحان بوضعنا
ضاقت بي الافكار مره اقول خله بكيفه ومره اقول بروح بيت هلي لكن بنفس الوقت اقول لا ما تستدعي السالفه واخاف يتعود او يحس اني جاهل بالخطوة و مرات اقول خلني عاديه جدا كأن شي لم يحدث وهو بكيفه خله يتصدد
ومره اقول ابادله نفس الشي تعبت وماعرف شسوي !
لكن هو صااااامد صامد حيل وهذا طبعه بكل هوشه تعلم اني انا ابادر وما ابي اعلمه هالشي
ودي مره يجيني ويعتذر دوم يكابر حتى وهو غلطان احيانا تصير سوالف اغض عنها لكن لو شخص مكانه مو بس يعتذر الا يبوس رجولي عليها
بس ماعرف طبعه ياما صارحته وقلت له عن هالشي يقول وقت اللي اكون غلطان صج باجي وبكل فخر وبعتذر والمشكله عمره ماشاف نفسه غلطان دوم هو الصح وهو العادل وهو اللي ماتطلع منه الغلطه
طيب انتي ماقلتيلنا جم صارلكم متزوجين ؟؟ وعندكم عيال ؟؟
اول ماتزوجتو كان جذي ؟؟
لما تبتعدين عن الريال هل يزيد غلاج ويعرف قيمتج
ولا يتعلم على بعدج
ساعات اقول خله يعرف قدر المره
وساعات اقول البعد يعلم الجفا ياليت حد يفيدنا في هالشي
تقبلي مروري
وحاولي مرة قوليلي انا ما اقدر اتحمل جذي قطني لبيت اهلي جيسي نبضة شوفي اذا هو يبيج ولا لا
او اقعدي معاة لحظة مصارحة قوليلية حبيبي باجر راح يكون بينا عيال والعيشة ما تنفع
انتي على قد ما تقدرين امسكي من الشي اللي يعورة او يضعف قدامة
اغلب الرياجيل نقطة ضعفة لما المرة تبجي قدامة
واهتمي بروح اكشخي البس تعطري روحي قصي شعرج اضبغية سوي نقش حنة سوي حواجبج تاتو حاولي تغيرين من نفسج واهم شي اختي الحلج يكون في بكتيرية خلي عندج غسول اسمة بيتادين للحلج حيل حلو وعن تجربة
بغيت اسئلج جم سنة صارلج متزوجة وهو من اول ما خذيتي كان جذي ولا مع الايام تغير
و خلي تصرفاتك عادية معاه.
ساعات الريال وده يزعل ، يوله على الزعل حتى لو على شيء تافه…
اقري سورة البقرة .
و ييبي ملح و اقري عليه المعوذات و الإخلاص و حطي منه في زوايا بيتك الأربع… عن الشيطان و الحسد ( هذا كلام بنت عمتي و هي متدينة)
وصلي صلاه الليل وادعي انه الله يصلح الحال بينكم والاستغفار
مادري شقول بس ماحبيت اطلع بدون ما ادعيلج