أقروا المشكله وحكموا انا صح ولا غلط

السلام عليكم … بصراحة مانى عارفة شكتب ومن وين أبدى بس نفسيتى حدها تعبانه وحيل مأثره على بيتى وعى وايد

أخت زوجى الله يشافيها ويعافيها ويبعد عنكم العام طلع فيها مرض بالكبد واضطروا انهم يسافرون للعلاج بالخارج وراحت أهى وأمها ومعاهم زوجى مدة شهرين وكان بفترة دوامات .. والحمد الله رجعت بالسلامة وكل شى تمام ربى لك الحمد وقالولها لج مراجعه طبعا الحين بعد مافات سنة عالموضوع اتفاجا من زوجى أنه يقولى ان موافقتها طلعت وراح يسافرون مره ثانية…

والله بنات ما تخيلون شصار فينى يوم قالى حيييييييييييييييييل تأزمت وقلت بينى وبين نفسى برجع حق نفس المعاناة أنا دوامى بصوب وعيالى دوامهم بصوب وغير مسؤولية البيت هذا شبلحق عليه .. المهم بصراحه زعلت وتخانقت وياه وقتله أظن المره اللى طافت رحت شهرين وسكت وتحملت أنا وعيالى بما فيه الكفاية هالمره خل أحد من أخوانك يروح عالاقل أهم حريمهم مو موظفات طبعا شقال ؟؟ قال الكبير ممنوع من السفر والثانين مايتحملون المسؤوليه وبعدين محد بادر منهم وقالى عشان اقول اوكى خلاص مانى رايح .. قتله يعنى احنا قعدنا عند أهلك قدرنا نتحمل كل شى ترى يابنات زوجى صاير حق اهله أبو مو اخو لأنه ابوهم متوفى وأهو مو الكبير ، قتله مثل ما أهم يفكرون بعيالهم وما يقدرون يتركون حريمهم المفروض انت تفكر فينا احنا بعد لنا حق عليك بتهدنا بحزة الدوامات وكل واحد مدرسته بصوب شلحق عليه انا، أهم عالاقل حريمهم مو موظفات اهون من حالى .. وبصراحه قعدت أبجى لما انهرت بتقولون الموضوع ما يسوى بقولكم يوم سافر زوجى شهرين اشرايكم محد من اخوانه سال حتى عن عيالى مره وحده وقال أمر اطلعهم مع عيالى هذيل عمام بذمتكم؟؟ قلت حق زوجى أنت استحاله تسوى جذيه مع عيالهم وأهم ما قدروا فيك هالشى إنك رحت وتحملت بدالهم وفوق هذا لا سؤال عن عيالك جان محتاجين شى ولا لا؟؟ وخالتى وحماتى جنهم حاسين بالموضوع ويقولون احنا ما نرتاح إلا مع أخونا هذا اللى أهو ريلى طبعا أنا من داخلى نار محد حاس فيها لأنه زوجها مايدرى عن شى وقاط المسؤوليه على أهلها وأهم متكفلين فيها .. أنا صارلى أكثر من اسبوع ما أكلم ريلى وقتله ياليت يكون لى بحياتك اهمية وشوى تفكير مثل ما تفكر بأهلك ، بس ساعات اتعوذ من ابليس وأقول مابى أصير جذيه أخاف من ربى وأخاف يصير فينى موقف مثلها وترد على نفس السالفه محتااااااااااااااارة وتعبااااااااااااااااااانه والله يابنات شورو على قولولى شالحل ؟؟

اللة يهديك يا اختى
انا ادرى بمعاناتك وانك راح تشيلين المسؤلية برووحك
بس اختى فكرى فيها هذا مرض اللة لا يبلانا والبنت وامها مالقوا الا اخوا هذا يرتاحون معاة
وهذى ديرة غربة
والاخوان الثانيين جبناء الى ما فكروا يسافرون مع اختهم وقطوا الحمل على اخوهم
واللة يا اختى من كان فية خير لاهلة لاااااااااااازم يكون فية خير لك وحاولى تحطين نفسك مكان حماتك بمعنى لو اختك لا مح اللة
مرضت واحتاجت ترووح اكيد تبتزعلين اذا زوجتة ارفضت وحرمت اختك عن العلاج و
والمرض ما فية شماتة
واذا على المسؤلية اتفقى معاة يحط لك سايق مدة اللشهرين الى يبى يرووح فيهم وانتى طلعى عيالك
ومشيهم الحين الاخوان مو مثل بعض
وصدقينى معاناتك هذى اكيد لها تقدير واحترام عندة
واللة يشفى جمييع المسلمين

انتي غلطانه اللي مافي خير بأهله مافيه خير لج

ياقلبي اللي مافيه خير لاهله مافيه خير لج
وحرام عليج تطلع حوبة المسكينه فيج تكفين بس تحملي
قولي قبل تسافر تحط لي سايق يودي اليهال المدرسة وبس
تعوذي من الشيطان وهذي ظروف والله انشاءالله بتمر
الدنيا مو دايمه لج وانشاءالله كل وقت عصيب بيعدي لج فيه اجر
من فرج على مسلم كربه من كرب الدنيا ولا نسيتي هالحديث
استغفري ربج وهذي بس مراجعه مراح ياخذون اكثر من شهر

الله يعينج

المسؤليه كبيره ومثل موقف عمام عيالج صار فيني ومحد فيهم يتكلم والحمد الله مو محتاجتلهم والله يعافي هلي ربي يخليهم لي

بس شنو يسوي زوجج اذا رايح علاج مع اخته مو سياحه عشان تعارضين واحمدي ربج باجر عيالج يبرون فيج

ودايم حسبيها اجر

حرام عليج الصراحه ادري ان تعب عليج ومسؤليه
بس تتوقعين صح انج تتهاوشين ويازوجج عشان صحة اخته ..؟؟ والله حرام عليج خافي الله
بدال ماتشجعينه يبر بأهله لاتحرمينه الاجر بدال ماتوقفين وياه وتشجعينه وتواسينه عالتعب الي بيتعبه بهالسفره
ترى مرافق المريض يتعب اكثر من المريض .. لاتزيدين عليه انا كنت مرافق مريض وفعلا شفت المر ..
اذا اهو ينام انا ما انام .. اذا اهو بيروح مراجعه انا اللي اشيله واروح اسأل وادور واحوس فيه مني ومناك..
اذا اهو بيقعد يرتاح انا اللي اقعد اعدل وارتب وانظف واسوي الاكل واعتني فيه وبرتاحه واعطيه الادويه ..
اذا اهو تعب او طاح فجأه انا الي بشيله واعابل فيه واذا نفسيته تعبت انا الي بقعد اواسيه ويمكن ابجي اكثر منه من الظيم الي بشوفه اهناك ..
حرام عليج والله لو تدرين ريلج شنو راح يتعب جان استحيتي وماسويتي كل هاذا ..وهو قالج ان اخوانه مابادرو .. اشلن اهو ينزل من مستواه ويعرض عليهم هالشي ..؟؟ جذي راح يطلع جنه ماله خلق اخته وجنها عله على قلبها يبي يفتك منها ..
انا اقول استغفري وتعوذي من ابليس وادعي الله يسهل امور زوجج ويقوم اخته بالسلامه ..

انت قد المسؤولية وتحسبي الأمر عند ربج ومنتي بحاجتهم ، الله يرجع ابوعيالج بالسلامة وانشاء الله قومته بخته وصبرج على الأمور ربج يعطيج خير منا

ما منج غلط ابد00زوجج سوى اللي عليه وماقصر00وبما انجت متشحططه مع مدارس عيالج لج حق انج تطالبينه انه يقعد ويجابل عياله واسرته

وبعدين خوانه حتى لو ما بادرو شنو هذا المفروض كل واحد يتحمل مسؤولية شوي عن الثاني عالاقل تقدير لاخوهم اللي حل مكان ابوهم

لو زوجج يخلي واحد بس يروح راح ايتعود على شيلة المسؤوليه00مو يبي لخوانه انهم يصيرون رياجيل ويتحملونمسؤوليه يالله هذا وقتها دام حريمهم ما يداومون وقاعدين بالبيت00وبعدين اهيا اختهم مثل ما اهيا اخت ريلج

بصراحه شي يحر القلب ومالومج

صري على موقفج00

المشلكه دايم الطيب يكون اهوا الطوفه الهبيطه اللي الكل يعتمد عليه ويقطون عليه كل الالتزامات

الله يعينج الصراحه والله يشفي اخت زوجج المفروض يخلون زوجها هو يسافر معاها هو المسؤول عنها ولا يوم مريضه تخلا عنها لاحول ولاقوة إلابالله حد من الرياييل يتخلون عن حريمهم يوم يعرفون انها مريضه وتبغي حد يداريها الله يهديه

تصدقين انا مريت بهذي التجربه يوم زوجي سافر مع بنتي الله يرحمها كانوا عيالي صغار وبعيد عن اهلي واهل زوجي ولا اسوق سياره يعني اعتمادي كله ع ريلي ويوم طلع قرار انه نسفرها برع للعلاج الصراحه الكل صار فيه انهيار وتأزمنا البنت مالها علاج غير في الخارج

ونحنا مانقدر نستغنا عن ابو عيالي فوضت امري لله وقلت له لنا الله توكل وروح مع البنت ويوم وصلوا امريكا قررو لهم العلاج بيستمر سنه او اكثر ماقدرت اتحمل مسؤولية العيال والبيت وخاصه يوم اروح السوق ولاعندي شغاله في هذيج الفتره

حالتي صارت اكتأب وتوتر مايعلم فيها غير رب العالمين

صبرت وفوضت امري لله تعرفين في هذيج الفتره والله العظيم ولا واحد من اهله اتصل فيني تسأل عني ولاعن عيالي محتاجين شي ولا ناقصكم شي كان زوج اختي يمر علينا بين فتره وفتره الله يجزيه خير مع انه غريب عن عايلتنا يعني مب قريب لنا بس طلع معدنه طيب الله يوفقه في حياته

المهم صبرت ومشيت حالي وبنتي الله رحمها ماطولت غير شهرين والله استخارها يعني شوفي شهرين ولاحد سأل فينا بس الحمدلله عرفت من اللي يحبني واللي يكرهني وترهم اهل الزوج مصالح

شوفي اختي فوضي امرج لله وان قدرتي تكلمين المسؤول في الدوام عندج عن ضروفح يعني يخليج تداومين بعد ماتودين عيالج المدرسه ويخليج تطلعين بدري من الدوام حتى تلحقين ترجعين عيالج للبيت

وخلي مشاري البيت اللي تنقصكم لاخر الاسبوع هي طلعه للعيال وهي تاخذون اغراض البيت

اذا كنتي تسوقين سياره ان شااء الله بتعدي امورج ع خير ولايصير تمنعينه انه يروح مع اخته دام اخوانه خالين مسؤوليتهم خله هو ياخذ الاخر فيها وصدقيني بتكبرين في عينه وبيعرف انج تحبينه وتحبين اهله وتقدرينهم اللي تحب زوجها تحب اهله لو هم مايحبونها تحاول بقدر استطاعتها تجاملهم وان شااء الله يروح ويرد لكم بسلامه

والله يسهل امورج ان شااء الله ..

احتسبي الاجر بعد شتسوين .. راح تكبرين بعينه ..

[QUOTE=sara bent elkuwait;8154207]اللة يهديك يا اختى
انا ادرى بمعاناتك وانك راح تشيلين المسؤلية برووحك
بس اختى فكرى فيها هذا مرض اللة لا يبلانا والبنت وامها مالقوا الا اخوا هذا يرتاحون معاة
وهذى ديرة غربة
والاخوان الثانيين جبناء الى ما فكروا يسافرون مع اختهم وقطوا الحمل على اخوهم
واللة يا اختى من كان فية خير لاهلة لاااااااااااازم يكون فية خير لك وحاولى تحطين نفسك مكان حماتك بمعنى لو اختك لا مح اللة

حبيبتى مشكورة على مرورج بس هذا اللى كتبته شى من لاشى من اللى زوجه متحمله فى بيتهم حتى اخطاء اخوانه وديونه أهو متحملهم ما تخيلين شلون وبتقولين ابالغ ، وفكرة السايق فكرنا فيه بس صعب أأمن واحد ماعرفه يودى عيالى ويرده .. الله كريم

مشكور يالغاليه على ردج

مشكورة حبيبتى على الرد بس أهو حاس غنه امه واخته يبونه أهو يروح معاهم وأخوانه خبر خير حتى ما تحجوا خليها على الله

مشكورة عل الرد وماقصرتى

ماقدر اقول الا الله يعينج