ابي المشورة العاجلة بيتحدد فيها مصيري الليلة

تقبل الله طاعتكم بنات
طبعا سامحوني لاني قاعدة اقط خيط وخيط وحدي تعبانة و الله فطور مو متفطرة و الله العظيم
يا بنات نفسيتي صايرة زفت من هالريل قسما بالله زفت
اليوم يا بنات و الله ماصار شي كلمتني اختي و قالتلي انها تبي تطلع قتلها خلاص اشوف فلان طبعا على مسمعها يقولي مافي طلعة هذا قتلج المهم بعد ماسكرته انا ما حطيت في بالي الموضوع رديت له مرة ثانية الا مبوز و زعلان قعت و الله العظيم ادلع فيه و ابوسه قال وخري عني وخلي اهلج يتفعونج يا جناعة اهلي و الله اهلي اقولهم لا مالهم غيري
انا الجبيرة يعمي شنو ارد الشايب ابوي و الا ارد امي
بالله عليكم قولولي شسوي المهم خليته على راحته ورحت سويت الفطور يعني شي خفيف شايفني و الله بالمطبخ قولي من البداية ما ابي فطور يوم اذن و قعدت افرش السفرة جان يقول ترى ما بي فطور قتله شلون احنا صيام قوم تفطر قال مابي منج شي قتله شصار على هذا كله انا ابي افهم شنو الموضوع
المهم و الله انا كنت حدي يوعانة قسما بالله ليلحين ما اكلت ولا لقمة وماطب في بطني شي احس نفسيتي مدمرة من هالريل
قتله حسبيالله ونعم الوكيل فيك على كثر ما اضيق خلقي و اتكدرني قال روحي روحي اشدعوة رب بيتقبل دعائج
قسما بالله مليت ودي صج صج صج اروح بيت ابوي عزوتي لي ضاق الزمن فيني مالي الا هو
بس خايفة اتحسف انا ماقمت اتحمل منه شي و الله صج
دلوع وزعول ياتفركيني و ادلكيني يا ازعل يا اراويج يا راح تشوفين الي بتييج قطيعة تقطعها عيشة
و الله العظيم يطلع من العشر لي الساعة 4 الفجر بالدوانية تالي اييني مستمرض
الحين طول هالوقت بالديوانية مثل الحصان تلعب و اتغشمر لما تيي البيت تتعب و تصير ميت
قلبي يعورني و الله اكتبلكم و انا بقمة التحطيم يا ناس
ابي اروح بيتنا طقت جبدي منه مستضعفني و الله مشتضعفني مدخل خشمه بكل شي بكل صغيرة وكبيرة احس شوي شوي قاعدة اكرهه يا بشر و الله انتوا مو حاسين فيني صج صج مو حاسين فيني

اااامبيه الله يعينج

مالج الا تصبرين وتتحملين ياقلبي

يمكن متضايق من شي وانتي طلبتي منه هالطلب

اصبر و انا فيني حيل اصبر كل مالي بالنازل على شنو اصبر
مضايق من شنو انا اصلا ما كطلبته اهو سمعني اتكلم مع اختي بس انا ما طلبته

شوفي حبيبتي ادري انج واصلح حدج معاه والله يعينج ان شاء الله ويسهل امرج ..

ذكرتيني بموقف صارلي مع زوجي ببداية حياتنا كنت قايمه فيه قوم وهو كله مو عاجبه وماد البوز شبرين 24 ساعه .. ليما وصلت حدددددددددددي خلاص ما قمت اتحمل وبيت النيه بروح بيت اهلي بس تالي قلت بعطيه فرصه اخيره .. قعدت معاه وطلعت الي بقلبي كله وقلت له شنو اعاني منه وشلون اهو ماذيني وليش يسوي جذي وشنو يبي مني شنو يرضيه ..

طبعا لان تزوجنا صغار وهو كان سفيه شوي قالي هذا انا ما راح اتغير .. بلحظتها قلتله دام جذي بااااي مع السلامه انا رايحه بيت ابوي .. وأدبه سنه كامله ما ظلت واسطه ما حطها عشان اردله .. تالي رديت بشروووطي ..

انتي لا تستعجلين وتطلعين خلج والله وقعدي معاه قوليله ابيك اليوم لا تطلع ابي اكلمك بموضوع وحااااجيه وقوليله قبلها اسمعني للاخر ولا تعصب علي اسمعني ليما اكمل ..وكلما بغى يقاطعج او يعصب عليج هديه وقوليله انت رضيت تسمعني للاخر اسمعني ليما اخلص وطلعي كللللللللللللللللللللللللللل الي بجبدج وقوليله الي تبينه وشنو تتوقعين منه ولما تزوجتي شنو تبين من هالزواج .. وشنو الحل وشنو اهو يبي وشنو الي يرضيه عشان تعيشون مرتاحين ..

وان شاء الله بتلاقين هالليله حل وبتكون بدايه حلوه ونهاية لمشاكلكم .. وان شاء الله ما تضطرين تدخلين ناس من بره بحياتكم .. الله يهدي سركم ويسخر لج زوجج امين ..

معلمة متميزة
زوجي استفزازي لاخر درجة تخيلي لو اكلمه ما يطالعني و يقعد يستهزء فيني هالطريقة الي تقولينها لناس نخهم مفتح ويقبلون التحاور لكن ريلي ماعنده هالاسلوب
انا اتبعت معاه كل شي بصراحة حدي تعبانة منه حدي

الله يعينج مشكله اذا كان الزوج جذي عسى الله يهديه لج .. ليش ما تلمحيله ان ما كو مره تتحمل كل هذا واذا بتظل على هالحال بتخسرني للصبر حدود ومن هالحجي عشان اذا طلعتي او خليتيه ورحتي يتذكر كلامج .. الله يعينج

تدرين مليون مرة اهدد و لبس و اشيل قشي لين وقفت عند باب البيت اهون اقول شذنب هالشايب ينقث
و الله ان ابوي حيل يحبه و مابي اسويه فتنه بين الاهل

والله احترت مادري شقولج الله يعينج عليه ويهديه لج ادعي يا قلبي كليوم عقب الصلاة واستغفري ليما الله يفرجها عليج .. وادعي هالدعاء يكفيج ما اهمج " حسبي الله لا اله الا هو عليه توكلت وهو رب العرش العظيم " والله يسهل امرج ..

عامليه بنفس معاملته شوفيه بيستحمل اذا هو دلوع صيري ادلع منه خل يتأدب ويعرف ان هالطبع خايس بعد انتي تبين زوج يحميج ويساعدج مو ياهل تربينه ،،، الله يصبرج ويسير امورج ويعقل ريلج ويركده يارب

و الله اني دعيت هالدعاء اليوم بعد صلاة المغرب اكثر من 10 مرات قلته من القهر الي فيني
قاعدة اقول تعوذي من ابليس ياي علينا 10 ايام مباركات و عيد ماله داعي تسوين سوالف
و ارد اقول ابيه يحترم نفسه و يصير ادمي ويبطل غرور و شوفه نفس

You FOR Me Only الله كريم مشكلتي ما اعرف ازعل و الله العظيم ما اعرف ازعل كلش

الله يعينج ويسخر لج ريلج

يمكن انتي الحين نفسيتج تعبانه ومحتاجه تغيرين جو وتريحين من الضغط النفسي

اختي لاتزعلين بس انتي الغلطانه من البدايه عودتيه انج انتي اللي تراضين حتى ليمن يكون اهو الغلطان
الحين احقريه ليمن يجي من نفسه ويتكلم
ولازم تتعودين انج تراضينه اذا كنتي انتي الغلطانه واذا كان اهوا الغلطان خليه اهوا اللي يراضيج

الله يصلح الامور بينكم

بس لازم تتعلمين تزعلين عشان يعرف الشي لين زاد عن حده ينقلب ضده

روحي تحبه غصب : انا اراضيه لان ما احب الزعل و اتضايق و اتكدر اذا شفت الجو متعكر لان صج روحي تحبه غصب

You FOR Me Only : ازعل وللاسف من كلمة وحدة ارضى