احبــكم وياليت تسمعون نصيحتي لكم

اخواتي بنات الكويت انا عضوة جديده بالتسجيل والمشاركه .. وقديمه بالمتابعه لكم

هذا اول موضوع احطه .. والله مسجله مخصوص عشان اكتبه لكم ..

لاني صراحه احبكم واخاف عليكم والله ..

مالي بالمقدمات بدش على طول بالموضوع ..

بنات انتم اللي تتكلمون عن ازواجكم او العرايس اللي تقول اشتريت او يا حلات العرس .. او اللي حامل وتحط تحت توقيت الولادة ..

او توقيت موعد العرس للعرايس ..

يا بنات انا والله اخاف عليكم ترا العين الحق ومذكورة بالقرآن .. والمحرومين واجد ..

انا مابي اقول لاتتكلمين عن حياتج الخاصه لا خلج مثل ما انتي وساعدوا بعض ..

بس نصيحه مني لا تسولفون بشي يفطن العيون عليكم .. ترا يا بنت انتي مو ضامنه نفسج تقرين المعوذات ليل نهار ..

الانسان احيانا يسهى .. وترا هالموقع اللي يقرونه اكثر من اللي يشاركون فيه ..

من الكويت وبرا .. توقعي ملايين يتابعونج وانتي تعرضين نفسج للحسد .. سواء من ناس ماتذكر ربها .. او ناس فزت لج من غير قصد

يمكن الحين بينج وبين نفسج بتقولين انا ماتكلم بشي كبير .. شدراج لو شي صغير عندج بس عند غيرج كبيييير ويتمناه طول حياته ..

يا بنات والله ما تتصورون شكثر قلبي يعورني على تواقيع اللي تحت عداد تحت ومكتوب تم على زوجها يومين او 3 .. والله اني ادعي ان ربي يحفظها من كل شر

بنات هذي مو وسوسه زايده بس انتي بعالم انترنت كبيييير والناس فيه اجناس وانواااع كبيره ..

ناس محرومه .. ناس تتمنى تتزوج .. ناس قلوبها سوده وتتعمد ما تذكر ربها .. ناس تفطن وتفز نفسها من غير قصد ..

حتى انتي ياللي عندج زوج وعيال شدراج لو غيرج يتمنى يكون مكانج ؟ لو حياتج تعيسه بس يبي اللي عندج ..

واهني بالموقع البنات ما يشكون المشاكل اليوميه اللي تصير ابيت الزوجيه واحيانا ماتستاهل انج تسولفين فيها ..

بس على كلامج ومدحج بعيالج ولا زوجج .. يظنون انج عايشه حياة الف ليله وليله ..

والله العالم بحياة كل وحده …

انا قلت هالكلام لكم نصيحه من اخت تحبكم والله الشاهد .. واللي ابيه منكم تسولفون عادي وتساعدون بعض

بس ديروبالكم على انفسكم .. وسالفة التوقيت اللي بالتواقيع ياليت ماتحطونها .. ترا غيرج يقول ياليتني مكانها ولا ياحظها ..

وعسى ربي لايغير علينا تجمعنا الحلو .. واتمنى تقبلوني اخت جديده بينكم

واخيرا .. ترا الدنيا بخير وفي ناس تذكر ربها وتدعي لكم بظهر الغيب …

وعسى الله يهنيكم ويسعدكم ويوفقكم جميــــعا ..