شلون ارد الثقه بزوجى الملتزم ؟؟!!

اللى قروا قصتى قبل فتره زوجى الملتزم والتغير اللى صار فيه باختصار قلت انه 3 شهور ينام بروحه بغرفه ثانيه ودايم فى البيت ما كنت اشك فيه ابد بس حيرني شلون ما قرب لي 3 شهور اخر شي طحت عليه يكلم وحده متزوجه وعندها عيال وواجهته وحلف لي انه غلط وكان هذا ابتلاء من الله سبحانه وتعالى على قوله طبعا وانه محسود !!!

المهم ما قام ياخذ تلفونه بالمره يروح ويطلع يخليه عندى لما قلت له التلفون مو اللى بيمنعك من الخرابيط تقدر تخليه عندى ومعاك خط ثاني قال شلون اثبت لك اني رجعت لله بعد الغلطه ((( لو ما صدته ما اعتقد انه بتوب بكمل معاها ))) ما ني قادره انسى رسايلها اللى بجهازه ولا قادره انسي شلون ريال ملتحي ومقصر الدشداشه وكل ما تكلم قال هذا حرام وهذا ما يجوز واذا قلت له انت شفيك بالليل تلفونك بيدك قال متى قلت له الساعه 4 الفير شفتك انا كأنك تكتب رساله هذا طبعا قبل ما اصيده قال ((( الثقه لازم تكون بين الازواج بعدين انا ريال اخاف الله ومربي اللحيه ومصر الدشداشه حق شنو يا مره نبي رضى الله علينا !!!! ))) واصدقه واقول كلامه ميه ميه ليش انا اشك فيه يمكن صح يشوف الساعه على قولته واخر شي اكتشف الطامه الكبرى 0000 ابي ارد الثقه بينى وبينه مو قادره من يطلع اقول يلا راح يكلمها راح يخربط الملتزم ولما يرد يحس من تعابير ويهي كل يوم يقول لي شنو تبين اسوي عشان اثبت لج انها غلطه وماراح تتكرر احس ماني قارده كل اتذكر كلامه والثقه اللى عطيته وشلون صدمني حلف على القرآن انه ماراح يكلم احد ولا يخربط ابد ولا يخز بالحريم اذا رحنا اى مكان عام اللى خلاني اكتب الموضوع امس رحت معاه السوق قلت بشوفه من بعيد يخز بالحريم والله يا خواتي انه نفس طبعه قبل اسوي نفسى مو منتبه له يطالع من تحت لى تحت ما تنزل عينه عن الحريم سواء بياعه او اجنبيه او عربيه ولما يحس فيني ينزل راسه عباله ما شفته شلون يبينى ارد الثقه فيه صج لي قالوا ابو طبيع ما يخلي طبعه !!! شلون احسسه انه ما تغير بنفس اللحظه من غير ما تكلم معاه لانى اذا قلت له قال والله ما لي شغل باحد انا ريال كبير وملتحي ما اطالع احد !!! حيرني هالريال فوق هذا كله يبينى اثق فيه يقولي ليش ويهج معفوس ما تضحكين ولا تسولفين معاى 00 صج انه ممثل ؟؟

ابي ارد الثقه فيه مو قادره تعبت من هالشغله مهما يسوي احس الثقه معدومه والله المستعان

اح موقفج قوي!! مادري شقولج والله شي يحر القلب عسى الله يعينج

اول شي لازم تحمدين ربج انج عرفتي عن علاقته و ادعي من الله ان يغفرله و يهديه ادعيله وايد لانه ذنبه عظيم

ثاني شي حاولي تعطينه فرصه لا تتصيدينله وايد انتي راح تتعبين جذي يعني مثلا اذا طلعتوا مع بعض لا تركزين عليه وايد

وعلى حركة عينه لان احيانا تكون حركات لا اراديه مثلا اذا طلعت و شفت واحد لابس لون فاقع لا ايراديا راح اطالعه واذا

شفت واحد كشته كبيره لا ايراديا راح اطالعه و احيانا اكون سرحانه مو معناته اني معجبه او شي لا فلا تعبين روحج و تدققين على

عينه وايد ادري هالشي صعب و يمكن نظرتج له تغيرت و قمتي تراقبينه جذي لانج عرفتي انه غلط و خايفه يغلط مره ثانيه

عشان تكملين حياتج لازم تنسين لازم تعرفين انج الاولى لازم تعرفين ان مرده لج لازم تعرفين قدرج و مكانتج لازم تعرفين انها غلطه

عشان تردين الثقه تحتاجين الى وقت لا تذكرينه بغلطه كل شوي و تعايرينه لا بس تكلمي معاه وايد ساليه ليش سويت جذي

شنو محتاج سئليه اساله مثلا احنا ليش عايشين في هالدنيا مردنا وين ؟ حسسيه بالذنب لكن لا تعصبين عليه عرفتي

ادري هالشي صعب انج تغضين النظر عن غلطه مثل هذي لكن تاكدي ان لج اجر عظيم على صبرج

حسسيه ان الزواج امان و استقرار و اطمئنان تكلمي معاه وايد قوليله ليش الزواج نص الدين ؟

حق منو انا اطبخ و اغسل و اتعب و اربي ؟ عاتبيه بس مو باعصاب

كبري عقلج وانتي تتعاملين معاه كوني انتي بمنتهى النضج كلميه عن الله و العقاب و الثواب هذا الي احس ممكن ياثر فيه

خليه يحبج مو كزوجه بس خليه يحب ايمانج و شفافيتج نسيه غيرج مو بملاحقة عيونه و انج تاخذين تلفونه

لان مثل ما قلتي اذا بسوي شي غلط يقدر طهري قلبه خليه ابيض خليه مؤمن خليه ملتزم من قلب غيريه

الله يهدي زوجج و يصبر قلبج و يطمن بالج انشاء الله

صراحه الله يعينج زوجج ملتزم ويغازل والله قويه

الثقه ان شاءالله ترجع مع الايام

بس انتي صبري وادعي ربج يسخره لج ومايطالع غيرج

المسألة كلها مسألة وقت

الله يصلح حالكم ان شاءالله

والله يا اختى احس مغثوثه من اشوفه بس ابي احاول ارد الثقه شلون ما اقدر حاولت مو بايدى ؟؟؟

يا طول صبرى الله اللى يعلم 3 شهور وانا ساكته واقول يمكن يتوب وكل ما شفت رساله مسحتها من غير ما يحس اهو بعد ما اكتشفت الخيانه 00 شلون اخليه يتخلص من الطبع هذا مو حلوه بحقى احنا كلنا حريم ونعرف شلون لما تمشين مع ريلج بمكان عام وخصوصا انه مربي لحيه لي صدره وعيونه يمين ويسار حتى الحريم اللى يخزهم لهم نظره فيه جاوبينى اذا ممكن لو انتى تمشين فى مكان عام وريال ملتزم مربي لحيه مقصر دشداشه يخز فيج وزوجته معاه شنو راح تفسرين الموقف وخصوصا انه ما ينزل عينه من المره لما تروح اهي وتيي غيرها ويخز ؟؟؟!!!

الله يريحج انى والبنات اللى خففوا من همي بس ي اختى كل ما بغيت انسى تصرفاته احس مو ملتزم بالمره اذا على الخز ارادي مو ارادي ليش ما يخز الريايل والله عمره ما خز ريال كل بنات وحريم حتى ينسى ساعات مثال اقولج يقول الله شوفى شطول هذى ينسى بعدين يرد لوعيه اربعه وعشرين ساعه مجابل الممثلات بالتلفزيون والله ما فيه وحده ما يعرف قصة حياتها اهو مو صغير عمره 42 سنه اللى بموتنى قهر ومو مخلينى انسى وارد الثقه انه مو ملتزم ليش مربي اللحيه ليش عند الناس معروف باخلاقه العاليه وانا طايحه على اردى افعاله شلون ارد الثقه فيه تعبت والله منه مهما يقول ما اصدقه بالمره احاول بس ما اقدر احس انه مراوغ شاطر باللف والدوران

الله يسمع منج وانسى مع الوقت كل ما بغيت انسى تذكرت صوتها لما قلت لها انتى تكلمين ريال متزوج وانتى متزوجه ما خفتى الله بزوجك وعيالك وخربتي بيت عايله ثانيه قالت زوجك هو اللى يلاحقنى من مكان لى مكان روحى مسكيه واذا مو مصدقه اقرى رسايله فى موبايلي شلون انسى لما قالت لي هذا مو ملتزم هذا متستر ورى الدين وانا بشوف مايته قلت لها يعنى بخوفها راح اوصل لزوجك واقوله كل شي والله ما خافت قالت زين قلتى لي عشان امهد لزوجى انى ريلج مأذيني لما قلت لزوجى كلامها ويهه قام يقط الوان يقول هذى مو محترمه قلت له الحين صارت مو محترمه بعد ما طلعت سوالفك كل واحد فيهم قام يطلع عيوب الثاني شلون ارد الثقه فيه مهما يسوى لي احس مخنوقه منه الله يصبرني

كم فرق سنه بينكم ؟؟؟؟؟

والله يسخره لج حبيبتي

الله يعينج

ماكو فرق ان 40 اهو 42 ما ابي امدح نفسي انا لو تشوفيني تقولين ما زلت بالعشرين بشهادته اهو وغيره ودايم يقول رقى نفسج ولا ابي ادخل بمدح نفسي وما عندنا الا ولد واحد اللى يخليه لي وعوضني خير

الله يعوضج خير يارب ويسخره لج ومايشوف غيرج حبيبتي

ولج بالمثل مع اني حبيت اقرى تعليقك لما سالتى عن العمر يمكن تكوني عارفه شغله تفيدني شوي انا مثل الغرقان الحين ابي حياتى تمشي بس التفكير اهو اللى مسيطر علي

الله يهديه ماخذ الدين ستار لأفعاله والله حز بخاطري هالشيء

خايف من الناس ومو خايف من ربه

ما ادري شقولج مالج إلا الدعاء الله يهديه