|
|
السلام عليكم ورحمة الله وبركاته
اشلونكم شخباركم
ان شاء الله بخير
والله هالمنتدى امريحنا …. نشكي همومنا لبعض ونساعد بعض
وماشالله عليكم يابنات مو مقصرين مع بعض
وقبل فتره كتبت موضوع عن زوجي ومشاكلي معاه
وماشالله عليهم بنات المنتدى ماقصروا كلهم شاركوني وساعدوني واشكثر دزولي رسايل عالخاص
والحين ندخل بالموضوع ياحلوين
منو فيكم فكرت تحط كاميرا او مسجل بسيارة زوجها؟؟؟
انا ودي احط كاميرا او مسجل لتسجيل الصوت
بصراحه انا مااحب هالحركات ولا من هالنوع اللي تحب تتجس على زوجها
بس انا وبكل صراحه شاكه ان زوجي يخوني ويعاشر غيري !!! بس ابي دليل عشان اقدر اواجهه
بتقولون لي اشلون شاكه وليش؟
انا اقولكم :
المعاشره بيني وبينه تتم كل شهرين مره وحده بس !!! يعني اتحسون انه كلش ماله خلق
مع العلم احنا تونا اصغار ماتعدينا 23 سنه
وانا استعمل حبوب مانع حمل واهو يدري ان استعمل حبوب وفجأه قام يستعمل واقي !!
ليش الواقي؟ اشحقه؟ يافلان انا استخدم حبوب مانع !! انت من شنو خايف؟
وكان حاطهم بالدرج اللي يم السرير كان كرتون متروس
اليوم بطلت الدرج مالقيت ولا وحده !! ماخذهم كلهم مادري وين موديهم !!
وساعات ادق عليه وما يرد
ويطلع من الظهر ومايرجع البيت الا الفجر !!
بس انا ساكته وصابره عشان مااهدم حياتي
بس الحين يابنات صار فيني التهابات 
والله اليوم حسيت بألم رهيب صوب الرحم شفت الموت بعيوني … ولما رحت الطبيب قالت لي انتي فيج التهابات !!
كل هالقرقه هذي بس عشان اوصل لكم المعلومه واقولكم انا مااحب التجسس والفضول
بس ابي احط كاميرا او مسجل عشان اضمن صحتي وسلامتي وابي اتأكد واواجهه
منو فيكم جربت؟ ومن وين؟ واشلون ركبتوها؟ واخاف احط ويكشفني
لان اهو بعد مو هين وماينقص عليه
وعفيه اللي تقرى موضوعي على الاقل اذا ماعندها شي تقوله خل تدعي لي
وعلى قولة وحده من البنات (ياعل تنتفش كشتج اذا مارديتي)لوووووووول لا اتغشمر
ويالله وروني همتكم
ادعيليه ليل ونهار بكل صلاه ان يحببه فيج ويسخره لج ويبعد عنه بنات الحرام ويبعد بنات الحرام عنه ويبعد عنه رفقة السوء
ويقربه منج اكثر واكثر
خليه يسوي اللي يسويه وانتي وكلي امرج لله
وقولي (( حسبي الله ونعم الوكيل ))
اول شي تسلمين على الرد
والحمدلله انا على طول ادعي ربي
وما يأست من رحمة ربي
بس انا الحين وصلت لمرحلة ابي احمي نفسي !!!
فهمتي قصدي؟؟ والله انا خايفه لايصير فيني شي !!
ومشكوره على الرد والدعاء ياقلبي
اشياء تحر القلب والله
لو السالفه سالفه سوالف وتلفونات اوكي يمكن تنبلع
بس توصل للزنا والمعاشره
لحد اهني وبس
الواحد الزم ما عليه صحته
الله يهديه ويصلحه ويهدي باجي الرياييل
والله هالرياييل علل
الواحد ما ادري اشلون يرضيهم
تسلمين على الرد
والله انا مابي اهدم حياتي واكبر دليل اني صابره عليه
بس لازم اعرف لأن الوضع مو طبيعي
صرت اخاف على نفسي
هلا والله
شفتي اشلون؟؟ تجينه يمين يروح يسار وان جيتيه يسار يروحلج يمين
مااقول الا الله يبعد عنهم بنات الحرام
انا خبله حدي استحي …
بس قلت اتاكد بالأول وعقب اقوله
انتي تشوفين ان اقوله الحين احسن؟
ان شاء الله بقوله
ان مستحيل يطلع معاي اماكن عامه !!!
وامس بالغصب وبطلعة الروح راح معاي عشان نشتري جم شغله من السوق كنت بشتري لبنتي ملابس
قالي (انا مااروح مجمعات وزحمة الناس مابي) عقب قلت له خلاص نروح لاندمارك وافق بس لما راح معاي كان حاط كاب على راسه ومنزله شوي على عيونه بحيث ان محد يعرفه !!
انا هذا اللي باط جبدي
ياربي ما دري شنو فيهم هل الريياييل اذا ماتبون الحلال ليش تزوجتو
والله توني متناجره مع ريلي ولايعه جبدي من الرياييل
وقال تعالى : ولا تجسسوا
اختي الاسلام نهى عن تتبع العورات وهذا لحكمة من رب العالمين لأن شكثر بيوت راح تنهد بسبب التجسس . وغير جذي خليني معاج خطوة بخطوة سجلتي وسمعتيه يكلم وحدة بتسكتين …مستحيل بتكلمينه بيقولج جذابة وهذي اوهام بتحترين وتطلعين المسجلة … ممكن اعوذ بالله يطلقج او يطقج او يكسر المسجلة والاهم ان عمره ماراح ينسالج هالشي وبتطلعين انتي الغلطانه وبيصير بعدين كل شي اشكره جدامج
والله اعرف وحدة سوت جذي والله يشهد على تطلقت وكرهها وقالها مستحيل اردج مع انها مسجلة له وسامعته يكلمها ويشرح شلون استانس بطلعته معاها … عبالج خاف او استحى لا .. اخذ منها المسجلة وطقها وشال اغراضها قطهم برا البيت ويومين ولا داز ورقتها … والحين اهي ندمانه ومتحسفة … اختي تعوذي من ابليس واقري صورة يس وادعي ان يردلج ريلج ويبعده عن بنات الحرام … ودايما ادعيله يارب اغني زوجي بحلالك عن حرامك … والله يهديه ويسخره لج