قصتي مع الولادة بأدق التفاصيل حياكم شاركوني

السلام عليكم .. شلووووووونكم ..

كروشات وامهات وبنوووتات ..

لكم وحشة والله ..

18-3-2009م .. اهم يوم ..

خل اقووولكم .. قصة ولادتي .. لوووول ..

يوم الاثنين اللي فات .. اللي اهو فجر الثلاثااااء ..

حسيت بعوار طبعا مو بطني لووووووول لااااا .. بريووولي لانهااا وارمة مثل الكرة ..

وقامت تحرقني .. ومضايقتني حييييييل لانه كلها زلال .. وهالمرة كانت غير ..

وريلي كان دوام .. اهو شفتات وطلعته من الدوام بسبة ريولي لووول فشلة .. وكانت السلاعه وحدة بليل..

المهم رحنا دار الشفا ودخلت على دكتورة عبير .. دكتورتي نائلة مو موجودة

قللت مو مهم كلها تحليل بسووويه ..

وراويتها ريلي .. قلت لها شووفي وارمة وتحرقني حييل .. وصاير ريلي تلمع لوول مادري ليش ..

قالتلي لازم تحليل .. بس قبلها قومي اسوي لج سوووووووونار ..

قلت لا مالاداعي توني مسوية من جم يوم .. قالت اي عادي نطمن اكثر ع البيبي ..

قلت يوووووه .. المهم قمت وسويت سونار .. جااان تصدمني .. قالت لي شنو هذاا ..

الماااااي حده شوية على البيبي .. وسالتني اذا ينزل علي مااااي .. قلت لها لأ ..

قالت مايصير جذي الماي يكون قليل بهالدرجة .. عاد ريلي نقز من الفرحة يقولها يعني راح تولد << متفرغ والله..

وانا اخزة .. لوووول

المهم قامت وقااااست ضغطي .. ولا اووووووف مرتفع .. جان تقولي انتي شنو كل هذا فيج ..

وانا شوي وابجي .. وحاطة في بالي هذا حجي دكااترة وشوي وراح ارد شقتي ..

قالت لي قومي سوي تخطيط بشوووف طلقج .. قلت انا لا صااااااااااااارت .. امبي

باقي على موعدي 9 ايام .. وانا ماكو الدمعه على طرف عيني .. واللي يقهر ريلي حدة متشقق .. << واناي اتحلطم بقلبي لووول

وشربت عصير كوكتيل ورحنا للتخطيط .. وانا قاعدة اسولف ويا ريلي والجهاز علي .. ولا ادري شنو السالفة ..
بعد 45 دقيقة يتلي الدكتورة تشوف التخطيط .. يؤ يؤ .. قالت لي فيج طلق << هذا اللي بتذبحني لووول كله مصرعتني ..

وانا مازلت عبالي حجي دكاااااترة وتخرع .. وقالت لي روحي سوي تحليل << ذبحووووووووني نزلت 30 كيلو من التطرش خخخخخخ ..

وخلصنا التحليل وديتلها اياه .. واهي تحوووس وماسكة تلفونها .. قلت لها هاا خلاص في شي ولا اروووح ..
ولا تقولي على وين حبيبتي انتي دخووول مستشفى على طووول <<< وقف قلبي وقتها .. جد قمت اتصرقع ..
قالت لي الماي شوية وضغطتج مرتفع وجمسمج امتفخ وغير هذا فيج طلق وانتي ولا حااااااااااسة << امبي كان الوضع عادي ..
والمشكلة اهي ماااسكة التلفووون ودق على دكاااترة.. واستشاريين .. وقلبي صااااااااار طقاقة ..
ولا تكلم استشاري اسمة زكريا .. وقالت له عن حااااالتي .. وانا واقفة يمها انطر الرحمة لوووووول ..

وقالها شوفي رحمها مبطل .. ياااااااااااااااااي سوت لي فحص داخلي .. امبببببببي تحطيم .. يذبح ..
وطلع الرحم حده مصكر

جان يقولها باااااجر من الصبح تيني على عيادتي .. دوامه 8 الصبح .. ووقتها كانت الساعه اربع .. يعني بعد 4 ساعات
قال لازم لازم اشوفها .. << ياويلي من الخرعه قمت ارجف والله

والمشكلة .. كانت الدكتورة كل شوي تقولي كل شي يهووون عشان صحة ولدج .. يعني لازم تولدين .. سواء قيصررية
او طبيعي <<< قااااااااااااااااااااعدة تمهدلي الطريج على الولادة القيصرية امبيييييييية .. وربي الله لا وريكم شعوري
انا رايحة حق عوار بريلي .. طلعت لازم اولد وقيصرية بعد .. تقولي مزين كل هذا على قلب الياهل
وكل هذا لصحتكم انتو الاثنين .. وطبعا راح نحاول نولدج طبيعي << املها كان ضعيف ..

صارت حالتي زييييرو وقلت الحمدلله على كل حااااال .. قلت حق ريلي امش ونيي الصبح .. انا بس طلعت من المستشفى
استانست قلت واااااااي اشوا مو الحين ببدي بالمعاناة ..

ورديت الشقة قلت خل انام .. نطرت الصلاة صليت وبنام ساعه او ساعتين .. وربي وقتها مو قاعده تغفي عيني
وصار فيني اعصاااب وتهاوشت ويا ريلي << لووووول مادري شنو ذنبة ..

وقمت ازهب جنطتي .. انا مزهبتها من قبل بس قمت احووس فيها .. مادري من التوتر ..

ونطررنا الساعه 9 ورحت للدكتووووووووور .. ودخلوني على طوول << طلعووو ناطريني خخخخخخ حسيت اني مهمة

وسوالي القصة اللي امس كلها .. عشان يتأكد من كلام الدكتووورة وبما انه اهو استشاري فأفهم بهالمواضيع ..
قالي اي صح كل كلمها مضبوووووووووووط ولازم الحين تسوين دخوول << امبييه
قلت لها مايصير بعد جم يوم .. قال لأ اذا بنطر عليييج حدج لي العصر او بليل .. ماكو غيرهم ..

قاللي فكري وتعالي قوليلي قبل الساعه 3 .. وقبلها شربي خرووع يمكن يفيد وياج بالطلق ويفتح رحمج ..
وكانت الساعه 10 ونص ..
قلت حق ريلي امش نتريق واشتري خروع واشربة مع عصير ..ورحنا مطعهم كويتانا اللي بالسرة .. وشريت حلوم
وعصير فراولة وصبيت فيه الخروع .. شريناه من الصيدلية .. حطيت 3 قفاااش .. وشربته
ياربي ثقييييييل ..
رديت الشقة بعدها ..

قلت بريح قبل الساعه 3 << نفسيتي طبعا زيروووووو كلها اعصاااااب واتخرع .. وتخيلو انا وريلي نسوي
كل هذا بالخشيش ومانقول حق احد .. عشان لايحاتون ..

وانا توني قلت بريح ساااعه شوي .. ولا وانتو بكرامة كل اللي اختة طلعتة .. ترجيع وحالة ..
وعوار بطن .. مااااااااانفع وياي الخرووع .. ذبحني

بعدين لبست وردينا المستشفى .. ورحت للدكتووور .. قالي لأ يعني مانفع وياج .. خلينا نشوفلج حلووول ..
ثانية .. وقالي روحي الحين سوي دخووول .. وانا راح اييلج بالغرفة …

وتوكلت على الله .. ورحنا نسوي الدخووول للمستشفى .. وااللي صاااار انه ماكو غرف فاضية لوووووول وناااااااسة

قلت له ماكو غرف يعني شسوي اقعد بالممر .. طبعا تشققت قلت هية بنطر بعد ؛ اهو وناسة ومو وناسة الصراحة .. لاني التفكير موووووشي .. المهم .. ودقو على الدكتووور تعال شوف المشكلة .. مافي غرفها لها << كاااان كله فوووول .. شدعوا عاد .. وانا استانست قلت خلاص نيي مرة الثانية
ولا يقولي الدكتووور على وين .. كلها ساعتين وفيه وحدة بتسوي جيك اوووت .. روحو ساعتين وتعالووو
يالله .. << احس تعذيب حااااااااااااالتي ..

ورحنا .. قالي ريلي يوعان امشي نتغدا برااا << وانا ابجي قلت ايييه اخر غدا بروحنا باجر الولد راح يقيدنا قوووم نستااانس
<< وادري بقلبة يقووول عني حمدلله والشكر
ورحنا تغدينا في مغل محل << طالعو المكان لانه الاخ فصل علي ابي اكل عيش ..: لووول

تغدينا وساعتين موراااااااااضين يمشوووون .. امبيه خرعه ..
وفجأة تذكرت شي .. انا ماحفيت ويهي لووووووووووووووووووووووول .. قلت له ابي صالون وقتها كنا نتمشى على البحر وقالي ليش قلت له بسوي بدكير منكير ..<< استحي اقول بحف هههههههه .. وقالي انا بعد ابي حلاق
لووول تحسوون متفرغين ..

ورحنا السالمية .. لقينا حلاق وصالون يم بعض .. وخلصنا وردحنا المستشفى .. ولا امي تدق علي
تقولي هااا وينج ماتبينين اليوم .. قلتها طالعه مع ريلي نقزززززز << مابي اقولها الا لما اولد اهي صاااحبة ضغط
والخرعه والماحتات مو زينه لها .. قلت حق ريلي لما يدخولني ولادة .. تدق عليها مابي تتأثر ..

طبعا انا كااااااااااسرة خاطر عمري .. مادري ليش لوووول ..

وردحنا دار الشفا الا ناطريني .. خخخخخخخخ ومزهبين الغرفة .. ودخلنا الساعه ست المغرب ..
انا وريلي .. مادري استانست عبالي داشة فندق لووول .. قلت روح ييب حب وجاااي من تحت << فرااااااغة ياناس
لانه دخلوني وخلوني جذي ساعه ونص بروحنا .. وكانت الغرفة تونس .. فنسيت كل شي لوووووووول ..

ريلي نزل جنطتي من السيارة .. ويابها لي وانا قعدت احط الاغراض بالكبت واعلق واصفط هدوم البيبي .. << عبالها ساكنة بيت يديد الاخت ..

وقعدت بعدها ادعي واقرا سووورة مريم والمعوذااات والكرسي .. وسبحان الله .. هديت ورضيت بالواقع ..
قلت ولدي وصحتة اهم من عوار يوم او يومين .. وبعدها بساااعه يولي سحبو دم مني وركبو جهاز التخطيط
وانطر وانطر وانطر .. تكسر ظهري من النومة جذي لا حركة ولا شي .. ريلي قالي برد الشقة اييب الاب توب
واغراض لي وارجع .. قلت اوووكي .. يتلي دكتووورة الساعه 9 قالت لي بفحصج .. ياااااااااااااااااربي .. امبي حيييل
يعوووور .. وفحصتني .. وتقولي الرحم حييييييييييل مصكر لازم طلق صنااااعي .. وحطتلي تحميلة ؟ عذاااب ..

وقالت بعد اربع ساعات ايي اشوووووف وضعج .. واشوف التخطيط زاد الطلق او انفتحتي شي
واذا لأ بزيد لج تحميلة الطلق .. لاحول ولا قوة الا بالله ..

رجع ريلي ويايب الاب تووووب .. قلت ابييييييه . محتاجة شوي .. وقتها اذا احد يذكر .. دشيت
المنتدى وحطيت موضوووووووع لكم .. كنت جد محتاجة وقفات خواتي من بعد الله ..
لانه كل تلمحياتهم لي اني اولد قيصرية وانا هالشي مااااااااااااااابية ..

وماشاء الله خواتي وحبااايبي ما قصرووو بدعوااتهم الطيبة للي .. يزاهم الله كل خييييييييير وبركة يااااااااارب ..
ربي يوفقهم يااارب .. وهذا اهو الموضوووووووع ..
https://www.q8yat.net/showthread.php?t=330242

وبعدها ياني دكتووووووووور.. حسين شميسان خوووش ودكتوور كنت اراجع عنده اهو نائلة ..
بس قالي تعالي افحصج .. امبييييييييييييييييييه فشلة لووول .. وريلي وقتها بساااااااابع نومة ..
لانه طولو صارهم 7 ساعات وتخطيط علي .. قلت لأ اخااااااااف

قال لا تخافين .. شوي بس .. امبي ورضضضيت .. وقالي مو تصرخين بعدين ريلي يصحى .. قلت انزين << خير ياعمي .. اهو سوا الفحص ولا انا ماااااااااكو صراااخ << ومابي ريلي يقوم يشوفني فشلة لووول
قولووووووو قاااااااااااااااام حشىى ولا تحرك .. خخخخخخ ولا يقولي الكتور واهو مستغرب ؟؟
ريلج نووومة كل مرة جذي .. << ماشاء الله .. قلت ايه عادي ..

جان يحطلي طلق صناعي مرة الثانية .. قال اذا مانفع لازم نطر لشي ثاني .. لازم تنفتحين .. انتي الرحم عندج مصكر ..
والماي شيو نخاف على نبض البيبي .. يقل .. << تمهيد للقيصرية ..

كانت الساعه وقتها 1 .. وقالي اييج بعد اربع ساعات واشوووف .. قلت على خير .. وحاااولت اغفي .. ماقدرت الا على ساعه الا ربع .. عاد تخيلووووووو من يومين مو نايمة .. وراي رحلة طوييييييلة بالولادة ..

بعدين ناديته اللستر تعالي شيلية بصلي اذن الفير .. المهم شاالته .. وصليت .. وقعدت ريلي ..
ماكو الا شوي يالي الدكتووووور ..قالي بفحصج اشوف تبطل الرحم .. تعبت من هالفحص يذبح

وقتها رييلي كان قاااعد .. << احس مو عااااااجبة لووول بس بالعها وساكت
واللي يقووولي الحمدلله انفحتي شوي .. وانا ادري انه اهو وسعني .. لانه كان الم مو طبيعي قلت يلا الحمدلله
بأذن الله طبيعي اولد

بس والله يابناااااااااااااات الله لا يوريكم عوووااار الطلق الصنااااااعي .. موطبيعي ..
وراح الدكتور .. وبعدا اشششششششيل واشدخ بالسرير من العوااااااااااار .. امبيية يذبح ..

والساعه ست وربع يالي دكتور زكريا .. وقالي بفحصج يووووووووووووووووووووووووه بعد .. ذبحتوني
وفحصني قالي 3 ونص .. واااااااااااااااااو .. الحمدلله لك ياااااااااااااارب هذا املي ..

قلت له دكتووووووور وربي عوااار خيالي مايصير جذي .. قالي تبين تقعدين ساعتين بالغرفة مع ريليج
ولا تبين اوديج غرفة الولادة .. بكل الحالات بننطر عليج بعد .. قلت صاااااااااااااااااااااارت قلت على طووول
لا ابي ريلي مابي مابي خلاص .. اهو طلع من صووووووووووب .. جان اصارخ من العوار .. قال ريلي
روحي نزلي ماعليج مني .. يمكن هناك يعطووونج شي .. وبسرعه راح ركض يلحق ع الدكتور
قال له وايد تتألم .. شنو الحل نزلوها يمكن اريح .. قاله اي خل تاخذ كمام وتنسى العوار شوي ..

قاله اي اي اهم شي لا تتحس جذي .. ونزلوني .. تحت .. حسيت بالخوف ونفس الوقت نهاية هالمعاناة ..
بس بجيت لانه ريلي مو معاااااااي .. ودوني غرفة .. ولادة وبعدين طلعوني لغرفة ثانية .. قالو هذي اسبشل
دام الدكتور زكريا يولدها .. وحطوووني بغرفة .. فيها ورق جدران وصاله وحمام ومكتب .. وتلفزيون .. << لووووول
حسيت اني مهمة .. بس وربي عنااااااااااااايتهم روووعه .. مايخلون الواحد أبــــد ..

وعطوني كمام قالولي شميه .. وانا اشمة بس مافيه فايدة عوااااااااااار قوي قوي .. اقولها عوار ما اقدر
شفيكم ولدوني خلاص تعذبت .. قالت لي شمي حييييييل .. انتي ماتعرفين تشمين حييل .. هذي سستر هندية يحليلها
ماخلتني كلش .. وانا كل 5 دقاااااااااااااايق اصارخ .. جان تيني وتحط الكمام على ويهي وتضغط جنها قاعده تخنقني
لووول وانا اتحرك حيييل وربي احسها تذبحني .. بس قاعده اتنفس حيييييييل واشم .. ولا طلع لازم اشفط الكمام شفط
موبس شم جذي خخخخخخخخخخخخ

ثواني الا اسمعها تقول هااا ماما فيه شي <<< اسمع صدى الصوت مليون مرة .. حسيت اني بغيب عن الوعي
قلت لها ابي تلفووووووون عفية <<< فراااغه الاخت .. وعطيتها رقم ريلي ..
وكلمته قلت روح ارتاح شوي شكلي راح اطول 6 ساعات انت روح اتسبح وغير وتعال <<< الاخت تألف على سالفة 6 ساعات ..

قالي اوكي .. ومسكين ولا رااااااااااح قاعدة ينطر براا .. واهو بلغ امي واهلي وامة .. وصاااهم يدعولي ..
وامي من الخرعه .. مسكينة دقاايق الا اهي عندي .. وقامت تحن على راااااسهم بشوف بنتي .. يقولون لها
لا ما يصير .. ومن الحنة كل شوي يدخلونها عندي .. وانا اطالعها وابجي واهي تبجي .. وانا احس اني اهلوس من
الكمام .. طبعا انا نزلوني ولادة الساعه 6 ونص والحين الساعه 9 ونص وانا انطر .. والله كل شوي يسون لي فحص داخلي
يشوفون شكثر وقتها كنت مفتووحة 5 ونص .. بس الكمام كان يخليني اهلوس لكن العوار موجود .. احس فيه حيييييل ..
و اسمع اصوات وايد وصدى الدكااااااترة والسستراااات ..حتى فية غرفة شوي قريبة مني .. وحدة ولدت .. عاد صوت
الياهل قاعد يبجي .. وان بس اسمع صدى جان انادي السستر اقووووولها هني في قطوة ترا اخاف منها .. جان تقول
لاااااا هذا بيبي صغير انولد << خخخخخخخخخخخ ..

والعواااااااار ماكووووووووووووو فكة منه .. وفجأة مادري شلوون .. فكرت .. جان اقولهم ابي الدكتوووووور الحين
واهو كل شوي ايي يشوف ويطل علي ويروح .. ينطروني انفتح 10 سم .. قالت لي السستر بعدين ايي ..
قلت لااااااااااااااااااااااااااا ابي ابرة ظهر .. اهي استغربت قالت اكيد يبي .. قلت لها اي خلااااااااص ما قدر ما قدر كلش ..الكمام ما يسوي شي .. والله جد تعب احس بكل شي ..
ودق الدكتور بعدين على الغرفة وكلمني قالي طلبيتي الابرة .. قلت ايييه ابيها .. قال اكيد قلت ايه .. وراحو خذوو موافقة ريلي
قالهم اي شي تبي عطووووووها .. ووقعووه على اوراق .. بعدها يالي دكتور متخصص بهالشي ..وقعدوني وعطوني اياها
امبي الابره شكلها يخرع حده .. كبيرة حيييييييييييل ..

تصدقوووووووون بعدين وربي ماجنة فيني شي .. قاعده اسوووووولف مع السسترات ..جنة مافيني شي ..
فضيييييعه الابرة .. تحسفت ليش ما اخذتها من قبل .. حرام هالمعاناة اللي عشتها .. واخر شي خذيتها ..
والحلو فيها بنات .. اني متخدرة بكل شي .. الا بطني وتحت .. يعني ارتحت لاني راح احس بالولادة واقدر
اساااعدهم .. وحمدت ربي لاني خلاااااااااااص ماكو قيصرية .. الف الف حمدلله..

والساعه 12 ونص يالي الدكتور وفحصني .. قالي هاااااانت 8 ونص .. الحمدلله استااااااااااااااانست حيييل ..
قالي ولادتج قربت .. بس على اني ما احس بعد الابرة بعوار الا انه تحسين بداخلج انج هلكانه وشايلة حمل فيج ..

ويحليلها اللسستر اللي ماخلتني .. اسمها ياسمين .. طبعا كلت زف مني وانا اهلوووس لووول ..
من كثر ماسووولي فحص داخلي .. قامت اهي بعد تسوي لي لووووووووووووووووووول وربي انا منصدمة ..
خخخخخخخخخ على مستغربة .. بس خليتها اهووو بقى احد .. مو ناقص الا مدير المستشفى بعد ..

ويحليلها تقولي جم انفتحت .. ويطلع والله كلامها صح .. لما الدكتور ايي يجيك .. يطلع نفس كلامها ههههههههه
ع الساعه 2 الا ربع .. سووت لي ولا تقولي ماما انا اشوف شعر راس البيبي في داخل رحم يعني بينزل بعد شوي ..
ونادت الدكتوووووووور .. وبالفعل قال . بدا ينزل البيبي حضري عمرج .. وقالي انتي ماراح تحسين بالطلق
بس اذا يبس بطنج ضغطي .. وقمت احط ايدي على بطني بس ايبس اضغط .. قاالي يلا قرب ..
وراح لبس لبس عمليات .. وانا قاعدة اضغط بروحي كل ما يبس بطني . ويالي قال شدي وانا اشد حييييييييل .. وحسيت بحرارة وشي زلق ..

وله .. ولدي حياااااااااااااااتي حشاشة يوووووووفي طلع ماشاء الله .. لا اله الا الله ..
حطوه علي .. بسته وشالوووه يودووونه لأبووووه يأذن بأذنة ..

ياربي احلىىىىىىىىى شعور هذا اللي صااار .. حسيت هانت وقتها كل تعبي .. ربي لاتحرم كل محرومة وترزقها يااااااارب .. و ترزقهم يااااااااااااكريم ,,

وطلعوني من العمليات الساعه اربع .. بعد ما ولدت على خير وسلامة ..

وكانت ولادة طبيعية لله الحمد مو قيصرية .. بفضل الله ووقفات خواتي ودعوات اهلي ..

اللهم لك الحمد والشكر ..

وادري طولت عليكم .. حيييييييييييل مو شوي .. بس حبيت تعيشون وياي كل لحظة عشتها ..
صج كانت صعبة .. بس احس الحين انه لها لذه .. وسبحان الله على كل شي ..