|
|
ابدي بالسلام ،،،،،
اولا الله يسهل على الحوامل يارب ويرزق كل وحده خاطرها سواء ببنت او ولد ….
يوم الخميس بتاريخ10 -3 كنت رايحه امشي بالافينوز ويا ريلي وكان باقيلي يوم وادش الاسبوع الرابع من شهري مشيت ومشيت لين تعبت ورديت البيت ريلي وارمه تعشيت وقعدت اشتغل بالبيت والفير حسيت بعوار
النغزات لي تحت وااايد زايد وكانت الدكتوره ليلى اشكناني قايلتلي اشرب خروع فقلت مره وحده دام في عوار خل اشرب وشربته وتمشيت والعوار يزيد طبعا انا ماكنت مهتمه كله عبالي هذا عادي بيروح لي الساعه 7 الصبح والعوار كل 5 دقايق يعني طلق بس انا مقاومه العوار وقاعده امشي بالبيت الساعه 11 الظهر قلت لا لازم اروح اجيك تسبحت وشربت دارسين والعوار قام اييلي كل 5 دقايق ومرات كل دقيقتين رحت رويال حياة بالطوارئ ولايحطولي التخطيط مال الطلق ولا الطلق حده حامي والرحم مفتوح 3 سانتي يعني زين لحقت على عمري
وقالولي تبين ابرة ظهر طبعا قلتلهم اي لاني ماخذتها على بناتي من قبل و كانت رحمه حقي الصراحه
ودوني الغرفه طبعا الغرفه وااايد حلوه وكل شي فيها من خدمات وسستر طول الوقت معاج ماتهدج
ونفسيتهم حلوه ويالي دكتور التخدير طبعا استشاري واهو احسن واحد بالمستشفى اسمه الدكتور عمر الخطيب وماشاءالله عليه ايده حدها خفيفه وشاطر ،،،، ضليت اطلق والتخطيط كان مستمر الطلق حامي
كل مايفحصوني يقولولي الرحم مافتح الا4يعني علي هالطلق المفروض يفتح بسرعه بس انا عندي العنق سميك وبكل ولاداتي اطول علي مايفتح الرحم طبعا من الساعه 11 لين الساعه 7 الليل واهو كل ساعتين يالله يفتح سانتي بالاخير الدكتوره دقت وقالت بطو جيس الماي عشان يحمى الطلق زياده ويفتح اسرع
طبعا بطو الجيس وفظووو الماي الي ببطني والطلق قل بدال مايزيد 
واهني استغربوا الدكاتره انه قل فعطوني طلق صناعي بالوريد واول ماحطته السستر ولا احس بضيق تنفس اقولها مااقدر اتنفس عدل تقولي اي مال الدوااا عادي وعطتني واير التنفس احطه وشوي ولا احسن
بعدها الساعه 9 يت دكتورتي وفحصتني ولا 7 سانتي بس قالت انتي راح تطولين واايد عطوني ملين للرحم ودكتورتي راحت وقالت اردلج بعدين انتي مطوله نامي طبعا وين ايلي النوم وانا احاتي
لي الساعه 12وشي امي واختي خلوني فقاره تعبو راحو الغرفه يريحون
عادفحصوني ولا زين 8وبعدها بنص ساعه 9 ويت دكتورتي وسعوني وقامت تقولي ضغطي بس انا من التعب مو نايمه ولا ماكله 30 ساعه عاد وسعتني الدكتوره واضغط واضغط موراضي يطلع الياهل مع انه 9 سانتي المفروض طالع السسترات ماسكين بطني ويضغطون بيطلعونه ومع الضغط المتواصل يالله طلع الحمدلله الساعه 1 الفير
صار معاي نزيف وقتها وخافو يستمر فقالولي لازم مغذي مستمر لي بعد الولاده بيوم
الدكتوره واهي تخيط اقولها قاعده احس تقولي شلون وانتي ماخذه الابره اقولها والله عطتني ابره موضعيه وكمام وهم قاعده احس اخير شي عطوني منوم بالمغذي ونمت وقعدت ولا الغرفه فاضيه مافيها احد الحمدلله عدا الشر وارتحت بعدها زهبوني ورحت غرفتي كنت ماخذه ليلي حلوه وملمومه واليوم الي بعده زاروني اهلي وطلبت منهم خدمة الضيافه وكانت زينه واسعارهم زينه بعد واهم شي الصحه والعافيه
اي سؤال بنات بتعرفونه عن المستشفى او الاسعار قولووووو والله يتمم على الكل
طبعا ولدت يوووم 11 كان يوم اليمعه ويومها طق المطر 
لي مدة اسبوع الف الحمدلله على النعمه
ومبروك مايبتي
هالافنيووز المفرووض يبنون يمه مستشفي لووول
ادعييلي الله يسهل علي حدي خاااااايفه
ويتربى بعزكم البيبي
والله يهون على كل الحوامل ويرزق كل محروم يارب
والله يجعله من الذرية الصالحة يارب
قمت اخاف لما اقرى قصصكم ماكنت متخيله جذي الوضع
ربي يتمم علينا ويهون طلقنا ويسهل ولادتنا ويقر عينها فيهم واحنا بصحة وعافيه
والله يخليييه لج يااارب وتشوفينه معرس
بالنسبه للغرفه اهيا اصغر وحده؟؟