|
بنات أبيكم تشورون علي بشغلة..
تزوجت شهر 5 اللي طاف..و كنت ناوية أسوي عرس و ألبس أبيض حالي حال البنات وأدخل على هب السعد..
عقب ما ملجت قلت حق أخت زوجي اللي خطبتني إني بسوي عرس و ياريت تقوليلي عدد المعازيم بالضبط عشان أحجز القاعة و حزتها كان موسم زواج والقاعات أغلبها محجوزة..جان تقولي إحنا أهلنا وايد يعني أقل شي 300 نفر و بعدين إحنا بنسافر بعد أسبوعين ما يمدينا نتجهز و نبلغ الحريم..قتلها خلاص مو مشكلة أنطركم لما ترجعون من السفر جان تقولي لأ خلاص انا أشوفلج الفندق الفلاني ،،و أحاول أشوفلج حجز فيه على ما نرد من السفر و أخليهم يسوونلج خصم حلو،،قتلها خلاص مو مشكلة..طبعا سفرتهم تاخذ 3 أشهر يعني يرجعون على رمضان.. وعلى فكرة أهما ما سووا عشا حق ولدهم ولا شي مع إنه وحيدهم و تزوج على كبر.
سويت حق أهلي حفلة بسيطة بالبيت و الله العالم ما تهنيت فيها ولا حسيت إني عروس ولا لبست أبيض ولا دخلة ولا شي و كلش ما كانت مرتبة و يومها بنص الحفلة صار موقف و قعدت أبجي بغرفتي و أهلي برة يرقصون مستانسين..يعني والله نهائيا ما فرحت..وقلت ميخالف أعوضها بالحفلة العودة و ألبس أبيض و أكشخ و أستانس..
المهم سافروا أهل زوجي..وخلال هالفترة دقت الأخت و قالتلي خلاص بس نرد نسوي الحفلة بسرداب بيتنا..وإحنا نتكفل بكل شي..قلت أوكي مو مشكلة..
و كذا مرة أسأل زوجي أقوله شنو صار يقول خلاص فلانة تقول الحفلة اليوم الفلاني و خلاص أهيا جهزت كل شي من هناك و اتفقت مع المطعم و الدي جي و ما أدري شنو..أقوله أكيييد؟؟ على أساس أبلغ أهلي يتجهزون يقولي إي أكيد انا كلمتها خلاص قولي حق أهلج..
طبعا بهالفترة حملت..والحمدلله على كل حال..و كنت تعبانة من النساة و ناوية أقولهم خلاص كنسلوا الحفلة يعني حامل و تعبانة و ويهي مصوفر..
ردوا من السفر سألتها اشصار على الحفلة..جان تقولي والله أختي فلانة ماسكة الموضوع كله.. قطتها براس أختها الثانية اللي أصلا ما تكلمني و ما شفتها إلا مرتين بحياتي و استحيت أتكلم خلاص..عقبها أسأل زوجي جان يقول لا خلاص هونوا ما يبون حفلة!!!
طبعا بعدها بفترة عرفت إنهم يتهربون من العرس و ما يبونه لا على حسابي ولا على حسابهم..
فيه أسباب طبعا انا عارفتها زييييين..
بس حرام عليهم..يعني عشموني بحفلة و ماطلوا بالموضوع آخرتها يكسرون بخاطري.. جان قالولي..
على الأقل أسوي حفلة مثل الناس وأعيش هالليلة حالي حال أي بنت..
والله يا بنات كل ما أسمع هب السعد أبجي..كان حلم حياتي أروح الصالون و أحط مكياج و أمي و رفيجاتي معاي يجهزوني..وألبس أبيض و أدش على المعازيم بزينتي و كشختي و هيبتي..وفطومة تغني هب السعد
والله انا مو سخيفة ولا تافهة..بس يعني أحس إني انقطيت قط بهالزواج.. خذوه فغلوه..
ما عشت ولا لحظة من لحظات الفرحة هذي..ليش؟؟؟
مو بنت حالي حال البنات..ليش أنحرم من هالفرحة..ليش محد اهتم فيني..
لا عرس مثل الناس ولا حتى زوجي صاحي وعاقل ربي لك الحمد..
بنات ابي رايكم تكفون..
والله خاطري ألبس أبيض..
شنو تشورون علي!!
حلات العرس تكون ليلة الدخله والخجل مو تطلعين معاه و يصير اللي يصير وتالي تبين عرس حتى لو كان زوجج بالشرع انتي للحين ماصرتي عنده في بيته مفروض في الملجه مايصير شي لين العرس عشان هو من نفسه يتسنع ويستعجل عالعرس
حلم كل بنت تسوي عرس ماصار وتلبس البدلة البيضه
بس. اعتقد لانج حامل الكل حاس ان العرس ماله داعي
وانا بعد برايي خلاص راحت وناسة العرس
عموما احتفلي انتي وزوجج هذا كافي
روحي فندق ولبسي القميص الابيض ويكون فخم حيل وروحي صالون سوي شعرج ومكياجج
واستانسي
وللحين مسكينه كل ما صار عندنا ولا عندهم عرس تدمع عينها مع ان اهيا كانت تبي عرس واهوا اللي رافض وخواته كانوا يقولون شتبين بالعرس وكل من تكلم هذا حلو وهذا مو حلو انتي خففتي على روحج الكلام واهيا تقول كلها ليله بالعمر وماراح تتكرر
الله يسامحهم ان شاء الله
بس انا اقولج سوي نفس طريقه اختي اجرت فستان عروس وراحت الصالون وسوت شعرها وتمكيجت وحجزت على بشت لزوجها بعيد زواجهم وراحت للمصورة وسوت لها البوم كامل وكأنه عرس واستانست واشفت غليلها لوول حبيبتي
وحفله صغيره هم حلوه
انا اعرف وحده سوت عرسها واهي حامل بالرابع وماكان طالع لها بطن
سوي الحين قبل لا يكبر بطنج وتولدين
بس حتى لو عملتي زوجك ما اتوقع يبادر بحركه منه او شي منه على حسب كلامك على زوجك ، يعني ما رح تنبسطي ، وخلص مع الحمل ما اتوقع تكون الفرحه نفسها لأي وضع طبيعي .
على حال الله يهدي بالك ويناولك الخير ،
واذا بخاطرج تفرحين وتلبسين الابيض سوي حفله محفوفه على قدكم بيت اهلج ورفيجاتج
حطي استيديو وصوري ببدلتج مع ريلج واهلج وعقب بدلي وكشخي وحطي دي جي وعشا وخلي رفيجاتج يرقصون لج
بس انتي لاترقصين طبعا عشان البيبي هههههه
سويها الحين ولاتاكلين بعمرج .. ترا محد بيفرح غيرج واللي بيقول حامل ومادري شنو خل يستريح اهم شي تحتفظين بالبوم حلو تورينه عيالج وبنوتج بعدين
حضرت عرس وحده كانت حامل لها ٣ شهور وسوت حفله بالشيراتون والكل رقص وفرح لها ولبست ابيض ماخلت بخاطرها شي
انا على فكرة بطني للحين ما طلع..يعني مو مبين علي حامل..
انزين عادي لو زوجي ما يدش الصالة؟؟
والإستقبال شلون طريقته؟؟
نفس العرس؟؟ يعني أدش على دخلة و جذي و إلا عادي أظل أحوس بين المعازيم؟؟؟