آخر مستجدات موضوع حبوب الphyto shape

السلام عليكم ..

قوة يا حلوات …أنا توته 79 مشاركة و عضوة جديدة بهالمنتدى الحلو.

شدني موضوع حبوب الفايتوشيب وايد , خاصة إني محتاجة شي يضعفني و ينزلني جم كيلو . أنا ما عندي وقت للرياضة بصراحة وقتي بالدوام و مع عيالي و حوستهم اسم الله عليهم . و هم ما أقدر اسوي ريجيم ما اتحمل أي نوع .( خاصة ريجيم دشتي المأساة اللي دوخني و نزل ضغطي و بغيت أموت منه )
أنا شريت حبوب الفايتوشيب من المندوب الشطي اللي قالت عنه وحدة من الاخوات( نسيت اسمها والله) يوم الاربعاء اللي فات . و استعملتهم لي اليوم . الحمدلله وايد زينين و مخليني ما اشتهي آكل و إذا كليت بسرعة اشبع و انقث , بس حاسة بدوخة بين فترة و الثانية لما يمر وقت و انا موماكلة شي ,بس تروح مجرد ما آكل شغلة أي شي بسيط( تفاحة مثلا) .
المهم . و هذا اللي ابي أوصلكم أياه. اني أمس دقيت على عيادة دكتور يوسف بوعباس ( مو عشان شي بس لأنه الدكتور الوحيد مال تغذية اللي يستقبل استفسارات عن طريق التلفون غيره مايرضى إلا بفتح ملف و زيارة العيادة) السكرتيرة أخذت مني اسم الحبوب و هل ممكن استعمالهم لإنزال الوزن بدون إحداث أي مضار على الصحة. الإجابة كانت : نعم , ممكن استعمال هاذي الحبوب للتخسيس و مالها أي مضار لأنها مكونة من الأعشاب فقط
بصراحة خواتي أنا وايد ارتحت لما سمعت هالحجي و الحين أقدر أكمل كورس الحبوب و أنا مرتاحة لأني سألت عنهم بنفسي عند دكتور متخصص . و هالدكتور ما يملك وكالة الحبوب بالكويت فهو ماراح يستفيد شي إذا سوا دعاية لها و هذا اللي خلاني مطمنة …
انشالله تستفيدون من مشاركتي ومجهودي بهالموضوع
باباي

يعطيج العافية على المعلومة صج ريحتيني وخصوصا إني ماختهم من فترة وخفت من كلام البنات بانهم يسوون سرطان في القولون.
بس الحمد لله طمنتيني

حيااااااااااااااااااااااج الله يا حلوة

مشكورة حبيبتي على الموضوع

mashkoora 7abeebty wallah 6amanteeny, el9ara7a ana wayed merta7a alaihom oo thag khilgy lama garait elta7theer bas al7een erte7t allah ya36eech el3afya oo etha3fech enshallah

الله يعافيج يا بعد قلبي
الحمدلله انج ارتحتي مثل ما انا ارتحت .
انا متعودة إني أسأل بنفسي عن أي شي ابي استخدمه خاصة إذا كان دوا أو حبوب أو فيتامين لأن الصحة أهم شي
ولا أعتمد على كلام الناس
و إذا عندج أي سؤال فأنا حاضرة

تبين الصج آنا من اليأس اللي فيني خذيتهم وآنا خايفه لول بس بنت الكويت بامريكا ريحتني حيل وقالت ودوهم وحللوهم والحين كلامج بعد وحتى طالب الشمري قال زينين ..

بس مادري ليش احس بقشعريرة بمخي !! طبعا غير الدوخه اللي مثل ماقلتي تروح بس آكل شغله بسيطة ..

بس مخوفتني سالفه القشعريرة شوي ..

بس صج مو قاعده آكل الا شغلات خفيييفه جداً .. نزلت كيلو ليلحين

عموما إنشالله خير. و الله الحافظ . و إحنا المهم سألنا عن الحبوب و ما كان الرد سلبي

توكلوا علي الرحمن واكلوهم :

قوة يا حلوات….
أنا عندي إقتراح للي تحس بالدوخة من الحبوب ( مثلي أنا إن تستعمل الحبوب 4 أيام و تريح يوم و جذيه .
أنا اليوم ريحت من الحبوب بس الله وكيلكم شربت لي عالريج شاي أعشاب ( ماكو شي ما حطيته فيه من الخرعة علشان يسد نفسي و ما أيوع و لا آكل وايد , حطيت فيه شاي أخضر +شاي البابونج بالنعناع + شاي المرامية طبعا كله مال الجمعية الأكياس الجاهزة . صار يلوع الجبد بس شربته ( كله في سبيل الرشاقة
والله كان تمام لأنه سد نفسي و أكلت شوية توست بالجبن مع الحليب .
ها إش رايكم ؟؟؟ يبييييييله؟؟

محد رد على ردي

سوري يا نجمة على التأخير في ردي عليج
أنا أمس سألت دكتورة أعرفها إن ليش هالحبوب تسبب لنا الدوخة و ساعات الصداع مع إنهم حبوب من الاعشاب بس و مافيها كيماويات . قالت لي لأنها قاعدة تأثر على خلايا المخ علشان تقلل من الشهية فشي طبيعي إنها تسبب هالدوخة و القشعريرة بس هي قالت لي إذا كانت الدوخة قوية وايد بشكل قاعد يأثر عليج لازم توقفين الحبوب يمكن لأنهم ما طايحين عليج.

ودي اجربهم بس خايفه
انا راسي مصدع على طول بدون حبوب اخاف يزيد الصداع بعدين

لأ الصداع مو حيل قوي اقدر اتحمله وبس آكل يروح

بس هاذي القشعريرة اهي اللي خوفتني تصير جنه لما ايدي تنام تتخدر نص راسي بعد مو كله :/ معه خدي اليسار بعدين تروح !! بسرعه بس ثواني

المهم آنا حاسه انه جسمي متغير شوي بس تو الناس لازم اكمل 15 يوم وانا توني مبلشه تقريبا

مشكورة حيل حبيبتي على ردج