|
|
صباح الخير بنات
شلونكم مع الرطوبة؟
اسمحولي بحطلكم خبر يغث شوي..
احنا خلاص تعودنا على المغثة يعني مو شي يديد ان ننغث بأخبار من وزارتنا الحلوة المصونة
الخبر حيل طويل بس أنا بختصره بإسلوبي، والي تبي تقرا الخبر بالتفصيل تدخل هني:
https://www.alanba.com.kw/AbsoluteNMN…616&zoneid=243
خلاص الخبر، إن وزرينا المليفي يقول انه يقترح معايير لمنح أي معلم الكادر أو البونص مايلي:
1- حضوره وغيابه
2- مرضياته
3- مستوى التحصيل العلمي للطلبة ( يعني درجات الطلبة بنهاية السنة )
أوكي لحد هني مافي مشكلة… بس الي يغث عدددددل
4– خضوع المعلم لاختبارات يحصل خلالها على شهادة التميز من مركز تطوير المعلم
ليش بعد ما تردونا المدرسة مو أحسن؟ شكو اختبارات ماصدقنا تخرجنا واشتغلنا، شنو يعني ناويين علينا ولا شنو؟ يبا خلاص مابي الكادر عوع عوع مابيه انا وحدة أقولها بصوت عالي مابــــــــــــــــــــــيه ويكفيني كادر موضي..
يبون يذلون طوايف اهل الي يابونا على هالكادر! كل شوي حاطين عليه مليون قرار وقرار هذا بعد ما عطونا ياه وجذي!!! ان شالله لو كان مليون مابيه خلاص، ماكو شغل اسوي اختبارات!! عندي مليون شي اسويه بحياتي، حياتي مو قاصرة على دورات علشان كادر.. ان شالله عني ما خذيته.. شمعنا باجي الوزرات ما يسوون لهم اختبارات ولا عشان احنا معلمين يبون يقزرونها علينا!! خلاص خل يسوون اختبارات كل موظفي الدولة وساعتها بيكون عدل.. مو ناس تاخذ كادر وهي مرتاحة وحاطة ريل على ريل وناس تكرف كراف علشان تاخذه هذا بعد مو عدل!!!!!
بنات، ترا الدورات عوار راس قطيعة اذكر الكورس الي طاف دخلوني دورة تخيلي تعب المدرسة وتطلعين من المدرسة وتردين البيت وتقعدين شوي الا صار وقت الدورة وتاخذين دورة مليقة مدتها ساعتين وااااي لمدة 3 اسابيع صج كانت معاناة..
وبعدين
مو ملاحظين إن المليفي ماله كلمة؟ من أول ما استلم وتصريحاته:
أرى
أود
أقترح
يجب
كلامه كله تصريحات ومقترحات ولا ينفذ ولا شي، باين الي تحته ماسكين الوزارة ويخططون وينفذون، واهو بس واجهة للوزارة على انه وزير.. الصراحة كنت حيل مستانسة ان الوزارة مسكها ريال، قلت خلاص هانت وراح تتعدل وتتسنع الأمور لكن الي أشوفه ان الحال مكانك راوح ومافيه أي تطور وتعديل.. وكل هالسلبيات تصب في راس المعلمات والمعلمين المساكين..
3- مستوى التحصيل العلمي للطلبة ( يعني درجات الطلبة بنهاية السنة )
انزين عندنا بنات لو تمووووووت الابله وصوتها يروح اهيا ماتبي تدرس والله اشوف ماشاءالله بنات درجات كامله وبنات صفرررررر
يعني شنو ذنب الابله بهالبنت تمسكها وتطقها ؟؟
ما اقول الا الله يعينكم على هالقرارات
لو يشوفونكم صف واحد و كلمه وحده ماصار كل هذا
لا و معصومه ذاك اليوم تقول موحلوه المعلمين يضربون عشان كادر و فلوس
ياسلام بس الحلو المدرس يصير حمار كديش و هو بالع الحسره و ساكت
مو حلوه بعد الادارات تستقلنه بهطريقه عشان فلوس خيشوفون لهم فراشات و حراس غيرنه حق الاحتياطات و المناوبات و يعطونهم 30 دينار
و الله مصخت
يبه لا يعطون كادر و لا هلمذله شسالفه
وعووووووووووو بس وعووووووووووو
خيشوفون غيرهم وينوصل ل وهم ليلحين قرار على بعضه مو عارفين يحطون يا خلاف
مانبي الكادر خلوه لهم و بنفس الوقت مانبي وظيفه غير وظيفتنه و بس معلم و بس مو خمام و فراش و مندوب و عمت عين و خيخلون الكادر لهم
اففففففف شي يبط الجبد
بنات حواء2: صح لسانج والله، مال اضراب من اول يوم دوام الي اهو بعد رمضان مباشرة بس وين الي يطبق تلقين مجموعة تضرب والباجي يخافون ويداومون وماسوينا شي.. قطيعة تقطع هالكادر الزفت
هذا وانتي توج يامنال ماصارلج فتره بالتدريس
شنقول حنا اللي طفحنا وانغثينا بوزارة التربيه عشر سنين بهالوزاره التعيسه
تفهمين منو والله مايفهمون يبون يقلدون الدول الثانيه مو عارفين
من خلال تجربتي بالتربيه سنين
انا اذا غبت مرضي وكنت تعبانه لما اداوم اعوض البنات دبلات اخذ حصص اضافيه واي احتياطي لصفوفي اخذه توصل اني اشتغل خمس وست حصص باليوم يعني شنو المعلم مايمرض حمار كرف عندهم مو انسانه
ثاني شي مناطق الكويت مختلفه المدارس فيها كل منطقه ولها بيئه معينه من كثافه طلابيه من اهتمام بالدراسه يعني بالله المعلمه تروح لبيت كل طالب تدرسه وتحفظه دروسه اذا هو مايبي يدرس او تدرس هم بعض الطالبات حضور العروس والمناسبات وماهمها الدراسه الفئه الطلابيه هذي شلون نعالج ضعفهم الدراسي وهم مايبون يدرسون يعني نجحهم علشان بس نرفع المعدل ونسبة النجاح والله هالنظام فاشل
خلاص يبه مانبي كاااااااااااااااااادر بس خلونا نشتغل وظيفتنا الاساسيه ندرس الطلبه بس
اااه يامنال قلبي مترووسه من الوزاره التعيسه
وبعدين حاطين ميزانيه بالملايين على فلاشات والله العظيم حرام عليكم ياوزاره فاشله
احنا دوله غنيه والله منعم علينا غيروا نظام المباني اللي وقت الصيف نموت حر وقت الشتاء نموت برد
خلوها مباني مغلقه للفصول وخلو الساحات نوعين نوع مفتوح والثاني مغلق والتكييف مركزي خلو التعليم بيئة جاذبه
مو نطلع من غرفة المدرسات ونروح للصفوف نطلع بالشمس والحر والموت ميزانية الفلاشات واللاب توبات سويتوا فيها مدارس نموذجيه مجهزه بأحسن التجهيزات
وبعدين في كل صف لازم ينحط داتا شو للعرض وكمبيوتر مو تعطون كل طالب بتعلمونه على عدم الكتابه ومايعرف يكتب عدل وخطه فاشل
مثل ماضيعتوا الطلبه وخليتوهم يعتمدون على الآلة الحاسبه مايعرفون يضربون او يقسمون وياليتهم يعرفون يستخدمون الاله صح يطلع الجواب غلط خليتوا الطلبه اتكاليين بالعمليات الحسابيه مايعرف يقسم ويضرب ويطرح للاسف انا اتعامل مع طالبات ثانوي ماتعرف ولاهي حافظه جدول الضرب وين بتودون الطلبه وللاسف نلاحظ ان مستوى الاجيال في النازل ويقولون السبب المدرس لاوالله الا قرارتكم الفاشله على ايامي يوم كنت طالبه بالثانوي ادخل اختبار الرياضيات والفيزياء ممنوع استخدام الة حاسبه وطلعنا من اروع مايمكن شاطرين ومخنا نظيف
واللي يقهر يقولون المدرسه ماتفهم ماتقوم بدورها للاسف طالبات ثانوي والاداره بس تشركهم بأنشطه وطلعات من الحصص البنت طول اليوم اما بقسم البدنيه او الموسيقى والحصص الاساسيه ماتحضرها والاداره تجبرنا نعطيهم علامات كامله بالنشاط والدفتر والاختبار القصير واذا جاء وقت الاختبار التحريري تتشكى الطالبه عند ابوها وامها ابلتنا ماتعرف تشرح كسلانه ماافهم عليها وهالبنيه كذابه ماتحضر حصصها مو حرام جذيه للاسف وصل مستوى التعليم لهذي الدرجه واذا قلنا للاداره حرام فاتتها حصص تقول اشرحو لها وين الوقت اللي ينشرح لها وهي ماعندها وقت اضافي طول اليوم حصص وراا بعض
والله المعلمات الكويتيات الاغلبيه فيهم خير ويشرحون من قلب وبذمه وضمير بس للاسف اغلب الطلبه قلبه مو عالدراسه يبي الوناسه والطلعات من الحصه اما بأنشطه او رحلات
والله يامنال مادتي اساسيه وياما راحت حصص علي علشان الرحلات اللي كل اسبوع مطلعين البنات
يالمليفي اتقي الله بالمعلمات والمعلمين وانصفهم مو بس قرارات خياليه تحطها انزل لارض الواقع ناقش المعلمات شوف شنو ارائهم وتطلعاتهم للارتقاء بمستوى التعليم بالكويت
والكلام يطول بس خلاص تعبت من الوزاره التعيسه ماجانا منها الا المرض ديسك وجانا قولون وجانا مابقى مرض الا حاشنا
بعمري من توظفت ماجلست بحصه من حصصي من ادش الحصه الين اطلع وانا واقفه وكتابه عالسبوره
بالأخير اقولها مانبي الكادر ومانبي منكم شي
انا طالبه اتمنى اكووووووووووووون معلمه بس بعد معانتكم لا مااااابي
الله يعينكم
انا من الناس اللي مع فكره العطاء مقابل الااداء…لكن المفروض تكون المعايير منطقيه ومقبوله…المجال التربوي بالكويت كله محتاج غربله ، مايصير قرارت عشوائيه ومافيها واقعيه
اكثر فئه تنذل والعيون عليها المعلمين
بس بس قلبي يعورني
قلت الاوادم كلهم كوادرهم ياتهم من غير هادندرة شنو يعني واقفة علينا احنا
مو باين تعبنا بعيونهم
عيب هذا المعلم المفروض يصير له تقدير شوي
يعني ما نعطي البونص لاي احد الا لما تطلع روحه
يبا خلاص كافي كادر موضي اللي يقولووووون انه بينصرف في شهر 9
وعلى فكرة كل الوزارات بينزل لها زيادة الخمسين باثر رجعي بشعر 7 وبعضهم استلموا
الا التربيييييييييييييييييييييييييييييييييييييه امس كاتبين وعلى لسان المليفي بانها بتنصرف في شهر 9
عفية شهر 9 هذا اللي كودتوا كل شي فيه
ليش ما تنصرف مثل باقي الوزارت في شهر 7 او 8
والله اللي تعرف تقول لي ليش احنا من بد الوزارات هذا يدل ان مافي تنسيق
ما اقول الا الله يعينا وبس
والله يعين والله..
الحين عندج الاختبارات و الدورات …. اصعب من مستوى الطلبه ؟؟
انا رايي ان الدورات هينه …. مستوى الطلبه اهو اللي مو مقياس .. و حرام تتقيم المعلمة عليه
يعني شنو ذنب الابله اذا صفها تيمعو فيه مشاغبين او كسالى ؟؟
و هالشي تعتقدون ما راح يشجع على الدرجات المجانية و التلاعب بالنتائج ؟؟
احنا جذي و مو خالصين .. هالدور يصير التقييم عليه ؟؟
عموما ..
انا اقترح تعطون الريال فرصه يشتغل و نشوف النتايج
يعني منال و اللي يعافيج شنو تبينه يقول .. غير انا ارى و انا اود و يجب ؟؟ يقول يعني امي تسلم عليكم و تقول سوو و حطووو ؟؟ ههههههه و لا تبونه يقول قررت و اللي عاجبه يا هلا و مرحبا و اللي مو عاجبه ينتف حواجبه :d
بعدين ترا كثرة التحلطم تتعب النفسية
بسكم ضيقة خلق و زعل و تحلطم وماكو شي عاجبكم
و نوعو من وقت لوقت .. ذبحتونا بهالكادر طالبو بتعديل منهج .. طالبو بالغاء الشغل اللي ماله علاقة بالتدريس
يعني ترا الفلوس لا راح تزيد طاقة المعلمة و لا بتطول اليوم عشان يمديها مسكينه تعطي بيتها و دوامها و اهلها و عيالها و نفسها حقهم !!
و سلامتكم
والوعد قدااام
أما عن الوزير، لا والله يقدر يسوي وايد أشياء ويسكت هالأحزاب الي قاعدين يدوبرون لنا بخططهم، بس الظاهر اهو دش التربية وانصدم بالواقع المرير. واذا نسولف بس على الكادر، وسوالفنا كلها عنها مو عن شي ثاني.. ياما تكلمنا يا مشغولة بس سمعوا؟ لأ ما يسوون شي.. أقولج الزبدة يبا الوزارة يبيلها تنفيض من فوق لي تحت لووووووول .. اتمنى يتعدل هالمنهج الي اغلبه اغلاط أنا اتكلم عن منهج العربي واكيد مناهج مواد ثانية وغير الأشغال الي مو من مهنة المعلمة لكن محد يلقينا ويه
يا معودة الله كريم بس وتتعدل الاحوال.. مع ان ماظنتي كلش