أبي حل م هالمشكله الحساسه

السلام عليكم خواتي ..
حبيباتي أبي حلكم لمشكلتي مع ريلي
آنا ما أعاني مشكله منه أهو بالضبط
أعانيها مع حمولتي و بالتخصيص مع
حريم أخوانه إللي حاطات دوبهم دوبي
و آنا و الله الشاهد علي ما شافوا مني
إلا كل خير ..
بس غيرة حريم من الكشخة و الذرابه
وحياة الكلاس إللي آنا عايشه فيها
آنا والله ماأمدح بنفسي بس بالفعل كل من شافني
إنبهر من ستايلي و حتى هم في البداية كانوا يمدحون
لبسي ومع مرور الوقت تغير هالشي لغيرة عميه
و تلفيق سوالف وتفريق بيني و بيني حمواتي الثانيات
المشكله إن هالشي أثر على حياتي و على نفسيتي
و بالتالي إنعكس على حياتي الزوجية
آنا إللي قاهرني إني كل ما قلت لزوجي عن سوالفهم
قعد يهديني و بعدين بدا يجعم فيني و بعدين
إتخذ أسلوب ثاني إللي هو البيت موجود تبينه حياج الله
ما تبينه ما تشوفين شر!!!
و الله إنجرحت حيييل من كلمته و أحس إنه طاح من عيني
و من قلبي و من حياتي كلها
آنا متزوجه صغيره و كنت عايشه في بيت كله نظافه بالقلب
نظافه بالأسلوب و بالتعامل و فجأه دخلت لعالم الحموات
و الله عالم الوحوش حتى إني ديما أحلم بحيات يلحقوني
وخواتي يحلمون فيني أحلام شينه
والله تعبت نفسيتي وايد و أحس إني خلاص أبي أنفصل عنه
و أشوف مستقبلي لوين بيوديني
بالله عطوني حل…

حبيبتي مبين عليج صغيره وطالعه من بيت اهلج على نياتج علبالج كل الناس نفسج تبين نصيحتى ( حريم حموانج الغيارات الكريهات عطيهم اكبر طااااف بالدنيا ) حرام تضيعين ايام شبابج بحره وتفكير وقهر واسمحيلي حبيبتي انتي غلطانه لما تشكين لزوجج . الزوج يبي زوجته تهلي فيه تقوله كلام حلو تهيأله جو الراحه والاستقرار مو يجي من برا من تعب الدوام الى مشاكل وهذى قالت وهذي سوت بعدين لا تفكرين بالطلاق اذا بس هذى المشكله حلها بايدج حبيبتي مدام زوجج مو سكار ولا راعي حريم ولا مدمن ولا اي شب جايد حرررام تخربين على نفسج بالعكس جذى تعطينهم فرصه يتشمتون ويستانسون وانتي بتموتين قهر محد درى عنج ؟ شيلي فكره الطلاق نهائيا من راسج وشوفي زوجج من نواحي ثانيه انتي حابته فيهم . و اشتري رااااااااااحتج واكشخى والبسي ولا تحتكين فيهم حييييل وخليج رسميه لا تطيحين الميانه بعدين تنصدمين دايما خلي حدووووود وانتي بيت اهل زوجج اول واحد له اعتبارات زوجج بعدين امه وابوه داريهم وعامليهم نفس ما تعاملين امج وابوج وصدقيني ما جزاء الاحسان الا الاحسان حتى خوات زوجج اذا شفتى منهم ضرر او شي ماعجبج لا تحتكين فيهم بس انتي لا تغلطين ولا تتكلمين من وراهم واخر همج حريم الحموان بعضهم هاديهم الله تصير رفيجتج لكن الي في قلبها غيره وحقد من ناحيتج صدقينى عمرها ما راح تصفالج ولا تحاولين انتي تبادرين علشان لا تتحسفين وتنصدمين واعيد واكرر لا تحتكين فيهم واجد لان هذا ساس البلا والقيل والقال وانتي متزوجه زوجج مو حريم حموانج وحبيبتى بقا الحال من المحال ماتدرين باجر شيصير فخليج انتي الحكيمه والشاطره وترفعي عن هالامور وعندي حكمه قالتها لي رفيجتي من قبل ومن اتبعتها والله احس اني ارتحت بس ياليت تفهمينها ( ان بلاك الله بعاقه ….. من مقاريد الرفاقه …….. لا توريه الحماقه … لين ربي يقلعه ) شرايج ؟؟؟.

الله يوفقج وينولج الي في بالج ويكافيج شرهم ويصلح مابينج ومابين زوجج اللهم اجمعييييييييين وموفقه يالغاليه

مالج شغل فيها حطي حاجز بس سلام وشلونج لا اكثر ولا اقل وخليج بنفسج لا تخربين حياتج بسبتهم

عطيهم طااااااااااااااااااااااااااااااااااااااااااف
وكيديهم بالطاااااااااااااااااااااااااااااااااااااف

خلج رسميه حيل معاهم…
سلام عليكم السلام…وبس ولا تعطينهم اي فرصه انهم يطيحون الميانه معاج
وعليج بالدعاااااااااء…
والله يكون بعونج

لا تخربين حياتج عشانهم

عططييييييييييهم طاف ولا تشتكين عند ريييييلج ترا بيمل ويطفش

اي شي يضايقج بحمولتج لا طلعينه عند ريلج قولي حق خواتج او صديقاتج لان الريال ما يحب الي تشكيله عن اهله وانتي مالج شغل فيهم خلي علاقتج فيهم سطحية بس السلام كافي حق هاالاشكال . الله يوفق

حبيبتي كويتية كلاس..

لا تتسرعين ولا تاخذين قرارات تندمين عليها طول عمرج بسبة >>>حموات

انتي الداخلة هم الطالعين..خلي هذي العبارة ترن باذونج ليل ونهار بالنسبة

لحياتج مع زوجج، ما كو بيت يخلى من بلاوي الحموات وحريم الحموان

والبيوت اسرار

صدقيني ..خلج انتي الكلاس حتى في تعاملج معاهم…لا يرمى بالحجر الا

الشجر المثمر .وانتي الشجرة المثمرة اللي غزت عالمهم الهمجي..المليئ

بالحقد والحسد والغيرة..طولي بالج وشوية صبر..ولالالالالالالالالالالالالالالا

تفكرين تتركين بيتج…ولاتقولين حق زوجج عن سوالف الحريم .لا في

صالحج ولا في صالح حياتج الزوجية (كثر الدق يفج اللحام)

بمعرفتج لنفسياتهم اختاري من الاساليب اللي تشوفينها

انسب..تطنيش..حقران..رسميات…تسامح…تشيمينهم..تحا ولين تكسبين وحدة

منهم ..مثلا..وقبل هذا وذاك قولي>>افوض امري الى الله ان الله بصير

بالعبادوادعي..(يا فارج الهم كاشف الغم يا مجيب دعوة المضطرين…رحمن

الدنيا والاخرة ..ارحمني برحمة من عندك تغنيني بها عن رحمة من سواك

ادري المسألة مو هينة لكن الله يوفقج ويفرج همج ويعينج وادعو الله يسخر

لج زوجج وييسر امرج (الله آمين)

كويتية خيالية

تعوذي من ابليس يامره

لاتهدمين بيتج على سوالف حريم وغيره

خير ياطير خليهم يغارووووووون

الزم ماعليج رجلج !

حياتي لا تنقهرين منهم بس نصيحتي لا تكشخين واجد عندهم خلي لبسج مثل مستواهم عشان لا ينقهرون وخلي البس والكشخه حق زوجج لان هو الي يستاهل تكشخيله مو الحساد وخلج رسميه وياااااااهم ولاتخربين حياتج عشااااانهم

حبيباتي الكويتيات مشكوراات و الله من كل قلبي
ريحتوني و هديتوني شوي مع إن القهر لي أللحين بقلبي
و الله ينصر كل مظلوم و يوريني فيهم أيام و أيام اللهم آمين
حبيباتي (( هوى الدار / ضوى العيون / جاكليت / عروس الكون
لانا / كويتيه خياليه / حلم السنين / لازوردي / توتاي
galya / fatmasm
خالص الشكر للمرور و التفاعل و الدعاء الخالص من القلب
عسى الله يكفيكم من الحموات الشريرات!!

حبيباتي الكويتيات خالص الشكر لكن على مروركن و تفاعلكن
و الدعاء الخالص من القلب بالتوفيق لكن جميعا
و الله عن جد و عن اللغه العربيه الفصحى ريحتوني و هديتوني
مع إن القهر للحين بقلبي منهم
الله يكافيكم شر الحموات و يوريني فيهم أيام و أيام و ينصر كل مظلوم
و الله آنا مقتنعه إن دعوة المظلوم مستجابه و ما بينها و بين الله حجاب
حبيباتي (( هوى الدار / جاكليت / توتاي / لانا / كويتيه خياليه
عروس الكون / لازوردي / حلم السنين / ضوى العيون
galya / Fatmasm
الله يوفقكم وين ما لقيتم ويهكم اللهم آمين

بعد عمري مالج الا الدعاء ان الله يكفيج شر العين وشر الحاسدين وان الله يسخر لج زوجج
دايما ادعي ياقلبي عادي حريم الحموان معظمهم جذي