|
|
السلام عليكم
اسمحوا لي افضفض لكم واتمنى القى بينكم ردود تغير الا انا فيه
صار لي من تزوجت اكثر من 11سنه وطوول هالسنوات واحنا في شقه صغيره تلمنا ومكانا ضيق لكن احس انا دايم ويا بعض وهذا الا انا ابيه مثلا بناتي في غرفتهم لكن قراب منا اذا انا في الصاله كأنوياهم اسمعهم واكون مطمنه عليهم واذا ناديتهم يسمعوني وزوجي اذا جا نتجمع ويا بعض في صالتنا الصغيره ومطبخي مفتوح على الصاله اطبخ وانا اشوف اولادي تحت عيوني وزوجي بعد واسولف وهم جالسين في الصاله وانا اطبخ 
الحين زوجي بنى بيت اخيرا وكان حلمي يكون عندنا بيت لكن زوجي يحب اذا سوا شي يسويه عددل فسواه مو بيت عادي قصر خاصه ان مساحة الارض كبيييره ..البيت كبييير وتحت خدمات وفوق غرف النوم ..وغرفة بناتي بعيده عن غرفتنا الحين لما اروح اشوفه لان مابقى شي ويخلص التشطيب اروح وماحس بالفرحه :eh_s(*):حتى زوجي يقولي ويين حلمي وين كلامي الحين بعد ماسوا قصر صرت كذا :eh_s(*): انا بداخلي اقول كيف نعيش في مكان وااسع ممكن خلاص بناتي يتعودون يكونون لحالهم وحتى زوجي يقولي اخيرا بيصير فيه بيت يقدر يرتاح يجلس لحاله في الغرفه وفيها تلفزيون عكس شقتنا مافيه تلفزيون الا في الصاله وانا اقول كيف يعني مابحس بلمتنا مثل الشقه !! احس المكان الواسع يبعد .. الحين في الشقه كلنا ويا بعض مافيه الا صاله صغيره وحتى وانا اطبخ معاهم واسمع التلفزيون معاهم ونسولف ويا بعض لكن البيت اكثر من صاله كبيره بخدماتها والمطبخ بعييييد وغرفة النوم ملزم يبي تلفزيون احس حتى جلستنا في غرفة النوم مابتصير مثل الحين ممكن نتكلم ونتناقش في امور مانقدر نتكلم فيها قدام بناتنا لانها مافيها تلفزيون وزوجي من النوع الا اذا فيه تلفزيون لاازم يشغله ويندمج لدرجة مايسمعني واذا تكلم كلمات متقاطعه .. كل هذا بيتغير اذا رحنا لبيت بتكون حياه ثانيه مختلفه عن الحياه الا تعودت عليها .. معاي حق اتخوف ؟ انا من النوع الا احب احس بوجودهم معاي ماحب حتى بناتي يكونون بعاد احب يكون فيه لمه حتى الاكل اذا حطيته احب ناكل من نفس الصحن واشوف بناتي ياكلون ويا بعض لما بنتي ترفض تاكل مع اختها وتبي لحالها في صحن اعصب عليها .. باختصار احب احس بالدفء العائلي واحب اشوفه في اولادي وبينهم وبين بعض احب اللمه لذالك كنت رااافضه وجود تلفزيون في غرف النوم لانه عادة التلفزيون يجذب للجلوس وانه يشاهدون حبيت يكون في الصاله عشان نشاهد ويا بعض لكن في البيت بيكون غيير ممكن زوجي عادي يجلس في اي مكان مرتاح منه وهو بعد اوقات يقولي يبي يفتك من الازعاج ويبي يجلس لحاله وبناتي بعد وانا اذا ابي اتمرن بتكون غرفه معزوله*كيف اشوف اولادي على الاقل ولدي الصغير .. مادري اذا معاي حق والا كيف عايشين عادة الا في بيت كبيييير؟ انا ماودي اخوفج بس اكيد راح يتغير عليج المكان اول شي لان مشاء الله البيت على كلامج كبير حيل
ولاني عايشه هالتجربه في بيت كبير احس اني ضايعه في وخصوصا ماعندي الاطفلين…….. يعني لانزلوا تحت اقعد احاتيهم لان يختفي صوتهم نهائيا
بس عندي فكره ليش ماتأجرون نص البيت يعني الطابق الي فوق بس وتعيشون بالي تحت بما ان عيالكم للحين صغار ومومحتاجين كل هالمساحه ع الاقل
لاصرتوا بدور واحد يصير جنكم عايشين بشقه بس كبيره شوي ،،،،
هونيها وتهون حبيبتي ،،، هذا حال الدنيا محد تام علي حاله كلنا تغير حياتنا بين يوم وليله وكلنا تغير ضروفنا لازم تصيرين قويه وتتاقلمين لان مبين عليج ووايد حساسه وعاطفيه
قوي نفسج حبيبتي حتي عيالج الي متعوده ع صوتهم بيجي يوم ويروحون لنصيبهم ويكون عايلات ويستقرون الله يبلغج فيهم يارب
بالعكس حبيبتي افرحي واستانسي
واستمتعي بهالمرحلة
حسسي زوجج انج مقدرة الشي اللي سواه
عشان مايحس بالاحباط
راح تكون لكم خصوصية اكثر
وجباتكم راح تظل مع بعض
وقعدتكم بالصالة هم مع بعض
يعني بناتج تحت عينج
بالنسبه ان نآجر فوق فزوجي من البدايه راافض الفكره يبي بيت مستقل ويبي مساحه حلوه يعوض فيها سنوات حياتنا الا قضيناها في شقه صغيره واصلا مارح يضبط حتى مستقبلا لان الدرج في نص الصاله ومفتوح الا فوق على تحت البيت مسويه كللشي مفتوح يعني فوق اقدر اشوف الا تحت من خلال الفتحه الا فيها فوق قبه وغرفة النوم فيها اكثر من نافذه اقدر اشوف من جهه الصاله الا تحت وجهه ثانيه الحوش
تدرون هذا كان حلمي بيت بدل الشقه الا مخنووقه فيها ماشوف السما والشتاء لما يغيم الجو اطالع من النافذه وياريت اشوف السماء عدل الا مخططه من حديد النافذه ولاني في السعوديه حياة النساء صعببه صراحه كنت اتمنى بيت يكون فيه حوش ووقت مابي اتنفس واشوف السماء اجلس في الحوش مثل لما كنت ببيت اهلي الحين بعد ماخلص بيتنا واشوفه كبير وانا متعوده على الشقه والمه صرت خااايفه مع ان الكل حااسدنا لان الاراضي غااليه وبيتنا مكلف ،،وانا اصلا مو حاسه بطعم الفرحه كل خوفي ان ماعاد نلتم مثل الحين ..
شعور عادي احس تبالغين لان عندج درجة خوف كبيرة
مافي اي شئ لا تحاتين شدعوة
بس اذا تعودتي على البيت راح تقولين بينج وبين نفسج شلون انت قدرت اعيش بشقه صغيره كل هالسنين
من ناحية الاكل لاتغيرين نظامج كلكم تيمعو على سفره وحده
وعساه منزل مباررررك يارب
وفترة الظهر خلي ريلج يرتاح اكيد اهوا ماتعب بالبيت الا لانه يحب جو الريلاكس والهدوء،، خلي مثلا فترة بعد المغرب حطي جاي وقهوة وكيك وقعدي مع ريلج وصرفي عيالج وهالله هالله بالمواعين الذربة والفناتك
وعموما كل تغيير له ايجابياته وسلبياته
لاتوسوسين كل شي بيصير مثل ما انتي تبين والكل بيصير تحت عينج لانهم تعودو على هالشي
لا توسوســــــين كـــــــــــــــل شـــــي بيصيــــــر مثل ما أنتـــــــــــــــــــــــــــــــــي تبين والكــــــــــــل بيصير تحت عينــــــــــــج لانهم خذو على عالـــــــــــوضع
وفليهاا
حنا ماشاء الله عايشين بقصر كبير ونفس نظامكم الدرج بنص الصاله وكل الصالات مفتوحه ع بعض وغرف النوم فوق بس تحت صالات استقبال بس لنا نظام ترا وجباتنا واكلنا مع بعض ومن صحن واحد وانا اكبر العايله خخخ الحين عمري 25 سنه والكل وقت الوجبه موجود والي ماينزل يتهاوش 
ونذاكر سوا ونسهر سوا يعني صدقيني اذا متعودين ع نظام معين انتي استمري فيه وخلاص رح يستمرون معاك
بالعكس انبسطي وفليها وحسي بالسعاده ف بيت العمر ولا تقعدين تشيلين هم المستقبل وهالسوالف خلي الامور تمشي وانتي موجوده بيكونون تحت عينك مهما كبرت المساحه تقدرين
( حنا مخصصين الصاله الي فوق مسوينها مسرح منزلي وفيها تلفزيون كبير نفس السينما ودااايم جلساتنا وسمراتنا فيها) مو شرط ان كل واحد بيجلس بغرفه وبتبعدون عنك انتي سوي جو اللمه وصدقيني الي تعودو عليه بيستمر
منزل مبارك والله يعطيكم خيره يارب
اهم شيء اول ماتسكنون شغلي سوره البقره فالبيت وادعي ربي انه يكون خير عليكم وبس تفائلي بالخير ..