اجهاضي متكرر ورد اللجنة كان قاسي

انا صارلي عشر سنوات متزوجه ولله الحمد والشكر

بأول زواجي اجهضت على شهرين وبعدها بسنة حملت حمل طبيعي وجبت ابنيتي الكبيره الحمدلله

بعد اربع سنوات اجهضت ثلاث مرات وحملت في بنتي الصغيرة والحمدلله

لكن بعدها قام يتكرر الاجهاض لحد ماوصل عندي سبع اجهاضات بينهم ست شهوراو سنه او ثلاث سنوات والمشكلة ان لي بكل مستشفى وعيادة بالكويت ملف يقول اني طبيعيه وماأحتاج لأي علاج وحتى زوجي طبيعي الحمدلله .
نفسيتي اتعبت وعقب كل اجهاض يصير فيني صدمة عصبيه وتشنجات لحد مارد طبيعيه وحياتي تغيرت حتى معاملتي لزوجي تغيرت صرت عصبيه حيل وابجي بسرعه . خليت المستشفيات ورحت لعلاج القرآن ارتحت عليها وجربت احمل واتعالج بالرقية الشرعيه من سدر وماي مقري وزيت زيتون وقرائتي للقرآن وخاصة سورة البقره مو علشان الحمل بس لأني ارتحت على هالشي والحمدلله .. وحملت واستمر حملي طبيعي حتى الشهر الثالث رحت لموعد السونار لكن .. للاسف الجنين ميت .. استغفرت ربي وحمدته لكن شي بصدري يصرخ ويقول اشفيني ؟؟ وغصبن عني بجيت الم وحسره ورديت للقرآن والحمدلله ارتحت بس احس بجرح مع ان اللي حولي يحاولون مايجيبون لي سيرة بالموضوع ويحاولون ينسوني اللي صار.

لكن قررت اني اشيل فكرة الحمل من راسي واحمد ربي على البنتين اللي الله عطانياهم نعمه والحمدلله .. بس زوجي قال لي آخر محاوله بنسويها اللي هي العلاج بالخارج .. بعد رفضي المتواصل لهالموضوع اقنعني ووافقت واخذنا موعد باللجنه اللي بمستشفى الصباح وشافو ملفي وتحاليلي ودخلت عليهم وكانو يسئلوني كم سؤال وشنو اللي سويته وفحوصاتي كانت كلها اوكي .. رد علي احد الدكاتره الله يسامحه وقال لي : احمدي ربج ان عندج بنتين والا غيرج ماعندهم عيال وراضين انتو مدلعين بس بتكودوون العيال والا تبون الولد زين بالله وافقنا ورحتي علاج بالخارج وجبتي بنت بترضين ؟؟ قلت ايه ارضى .. قال عيل حمدي ربج على البنتين

رديت عليه وقلت العفو اخوي انت بتسفرني على حسابك والا على حساب الدولة ؟؟ ضحك وقال طبعا على حساب الدولة بس الدولة ماهي فاضيه لدلعكم غيركم أولا منكم .وانا انصحج تشيلين الموضوع لأن حتى لو حاولتي مره ثانية بتحصلين نفس الرد

قلت ماجيتلك عشان تعطيني نصايح ويادكتور يافاضل لاتنسى ان اهم شي بالعلاج الكلمة الطيبه

فقال لي انا آسف ابلغج وتوفرين على نفسج النطره انتي علاجج متوفر بالكويت وماله داعي العلاج بالخارج .. قلت اوكي الله يجزاك خير المفروض مختصرها من الاول وماله داعي تقول مدلعين .

طلعت من الغرفه فوق ماأنا منقهره من حالتي انجرحت اكثر واكثر من رد اللجنه طلعت من الغرفه وانا ماشوف طريقي بس ابي السياره ابي بيتي ابي بناتي ماني بحاجة احد واذا ابي اعالج اخذ قرض ولااني اعرض نفسي لكلام بايخ .

ياترى الحكومه تدري ؟؟ عندها خلفيه عن الدكاتره اللي حاطتهم باللجنه ؟؟ عادي انهم ياخذون راحتهم بالكلام جذيه يجرحون ؟؟؟

ماعتقد والله

مشكوره يالجنة الانسانيه فوق نفسيتي زدتيني تعب