اجوبه لجميع تساؤلاتك لشهر العسل !!

تنغسل جيدا بماي دافي وتنشفينها بفوطه نظيفه
ودايما استعملي كير فري .. لاتلبسين اي اندر وير بدون الكير فري لانه يحفض المنطقه جافه ويحمي المنطقه من انواع الاندر الوير اللي تسبب للمنطقه الحساسيه
وانا انصح بهذا النوع

الغسول الخاص بالمنطقه الحساسه؟

بالنسبه للغسول انا ما استعمل اي نوع من انواع الغسول فماعندي خبره فهذا الموضوع
بس اللي ابي اقوله ان اخت زوجي راحت للدكتورة واسالتها عن الغسول واي نوع يكون مناسب والغر يب ان الدكتورة حذرتها من انواع الغسول لانها تسبب جفاف للمنطقه وبالتالي التهابات خفيفه تمنع الحمل
فانا خذتها من الاخر وما استعملت

الكريم او البدي لوشن اللي تستعملينه لقميص النوم؟
هذا النوع من الكريم فيه عطور وهي تسبب سواد البشره
عشان تتجنبين هذي المشكله حاولي انج تحطين الكرم على اليد من فوق ( منطقه الزند ) وعلى فخوذج من برى
اول شي عشان تكون الريحه مناسبه لاهي خفيفه ولاقويه
نفس الوقت ما يسبب لج سواد
طبعا لاتنسين تعلمين نفسج قبل لاتلبسين قميص النوم تشطفين جسمج بالماي شوي وهذا الشي ما يكون فشهر العسل بس لاء يكون طووووووووووووول عمرجالملابس:

– ايش الملابس اللي اخذها معاي؟

اخذي معاج 5 اطقم اندر وير
تقريبا 7 قمصان نوم
شنطه يد تناسب لبسج
للصيف:
صندلين مريحين اللي لهم كعب كامل عرفتوه؟
واحد بلون فاتح مثلا الاوف وايت مثلا والثاني بلون اسود
اذا بتلبسين عبايه:
اخذي 3 عبي طقم يكون فيهم شغل خفيف بالوان مختلفه
و 3 بناطلين مريحين تحت العبايه
5 تيشيرتات او بديات
اذا بتفصخين العبايه:
اخذي 3 بناطلين وركبي عليهم 3 قمصان بنفس اللون وانا اقترح
قميص اسود ساده + بنطلون اسود ساده من نفس القماش
قميص اوف وايت ساده + بنطلون اوف وايت ساده من نفس القماش
قميص بلون بيج على رملي شوي + بنطلون بنفس اللون والقماش
حاولي ما تاخذين بديات اخذي قمصان عشان ما تفصل ايدج وظهرج
القمصان استر بوايد
وتركبين عليهم 6 فساتين قصيره بحبل تلاقينهم بالمحلات مثل زارا ومانغو يكونون وساع ما يفصلون جسمج وطوال شوي يعني لحد فوق الركبه بشوي
يعني لكل بنطلون وقميص ساده اخذي فستانين يناسبون
او ممكن تاخذين القمصان الطويله تجي كت بدون اكمام
حاولي تختارين شيفونات او حراير لانها تكون خفيفه وراقيه وبنفس الوقت ما تزيد عليج الوزن
بعدين اخذي شيل ملونه تكون شيفونات وثابته على الراس وبنفس الوقت يكون حجمها اوكي
اخذي 3 شيل تناسب لبسج
للشتاء:
بوت طويل بيج وواحد ثاني اسود + دلاغات
قفازات
مظله
اذا بتلبسين عبايه :
اخذي جاكيت بلون اسود طويل
3 بديات هاي نك شتويه
3 وبناطلين ثقيله جينز او مخمل
اذا بتفصخين العبايه:
جاكيتين واحد بيج والثاني اسود او بني والثاني وردي المهم لون غامق ولون فاتح
4 بديات هاي نك وتكون طويله تقريبا فوق الركبه بشبر
بناطلين تكون شوي قصيره يعني لحد عضمه القدم عشان ما تتوصخ بالمطر والثلج
يكونون بالوان تناسبه الجاكيتات
شالات شتويه ضعيفه تنلف حول الرقبه
شيل ملونه تكون شتويه
– غسيل الملابس؟

ملابسج العاديه ممكن تبعثينها للمغسله بالفندق
الانر وير ما يحتاي تغسلينه دام انج بتلبسين كير فري
بس اذا طولتي واحتجتي تغسلينه .. اغسليه بشويه ماي وصابون وعلقيه داخل الكبت
واذا تنحرجين جيبي تي شيرت ما تبينه وعلقي الملابس داخل التي شيرت المعلق فهمتو؟- الكوي؟

افضل شي تشترين مكواه البخار تلاقينها بكارفور صغيره وتستعمل للسفر
تقدرين تكوين ملابسج وهي معلقه سهله وايد
وعشان ما تكوين وايد بالسفر حاولي ترتبين ملابسج بالشنطه بطريقه ما تعفس فيها الملابس بسرعه اشلون؟
يعني مثلا البنطلون تطوينه طويه وحدة بس وافرشيه على عرض الشنطه فهمتو اشلون؟
القميص بس طويه وحدة بالطول ..قمصان النوم على حالها افرشيها في الشنطه

– اختيار الملابس؟

اشلون اختار ملابسي داخل الشنطه بطريقه سريعه ومن دون ما اخرب واعفس الشنطه؟
هذي يعتمد عليج من بدايه الموضوع يعني قبل السفر واشلون ترتبين شنطتج!
يعني الشنطه اول شي تقسمينها بالعرض لقسمين
وتبتدين تحطين الملابس
اول شي البنطلون وفوقه القميص اللي راح تلبسينه مع هذا البنطلون
بعدين البنطلون الثاني وفوقه القميص اللي راح ينلبس مع هذا البنطلون
وهالشكل تعبين القسمين
اما الشيل او الحجابات تحطينها بالاخير فوق عشان بعدين تختارين منهم بسهوله على كل بدله
اما القطعه اللي تجي بنص الشنطه واللي فيها السحاب عرفتوها؟
هذي تعبين فيها قمصان النوم والاندر وير
عشان لاسمح الله اذا اضطريتي تفتحين الشنطه بالمطار ما تتناثر هذي الملابس !

– الملابس اللي لبستهم وين احطهم؟

اول ما ترجعين من برى وتبدلين ملابسج حاولي تفرشينهم على الكرسي كم ساعه عشان تروح منها ريحه الجسم اذا ما كانت وصخه
بعد كم ساعه طبقيها بنفس الطريقه اللي رتبتيها فيهم داخل الشنطه
يعني البنطلون طويه وحدة بس والقميص طويه وحدة بالطول وحطيهم فوق بعض على احد الرفوف … افضل رف هو الموجود باعلى الكبت
بهالطريقه لما تدورين على ملابسج مرة ثانيه بتعرفين وينهم بالضبط
وحتى بيساعدج هالترتيب على ترتيب الشنطه مره ثانيه لان الملابس بتكون مطويه وجهازة بس حطيها بالشنطه

– قمصان النوم… ايش اللي ممكن البسهم باول الايام؟

حاولي تاخذين معاج كل الانواع
في البدايه اول 3 ايام لبسي طويل
بعدين حاولي كل مرة تغيرين
مرة قصير ومرة طويل…مرة غامق ومره فاتح…مرة شيفون مرة حرير دانتيل المهم تغيرين
بس المهم حاولي انج بعد اسبوع واحد او 2 بالكثير تلبيسن القصير لانج لو استحيتي من البدايه بتلاقين نفسج طول العمر مستحيه منه

– الملابس المستعمله؟

هذي الملابس تحطينها على طول بكيس الاندري حتى لو ما راح تبعثينها لللاندري بس حطيها بالكيس … ولو مثلا كانت عندج ملابس مستعمله واضطريتي تنتقلين من دوله لدوله حطيهم داخل كيس الاندري وبعدين حطيهم بالشنطه علشان اول ما توصلين تبعثينهم لللاندري متفرقات:

– العلب اللي فيها سوائل ؟

هذي العلب لو بتحطيها بالشنطه بتلاقينها تسرب شوي
مثل الشامبو والبلسم
وتخيلي لو انكسرت العلبه داخل الشنطه !! يعني ملابسج كلها راحت
تعرفين الاكياس البلاستك اللي تنحط فيها السندويشات ؟؟
بتلاقين في الجمعيات احجام شوي كبيره هذي تقدرين تعبين فيها اغراضج السايله بدون خوف

– المقراض ,, المبرد ,, الملقط ,, المقص ,, اشلون بحصلهم بسهوله داخل الشنطه؟
طبعا انتوا عرايس وبتشترون مكياج بكميه كبيره
واكيد بيعطونكم شناط الميكب الصغيره كهدايا

طبعا هذي الحمامات الوحده منا تخاف منها لانها عرضه لللامراض وخصوصا باول ايام الزواج اجسامنا تلتقط المرض بسرعه
اول شي لازم ترفعين الفلاش بالحمام عشان الماي الموجود يروح ويعطيج ماي جديد ونظيف
بعدين مقعد الحمام هذا اللي فيه اكبر كميه من الميكروبات اشلون استعمله !!
بتلاقين في بعض الجمعيات اوراق خفيفه تنحط على المقعد بالحمام عرفتوها ؟ ممكن تشوفونها ببعض الفنادق موجوده اكيد شفتوها من قبل
ممكن تاخذين كم حبه منهم وتحطينهم بشنطه ايدج وتستعملينهم وقت الحاجه

– ايش احط بشنطه يدي؟

اول شي البوك وكل البطاقات
مفتاح الفندق اللي ساكنه فيه وعنوانه احتياط لو ضعتي مثلا او لو ركبتوا تكسي ما يعرف اسم الفندق اللي انتوا فيه
بولو… علوج … مقراض …كير فري …. اوراق الحمام وانتوا بكرامه …فاين عادي … فاين معطر .. بانادول

– الكير فري ( الكوتكس اليومي ) ؟

حاولي تختارين نوع جيد مافيه عطور ويكون مصنوع من القطن وانا انصح بهذي الماركه
بعدين حاولي تاخذين كميه كبيره تقريبا لكل يوم 3 حبات وانتي احسبي كم يوم راح تقعدين هناك
بس لاتعتمدين على انج بتشترينهم من هناك .. لان في بعض الدول ما تبيع اليومي لانهم اصلا ما يستعملونه
بتكون عندج كميه كبيره من العلب تقريبا لو مسافره شهر راح تلاقين نفسج محتاجه ل خمس علب … تخيلي شكلهم بالشنطه!!
حاولي تدورين على شنطه صغيره ونظيفه تجمعين فيها كل الكميه
انا استعملت شنطه البارشوت كان عندهم عرض كل علبتين فشنطه بلاستيك

المكياج .. ايش اخذ معاي؟

اللي بشرتهم جافه ياخذون كريم اساس سائل خفيف مثل ديور
اما اللي بشرتهم دهنيه لازم ياخذون كرم الاساس المضغوط او البودر مع الاسفنجه
روجين واحد بلون وردي والثاني بني بس الدرجات تكون فاتحه
بلاشر مع فرشاه البلاشر
ضل لون وردي فاتح وبني فاتح مع فرشاه
مسكرا… كحل لداخل العين… وكحل لبرى العين مع فرشاه

==
==
==

نصايح عامه :

– قبل كل شي وفوق كل شي الله … الصلاه يا بنات لاتلهيكم الدنيا والوناسه عن الصلاه … القران حاولوا لو مرة في الاسبوع تقرون صفحه وحده كفايه اهم شي تذكرتوا الله
– الدعاء والاستغفار… احسن وقت للدعاء في الطياره وقت الاقلاع ادعي ان ربج يوفقكم ويا بعض ويبعد عنكم العيون والحسد والاعمال والسحر ويرزقكم بالذريه الصالحه في الوقت المناسب لكم .. طول الوقت بالطياره ادعي لان الدعوه وقت الصعود يعني وقت الاقلاع مستجابه ودعوه المسافر مستجابه بعد … واذا تمللتي استغفري ربج او سبحي شوي بس الاهم انج ما تنسين ربج بالسفر
– هذي السفره اول سفره واول تواصل بينج وبين زوجج … ومن هالسفره زوجج راح يحكم عليج وعلى حياتكم وعلى كل السفرات الجايه … فلازم تتحلين بكم صفه وهالصفات المفروض تتحلين فيها طوووووووول عمرج
– ما تكونين ممله يعني .. اف ملل.. اف حر… اف تعب هذي كلها تنسينها حاولي تكونين دايما انسانه ممتعه بالسوالف والتصرفات
– تكونين انسانه مرتبه دايما سواء بلبسج وشعرج ومكياجج وحتى بالغرفه بالفندق يعني مثلا لما تقومين من النوم حاولي ترتبين الفراش مب تعتمدين على الهاوس كيبينق .. حتى لو تفرشينه بطريقه مرتبه بس مب مهم يكون شي مظبوط ميه بالميه لا المهم ان الفراش يكون مرتب ….. وحتى ملابسج وملابس زوجج حاولي ترتبينهم دايما يعني اختاري مكان بالغرفه مثلا تحطين فيه كل الجواتي وانتوا بكرامه والملابس الوصخه على طول حطيها فكيس الاندري
– حاولي انج تكونين يد زوج اليمين بالسفر يعني مثلا الجوازات لما يعطيج اياهم خلج حريصه عليهم وحطيهم بشنطتج … اول ما تطلعين من الفندق اخذي عنوان الفندق معاج ومفتاح الغرفه عشان لما ترجعون للفندق يكون معاج العنوان تعطونه للتكسي … بانادول وعود الاسنان والعلوج هذي كلها تخلينها بشنطتج عشان اول ما يطلبها تكون عندج …يعني مب لازم زوجج يقولج افعلي وسوي لا بالعكس انتي ابهريه بتصرفاتج العقلانيه صدقيني بتكبرين فعينه
– لاتكوينن بليده بالسفر يعني لما يقولج بنطلع الساعه 4 مثلا حاولي تجهزين نفسج قبل او مثلا لما يقولج يلا نطلع حاولي تجهزين بسرعه خصوصا باول سفره لان الزوج مب متعود ان حد ياخره بالسفر فحاولي تكونين مستعده دايما
– اذا قررتوا تسافرون يوم الاربعاء على الظهر مثلا …حاولي تجهزين شنطتج الثلاثاء الظهر بحيث تخلين الاغراض اللي راح تستعملينهم خلال هاليوم بس برى اما الباقي كلهم داخل الشنطه يعني حطي لج لبسه ليوم الثلاثاء الظهر ولبسه ليوم الثلاثاء بالليل ولبسه ليوم الاربعاء الظهر ولبسه ليوم الاربعاء للسفره يعني …. بهالطريقه راح تكونين مستعده وما راح تتبهدلين على اخر لحضه ولا راح تنسين شي بالغرفه مثلا- لما زوجج يدخل محل للبس الرجال لاتقولين له انا بدخل المحل الفلاني لحد ما تخلص!! والا اف يلا ما خلصت اف تمللت امممم ماعرف ملل !! لاء طبعا حاولي تشاركينه اختياره ولاتبينين له انج متملله او متضايقه بالعكس
صدقيني بتشوفين اشلون راح يعاملج يوم تدخلين محل للحريم .. وبنفس الوقت راح يتعلم ياخذج معاه كل مره يوم يختار له لبس يعني كسبتي شيئين
– لو مثلا ضعتوا بالشارع ايش يكون موقفج ؟؟؟ الرجال ما يحب يفقد ثقتج فيه لذلك لما يضيع يحس ان ثقتج فيه قلت فاول شي تقولينه : الله حلو هالشارع لو رحنا على طول للمكان الفلاني من الشراع الثاني ما كنت بشوف هالشارع الحمد لله مرينا على هالشارع وغيرنا الطريق
يعني حاولي تخلين كل شي بعينج وبعينه حلو حتى لو كان تصرف مب حلو منه
– لو مثلا قالج انا ابي نزل تحت بالكوفي شوب صديقي عازمني على قهوه ابي اسلم عليه مثلا بخليج في الغرفه دقايق وراجع …. لاتقولين لاء والا اف والاما يصير .. بالعكس خليه على راحته عشان ما يكون مقيد معاج … لو حس انه مقيد بتلاقينه يفكر مره ثانيه الف مره قبل لاياخذج معاه !!!
بالعكس انتي لو خليتيه يروح مثلا ربع ساعه بهالوقت رتبي شنطتج والا غرفتج او استشوري شعرج وحطي مكياج او حفي جسمج صدقيني بتطلع لج الف شغله بهالوقت وبنفس الوقت زوجج راح يحس انه حر مب مقيد
– تصرفي على طبيعتج لاتكونين مصطنعه.. يعني لاتضغطين على نفسج عشان تكونين بعينه الانسانه المثاليه
بالعكس الرجال يحب المراه اللي تتصرف على طبيعتها … واذا تصرفتي انتي على طبيعتج بتلاقينه هو نفس الشي يتصرف على طبيعته…لاتخلين الخجل يكون حاجز بينج وبينه… بالعكس من اول الايام من شهر العسل كسري الحاجز وبتلاقين نفسج ان شالله مرتاحه وسعيده معاه
– الزعل… حاولي ما تشيلين بخاطرج على اي شي يعني مب كل كلمه اطلعت من زوجج بالغلط او تصرف بسيط ضايقج يخليج تزعلين وتسوينها سالفه !!
بالعكس بينيله انج زعلتي وبعدين على طول انسي
الدنيا ما تسوى واشكثر الانسان بيعيش من عمره عشان يضيع هالايام بالزعل؟ وصدقيني بهالشكل راح تكسبينه وبتلاقينه يحبج اكثر واكثر وبتلاقينه يحب ياخذج معاه وين ما راح لانج مصدر راحه مب مصدر زعل
نفس الشي لو انتي غلطتي بحقه بشي وشفتيه زعل … لاتكبرين الموضوع وتسوينها سالفه وتعتذرين واسفه ومب قصدي!! لا عادي خلي كل شي سلس بينكم اضحكي وتكلمي معاه بطريقه عاديه كان شي ما صار لاتعلمينه على الاسف والاعتذار من البدايه
بهالشكل راح تقلصين المشاكل اللي بينكم
طبعا اتكلم عن المشاكل البسيطه مو الكبيره

اخيرا .. للأمانه هذا الموضوع منقوووووووووووووووووووووووووول ونقلته لكم للإفااده

اتمنى ان الموضوع نال على اعجابكم