اجر كبير لابلات العربي

الى مدرسات اللغة العربية السلام عليكم ورحمة الله وبركاته منو منكم تكسب فينا اجر وندعي لها دايما تعلمنا خبايا واسرار اللغة العربية للابتدائي عشان ندعي لها من قلب يعني لما ننام مبجر ندعي لها ولما نزور براحة من غير ما نشيل هم العربي هم ندعي لها ولما نسوق عدل من غير مرجعة العربي هم ندعي لها ولما تخف الصيحة اثناء التدريسهم ندعي لها ولما تتحسن علا قتي مع ابنائي بسبة الزعل من درجات العربي هم ندعي لها وبالاجتماعات هم ندعي لها وبحفلة التفوق هم ندعي ووووو==================الخ وحتى يكون ملف متواجد دائما اابدا ولحل اي مشكلة تواجه اي ام في عربي الابتدائي يعني باختصار خط ساخن للعربي واذا نجحت النسخة العربية ما فيش مشكلة نعمل نسخة انجليزية يا سللللام انا لو افهم بالعربي جان اول وحدة اطق الصدر بس للاسف ثقافتي انجليزية ياالله يا ابلات يا حلوات منو الي تبي الاجر والثواب من الله في الاخرة ولها السمعة الطيبة بالدنيا عاد نبي نسوي مظاهرات ونتجمهر لما يلبون رغبتنا منتدى كويتيات ندري فيه مواقع تعليمية كثيرة لكن نبي منا وفينا وقريبة لقلوبنا الي يؤيدني يشارك وشكرا

انا أول المؤيدين لج

ولدي من دخل المدرسة وانا متأزمه والسبب العربي

عزيزتي ضحاوي يسعدني تجاوبج السريع والظاهر هالحزة الابلات نايمين نومة العوافي

انا جيتكم

هلا والله بالامهات الغاليات

العربي يا عزيزتي سهل سهل وايد بس المشكلة المدرسات عليهم ضغط بالمناهج والاشغال الثانية في المدرسة من تنظيف وسمكرة وتدليك ظهر الناظرة ( احم أقصد من نشاطات اذاعية وورش عمل ودروس نموذجية )

المهم ماعلينا بشنو مشغولات بس مو معطينهم فرصة يحكون راسهم او ينتبهون لعيالهم هم شلون عاد على عيال الناس

منهج اللغة العربية يا الغاليات ما يبيله شي سهل سهل
بس دربيهم على المهارات المطلوبة والكتابة والقراءة
لكن بعض الامهات تلقون ولدها ما يعرف الحروف وتجي تتكلم عن ان العربي صعب

طيب بدال ما تشتكين علمي ولدج الحروف وطريقة تركيب كلمات منها ترى الموضوع سهل
بعد هذا ولدج اهم من شي ثاني اهم من اسواق وطلعات واعراس ووظيفة
بعد الناس مو أحرص منج عليهم
اسفة خواتي انا اتكلم عن بعض الامهات بس اي خدمة انا حاضرة لكم مستعدة اتواصل معاكم في هذا الموضوع كل يوم

هلا وغلا النويرة شيفكج مني الحين بس عاد مادري هل انتي تطوعتي الحين والا شنو لانه من باجر اتوقع الاسئلة تتهافت عليج كالمطر حبيبتي كل الي قلتيه عدل وانا ادرس عيالي وادري عليكم ضغط والله ودايما اقول للابلات الله يعينكم بس فيه البعض واركز البعض الله يهديهم على ابو اني مدرسة قديرة قديمة تشد على الاطفال يعني مدرسة ولدي الله يهديها تقول الي يبي الواجب يجي ياخذه حتى ما تتعب نفسها وتوزعه والا اذا كتب الخط مو عدل حبطته وعقدته والله مو بس انا الامهات كلهم يشكون منها وكرهت الاطفال بالمادة ومرة ثانية الله يجزاج خير بس نبي فكرة عن التعبير

يا هلا ام الشيوخ
انت تامرين مافيه تعب وتعبج راحة

المدرسة هذى اللي تقول للتلاميذ تعالوا اخذوا الواجب مسكينة
اما انها مهتمة بحصتها وايد وما عندها وقت توزع عليهم الواجب او انها مهملة
بس اذا هي تعاملها مو زين مع الاولاد لا تسكتون عنها
انا مدرسة واعرف الوضع زين … مو كل الاولاد مثل بعض لان بعضهم يحتاج حنان وتشجيع لانه مفتقده في بيته
وبشكل عام الاولاد يحتاجون تشجيع وايد
تصدقين يالغالية انا والله ما امدح نفسي كنت اعامل التلاميذ مثل امهم واهتم فيهم واوزع عليهم هدايا غالية
ومع هذا ما افتكيت من شكاوي اولياء الامور والحين تركت التدريس من كم شهر قلت خل عيالكم تحت ضمير اللي تبي راتب وبس ولا همها يفهمون او مايفهمون يتعقدون او ما يتعقدون بالطقاق عيال خلق الله وشبي فيهم

المهم انا حاضرة لج كل يوم حطي اسئلتج ومستعدة اساعدج
ويكفيني بس الدعوات منج حبيبتي

الله يوفقج ويجزاج خير بس انتي باجازة والا مستقيلة وما عليج منهم اهم شي ضميرج مرتاح وما اغضبتي ربج وشكلها التربية ماشية على البركة الله يستر

انا مو باجازة تركت التدريس خلاص وبروح للأوقاف ان شاء الله
ادعيلي اتوفق ويقبلوني بالاوقاف وارتاح في الوظيفة

أما ان التربية ماشية على البركة فهي فعلا ماشية على البركة بس هذا مو من المدرسات
هذا من المناهج اللي كل يوم والثاني مغيرينها والمدرسة تشتغل مثل المكينة ماعندها وقت تتفرغ لصفوفها علشان تعطي عدل
ياحبيبتي في التربية ما يطالعون التلاميذ
ترى التلاميذ بس ديكور علشان الكشخة ……. يطالعون تزيين الوسائل والصف وكشخة المدرسة وكشخة دفتر تحضيرها
وعمل دروس نموذجية مادروا عنها التلاميذ وعمل انشطة اذاعية بس نقول فيها للناظرة شوفينا ترى احنا هبة ريح
وعمل مجلات واصدارات موحق التلاميذ لا حق نوديها للمنطقة وناخذ كتاب شكر

بدال ما نتفرغ للمشاكل الاخلاقية والسلوكية في المدارس وندرس حالة كل ولد قاعدين نعرض مسرحيات وونقيم حفلات وايام مفتوحة ومتفرغين للتجارة في المقصف
غير الضغط اليومي على التلميذ المسكين والاوراق اللي ماتخلص وهو بس ياخذ ومادري شنو معطينه
تخلف والله

الله يعين المدرسات

همهن هم الله يفرجها عليهم بناظرة تبرد الجبد

انا ولدي في كل المواد تمام

وتقديره العام ممتاز

بس احس انه بالعربي مو ذاك الزود

يكسر خاطري لما يكتب ويبجي

احس وايد يستصعب الكتابه

مادري يمكن لانه صغير حده مولود في 12 3

يعني لو متاخره بولادته 3 ايام كان بالروضه

مع انه بالعلوم والرياضيات والانجليزي وباجي المواد شاطر

بس احس مشكلته بالكتابه وااااااااااااااااايد يتعب لو كتب

انا بصراحة مو ابلة عربي بس عندي طريقة لتعليم الكتابة والقراءة فادتني وعيالي والفايد الله والحمدالله

الله يوفقج ان شاء الله ويقبلونج بالاوقاف والحين عرفت السر بين المدارس الحكومية والخاصة لانه بالخاصة يهتمون بالطالب وسلوكياته ودرجة استيعابه اول باول

الناعمه فيدينا بطريقتج يمكن اقدر افتح القفل اللي على مخ ولدي

النويره

الله يوفقك ويقبلونك ان شاء الله

انا بعد نفس الحالة ولدي متفوق بس موعاجبني احس مو هذاك الزود بالعربي وبعد ترى اسم الله عليه صغير بس شوفي المدارس الخاصة 4سنين يقرا ويكتب لا اله الا الله ترى الاطفال يستوعبون وبسرعة لغتهم تتطور بس احنا نحس انهم صغار وما يستوعبون ما سمعتي التعليم في الصغر كالنقش على الحجر

الله يوفقج ويوفق عيالج ويحفظهم ولمزيد من التفوق ان شاء الله واذا ما فيه احراج تفيدينا بطريقتج انا استخدمت مع عيالي الطريقة الحلبية وشريت كتبهم بس طبعا شققوهم عيالي بس احس انها طريقة جيدة بس ما استمريت فيها لانه ما ودي اشتتهم بين المدرسة و القاعدة الحلبية لانه عكس بعض الطرق الحلبية تعلم الاحرف اول شي وشلون نستخرج الاحرف من الكلمات بعدين تعليم الكلمات والتربية يعطونهم اول شي الكلمات يكتبونها على قولتهم تصور بصري وسلامتكم