|
|
بسم الله الرحمن الرحيم
شلونكم خواتي شخباركم؟
قبل لاأبدي الموضوع كنت اسوي بحث بقوقل عن عمليات أطفال الأنابيب وبالصدفة دخلت موقعكم المحترم وقلت أبي أكتب موضوعي لعل وعسى ألقى منو يفيــدني جزاكم الله خير ومن الاسم حسيت إنه منتدى مختص بمواضيع النساء وإن شاء الله ماأضايقكم بشي و زوجتي ماتعرف تستخدم الإنترنت وقلت أبي أكتب الموضوع بدالها وأتمنى أنكم تقبلوني أخو لكم بمنتداكم الغالي..والله يرزق الكل ويعطيكم على قد نيتكم
قصتي بإختصار …
أنا شاب كويتي عمري 28 سنة تزوجت وحده من جماعتنا وعمرها بالعشرينات وصارلنا تقريباً 4 سنين متزوجين وللحين الله مارزقنا بالذرية الصالحة اللهم لا إعتراض على حكمتك والحمدالله عل كل حال.. فقررت إني أنا وزوجتي إنه نسعى بالموضوع
والله سبحانه وتعالى يقول ((إسعى ياعبد وأنا أسعى وراك))و أول شي سويته عملت تحليل بإحدى المستشفيات الخاصىة وماسويت تحليل ولامره قبل الزواج وأنا الصراحة كنت خايف بيومها لانه ماني عارف شنو فيني بالضبط( شي مجهول) فتوكلت على الله وقلت ماني خسران شي سويت التحليل وعطيته حق فني المختبر وقالي النتيجه راح تبين بعد يومين أو ثلاث وخليت رقمي عنده عشان يبشرني ….رديت البيت وأنا ناطر على أحر من الجمر وخايف من نتيجة التحليل وطول اليوم أدعي الله إنه يسهل الأمور ويعدي السالفة على خير …دق علي فني المختبر وقالي النتيجة طلعت تعال استلمها ورحت لهم وقتله ها بشر انشالله اوكي… طالعني وقالي الحيوانات المنويه وإنتوا بكرامه كله مووووت إهو كان هندي 
أنا وزوجتي قالت لي مالكم إلا الله ثم دكتور منصور العرف سمعته سابقة إسمه اللي بالجهراء لاتشوفون المخاسير اللي خسرتها الله لايخسر إن شاء الله …مابي أدخل بتفاصيل أكثر
قرر الدكتور منصور إنه لازم نسوي أطفال أنابيب بس بالأول لازمني عملية عشان يشوفون إذا فيه حيوانات منويه ولا لا
سويت العملية والحمدالله لقوا الحيوانات المنويه وإنتوا بكرامه وعندنا عينات مجمدة عندهم حق العمليات .. وأنا كنت أراجع عند دكتور مصري إسمه بلال الجمل تخصص مسالك بوليه وعطاني حبوب ومقويات بس مالقيت منهم فايده وبعدين وقفت علاجي لظروفي الخاصة… وإن شاء الله برد وبكمل وياه علاجي …وتوكلنا على الله وسوينا أول عملية طفل أنبوب بس فشلت قلت ماني مأيس سوينا الثانيه وهم ماكو فايده قلت يمكن الثالثه تكون ثابته نفس النتيجه الاولى والثانيه باءت بالفشل ..طبعا لاتشوفون زوجتي شلون إنتفخت من كثر الإبر اللي تاخذها أول ماخذيتها كان وزنها 65 والحين صار 90 طبعا لاتشوفون نفسيتها مسكينه الله يعينها شلون تعبت بس أنا كثر ماأقدر أحاول أرفع من معنوياتها وأنا نفس الشي أحاول أصبر على نفسي وأقول الله ماينسى عبده وإخواني اللي أصغر مني يولهم عيال واللي تزوجوا بعدي صار عندهم ذريه والحين لاولد ولاهم يحزنون وتمنيت يكون عندي طفل اسمع منه كلمة ماما بابا الله كريم وانا ناطر الفرج من رب العالمين ومادري يمكن الله كاتبلي بعملية وحده يصير عند زوجتي 4 أطفال للحين ماأيست من رحمة الله الواسعة وأنا كلي ثقة برب العالمين
إنه بيرزقنا بيوم من الأيام إذا مو بالدنيا بالآخره إن شاء الله…والله يرزق الجميع
عندي جم سؤال الله يخليكم:-
1-ليش ماتنجح عملية أطفال الآنابيب مع حالتي مع العلم إنه جميع الفحوصات سليمة أنا وزوجتي مافيه شي يمنع الحمل وقريت انه نسبة نجاح العمليه 30 %و فيه مراجعين من أول عملية تنجح وياهم؟ أنا لما سألت الدكتور يقولي ماكو سبب وكل شي بيد رب العالمين؟ تنصحوني أكمل عند دكتور منصور العرف ونجرب المرة الرابعة؟ زوجتي تقول نبي نغير الدكتور
2-منو أحسن دكتور متخصص بعمليات أطفال الأنابيب بالكويت؟
يا ودود يا ودود، ياذا العرش المجيد، يا مبدئ يا معيد، يا فعالاً لما
يريد، أسألك بنور وجهك الذي ملأ أركان عرشك، وأسألك بقدرتك التي قدرت
بها على جميع خلقك، وأسألك برحمتك التي وسعت كل شيء، لا إله إلا أنت،
يا مغيث أغثني،
اللهم يا سميع ياقريب ياكرريم
الهي ارزق اخي سامي وزوجته بالذريه الصالحه
اكثروا من الاستغفار واقرؤا سورة البقره كل يوووم
واهم شي الاتكال على الله
والله يرزقكم بالذريه اللي تفرح قلبكم وتسعدكم ان شاء الله
واستجابة الدعاء.
ثانيا :: اقدم شكري وامتناني لزوجتج وادعوها لصبر حتى تنول رضا الرب وثم رضا الزوج وتنول من بعده الذريه الصالحه والمعافاة وان
تتحلى بالثقه بالله سبحانه وتيقن بأنه هو الرازق والمعطي وان لاتجعل لناس منفذ لها ولحياتها مع زوجها .
ثالثا :: انصحكم أولا بطلب العلاج بالخارج وبتحديد (( بلجيكا )) وباب العلاج بالخارج مفتوح حاليا للي ماعنده عيال تتم الموافقه له على
طول بس لازم عقب الله واسطه سنعه وممكن تتصفحون موضوعي عن بلجيكا للفائده .
رابعا :: ممكن تمرون كأستشاره وتشخيص عند الدكتوره (( حفصه بوعركي )) في مستشفى رويال حياة دكتوره شاااااطره ذات شهاده
امريكيه ومارست الطب بأمريكا خمس سنوات وهي بحرينية الاصل ولكن للعلاج انصح في بلجيكا لأن مختبراتهم افضل ومطوره اكثر وذات
تقنيه عااااليه جدا
عندنا بالكويت ممكن تحصل دكتور شاطر بس نفتقد المختبرات المتطوره وخبراء الاجنه اللي فعلا خبراء مو لعبه لأن عملية الانابيب تعتمد على
خبير الاجنه والمختبر السليم اكثر لأنهم الاساس في النجاح…………………وكله بأيد رب العالمين بس جد الطب عندنا بالكويت موشي
وبالذات للعقم ما خصصوا اي مركز خاص بعلاج العقم للكويتيين ويكون حكومي .
الصراحة أنا صار عندي شك والحين تأكدت إنه الطب بالكويت موشي وإنه الدكتور غالباً مايسعى ورا المادة حسيت أنه قاعد يتاجرون بهالشغلة والله مادري شسوي أكمل العلاج بالكويت؟ أو أوقف وأقدم على الخارج إحترت والله
شكراً على المرور وجزاكم الله خير تمنياتي لكم بالتوفيق
والحالة الثانية عمي وزوجته صارلهم 10سنوات متزوجين ولاصار حمل وماخلوا مستشفى ماسووا فيه طفل انابيب ومانجحت وبالنهاية راحووا لندن وسوووا الطفل الأنابيب وماشاء الله بسرعة حملت والفاااااااال لكم يارب….
وبالنهاية حبيت اوصل لك ياخوي رسالة انه الطب بالكويت مو شي وعلى طول يتعبون نفسيتك يخلونك تكره العلاج انت توكل على
الله وقدم طلب علاج بالخارج والله يرزقكم بالذرية الصالحة……….
انا مرة ابوي سوت انابيب عند دكتوره عاليه الفضلي ونجحت العمليه وثاني شهر حمال تكرم طاحت بالحمام وفقدت البيبي
والحين بيردون يسونها مره ثانيه
بس انا عندي علاج برا احسن نفسيا ومعنويا
وان شاءالله بيتك ينترس عيال تفرح فيهم وتشوف عيالهم يارب
لا تنسي كثر من الاستغفار بنية الذريه الصالحيه
شوف هالرابط العلاج بلجيكيا
https://www.q8yat.net/showthread.php?t=165688
اولا تاخذ تحويل من المستوصف الى مستشفى الصباح قسم اطفال الانابيب
او انكم تسون نفسي انا طلبت تقرير من الدكتور منصور العرف
ووديته حق المستشفى وعطوني تحويل لوحدة الانابيب وانا طلبت منهم لجنه
وبموعد اللجنه لااااااازم الواسطه موجوده
وحالتك على طول يحولونها لجنه
والله يطعمكم الذريه يااااااااااااااااااااااارب
بالنسبه للعلاج بالخارج يقولون اللحين صارت سهله وصاروا يسفرون ناس وانت مستوفي الشروط لأنك صارلك اكثر من سنتين متزوج
ومسوي اكثر من عمليتين انابيب في خاص
اول شيء اخذ تقرير من مستشفى العرف وتروح لمبنى العلاج بالخارج الموجود في مجمع مستشفيات الصباح
وتقولهم انك تبي تقدم على العلاج بالخارج وراح يطلبون منك التقارير ويعطونك ورقه وتاخذها وتروح لمستشفى الولاده
بتلقى مكتب للعلاج بالخارج وعطهم الورقه ونفس التقارير تعطيهم بعد ( لازم تنسخ التقرير اكثر من وحده ) وراح يعطونك موعد لمقابلة اللجنه
وان شاءالله تتسهل اموركم يارب ويرزقكم بالذريه الصالحه
شوف أخوي عمليات اطفال الانابيب اذا استمريت فيها تنجح انشاء الله حاول تسوون كل ثلاث شهور …
عن حالتي سوينا انا وزوجي 9 محاولات انابيب ونجحت وحده ويبت ولدي الله يخليه لنا انشاء الله …. وزوجي سبحان الله نفس حالتك
الله يرزق الجمييييييييع
الله ياجركم ويصبركم وان شاء الله ربك قادر على كل شي …ان عجز الطب فلن يعجز الرب …. ان شاء الله تفرحون انت وزوجتك وتترسون البيت يهال اللهم آمين ويرزق كل محروم
مادري اشلون افيدك بس البنات ماشاء الله كفو ووفو