زوجي العصبي وحياتي معه

بنات أنا الحمد لله زوجي مو مقصر علي بشي ويحبني وايد بس عيبه عصبيته.صارلنا متزوجين 9سنين وعندنا 4عيال
بنات أنا اقولكم الصج ينرفزني بتصرفه وعيبه أن إذا صارت مشكله يمرر الموضوع جن شي ماصار وأنا مشكلتي أحس أن جرحني فأرد علية.وللاسف كبرت السالفة مرتين وأنا اللي خسرت فيها.طلقني اول مره قبل سنه وردني بنفس اليوم،وثاني مره قبل جم يوم واحنا نتكلم بالسيارة قلبها هوشه فقال بروح لاهلج عشان اعرف اشتبين انتي ورحنا وقعد مع أبوي وبعدها قال يالله تعالي أن طرح وأنا مادري اشيبي بابوي فقلت وأنا بالسيارة انت تشكيني عند أبوي ليش وكنت معصبه قلت كلام واهو يحاول يهديني بس مأكولات فايده فوقفنا عند البيت قلت أن دخلت بتكبر المشكلة فدخلني وكلمه مني ومنه طلبت الطلاق رفض بالأول بس بعد ما طفرته طلق وقلت ودني لأهلي ووداني.قطني عند الباب وراح واشوفه يمسح دموعه.أهلي حاولو يكلمونه إلا مسكر جهازه.فرديت من نفسي ثاني يوم إلا ماجى البيت اهو ويدق علي العيال يسال عني يأت أو لا. اليوم اللي بعده دزيت له مسج أقوله أني أبيه ومن هالكلام فرد بمسج وردني ورد البيت.وقال أن بيرضيني ويكلم أبوي يعتذرله لما ايي من السفر.المشكله صح أن ردني بس والله خايفه من الطلقة الثالثه.صج أن أنا اللي كنت طالبتهم قبل بس ما توقعت يطلق.قولولي بنات شاسوي وشلون ارد السعادة لعايلتي ولي بالذات لان احس ان ذليت نفسي بردتي وان مو اهو اللي رادني.وشلون اكسب ريلي وما خليه يفكر بالطلاق.صج ان معاملته زينه معاي بس انا من داخلي التفكير بيذبحني.ساعدوني بنات أبي أنقذ عايلتي ونفسي بمساعدتكم

هو مافكر بالطلاق انتي قلتي ان انتي اللي طلبتيه يطلقك امسكي لسانك وخلص واذا ع العصبيه اكيد موعصبي طول الوقت اكيد تجيه اوقات يصير عصبي انتي بهالحاله امسكي نفسك ولا تراددينه وبس بيهدى من نفسه كل الرجال كيذا ترا بس يبي لهم وحده تداريهم وتعرف متى تتكلم ومتى تسكت

الله يهداج بس

انتي اللي تكبرين السالفه وفوق هذا تطلبين الطلاق حاولي تمسكين نفسج لحظة الغضب

وبعدين مو على كل سالفه يلا طلقني عبالج الطلاق لعبه اإذا شفتي نفسج معصبه روحي توضيً وصلي ركعتين

انتي لا ذليتي نفسج ولا شيء هذا ريلج وابو عيالج مافيها شيء اذا قلتيله ردني واهو طلقج بلحظة غضب

الحياة الزوجيه فيها تنازلات وانتي تقولين ريلج معاملة زينه معاج وشكله يموت فيج مبين من (( دموعه ))

وبعدين خلي عنج التفكير والوساويس ترا كلها من الشيطان نصيحه لاتخسرينه

وعسى الله يوفقكم

مشكوره مناي والله بإذن الله بسوي بنصيحتج.صح أنا اللي غلطانه واعترف بس شاسوي بالشيطان.

أي والله ندمت قد شعر راسي اتمني الوقت يرد بس اعدل اللي سويته بس الحمد لله .وتوبه اطلب الطلاق انا شفت نفسي عليه يمكن عشاني شفته يحبني.بس خلاص حرمت اختبر حبه.مابي اخسره لوحده ثانيه.
المشكله طلع أن مادحني عند أبوي ومو شاكيني.والله الشيطان دخل بينا وأنا سمحت له

لاحول ولا قوة الا بالله العلي العظيم

الله يهداج ما في كلمة حلوة على لسانج غير الطلاق

للاسف احب اقولج انتي وحده ضعيفة بخبرة الحياة الزوجية عندج نقص وايد واكبر دليل اذا زوجج عصب بنفس الحزة تطلبين الطلاق

واحتمال انتى ما تعرفين مدى صعوبة الكلمة

قال رسول الله صلى الله عليه وسلم أيما أمراءه سالت زوجها طلاقا من غير باس فحرام عليها رائحة الجنه

معنى الحديث أن حتى لو تضحكين مع زوجج وتقولين له طلقني حرام شلون هذا وانتي تطلبين الطلاق !!!

ترا الكلمة قويه واسبابج الي تطلبين الطلاق فيها سخيفه ومو حلوه تعودين عليها

الله يهديج للصلاح

الله يهدينا ويهديك

اهم شي عرفتي غلطتك

والاهم تعرفين وش ينرفز زوجك
المرااادد

اتركيه لاتناقشينه الا اذا هداا

ولا تبين افضل حل
تفاهموا بالكتاابه وربي تصيرين ماتكتبين الا الشي السنع اللي لمصلحتكم

واتس او بالاوراق اي شي المهم لاتناقشينه وانت معصبه وتقولين كلام بلحظة غضي

ياعمري انتي معروف العصبي قلبه ابيض ومايروح بعيد ف انتي اذا شفتيه معصب سكتي عنه لاتناقشينه ومن يطخ تكلمي معاه بكل هدوء وفهميه تري العصبي اذا بتعصبين معاه ماراح تستفيدين شي بالعكس بردي قلبج واذا شفتيه عصب طلعي عنه ولاتسوين شي ينرفزه ومره اذا شفتي مزاجه عال العال ناقشيه بموضوع الاعصاب وانه لازم يهدي نفسه علشان حياتكم تمشي انتي ساعديه علشان اهوه يساعدج وان شاءالله اموركم تمشي من احلي مايكون وادعي دايم واستغفري وربي الاستغفار يهدي النفس ويخليج ريلاكس وعساكم دوم ريلاكس

بصراحة زييين سويتي رديتي لبيتج
وماطولتي السالفة
انت جدي سيطرة ع بيتج
وانت غلطانه مو حلوة كلمة طلقني

انتي الغلطانه !!!!!!!!!!!!

المفروض مهما تكبر المشاكل ماتوصل للطلاق !!!!!!!! خصوصا انتو كبار وتعرفون شنو يعني طلاق وبينكم اطفال !!!!!!!!

حتى لو عصبي انا ماا ارادد زوجي مااصارخ عليه مااكبر الموضوع اذا عصب علي اهده وامشي لانه هالشيء راح يهديه وراح يحس انه غلط عليج …… كلمه منج كلمه منه خلاااااااص بيطلقج الثالثه خلاص توبي من كلمه طلقني !!

ربي يسخره لج

قريت الموضوع مره ومرتين وقريت العنوان اكثر من مره
زوجي العصبي؟
الموضوع كله عليج :/
انتي تكبرين السوالف والحاره وتردين وتبين تطلقين والحاله حاله
حبيبتي لا تيبين سيرة الطلاق ترا قام يحطها اباله بسبتج ولي قلتيها بقول انا رخيص عندها وهي مومهتمه وو " عقول الرياييل عاد "
ديربالج ومسكي لسانج