آخر خبر بنات الجامعه دوامنا راح يصير لي الساعه 8 بالليل

«الشؤون العلمية» بالجامعة اعتمدت زيادة اليوم الدراسي حتى 8 مساءً

كتب يحيى دشتي:

علمت «الوطن» من مصادر مطلعة ان لجنة الشؤون العلمية بجامعة الكويت اعتمدت زيادة تمديد اليوم الدراسي حتى الساعة الثامنة مساء.

حيث ان آخر محاضرة في الوقت الحالي تدرس لغاية الساعة الخامسة عصرا واعتمدت اخيرا ان تمدد الدراسة لغاية الساعة الثامنة مما يوفر ساعات اضافية للطلبة في اوقات مختلفة ويتيح لهم حرية الاختيار في التسجيل اضافة الى طرح شعب دراسية اكثر.

تاريخ النشر 17/02/2009
جريده الوطن عدد اليوم

شرايكم بهالقرار التعسفي ؟
على فكره الاتحاد الوطني لطلبه الكويت اهوه كان مطالب بهالشي الكورس اللي طاف

بالنسبة لي ما يناسبني هالشي لأني أفضل الدراسة الصبح و إذا حدي حدي العصر بس..لكن أكيد في ناس لهم ظروف و ما يقدرون يدامون العصر أو الظهر و بالذات الطالبات المتزوجات و اللي عندهم عيالهم فهالقرار حلو لهم

اهلين bobo lover نورتي حبيبتي
بس صراحه انا ما اشوفه قرار مدروس بالعكس الطلبه راح يتأذون اكثر خصوصا اللي جدولهم ما يضبط و تخصصاتهم عليها ضغط مثل الاعلام و التربيه و الاداريه يعني يداوم الطالب من 8 او 9 الصبح الى 8 بالليل
انزين و اللي عنده امتحان من باجر متى يمديه يدرس ؟
و الدكاتره هل راح يطرحون كذا شعبه في النهار و بالليل خصوصا في ظل مشكله احتكار المواد
و صاجه يمكن الميزه الوحيده انها يمكن تناسب الطلبه اللي يشتغلون بالنهار او اللي عندهم ظروف
عموما هذي وجهه نظري و ناطرين آراء البنات

والله انا معاج يابيتي,, وممكن هالقرار يفيد المتزوجات..

وكل واحد ممكن يضبط جدوله اللي يحب يداوم عصر مايداوم صبح,, بس هل الدكاتره نفسهم والا في دكاتره يدد والا شالسالفه؟

هلا و غلا مرمر منوره يا قمر
لا الدكاتره نفسهم و هذي المشكله احنا من الاساس عندنا نقص بالدكاتره و مشكله احتكار الشعب الحين صار دوامين شلون راح يكون الوضع ما اتخيل صراحه

ويي وعليا بيصير ضغط عالدكاتره!!

سكتي اليوم رحت حق الدكتور جمال الزنكي بكلمه يعطيني ورقه عشان اسجل تاريخ حضاره والله كسر خاطري , يقول الكورس اللي فات فتحت شعبه ثانيه وكل شعبه فوق الستين طالب وخذيت زياده واخرتها يوولي بناات رافعين تظلم؟؟ والماده مومحتكره مومعقوله انا شعبتي 70 طالب والدكتور الثاني 50 طالب ؟؟ يعني حتى الدكاتره صار ضغط عليهم الله يعينهم

وااااي شنو لي الساعه 8 يعني البنت ترجع بيتهم بالليل والله مصخره قرار ماصخ ماعندهم سالفه ولا يراعون ضروف بعض الطلبه !!
حده وقت مو شي
انا لي الساعه 3 واقفل ابي انام لووول لي 8 متى انام متى ادرس اذا كان عندي امتحان هههههههههههه

وااي جامعتنا خربت كاسره خاطري لووول

****

مريوم انا كنت ماخذه عند جمال وصح كلامج كااان ضغط عليه لدرجه ماعطانا امتحان ميد تيرم 2 قال ماقدر عندي شعب وايد ماقدر اصلح حق الكل جزاه الله خيرر فكنا من الامتحان الثاني لووول

شفتي شلون القرار مو مدروس على اي اساس جذي بسرعه تطبقونه في قرارات اهم مثل قرار تقديم امتحان القدرات –
قرار اللي ما نقدر نسحب اذا كنا مسجلين 4 مواد – قرار النص ساعه اللي اذى الطلبه و المفروض ينشال – قرار السحب و الاضافه ما نقدر نسحب او نضيف بالنت عقب ماندوام
في قرارات واايد تحتاج تغيير ما التفتوا لها للاسف

اهلين miss*q8 نورتينا عسوله
هذي المشكله الطلبه قدراتهم متفاوته في ناس ما شاء الله عليهم عادي يصبرون لي بالليل ما عندهم مشكله بس في غيرهم ما يتحملون راح يصير جهد على الطالب و الدكتور
ههه جامعتنا الظاهرمطبقين شعار خاربه خاربه

الموضوع له اجابيات يمكن مايناسبنا بس يناسب بنات وايد غيرنا .. وبالعكس راح يفتح لنا مجال اكثر ان نسجل في المقررات وجداولنا تتضبط وبالنسبه لسالفة الامتحانات اكيييد هم مواعيدهم بتتأخر خواتي من يوم دخلوا الجامعه العلوم الطبيه لين تخرجوا واهما مايردون البيت الا 9 عندهم لاب والحمدله مشت معاهم بالنسبه لي يناسبني هالوضع…
في كليتنا اطرحوا علينا استبيان وكان في وايد طالبات موافقين .. بس اخر شي د.فهد قال بنجرب نتبع نضام ان الطالبات يكون دوامهم من 8 الصبح لي 2 الظهر فقط والطلبه من 3 لي 8 وبجذي تتساولن في المقررات المطروحه ويصير الوقت اوسع لان البيت ماتقدر تتأخر عن البيت اكثر من 2 …. الله يعينا والله اهما يحطون القوانين واحنا ننفذ .. الله المستعان

صاجه بيتي في قرارات اهم بواايد من هالقرار

اي اشوف ياربي ذيك المره بالسستم شفت محضارة وقتها من 7 لي 8 قلت اوووووف في محاضرات هالوقت!!

بس يمكن هالقرار يفيد الناس الي عندها ظرووف وماتقدر تروح الصبح..

اهلين حبوبه نورتي ماسمعت بالاستبيان انتي باي كليه حبوبه ؟ و دكتورج قصده ان الجدول يكون موحد او نمطي بحيث ان بعض طلبه يداومون الصبح و الباجي بالعصر ؟ و امين الله يعين

صج مرمر شصار على تسجيل القدرات ما كلمتي احد ؟

هلا و غلا غزل الكويت منوره عسوله
صج نزلو بالسستم ؟ ما انتبهت
ان شاء الله يفيدهم بس اتمنى ان يجربونه فتره قبل لا يقرونه كقانون فعلي