اااااه شنو اسوي بأخو زوجي الي يتحكم فينا ارجو المساعده!!

السلام عليكم شلونكم بنات شخباركم ..اليوم طفح الكيل عندي مادري شسوي ابيكم تساعدوني والله مادري شسوي يا بنات …سمعوني وانتو حكمو..

انا متزوجه صارلي تقريبا سنتين زوجي وايد حبوب وطيب ويحبني وايد ..من تزوجنا واحنا عايشين برا ندرس انا معاه وعلاقته فيني من اروع ما تكون حتى بلغربة علاقتنا جنا ربع مو بس زوجين …وطبعا ما يعاتبني اذا قصرت في اي شي بلبيت بسبب الدراسه بلعكس قبل لا تقرب امتحاناتي يقولي خلي كل شي عنج واهم شي دراستج..الحمدالله لك يا ربي ..وطبعا ما نيي الكويت الا بلعطل والمناسبات..و بكل جيه لنا احس ريلي يقلب علي وايد وااااااايد وكل مره اجهل السبب اقول يمكن ضغوط ابوه واهله عليه لان احنا بس نرد الكويت اهله وايد يكرفونه لي درجه ان ما يفضالي بتاتا بس يرد بليل متأخر من ابوه تعبان يبي ينام بما انه اهوا بجر اهله .

مره من المرات اخوه الي اصغر منه جانا برا وقته كنا ما نقدر نرد الكويت لان الاجازه جدا صغيره ..ايي صج نسيت اقولكم ان زوجي واخوه هذا علاقتهم وايد قويه من اهما صغار..بعدين بعد ما يانا هني اكتشف السر اكتشفت ريلي ليش يتغير بس نرجع الكويت عرفت ان اخوه يلف راسه ..لدرجه ان ريلي يفتحلي مواضيع ماله دخل فيها مثلا ريل اختج ما يستحي على ويهه كله مجابلكم جنه ما عنده اهل وغيره من المواضيع الي تجرحني ساعات ارد وساعات اتحشى هل مواضيع (يعني اكبر عقلي) بس للامانه مره كنا طالعين انا وزوجي واخوه نتعشى ..قام زوجي راح الحمام حشاكم جان يقولي اخوه تصدقين انتي غبيه ما تعرفين تلفين زوجج احمد اللي اهوا زوجي اسهل مخلوق بالدنيا بس انصدمت انج ما تعرفيله كان حسبالي انج تعرفيله …انا ما حبيت اعطي موضوعه اهميه قتله اهم شي ان احنى زينين مع بعض ..جان يقولي اي شي تبينه منه قوليلي انا اضبطه لج !!!!!! انا انصدمت وسكت

ومن بعدها يبي يوريني ان اهوا يمشي زوجي وصارت مشاكل بسبته واذا كلمت زوجي يقولي كل شي تكلمي عنه ما عدا اهلي ..اهما اصلا بيتهم وايد غريبين يعني انا مزوجته صارلي سنتين واذا جيت الكويت اسكن عندهم بس علاقتهم وايد رسميه معاي ما ادري ليش مع انه انا والله مو مدح بنفسي بس لا لي ولا علي و وايد حاولت اتقرب من امه وخواته ومن شافو ان اختهم صارت معاي وايد جان يبعدونها عني ..مادرس شسوي احس زوجي طاح من عيني وايد احسه ما عنده شخصيه وجنه رايي بيد اخوه واهله …واخر شي صار الحين سافرو كلهم وخذو زوجي وحسيت ان ما يبوني اروح معاهم جنه زوجوه وتوهقو …وقالي زوجي مالج شغل فيهم امشي معاي نروح معاهم بس شعقبه ما دريت بسفره الا اخر يومين وامها مخططين وحاجزين صارلهم اسبوعين عاد قلت براحتهم خلهم يستانسون بولدهم ماني رايحه ..قاعده اسلم عليهم قبل لا يروحون المطار جان تقولي اخته صج انج ما تستاهلين الي يصير فيج وصج اهليمو عارفين قيمتج..انا سكت ما قلت شي ..رحت بيت اهلي وتخيلو محد من اهلي يعرف السالفه وامي يا حياتي كل يوم اطرشله غدا..
تكفون عطوني حل احس اني كارهه زوجيييييي واحسه طاح من عيني حيييييييييييل مع العلم من وصل هناك واهوا رد مثل ما نكون مع بعض كل شوي يدق علي ويقولي كلام حلو ..بس ترا اخوه مو مسافر معاهم اخوه قاعد بلكويت…

اسفه اني طولت عليكم …

الله يعينج أختي
والله ما أدري شقولج بس واضح من كلامج ان شخصية زوجج ضعيفة خاصة جدام أهله وأخوه بالذات فأعتقد موصعب تسيطرين عليه00 بس شلون ما أدري
انشالله البنات يقدرون يفيدوج
وبصراحة انا ملاحظة ان ان فيه أزواج يتأثرون بأهلهم وربعهم ويسمعون كلامهم حتى لو غلط بس مع الزوجة لأ- شنو الحل مع هالنوعية؟
والله يوفقج ويسر أمرج

زوجك شخصيته مو ضعيفه لان صدقيني كل رجال لازم يتاثر باهله…..اهله بعد شلون ما يتاثر فيهم ….
بس تختلف درجة التاثر من واحد للثاني
والبعض يطنش
على فكره مشكلتج بسيطه
لا تشغلين بالج
بكره تتعدل
ما صار شي

يا حياتي يا دلوعه مشكوره انج تواسيني بس بصراحه اي انسان ما يحب يطيح من عينه شخص يحبه ومتعلق فيه وهذي اول مره اكتشف فيه هل شي وهل شي وايد مضايقني واحس انه صج طاح من عيني ..جدامي شخصيته قويه وعند اهله شي ثاني ..وبعدين الي قاهرني زياده ان كل ما ابي اتقرب منهم يبتعدون مع اني كلش ما اقصر معاهم وكل شي يسونه بلخش والدس وفوق هذا زوجي دايم يقولي ان خالتي تقولهم واهما صغار ايي اذا تزوجتو تخلون حريمكم يمشونكم ومن هل سوالف الي ماله داعي يعني معلمتهم هل سوالف من صغرهم …واي انا اسويه بأهله حسباله انا اسويه رياء من من قلب مع اني ما ازور اهلي الا مرتين بلسبوع وما اطول عندهم …

انا معاج يا الثقبه ان شي عادي الواحد يتأثر بأهله بس مو جذي مو يعني يخربون حياتي او يتدخلون فيها انا خواتي والحمدالله الله يهنيهم والله ريايلهم واهلهم ينحطون على الجرح يبرا ..انا افكر احنا الحين برا وجذي حالنا لو نرد الكويت نستقر شنو راح تكون حالتي مع اني صج احسه يحبي بس احس شي قوي يتحكم فيه ما يقدر يسيطر عليه وثاني شي اهما ما يبون يختلطون فيني ..معني مطيحه عندهم واسوي اي شي عشان يحسسوني اني بنتهم الثانيه بس كله يقطون نقزات علي وانا اسوي نفسي جنه الكلام مو لي

ماقول الا الله يساعدج حاولي تجذبينه صوبج دام اهو طينته يتأثر بسرعه
وبعدين هذا الاحساس مر علي بوقت حملي يمكن انتي حامل وتتنسين فيه
وحاسه ان اخوه اهو الاقوى واللي بطنج راح يطلع على اخوه؟؟
سوري حللتج وحملتج وولدج ويبتي ولد ؟؟؟خخخخخخ فال حلو شرايج؟؟؟

مشكوره حبيبتي صبره على دخولج وتحليلاتج
بس انا مو حامل وما حمت من الله لان حللنا في كل مكان نروح له بس الله ما كتب ليلحين ..بس ما اقول الا الله يهديه ويفتح بصيرته ويسخره اهوه وهله لي يا رب ويعرفون معدني شنو …انزين ما قلتيلي انتي شنو صار معاج لانج تقولين صار فيج مثل ما صار فيني شلون حليتي الموضوع ..لان اهوا اذا صار معاي يكون اروع ما يكون يسويلي اللي ابيه وما يخلي على قاصر وفوق هذا شخصيته قويه بصح والغلط بس عند اهله احسه صغيييييييييييييييير و وايد يطيح من عيني واغض البصر عشان احاول ما يطيح من عيني لان صج ماني قادره اوريكم الوضع شلون اهوا ماكو شخصيه عند اهله يعني لدرجه ان يزفونه جدامي وماخذينه معاهم غصبن عليه اهوا قالي انا مابي وهذا الشي صار جدام عيني لما عمي زفه على الغدا عشان يسافر معاهم وما قالي تعالي معانا ..وانا قتله روح معاهم والله يشهد اني ما ازود النار حطب بلعكس اعد نفسي مكانه وافكر بمكانه باجر اذا يبت عيال

تصدقين انجل كذا وحده من الى معاى الى تزوجو وتغربو عشان دراسه يقولون انو ازواجهم تتغير شخصيتهم بزيارتهم لاهلهم ……..

لا لا لا حبيبتي زوجج موشخصيته ضعيفه ديري بالج تحطين هالشي براسج وتتأثريت فيها وبوقت الزعل تقولنها له والله راح يكون جرح ماينبري.

المشكله ومافيها ان زوجج يحبج وعايش معاج بالطريقه اللي تريحه واللي اهو يبيها وهذا حالكم بالغربه يعني هذا شعور زوجج الحقيقي بس شنو اللي قاعد يصير لما تردون وضع حده طبيعي تدرين شنو اقدر اسميه ان زوجج يبي يمسك العصا من النص وهذا الشي والله والله صار لي موبالضبط الا بالضبط وبنفس الضروف الفرق اللي بيناتنا ان آنا بحكم حبي لزوجي وسعت صدري وعطيت طااااااااااف وزوجي كان له الدور الأكبر لما شاف ردة فعلي شرح لي الموقف علشان لا أفهم ان ضعيف شخصيه.
وبالنسبه لحماج قطعي العلاقه معاه بتاتا وصدقيني الرسول صلى الله عليه وسلم يقول (الحمو الموت ) وشكل حماج موت حمر تدرين شلون عرفت من كلمته لج ان انتي ما عرفتي تلفين ريلج والله يبي يصيد عليج شي ويقول له شفت ما قلتلك ولا تستبعدين يكون فيه تسجيل بعد لصوتج ترى المرضى النفسيين وااايد.

المهم ان بقولج تجاهلي اللي قاعد يصير لان وضع حده طبيعي خاصه ان زوجج البجر يعني لازم يحسون ان المره ما أخذته وحماج بس يتزوج والله بتغير علاقته بزوجج وتذكري كلامي وعن تجربه صاارت معاي انت واحد آنا أثنين وكلهم بس تزوجوا تغيروا اميه وثمانين درجه وردة حياتنا طبيعيه والشغلات اللي كانوا يعيبون فيها على زوجي اهم قامو يسون اعبر منها وسكبوا حق اهل زوجي الخاله والحموات والعم والكل ,, أهم شي انت تصفين نيتج والله بيرزقج من اوسع ابوابه بعدين اذا تضايقتي شويه من القاعد يصير تخيلي زوجج اخوج واللي قاعد يسوي لخالتج جن قاعد يسويه لأمج بالله علج مو راح تستانسين خلاص خلي عندج شوية ايثار والله ماراح يضيع اجرج.

أهم شي حبيبتي لا تحطين ببالج ان زوجج ضعيف شخصيه ترى الفكره هذي ممنوعه لان راح يترتب عليها كرهج له واقتناعج بالفكره ومن ثم مصارحتج له فيها حزتها تعالي داوي غلطتج والله ماراح ينساها فنصيحه لا تخربن علاقتكم على شي انتي متوهمته.
أقتنعي بهالأمور:
1-زوجي يحبني
2-زوجي يبي يطلع جدام أهله بصورة الرجل اللي مرته ما تقوده(وهذا شي يسعدني) وصارحيه بهالشغله
3-لازم تقتنعين بفكرة اذا الحريم يفتخرون ان رياييلهم ختم بأصابعهم فأنا افتخر ان زوجي تاج فوق راسي اذا حفظتيها عدل سمعيها لزوجج بمناسبه وبغير مناسبه علشان لما يسمع تحريشات هالعزوبي اخوه اللي باجر بتلعب فيه المدام لعب يتذكر كلامج ويدري ان انتي موقصدج تلعبين فيه وتسحبينه وراج.
4- تأكدي ان تأثير أخوه وقتي مرده بيزول بس لا تستعيلين ولا تغارين من اهله لأنج بتتعبين عطي طااااااف وبيي اليوم اللي يفضلج فيه على الناس كله صدقيني بس لا ياخذ فكره عنج انج بتفرقين بينه وبين اهله.
بس هذا اللي اقدر اقوووووووله

موبس زوجج شخصيته اضعيفه حتى انتي شخصيتج ضعيفه
لانج راضيه على الغلط
ويوم قالج حماج هالحجي بالمطعم جان قلتي لريلج جدامه وخيستيه بالحجي
ويوم دريتي انه بيسافر شكو خليتيه يروح وياهم؟
اصلا انتي ما حطيتي لروحج قدر وهالنوب اذا قالج ريلج لا اتييبين طاري اهلي قوليله وانت مالك شغل باهلي ورياييل خواتي ياربي مادري شقولج ريلج يبط الجبد
اشتغلي على نفسج قبل تالي ريلج

الله يعينج

الله يعينج وصراحه صجشخصيه ريلج ضعيفه وبعدين ليش لما كلمج حماج بهالاسلوب ماعلمتي ريلج او جان انتي رديتي عليه بصراحه مصخها وايد

حاوللي تكسبين ريلج بصوبج ومالج شغل في اخوة وزوجي اخوة وافتكوو منه

حبيبتي يا زوجة رجل مهم والله انتي عسل …الله لا يغير عليكم يا رب …بس والله انا مو من النوع الي اكبر المواضيع بلعكس انا وايد هاديه وابعد عن المشاكل بسبة ان ماكو شي يسوا بس كل ما اسوي اطنش يطلعولي بسالفة ثانيه يعني اخذي اليوم يا من السفر واول ما وصل كلمني بلمطار بكل شوق وحنية وانا طبعا خذيت بكلامج وقلت بطنشهم كيفهم …ما القى الا بعد ساعه من وصل دق علي معصب ويزف ..ما ادري شنو السبب بس الفرق بيني وبينج ان ريلج الله يخلبه لج صارحج وفتحلج هل موضوع بس انا لا يسوي ان عادي الوضع ومو حاس ان اذا قعد معاهم يتغير علي…الله يهديه يا رب ..ويخليلج عيالج وابوهم يا رب

مشكوره حبيبتي على مرورج …بس والله انا شخصيتي مو ضعيفه بس انا ما ابي ازيد النار حطب انا مو راعية مشاكل وهم ما ابي يصدق الكلام الي يقولونه عني والشيطان شاطر بس ومو بكيفي ما اخليه يسافر اهوا عنده كلام عمي وخالتي مسمار بلوح بلعكس انا يعجبني هل شي فيه بس مو بكل شي المشكله ان يعاملونه جنه ياهل جدامي ..وترا انا قلت حق ريلي ان حماي قالي جذي وانا ما فهمت قصده جان يضحك ويقول ايي قاعد يتقشمر معاج المشكله اي شي اهما يقولونه يا قشمره يا يضحكون معاي بس اذا انا قلت شي مو قصد التحريش يقول اهلي فوق كل شي واهلي يبون مصلحتي و وراحتي وما اعتقد يضايقونج انتي حساسه ودلوعه..تكفين شنو تبين اسوي ؟؟ تبين ادش بهوشه معاه؟؟ مو هذا الحل جان الكل حل مشاكله بلهواش واسلوب الوحده بوحده بس انا ما افكر جذي ابي حل مقنع بدون حتى ما اييب طاري اهله ولا اخوه الي عالني ومخرب حياتنا ..هذا ريلي ومو كل يوم بيكون عندي ريل يديد وهذيله اهله مابي تخترب علاقتنا في بعض اذا مو عشانهم عشان ريلي وباحر الله يرزقني بعيال ومهما كان هذيلا اهلهم…

مشكوريييييييييييييييييييييين كل من يساعدني بحل مشكلتي بس تكفون شوفولي حل معاهم والله طول ما احنا بلكويت مشاكل كل وقت مليييييييييييييييت او ياخذونه وما يردونه لي الا تالي الليل واذا اهوا مو موجود يراقبون تحركاتي مع العلم تزوجته خطبة اهل وامه الي خاطبتني مو شي ثاني ولا تزوجنا قصبن عليهم …الله يهديهم لي يا رب تكفون ادعولييييييييييييييييييييي (((